ယံꩻလူးစေကြန်ႏ နီပအိုဝ်ႏဟံႏ

"ယံꩻလူးစေကြန်ႏ ပအိုဝ်ႏဟံႏ" နီပအိုဝ်ႏလိုꩻမျိုꩻ တယ်ႏစွဉ်ႏသထွုံႏခမ်းထီ ပြုဲင်ပြင်ꩻ(၁၁)ရျာꩻဗူႏခေါင်ꩻကို ဗꩻတွိုႏလွဉ်(၂၀)ရျာꩻဗူႏခေါင်ꩻ နေင်ႏပေါင်ꩻတရေင်ဗော့ꩻဗော့ꩻယို ဗွိုန်ပီစွဉ်ႏ ဖိုးအေႏသဲင်အောဝ်ႏတခြွဉ်ႏထီခိုႏကီအတွိုင်ꩻ ဘဝတုံပေါ်သော့ꩻဒျာႏ မဟာႏလိုꩻမျိုꩻ ထီတဒူကိုတဲင် လိုꩻမျိုꩻအီႏထိုꩻမားတမွာမွာစွဉ်ႏ ဘဝနုဲင်းစွဉ်ႏထာꩻဗေင်ႏမင်းနောဝ်ꩻသွူ။ ထွိုင်ႏတွိုႏလွဉ်စွဉ်ႏ ပထမကမ္ဘာႏစဲ့ꩻ ဒုတိယကမ္ဘာႏစဲ့ꩻတွင်ꩻကာႏလကိုမꩻ နီပအိုဝ်ႏသွိုန်ႏထီဗွေသား ပါႏရမီႏဖြားအာႏဇာႏနီႏယံ ရက်ခွိုꩻသွီႏသန်ပုဂ္ဂိုလ်ႏဖုံႏ စွိုးခွိုꩻရေꩻမဲ့နား၊ ခမ်းထီရေꩻမဲ့နား ကွဲဗွောင်လွဉ်ခန်း တလဲင်ႏတစိꩻစိꩻနောဝ်ꩻမꩻ အွဉ်ငါပိုလီꩻ လွောင်ႏဗူႏလွေꩻခန်း အစွုမ်ꩻစွိုꩻတွော့ꩻ တွူႏတရန်ထန်ႏလွဉ်စခန်း ပအိုဝ်ႏကံႏကျမ္မာႏညံးဖုံႏတဲင် ခွိုꩻပအိုဝ်ႏဘဝ ကွဲတတဲက်ꩻဆားမွန်ဗွန်လွဉ်ချာယင်း နုဲင်းဟန်ႏနီꩻယိုနောဝ်ꩻသွူ။ ဂျူးလိုꩻမျိုꩻနောဝ်ꩻ နေင်ႏပေါင်ꩻနီရေင်လွို လိုꩻမျိုꩻထိုꩻမား၊ ဘာႏသာႏထိုꩻမား၊ ခမ်းထီထိုꩻမားတဲင် အုံစွမ်ႏညီꩻဗာႏရောဝ်းကြွို့ꩻဝင်ꩻတွော့ꩻ အောဝ်ႏလွင်းပေႏဆားဗာႏသေႏသေႏစွဉ်ႏထာꩻ၊ တခမ်းထွူတခမ်း အောဝ်ႏလွင်းလွေꩻငါငါ ဟံႏတန်လောင်းဘို ခံႏဗာႏဝင်ꩻအံႏနွောင်ꩻတေက်ꩻနျꩻအာလွိုဝင်ꩻ လိုꩻမျိုꩻတမျိုꩻနောဝ်ꩻသွူ။ ဝွေꩻသီးလိုꩻမျိုꩻနောဝ်ꩻ ကတူႏခီးတန် ထာꩻသေဉာဏ်ႏထင်ငါႏတဲင် ပထမကမ္ဘာႏစဲ့ꩻတွင်ꩻကာႏလ ဝွေꩻသီးတွိုႏလွေꩻအာမေရိကတွိုက် အမေႏရိကန်ႏလိုꩻခမ်းကိုတဲင် အမေႏရိကန်ႏ ထွိုင်ႏသေထွꩻပါꩻလိုꩻမျိုꩻယို ကတူးခီးဆꩻငါႏအကျောင်ꩻနောဝ်ꩻ နေက်စက်အံႏနွောင်ꩻတောဝ်းဝွေꩻသီး၊ ရက်ဆွုမ်ႏရောင်ထဲင်းဝွေꩻသီးတွော့ꩻ အမေႏရိကန်ႏစေ့ꩻထန်ႏလုဲင်ႏ ဝွေꩻသီးကတူႏခီးဉာဏ်ႏတဲင် ထွဉ်ႏထွင်ႏလွဉ်ခန်းစူခွုမ်ခြွိုင်းခြိုꩻ အစွိုးစွိုးအဒေါဝ်ႏဒေါဝ်ႏနောဝ်ꩻမꩻ ထွိုင်ႏတွိုႏလွဉ် ဒုတိယကမ္ဘာႏစဲ့ꩻတွင်ꩻနောဝ်ꩻ အမေႏရိကန်ႏစာအံႏလုဲင်ႏ ဝွေꩻသီးကထွင်ႏခါꩻဒါႏ စူခွုမ်ခြွိုင်းခြိုꩻဖုံႏနောဝ်ꩻတွော့ꩻ အမေႏရိကန်ႏခမ်း ထင်ႏထိုတသွောင်းစွဉ်ႏတအာႏချင်ꩻနောဝ်ꩻသွူ။ ဒုတိယကမ္ဘာႏစဲ့ꩻ ကထွိုင်ႏထွူနောဝ်ꩻ အမေႏရိကန်ႏ ထေဖေႏလုဲင်ႏဝွေꩻသီး အနီꩻအရင်ꩻတဲင် ထွဉ်ႏတယ်ႏထောင်ႏချာ ခမ်းထီတဖြုံႏတွော့ꩻ ယိုခါ လꩻလွဉ်လဲဉ်း အစ္စရေးနဲင်ႏငံႏ၊ အစ္စရေးခမ်းထီနောဝ်ꩻသွူ၊ နီပအိုဝ်ႏလိုꩻမျိုꩻယိုလဲ့ ခမ်းထီထိုꩻမား၊ လိုꩻမျိုꩻကဖင်းဗာႏထာꩻ၊ ကခံႏဗာႏငါႏဝင်ꩻအံႏနွောင်ꩻတေက်ꩻနျꩻ၊ ကအုံစွမ်ႏဗာႏဝင်ꩻယို နေင်ႏပေါင်ꩻကွတ်ꩻရျာꩻလွိုလဲဉ်း၊ မဉ်ထွာထဲင်းဝင်ꩻသွဉ်နဲ့၊ မဉ်တယ်ႏထောင်ႏချာခမ်းထီတသာနဲ့ကရိုꩻနောဝ်ꩻ။ မီႏမဲဉ်လꩻချာခမ်းထီတသာလဲ့ စွုမ်ႏဖြာꩻလွူးဗာႏသꩻရက်ခွိုꩻမꩻ၊ လွောင်ႏဗူႏမꩻ၊ စွုမ်ႏဖြာꩻထာꩻသေဉာဏ်ႏဖေႏကဆꩻနောဝ်ꩻ ကျိုꩻစာꩻမꩻ၊ ကလꩻလဲဉ်းဒါႏ ခင်ႏလမ်းအုံသော့ꩻတာႏ ဟံႏယာႏဖုံႏနောဝ်ꩻ စာအံႏထိုꩻမွိုန်းမꩻ၊ လိုꩻမျိုꩻဖေႏကအာ ယားမွိုန်းပိုမꩻ၊ စဲ့ꩻရေꩻအထီအသွီႏ၊ စဲ့ꩻရဲင်ꩻအာႏဖေႏတလာနောဝ်ꩻ မူထင်မꩻ လိုꩻပေႏသက်(၁၈)မာꩻလ အွဉ်ႏလွင်ꩻပျင်ႏမွိုန်းထာꩻမာꩻ စတဲင်အခရာႏနုဲင်းယိုဖုံႏ အောဝ်ႏလိုႏပွိုင်ရဲဉ်ꩻသေꩻခါꩻငါႏနောဝ်ꩻသွူ။ တယ်ႏခမ်းထီ လꩻလွစ်တခြင်ရေꩻ မာꩻလွဉ်ယို ဗꩻစွဉ်ႏခါးလား ကထူႏငိမ်ꩻချံꩻရေꩻ နေင်ႏပေါင်ꩻလစ်ꩻငတ်ꩻသူဆီကို နီပအိုဝ်ႏဟံႏနယ်ႏ၊ ဒုံဆောင်ႏဆꩻကီ ယံꩻလူးအောဝ်ႏဒို့ꩻခေ့ꩻကရစ်ꩻထံစွဉ်ႏ၊ ကောင်ရွေꩻသွမ်ႏလောင်းလဲ့ ထုံမောင်းငေါဝ်းလဲင်ꩻအီႏယေဉ်တမွာမွာ၊ ဒုံခြင်ꩻခါႏထော့ꩻဆျာ ဖိုးပနားပေႏငါ လဲင်ꩻထွာလို့ဒျာႏ ဝင်ꩻထာꩻအံႏပျင်ႏ၊ ပေါႏတနတ်ငေါဝ်းသင်ႏ တလဲင်ႏလဲင်ႏလဲ့ ဗာႏတံႏ၊ ဗာႏခွဉ်း၊ ဝင်ꩻလဲ့အံႏဒုံဆောင်ႏ၊ ကျောင်ꩻကန်ႏလဲ့ တွက်လဲင်ꩻတခိꩻဒွုမ်နောဝ်ꩻသွူ၊ တွင်ꩻနောဝ်ꩻကာႏလ ပအိုဝ်ႏဘဝယို ဗွိုန်ပီစောက်ꩻအာႏအံႏအဆာႏအတွိုင်ꩻ အံႏကီဒဲဉ်လဲ့ နားယို အောဝ်ႏနာႏပါဗာႏစွဉ်ႏ ပါꩻတလေးငေါဝ်း အစောဝ်းအလေ အခေ့ꩻလဲင်ꩻတသေဒွုမ်၊ ပအိုဝ်ႏဒုံစွဉ်ꩻလူႏလွေꩻဖေႏ အဖြုံႏပေါင်ꩻ တွက်လဲင်ꩻသူႏသေဒွုမ်နောဝ်ꩻသွူ။ ၁၉၉၁-ဗာႏ၊ ဧပြီလာကို (P.N.O)အွဉ်ငါ ဖြားတန်စင်ꩻဖါအောင်ႏခမ်းထီတွမ်ႏ သွꩻဟောဝ်ထာꩻမာꩻဖက်စွိုꩻ ထွိုင်ႏထူႏလွဉ် ငိမ်ꩻချံꩻရေꩻနောဝ်ꩻမꩻ နီပအိုဝ်ႏဒုံဆောင်ႏရပ်ရာႏဆꩻကီ ယံꩻလူးကအောဝ်ႏလီဗာႏဒါႏထာꩻယို ကွဲစေခြီ တကြန်ႏလွဉ်ယင်း တလဲင်ႏတစိꩻစိꩻတွော့ꩻ ဗꩻတွိုႏထံဟန်ႏသတနီꩻယို ပအိုဝ်ႏဘဝကွဲမွန်ဗန် ပြွူႏဖြိုလွဉ်ချာယင်းနောဝ်ꩻသွူ။ ပွိုးစွဉ်ႏအွဉ်ငါစွိုးခွိုꩻဒါႏ ဖြားသီးကေꩻဇူꩻတရာꩻတဲင် နီပအိုဝ်ႏရပ်ရာႏ ကလွိုင်ႏကွိုန်ꩻသာႏယာႏဗာႏနုဲင်းဟန်ႏနီꩻယို နီပအိုဝ်ႏဖုံႏ ဟောဝ်အွဉ်ႏတဖေင်ꩻတောဝ်း၊ ထွာအီငါႏ နီပအိုဝ်ႏသမဲင်ꩻယံ အတန်လွိုသွတ်ꩻတဗာႏနေနေတွော့ꩻ ပအိုဝ်ႏစွုမ်ႏဖြာꩻ လိုႏသေခါꩻငါႏဝင်ꩻ ပငါပရာꩻနောဝ်ꩻသွူ။ ထွားနုဲင်းလွဉ်ꩻဖြားတန်သီးထာꩻမာꩻ တဖူꩻရဲဉ်ႏ၊ သꩻဓာတ်သွိုန်ႏထီတဲင် ပအိုဝ်ႏစွုမ်ႏဖြာꩻ လိုႏလွူးငါႏဝင်ꩻ၊ သꩻရက်စွိုးခွိုꩻပငါပရာꩻတွော့ꩻ နီခေတ်နီစွိုး နီအစုပ်ယို ဖေႏကတယ်ႏထောင်ႏလꩻချာ စွိုးခွိုꩻခမ်းထီနောဝ်ꩻ အောဝ်ႏလိုႏအုံသွီႏခွꩻမွိုန်းတောဝ်းဝင်ꩻ၊ အောဝ်ႏလိုႏရက်ဝင်ꩻ၊ လွောင်ႏဗူႏဆွန်ꩻဝင်ꩻစူတွော့ꩻ အွဉ်ဝင်ꩻဒဲ့ꩻထူႏရောင်ခန်းသွော့ဝင်ꩻ စွိုးခွိုꩻခမ်းထီအကျောင်ꩻ။ နမ်းသꩻနီပါꩻယံချံꩻသာႏ၊ ရက်ချာဗဲင်းဝင်ꩻခွိုꩻ ပငါပရာꩻတွော့ꩻ ယံထင်ႏမော့ꩻခွဲဗာႏခန်းဝင်ꩻ အွိုးပအိုဝ်ႏဟော်နန်ꩻဗိမာန်ႏလောင်းအကျောင်ꩻ ဆုတောင်ꩻမင်္ဂလာႏထွူတဲင်-