မိစ္ဆာဒိဋ္ဌိ

ဟန်ႏနီꩻယို အခိုနီစွိုꩻ၊ အမူႏနီစွိုꩻ ထင်ႏစုလို့ဝင်ꩻ နီကျောင်ꩻငါ၊ အီတွမ်ႏနမ်ႏ ထမ်ႏတွမ်ႏနꩻကဲင်ႏဖုံႏ။ အခိုနီစွိုꩻနဝ်ꩻ - သူရိယစန္တာႏစွိုꩻတွမ်ႏ မနုဟာႏစွိုꩻ။ အမူႏနီစွိုꩻနဝ်ꩻ ယသောႏဓရာႏစွိုꩻတွမ်ႏ ဝိသာႏခါႏစွိုꩻ။ အစွိုꩻလစ်ꩻစွိုꩻလွုမ်း ထူႏလဲန်းခင်ႏလမ်း၊ အုံလဲန်း ပဉ်ရဲန်ႏရဲန်ႏ၊ တစဲန်ႏတဆီ၊ သူရိယစန္တာႏစွိုꩻနဝ်ꩻ အုံစူထွေဖဲ့ꩻ (ခꩻနဝ်ဖဲ့ꩻ) မဲ့ငါခွယ်ႏကွဉ်ႏ၊ လိုꩻငတ်ꩻဆီ။ နဝ်ꩻခꩻထင်ꩻနဝ်ꩻ ယသောႏဓရာႏစွိုꩻ လိုꩻလစ်ꩻဆီကွတ်ꩻဖြာꩻ၊ နဝ်ꩻခꩻထင်ꩻနဝ်ꩻ ဝိသာႏခါႏစွိုꩻ လိုꩻငတ်ꩻဆီ၊ နဝ်ꩻခꩻနဝ်နောဝ်ꩻ မနုဟာႏစွိုꩻ လိုꩻလစ်ꩻဆီကွတ်ꩻဖြာꩻ။ အစွိုꩻကတူႏသားနဝ်ꩻ ထူႏခင်ႏလမ်းနုဲင်းနဝ်ꩻထင်ႏထွူတဲင် နီဆရာႏဒေါ့ꩻဖေႏနီ ငေါဝ်းနုဲင်းယို- "တပဲ့ꩻသီးဖုံႏဟွေး- သူရိယစန္တာႏစွိုꩻတွမ်ႏ ယသောႏဓရာႏစွိုꩻနဝ်ꩻ ထင်ႏသဲ့ꩻကျောင်ꩻတလင်ꩻ၊ မနုဟာႏစွိုꩻတွမ်ႏ ဝိသာႏခါႏစွိုꩻနဝ်ꩻ ထင်ႏသဲ့ꩻဘုရာꩻတလင်ꩻ၊ တပဲ့ꩻသီးဖုံႏ အီႏမာꩻကြောင်းစင်ဗာႏ ကျောင်ꩻတလင်ꩻ၊ ဘုရာꩻတလင်ꩻနုဲင်းယိုနဝ်ꩻ အကျိုꩻတန်ငါႏ၊ သီကလွေꩻသဲ့ꩻဒါႏ သီသွို့ꩻနဝ်ꩻ သီစူပလဲင်ꩻမန်၊ သီကလွေꩻဝင်ဒါႏ သီခြံနဝ်ꩻ သီစူပလဲင်ꩻပွစ်ꩻ၊ ယိုနဝ်ꩻ ကုသိုလ်ႏထဲင်းဟ အခိုစွိုꩻတဲ့ နေးတွမ်ႏသꩻဖျူႏ၊ အမူႏစွိုꩻတဲ့ နေးတွမ်ႏသꩻဗွာ ယိုခါဆုဲင်ꩻတာႏ ယံချမ်ꩻသာႏ ပငါပရာꩻ ကျိုꩻစာꩻမာꩻလွသွော့နော" "မွေးဒျာႏ ဗွေႏအော်" "အစွိုꩻကတူႏဖုံႏနဝ်ꩻ လိုႏဒေါ့ꩻနုဲင်းမုဲင်ꩻတဲ့ ဒေါ့ꩻဟုဲင်း"ဆရာႏခွင်ꩻဖေႏနုဲင်းနဝ်ꩻတဲင်- စိန်ထွန်းဒေါ့ꩻနုဲင်းယို- "သွꩻရက် ရုဲင်းဖက်သီးဖုံႏဟွေး- နီအီႏထင်ႏသဲ့ꩻကျောင်ꩻတလင်ꩻတဲင် ကျောင်ꩻတလင်ꩻကိုနဝ်ꩻ မဉ်ႏမော့ꩻစိန်ႏစွော့ꩻ သင်္ကန်ꩻခဝ်၊ သပိတ်ခဝ်၊ လိတ်ပိဋကတ်ခဝ်ဖုံႏနဝ်ꩻ ဖွစ်ꩻရော်ꩻမွုန်းထာꩻအီႏ၊ တွမ်ထူႏခေါ်ခေါ်တဲင် ရိုႏရိုႏသေႏသေႏ လွေꩻအွဉ်ႏဒင်ႏဒျာႏ ထာꩻထိုထိုလောင်းနော" "မွေးဒျာႏအော်" နောဝ်ꩻထွူတွော့ꩻ ခွန်ကျော်ဒေါ့ꩻနုဲင်းယို- "သွꩻရက်ရုဲင်းဖက်သီးဖုံႏဟွေး- နီအီႏထင်ႏသဲ့ꩻ ဘုရာꩻတလင်ꩻတဲင် ဘုရာꩻတလင်ꩻကို မဉ်ႏမော့ꩻစိန်ႏစွော့ꩻ အွတ်ꩻယအွတ်ꩻခဝ်ဖုံႏ၊ မော်နမ်းယ မော်နမ်းခဝ်ဖုံႏ၊ သင်္ကန်ꩻယ သင်္ကန်ꩻခဝ်ဖုံႏနဝ်ꩻ တွမ်ထူႏခေါ်ခေါ်နေးတဲင် လွေꩻအွဉ်ႏဒင်ႏ ရိုႏရိုႏသေႏသေႏသွော့ ထာꩻထိုထိုလောင်းနော" "မွေးအော်" နောဝ်ꩻထွူတွော့ꩻ နင်ꩻဗိုလာႏ ဒေါ့ꩻနုဲင်းယို- "သွုန်ႏဗွာ သꩻဖျူႏ သွꩻမူႏသီးဖုံႏဟွေး- နီစွိုꩻလစ်ꩻစွိုꩻယို မွူးယာ နားရီႏတဆီပုဲင်တဆင်ႏခွယ်ꩻနဝ်ꩻ လွဉ်စုတရောပ်တန်ကို၊ အံႏသုံꩻဆောင်ႏဒဲန်ယာ၊ နီသွဉ်းသီး "ယသောႏဓရာႏ"စွိုꩻယိုနဝ်ꩻ ဗော့ꩻဖေႏဗာႏဒဲန်၊ အွဉ်ႏတံꩻဖေႏဗာႏ ဟန်ႏအိုဝန်ႏဖုံႏ၊ စောဖုံႏ၊ ဝန်ႏကျောင်ꩻနဝ်ꩻ ထူႏမွုန်း၊ အံႏသော့ꩻမွုန်း၊ တောင်ꩻနေဟောင်း" "တောင်ꩻဒျာႏဗွေႏအော်" နောဝ်ꩻထွူတွော့ꩻ နင်ꩻခံꩻဗွာ ဒေါ့ꩻနုဲင်းယို- "သွုံꩻဆောင်ႏ ဒဲန်ယာမဉ်ႏထွူနဝ်ꩻ နီ'ဝိသာႏခါႏစွိုꩻ'နဝ်ꩻ အံႏပသေဝါန်ႏဖုံႏ၊ စောဖုံႏ၊ ဖွိုင်ꩻဖုံႏ၊ ဒဲန်စျꩻဟန်ႏအိုစျꩻဖုံႏနောဝ်ꩻ ထောက်ꩻဝွေႏမွုန်း ကျောင်ꩻတလင်ꩻ၊ ထောက်ꩻသော့ꩻဗုံꩻကိုတဲင် လွေꩻထောက်ꩻညာꩻညာꩻဒျာႏ ကျောင်ꩻတလင်ꩻထန်ႏသူꩻ၊ သင်္ကန်ꩻယတဲ့နဝ်ꩻ၊ သင်္ကန်ꩻခဝ်တဲ့နဝ်ꩻ ဒွုတ်ꩻအီစူ၊ ဒွုတ်ꩻအီဝန်ႏ၊ အွဉ်ႏလင်ꩻအီဖွိုင်ꩻ လꩻတဝ်း၊ အပဲစ်တန်ငါႏ၊ လိုꩻကျောင်ꩻစူသွတ်ꩻဖုံႏနဝ်ꩻတဲ့ ဒွုတ်ꩻအီမွုန်းနော" "မွေးဒျာႏ ဗွေႏအော်" နောဝ်ꩻထွူတွော့ꩻ စိန်ထွန်းရိုꩻ- "လွေꩻတရဲန်ႏဝင်ꩻနီ၊ ဝင်ꩻနီဟုဲင်း၊ နမ်ႏဖုံႏ နꩻကဲင်ႏဖုံႏနဝ်ꩻ အွဉ်ႏဒင်ႏပြေင် အပင်စေႏ၊ ထမ်ႏလွေꩻနေး ပငါပရာꩻဟုဲင်း" ထွားနီလိုꩻစွိုꩻယိုနဝ်ꩻ နုဲင်းစွဉ်ႏစဲ့ꩻသားလွိုႏလွိုႏ၊ ကွပ်နဝ်ꩻမꩻ သေစ်ပျက်ထာꩻနုဲင်းယို- "စေႏ-ထွေ-စေႏ၊ စေႏ-ထွေ-စေႏ၊ စေႏ-စေႏ၊ ထွေ-ထွေ" "ဟား ဟား ဟား ဟား" နီမာꩻကုသိုလ်ႏယို ပျောႏမွေးစွဉ်ႏထာꩻ၊ ကွပ်တကာႏလိန်ႏမာႏ၊ ကွပ်ခိုခိုမူႏမူႏ လွောင်ႏဗူႏနုဲင်းယိုတဲင် နီဗွေႏဗွန် နီဗွေႏစင်ꩻတဲ့ သꩻခွꩻကဒဲ့ꩻ၊ ငပယွုမ်းယဲ့စွဉ်ႏထာꩻ" "ခွေမာꩻအာအာ ကုသိုလ်ႏတဲ့ ခွေလꩻအာအာဒျာႏ ကုသိုလ်ႏ"အွဉ်ႏသꩻနုဲင်းနဝ်ꩻ မာꩻပငါပရာꩻတဲင် မွူးပင်ꩻ နီနားရီႏပုဲင်မိနစ်နီဆီနဝ်ꩻ ထွူလဲန်း။ နီကတိန်ႏသဲင်ꩻတဲ့ သဲင်ꩻရဲန်ႏနေးလို့ဝင်ꩻ၊ နီမာꩻသဲင်ꩻပါတွမ်ႏငေါဝ်းတဲက်၊ ပျောႏမွေးစွဉ်ႏထာꩻ။ "နီလိုꩻအဝ်ႏလွို၊ သီအဝ်ႏလိုႏနယ်ဟွေး-ဟွေး" "နီလိုꩻအဝ်ႏလိုႏ၊ သီအောဝ်ႏလွိုနယ်ဟွေး-ဟွေး' မွိုးဖါဖူးဝေးဖုံႏ ထွားဆွုမ်ႏနီတဲင် ပယွုမ်းတရေꩻရဲ့စွဉ်ႏထာꩻ ပငါပရာꩻ။ (မာꩻစွဉ်ႏအမျိုꩻမုဲင်ꩻတယဝ်း မဉ်ႏမာꩻလွောင်ႏလွောင်ႏဗူႏဗူႏ ပျောႏပျောႏသွင်ႏသွင်ႏနဝ်ꩻ သꩻရေꩻပျောႏသွင်ႏ အောင်ႏမျင်ႏဗာႏနုဲင်းယိုဒျာႏရင်ꩻ။) သဲစ်နီကဖျော်သဲင်ꩻဒုံ အုံတပေါႏညတဝ်း ဟွုန်ဗာႏစွဉ်ႏငေါဝ်းအမင်္ဂလာႏ။ "ထံဗွော့ꩻ ထွန်ꩻဗယ်-တဲ့၊ အဖြောင်းတကွစ်ꩻထိုꩻစွဉ်ႏ-တဲ့" နီဒုံယိုနဝ်ꩻ "မောင်ႏကုဲင်"၊ "မောင်ႏလွင်ꩻ"၊ "ထွန်ꩻဗယ်"ဝွေꩻသီးဝင်ꩻသိုမ်ယိုနဝ်ꩻ ဒုစရဲက်သား၊ လိုꩻအကျင်ꩻတဟဝ်တဝ်းဖုံႏ၊ ကွဲႏတွော့ꩻ ယိုခါနဝ်ꩻ မောင်ႏကုဲင် မောင်ႏလွင်ꩻ ဝွေꩻသီးဝင်ꩻနီနဝ်ꩻတဲ သံႏဝွေႏဂလꩻတဲင် ဟဝ်ထိုꩻလဲန်း။ အဝ်ႏကုဲင် ထွန်ꩻဗယ်-ယိုနဝ်ꩻ နီကျမ်ႏဖျင်တဲ့ တလꩻတဝ်း၊ မဟာနီꩻနဝ်ꩻ နီတွိုင်ႏပင်ႏ အီႏထင်ႏသဲ့ꩻကျောင်ꩻတလင်ꩻ၊ ဘုရာꩻတလင်ꩻခရာႏနဝ်ꩻတဲ့ ဝွေꩻအဝ်ႏသေဒျာႏ၊ ဝွေꩻရိုꩻဒျာႏ- "ထင်ႏသဲ့ꩻကျောင်ꩻတလင်ꩻ၊ ဘုရာꩻတလင်ꩻနဝ်ꩻ ခရာႏကဲးထမုဲင်ꩻ၊ အကျိုꩻအဲန်ထဝ်း၊ လွေꩻလော်တခြာကိုနဝ်ꩻမꩻ မဉ်ႏလꩻထာꩻသောင်ꩻထာꩻသားယာႏနဝ်ꩻ အံႏဗာႏအွီႏကွပ်ထာꩻ"ဒေါ့ꩻမွိုက်တောဒျာႏထာꩻနုဲင်းနဝ်ꩻ။ ကွပ်ဝွေꩻထာꩻမွိုက်၊ ကွပ်ဝွေꩻဒုစရဲက်နဝ်ꩻတဲင် ဝွေꩻမော့ꩻဗာႏထာꩻဒုက္ခနုဲင်းယို ကရိုꩻနဝ်ꩻ ယိုတလဲင်ႏတဲတဲ့ ဝွေꩻသေစဲင်းစဲ့ꩻသွူမတောဝ်။ "တပဲ့ꩻသီးဖုံႏဟွေး- ဆရာႏကအီႏသွဉ်ဖေႏ ဟန်ႏနီꩻယိုနဝ်ꩻ ဒုစရဲက်အမုဲင်တဆီ၊ "မိစ္ဆာဒိဋ္ဌိ-ထာꩻယူႏမာႏ"ခရာႏ။ (မိစ္ဆာဒိဋ္ဌိ-ကရိုꩻနဝ်ꩻ "မာꩻစွဉ်ႏကုသိုလ်ႏတဲ့ အကျိုꩻတအဲန်ထဝ်း၊ မာꩻစွဉ်ႏအကုသိုလ်ႏတဲ့ အပဲစ်တအဲန်ထဝ်း"ထာꩻယူႏမာႏနုဲင်းနဝ်ꩻ။) လောကလိုꩻခမ်း အကိုယိုနဝ်ꩻ ပေါႏမာꩻထာꩻမာꩻဟဝ်၊ ပေါႏဒေါ့ꩻထာꩻဒေါ့ꩻဟဝ်၊ ပေါႏကျမ်ႏထာꩻကျမ်ႏဟဝ်နဝ်ꩻတဲ အကျိုꩻဟဝ်၊ အကျိုꩻချမ်ꩻသာႏ၊ အကျိုꩻခွꩻနဝ်ꩻ လꩻဗာႏဒျာႏရင်ꩻ။ ဥပမာႏ- တပဲ့ꩻသီးဖုံႏ ပျောႏပျောႏသွင်ႏသွင်ႏ စီႏရင်ႏခွုမ်မာꩻဒျာႏ အဟဝ်ဖဲ့ꩻ၊ ထီႏဘုရာꩻ တရာꩻ သံႏဃာႏ ဆရာႏမွိုးဖါတဲ့ အံႏသွင်ꩻဒျာႏ၊ ခမ်ႏနောမ်ꩻဒျာႏ၊ ရိုႏသေႏဒျာႏ၊ ယွုမ်းအံႏဒျာႏ၊ ဒါႏန သီႏလ ဘာႏဝနာႏတဲ့ ကားကနွောင်ꩻရာꩻ ကျိုꩻစာꩻထိုမ်ႏရွမ်ဒျာႏ၊ တပဲ့ꩻသီး သꩻချမ်ꩻသာႏတကားမုဲင်ꩻ၊ မာꩻတွိုင်ꩻအောင်ႏမျင်ႏ ပျောႏသွင်ႏတကားမုဲင်ꩻ၊ မဉ်ꩻအွီႏလွီးဟောမ် တကားမုဲင်ꩻ။ နီဗွေႏစင်ꩻပညာႏ၊ ထွန်းဖေ၊ အကျော်သီးဖုံႏနဝ်ꩻ ဝင်ꩻအာႏကွိုꩻတကားမုဲင်ꩻ၊ ဝင်ꩻရိုႏသေႏတကားမုဲင်ꩻ၊ သတင်ꩻအွီႏနွိုး အစွိုးစွိုးအဒေါဝ်ႏဒေါဝ်ႏ၊ ဂုဏ်ႏကျက်သရေႏ အဝ်ႏတကားမုဲင်ꩻ၊ ယိုနဝ်ꩻ အဟဝ်ဖဲ့ꩻ၊ သမ္မာဒိဋ္ဌိ-ထာꩻယူႏမဲန်ႏ၊ ထာꩻထီႏမဲန်ႏဖုံႏ။ အဝ်ႏကုဲင် မိစ္ဆာဒိဋ္ဌိဖဲ့ꩻ-ထာꩻယူႏမာႏဖဲ့ꩻ၊ ထာꩻထီႏမာႏဖဲ့ꩻနဝ်ꩻ အဝ်ႏနုဲင်းမုဲင်ꩻနဲတဲင်- ဥပမာႏ- မောင်ႏကုဲင်၊ မောင်ႏလွင်ꩻ၊ ထွန်ꩻဗယ်ꩻသီးဖုံႏနဝ်ꩻ ထီႏဘုရာꩻ တရာꩻ သံႏဃာႏ ဆရာႏမွိုးဖါတဲ့ အံႏသွင်ꩻတဝ်း၊ ခံႏနောမ်ꩻတဝ်း၊ ရိုႏသေႏတဝ်း၊ ယွုမ်းအံႏတဝ်း၊ ဒါႏန' သီႏလ' ဘာႏဝနာႏတဲ့ တမာꩻတဝ်း၊ ရိုꩻဒျာႏ အကျိုꩻအဲန်ထဝ်း။ တွိုႏဒုစရဲက် ထာꩻမာꩻဟဝ်တဝ်းမျိုꩻနဝ်ꩻ သမ်းမာꩻ၊ တွိုႏထာꩻဒေါ့ꩻ တဟဝ်တဝ်းနဝ်ꩻ သမ်းဒေါ့ꩻ၊ တွိုႏထာꩻကျမ်ႏ တဟဝ်တဝ်းမျိုꩻနဝ်ꩻ သမ်းကျံႏ-တဲ့။ ကွပ်ဝွေꩻသီး မာꩻထာꩻမာꩻကုဲင်၊ ထာꩻဒေါ့ꩻကုဲင်၊ ကျံႏထာꩻကျံႏကုဲင်တဲင် ဝွေꩻသီးလꩻဗာႏ အကျိုꩻကုဲင်၊ အကျိုꩻဒုက္ခ၊ အကျိုꩻလျား၊ ဝင်ꩻလွꩻထွား ဝင်ꩻလွꩻထီႏ၊ သွီႏရီႏအင်္ဂါႏကုဲင်၊ ဟုဲင်လုဲင်သွုမ်ꩻပျင်ႏ၊ ပျောႏသွင်ႏတဝ်းနုဲင်းနဝ်ꩻ၊ ဂုဏ်ႏလင်ꩻမဲ့ငါပေႏ၊ တရေႏကုဲင် မဉ်ꩻအွီႏတဝ်း ကရိုꩻနဝ်ꩻ အဝ်ႏထီႏဒျာႏတွမ်ႏမဲ့၊ စဲင်းစဲ့ဒျာႏ တွမ်ႏနား ပငါပရာꩻ။ ကွပ်နဝ်ꩻမꩻ "မိစ္ဆာဒိဋ္ဌိ-ထာꩻယူႏမာႏ"ယိုနဝ်ꩻတဲ့ ဒုစရဲက်တပါꩻနေနေ၊ ထာꩻယူႏမာႏမွုန်း၊ ပေါႏထာꩻယူႏမာႏနဝ်ꩻ ဘဝယိုခါတဲ့ မော့ꩻထာꩻဒုက္ခ၊ မဲ့ငါပေႏ တရေႏလင်ꩻ၊ ဝင်ꩻကဲ့ꩻရဲ့ꩻသဲ့ꩻသွမ်ꩻ၊ မဉ်ꩻအွီႏတဝ်း၊ လွီးဟောမ်တဝ်း။ ခန္ဓာႏကုဲင်လီ မဉ်ႏသီသူꩻတဲ့ လင်ꩻထဲ့ဗာႏငါးရုဲင်ꩻ၊ အဝ်ႏငါးရုဲင်ꩻမဉ်ႏထန်ႏ၊ မဉ်ႏသဲင်ꩻကွုတ်ယင်းလိုꩻပိုတဲ့ လꩻတဝ်းသွꩻဟဝ်၊ မာꩻဒျာႏအကုသိုလ်ႏ၊ ယွုမ်းတဝ်းဘုရာꩻ တရာꩻ သံႏဃာႏ၊ လိန်ႏမာႏတဝ်း၊ ဉာဏ်ႏအဲန်ထဝ်း၊ ကေန်ꩻခြောဒုက္ခ ဘဝလိုꩻခမ်း ထွာဗာႏလိုꩻညမ်းနုဲင်းနဝ်ꩻ။ ဖေႏနေး ထာꩻယူႏမာႏမွုန်းတဲင် နီဆရာႏ တဲမ်းဖေႏပါကဗျာနုဲင်းယို- + ထာꩻယူႏမစွို့ꩻ - တရွို့ꩻလွဉ်ꩻမာႏ ငါးရုဲင်ꩻထဲ့ဗာႏ - ချမ်ꩻသာႏကင်ꩻညာꩻ သဲင်ꩻကွုတ်ချာလိုꩻ - ကုဲင်မျိုꩻမာꩻဒျာႏ ယူႏမာႏမွုန်း - မဉ်ႏယွုန်း ကျင်ꩻဟဝ်ထွာ။ ကဗျာယိုတပွုတ် မဉ်ႏပြန်ႏငေါဝ်းရိုꩻရိုꩻနောဝ်ꩻ- (ထာꩻယူႏမဉ်ႏတစွို့ꩻတဝ်း၊ မဉ်ႏတရွို့ꩻလွဉ်ꩻမာႏနဝ်ꩻ လင်ꩻထဲ့ဗာႏငါးရုဲင်ꩻ၊ မဉ်ႏလင်ꩻထဲ့ငါးရုဲင်ꩻ၊ မဉ်ႏလင်ꩻခံႏဗာႏငါးရုဲင်ꩻသူꩻနဝ်ꩻ ထာꩻချမ်ꩻသာႏ အဲန်ထဝ်းတစိꩻစိꩻ၊ မဉ်ႏသဲင်ꩻကွုတ်ချာယင်းလိုꩻပိုတဲ့ မာꩻယင်းဒုစရဲက် အကုသိုလ်ႏ အကုဲင်မျိုꩻ၊ ကွပ်နောဝ်ꩻမꩻ ထာꩻယူႏတွမ်ႏမာႏမွုန်းသွော့၊ မဉ်ႏယွုန်းထိုꩻနဝ်ꩻ ထွာလိုꩻအကျင်ꩻဟဝ်) ပြန်ႏဗာႏနုဲင်းနဝ်ꩻ။ "တပဲ့ꩻသီး စွုမ်ႏဖြီးစွုမ်ႏဖြာꩻ ဖေႏနေးကထွာ လိုꩻအကျင်ꩻဟဝ်၊ ဖေႏနေးကထွာလိုꩻယံ ပငါပရာꩻနဝ်ꩻ ထာꩻယူႏတွမ်ႏမာႏမွုန်းတဝ်းနော" "မွေးဒျာႏ ဗွေႏအော်" "ကသွဉ်ဖေႏ တပဲ့ꩻသီး ဒုစရဲက်ပါꩻဆီတဲ့ လို့လဲန်းသွူယို"

ဒုစရဲက်ဆီပါꩻဖုံႏယို မဉ်ႏခွယ်ꩻနေး ကံႏသွံပါꩻနဝ်ꩻ

၁။ ပါဏာတိပါတာ - မာꩻသီဝင်ꩻသက် ၂။ အဒိန္နာဒါနာ - ထူႏတခွန်ꩻဝင်ꩻတခြိုꩻ ၃။ ကာမေသုမိစ္ဆာစာရာ - ပဲစ်မာႏဝင်ꩻပိုမာ ယိုသိုမ်ပါꩻနဝ်ꩻ ဟဲ့ꩻ"ကာယကံႏသွံပါꩻ"(နမ်းထာꩻမာꩻသွ့စွိုး)။ ၁။ မုသာဝါဒါ - ဒေါ့ꩻလဲန်ထာꩻ ၂။ ပိသုဏဝါစာ - အံႏစာဝင်ꩻမဉ်ꩻ ၃။ ဖရုသဝါစာ - ခွန်းဒေါ့ꩻ ငေါဝ်းကျံꩻထံꩻ ၄။ သမ္ဖပ္ပလာပ - ဒေါ့ꩻငေါဝ်းခွဉ်ႏဆေ့ꩻ ယိုလစ်ꩻပါꩻနဝ်ꩻ ဟဲ့ꩻ"ဝစီꩻကံႏလစ်ꩻပါꩻ"(ဖြောင်းထာꩻဒေါ့ꩻလစ်ꩻစွိုး)။ ၁။ အဘိဇ္ဈာ - မဲန်လꩻဝင်ꩻတခြိုꩻ ၂။ ဗျာပါဒ - ကျမ်ႏတကုဲင်ဝင်ꩻ ၃။ မိစ္ဆာဒိဋ္ဌိ - ထာꩻယူႏမာႏ။ ယိုသွံပါꩻနဝ်ꩻ ဟဲ့ꩻ"မနော်ꩻကံႏသွံပါꩻ"(သꩻထာꩻမာꩻသွံစွိုး)။ ကာယကံႏသိုမ်ပါꩻ၊ ဝစီꩻကံႏလစ်ꩻပါꩻ၊ မနော်ꩻကံႏသွံပါꩻ စုစုပေါင်ꩻ ဒုစရဲက် အပါꩻတဆီ။ နီသွဉ်းသီး ကသွဉ်ဒုစရဲက်ပါꩻဆီနဝ်ꩻ ထွူလဲန်းသွူတဲင် နီသွဉ်းသီး ကွဉ်းတော့ꩻဆရာႏ၊ နီဆရာႏ စင်ꩻပညာႏ ကျွꩻလွဉ်ဖေႏ ဩဝါဒနုဲင်းယို- "တပဲ့ꩻသီးဖုံႏဟွေး- ဗွေႏစင်ꩻတွမ်ႏ ဆရာႏခွန်ထွန်း ကသွဉ်ဖေႏ ဒုစရဲက်ပါꩻဆီနဝ်ꩻ ထွူလဲန်းသွူ၊ "ဒုစရဲက်"ကရိုꩻနဝ်ꩻ အကျင်ꩻဟဝ်တဝ်းနဝ်ꩻတဲ့ တပဲ့ꩻသီး သေဗာႏလဲန်း၊ ဒုစရဲက်သား လိုꩻအကျင်ꩻတဟဝ်တဝ်းသားနဝ်ꩻ မဲ့ငါပေႏ တရေႏလင်ꩻ၊ ဗွိုန်တဝ်းဝင်ꩻ မော့ꩻဒုက္ခ၊ တွိုႏဘဝခိုးလျား ကရိုꩻနဝ်ꩻတဲ့ တပဲ့ꩻသီး သေလဲန်း။ ကွပ်နဝ်ꩻမꩻ တပဲ့ꩻသီး စွုမ်ႏဖြီးစွုမ်ႏဖြာꩻ ဖေႏနေးကထွာ လိုꩻအကျင်ꩻဟဝ်၊ ဖေႏနေးကထွာ လိုꩻယံပငါပရာꩻနဝ်ꩻ မာꩻမွုန်းတဝ်း ဒုစရဲက်အပါꩻတဆီယို၊ ဒုစရဲက် အပါꩻတဆီယိုနဝ်ꩻ မတ်နုဲင်းစွဉ်ႏအေႏ၊ မတ်နုဲင်းစွဉ်ႏ မေႏအူတဲင် လဲ့ꩻညာꩻညာꩻ၊ သျောင်ႏညာꩻညာꩻသွော့။ ဝင်ꩻလင်တဲ့ ဖေႏနေးကသေကဒါႏ ဒုစရဲက်အပါꩻတဆီယိုနဝ်ꩻ အွဉ်ႏသꩻစေႏတနာႏဟဝ်ဟဝ် သွဉ်တောတောဖေႏသွော့၊ လိုꩻတွိုင်ꩻစွုမ်ႏဖြာꩻ ဖေႏနေးကထွာ လိုꩻအကျင်ꩻဟဝ်၊ ဖေႏနေးကထွာလိုꩻယံ ပငါပရာꩻနဝ်ꩻ ကျိုꩻစာꩻဖေႏသွော့နော။ တပဲ့ꩻသီး ကားကအဝ်ႏ ခြွိုင်ႏသန်ꩻပျောႏသွင်ႏ အောင်ႏမျင်ႏလွသွော့ ပငါပရာꩻနော"။ "သာႏဓု-သာႏဓု-သာႏဓု"

ပေႏခါကာႏ လိန်ႏမာႏမွေးခါꩻမꩻ

ယိုခါ လိုꩻတန်သီးဖုံႏ ကအဝ်ႏထမ်ႏဒါႏ တာႏဝွန်ႏအမျိုꩻမျိုꩻဖုံႏနဝ်ꩻ တွိုႏတနီꩻခါမဲ့ꩻ အီႏလင်ꩻအောဝ်ႏဒင်ႏ လိုꩻပေႏသီး၊ လိုꩻယွဲးသီးပြေင်လောင်း။ ကွပ်နဝ်ꩻမꩻ မူႏပေႏ၊ မောင်ႏပေႏသီးဖုံႏ၊ မူႏနံꩻယွဲ ခိုဗင်ႏယွဲးသီးဖုံႏနဝ်ꩻ အဝ်ႏလိုႏလိန်ႏမာႏသေꩻခါꩻ ပေႏခါကာႏ။ ("ထာꩻလိန်ႏမာႏယို အဝ်ႏလိတ်ကို"ရိုꩻနုဲင်းနဝ်ꩻတဲင် သွဉ်လိတ်မꩻ လိန်ႏမာႏ) မဉ်ႏလိန်ႏမာႏသေꩻခါꩻ ပေႏခါနဝ်ꩻမꩻ တွိုႏမဉ်ႏတန်သူꩻနဝ်ꩻ အီႏယံအီႏသေႏချာႏ၊ ပေါႏတလိန်ႏမာႏတဝ်း (ပေါႏတသူႏသေတဝ်း၊ ပေါႏတဒါႏတဝ်း)နုဲင်းနုဲင်းဝင်ꩻနဝ်ꩻ ပေါင်တယ်ႏခမ်း၊ မာꩻခန်းထာꩻမာꩻအမျိုꩻမုဲင်ꩻတယဝ်း ကံႏညံးထိုꩻဒါႏ (ထာꩻမာꩻ တအောင်ႏမျင်ႏတဝ်း)။ လိုꩻပေႏသီး ခမ်းထီတွက်တာႏ ယံဖေႏနေး ကသေႏချာႏ၊ ယံဖေႏနေးကဟဝ်၊ ယံဖေႏနေး ကစီꩻပွါꩻ၊ ယံဖေႏနေး ကတိုꩻတက်နဝ်ꩻ တစိုးသက် နေးလွဉ်ꩻဗာႏ နီဘာႏသာႏယိုနော။ တွမ်ႏမာꩻမွုန်းတဝ်း အကျင်ꩻသောက်သဲက် ဒုစရဲက်နဝ်ꩻနော။ ခြွိုင်ႏသန်ꩻပျောႏသွင်ႏ အောင်ႏမျင်ႏလွသွော့။ စင်ꩻတန်သီႏသဲင်ႏ (၁၃/၄/၈၇)