လိတ်ဖေႏတကာႏမမွိုး
"လိတ်ဖေႏချာ တကာႏမမွိုး" တကာႏမမွိုး- တကာႏမမွိုး ကကပ်ယောင်းလွဉ်ဒါႏလိတ်နောဝ်ꩻ ပိုခိုသျင်ႏယို ကထင်ႏဟော်ꩻဖတ်ထွားဆွုမ်ႏဗာႏတဲင် သေဗာႏအခရာႏအကျောင်ꩻတွော့ꩻ သꩻရေꩻငါႏ မရေႏမရာႏ၊ တကာႏမမွိုး ဒါႏလဲဉ်းလိတ်၊ တကာႏလုံဖါ အွꩻတောဝ်းဒွုမ်ဒေါဝ်၊ တောႏတောတ်းဒွုမ်ထာ၊ သေမာꩻသေခွုမ်လဲဉ်းကရိုꩻနောဝ်ꩻ ဟွိုန်ဗာႏတဲင် ပိုခိုသျင်ႏယိန်းသꩻရေꩻ၊ အာႏလꩻငါႏ မရေႏမရာႏသွူ။ ပိုခိုသျင်ႏတဲ့ တွိုႏတနီꩻခါ ယံကထွာ ပုဂ္ဂိုလ်ႏဒါႏတပါꩻ၊ ယံကမာꩻနွောင်ꩻ သာႏသနာႏအကျိုꩻ၊ စွိုးခွိုꩻအတာႏနောဝ်ꩻ အောဝ်ႏကျိုꩻစာꩻသွဉ်ဒျာႏ ဉာဏ်ႏပညာႏ၊ ရေႏဖေႏနေးကအောင်ႏလꩻ ဓမ္မာစရိယ၊ ကျောင်ꩻတွိုက်စီꩻကန်ꩻတွမ်ႏ ဆရာႏသမာꩻသီး အဆွုံꩻအမꩻငေါဝ်းဟောဝ်ငွါဒါႏဖုံႏယိုတဲ့ ပိုခိုသျင်ႏယို အောဝ်ႏနေးထူႏလွောက်ꩻနာႏလွဉ်ꩻဒျာႏ၊ ထီႏဆရာႏတဲ့ အံႏသွင်ꩻဒျာႏ။ ဗွေႏဆရာႏသီးဖုံႏ ရက်တပဲ့ꩻ၊ ရက်တကာႏ/တကာႏမတကားမုဲင်ꩻ၊ တပဲ့ꩻသီးတာႏ တကာႏ/တကာႏမသီးအတွက် ဆောင်ႏရွက်ခွုမ်မာꩻဖေႏတကားမုဲင်ꩻ၊ ဘာႏသာႏရေꩻတာႏ၊ သာႏသနာႏရေꩻတွက် နစ်သက်ယွုမ်းအံႏ၊ ခံႏယပ်ꩻအွဉ်ငါ သောင်ႏသာလွေꩻဖေႏ တကားမုဲင်ꩻကရိုꩻနောဝ်ꩻ ပိုခိုသျင်ႏအောဝ်ႏသေဒျာႏ၊ အောဝ်ႏယူႏလꩻသေႏသေႏဒျာႏသွူ။ မွိုးကလွူးနီ အွိုးပေႏခါ၊ ဖါကလွူးနီ အွိုးပေႏတွင်ꩻနောဝ်ꩻကာႏ ဗꩻတွိုႏစွဉ်ႏယိုခါ မွိုးဖါသီး ကအုံတင်းယာခိုးယာလျား၊ ခမ်းလော့ခမ်းစောဝ်ႏ လူးသီးလူးသိုꩻ ထုမ်ႏကျမ်ႏယပ်ꩻဗာႏ တကားမုဲင်ꩻ၊ ပိုဖုံႏ ဒါႏလꩻငါပညာႏငါ မွိုးဖါဆꩻချာနောဝ်ꩻ ခံႏဒုက္ခတေား တကားမုဲင်ꩻကရိုꩻနောဝ်ꩻတဲ့ ပိုခိုသျင်ႏ အောဝ်ႏသေဒျာႏသွူ။ ကွပ်ပွိုး အောဝ်ႏသေထီႏထွꩻ၊ ယူႏလꩻဗွေႏသီးကျေꩻဇူꩻ၊ မွိုးဖါသီးကေꩻဇူꩻနုဲင်းနောဝ်ꩻတဲင် ပိုခိုယို အုံလိန်ႏလိန်ႏမာႏမာႏဒျာႏ၊ ကျိုꩻစာꩻဒျာႏပညာႏ၊ ရွဉ်တဲ့ ထွားချင်းစုဲင်ႏဒျာႏ၊ လိတ်သွဉ်သားဘဝတဲ့ ခံႏယပ်ꩻဗာႏကရိုꩻနောဝ်ꩻ ပိုခိုအောဝ်ႏသေဒျာႏ၊ ဆရာႏသမာꩻသီးတဲ့ အောဝ်ႏဆွုံꩻမꩻခွိုꩻခွိုꩻ၊ ထာꩻမွန်းပျောႏ ထာꩻလော်လယ်ႏဖဲ့ꩻယို ပိုခိုတစွယ်ꩻတောဝ်း။ နီတကာႏမမွိုး ကသွဉ်အတွိုင်ꩻ ပိုခိုသျင်ႏ အုံအောဝ်ႏဒေါ့ꩻဖြောဝ်ႏလိုꩻကျောင်ꩻဒျာႏထာꩻ၊ ဖေႏနေးကဗꩻလꩻစင်ꩻတဲ့ ပိုခိုသျင်ႏ အာႏမခံႏဒျာႏ တကာႏမဟွေး၊ အွဉ်ႏပယွိုမ်းသေꩻမꩻခန်းလွိုးနော၊ ထွူတခါႏက- တလမ်းလုမ်း ယံအုံဟောဝ်အောဝ်ႏသန်ꩻ ချမ်ꩻသာႏလွသွော့နော။