လိုꩻယွဲးတွမ်ႏဘာႏသာႏရေꩻ
"လိုꩻယွဲးတွမ်ႏဘာႏသာႏရေꩻ" ဘာႏသာႏရေꩻ-ကရိုꩻနဝ်ꩻ ကနပ်ဖြားဒါႏပုဂ္ဂိုလ်ႏတဖြာꩻ ယူႏစဉ်ꩻစာꩻ ပွိုင်းဝွို့တွမ်ႏအမဲဉ်ႏတရာꩻ၊ နမ်းမော့ꩻအနေႏ ကံကျင်ꩻအားထုတ်လွဉ်ꩻမွေး၊ ခြိꩻတဲက်တွမ်ႏ အခွဲးအကျုံႏတဲင် ဆင်ႏချင်ႏစဉ်ꩻစာꩻလွေꩻ၊ တွမ်ႏယုတ္တိဗေဒဥပဒေသအလွောက်ꩻ အွဉ်ႏထွော့တွမ်ထူႏချက်ဖုံႏထွူတဲင် နမ်းကမော့ꩻဒါႏ တရာꩻဓမ္မဖုံႏယို သွဉ်သင်ဆုံꩻမꩻ' ဟော်ꩻခြုဲင်းဖေႏ လိုꩻဆုဲင်ꩻသားတွော့ꩻ ပေါႏထွာလွဉ်ဗာႏ ဘာႏသာႏရေꩻအမျိုꩻမျိုꩻနဝ်ꩻသွူ။ ဘာႏသာႏ-ကရိုꩻနဝ်ꩻ ထွာဒျာႏ ငဝ်းငွါ၊ ဓလေ့ꩻ၊ ထုံꩻစံႏ၊ အယူႏဝါႏဒ ပညာႏတမျိုꩻ -အဓိပ္ပါယ်ႏလꩻနုဲင်းနဝ်ꩻသွူ၊ ဘာႏသာႏတရာꩻနဝ်ꩻ ထွာဒျာႏ ထာꩻယွုမ်းအံႏကိုꩻကွယ်ႏ အယူႏဝါႏဒတန်သွူ၊ ကထင်ႏသျာꩻလွဒါႏ ဘာႏသာႏတန်လစ်ꩻမျိုꩻဖုံႏနဝ်ꩻ ဟိန္ဒူဘာႏသာႏ၊ ဗုဒ္ဓဘာႏသာႏ၊ ခရစ်ယာန်ႏဘာႏသာႏတွမ်ႏ အစ္စလာမ်ဘာႏသာႏဖုံႏနဝ်ꩻသွူ။ ဘာႏသာႏတရာꩻတွိုင်ꩻနဝ်ꩻ ဆုံꩻမꩻလွဒျာႏ ယံကမာꩻထာꩻဟဝ်လွုမ်ꩻလွဉ်းလွဉ်း၊ ယီးထွဉ်ႏအွဉ်ႏနယ်လွဒျာႏ ဖေႏကဟဝ်အီ ဖေႏကဟဝ်တာႏလွုမ်ꩻကွေႏကွေႏသွူ၊ ဖေႏကမာꩻသီ' ဖေႏကယားကုဲင်' ဖေႏကရွိုင်ꩻစွိုင်ꩻနဝ်ꩻ ဘာႏသာႏမုဲင်ꩻခန်းတဲ့ယဝ်း တယီးနယ်' တတမာတဝ်းနဝ်ꩻသွူ။ ဘာႏသာႏကားကအဝ်ႏဖုံႏ ယီးထွဉ်ႏအွဉ်ႏနယ်လွဒျာႏ တွမ်ႏထာꩻစာႏနာႏ' ဖေႏကအွဉ်ႏဒါႏမေတ္တာႏ တဖူꩻမဲဉ်ႏနုဲင်းနဝ်ꩻလွုမ်ꩻသွူ၊ မဉ်ႏလွူꩻထွားတဲက်ခြိꩻ ဘာႏသာႏတန်ကီယိုလစ်ꩻမျိုꩻနဝ်ꩻ ထာဝရဘုရာꩻအဝ်ႏ/တအဝ်ႏတဝ်း၊ ဖန်းဖြယ်လက်ခံႏ အတ္တတွမ်ႏအနတ္တ၊ အယူႏအတွေꩻ ပွိုင်းဝွို့တွမ်ႏ ကလွစ်ထန်ႏဒါႏ အမတစခန်ꩻ အထျꩻထျꩻ ကွာႏခေါ်ကွာႏလွိုဒျာႏကွို့ꩻ သိုမ်မျိုꩻလွုမ်ꩻနဝ်ꩻသွူ။ ငဝ်းငွါအသုံꩻအနုံꩻ ကွာႏခေါ်လွစွဉ်ႏလဲ့ အကဲဉ်အဗဲ့ꩻနဝ်ꩻ ဗိုန်လွဒျာႏဝင်ꩻသွူ၊ အထျꩻထျꩻနဝ်ꩻ ထွာဒျာႏတရာꩻယီးထွဉ်ႏအွဉ်ႏနယ်ဖေႏ တရာꩻကဆဲင်ႏတွမ်ႏလိုꩻပေႏသီး ဖေႏနေးလောကီꩻကစီꩻပွာꩻဖုံႏဒျာႏသွူ၊ ဘာႏသာႏတရာꩻကရိုꩻနဝ်ꩻ ဖေႏနေးပစ္စုပ္ပန်ႏ ကချမ်ꩻသာႏကလွိုင်ႏကွုန်ꩻ အဝ်ႏလိုႏလွောက်ꩻနာႏ ယီးထွဉ်ႏနယ်တဖူꩻအဝ်ႏအတွိုင်ꩻ ကယီးထွဉ်ႏအွဉ်ႏနယ်ဖေႏဒါႏ အနာႏဂတ်တာႏ ယံချမ်ꩻသာႏအီ၊ ဖေႏကလွစ်ထန်ႏလꩻအီ သံႏသရာႏ-စတဲင်လဲ့ အဝ်ႏဒွိုန်းကဒျာႏနဝ်ꩻသွူ။ လိုꩻယွဲးသီးတာႏ လွောက်ꩻနာႏပစ္စုပ္ပန်ႏ တရာꩻကစီꩻပွာꩻလွိုင်ႏကွုန်ꩻနဝ်ꩻ ထဲ့မဲဉ်ႏမွေးထွူတဲင် လိုꩻတလောင်ꩻသီးအတာႏ လွောက်ꩻနာႏဒျာႏ တဖူꩻယီးထွဉ်ႏအွဉ်ႏနယ် ယံကဖျင်ဆင်သေꩻခါꩻနွောင်ꩻအီ အနာႏဂတ်တာႏနဝ်ꩻ မဲဉ်ႏတနꩻမွေးစွဉ်ႏ တဘာဝနဝ်ꩻသွူ၊ ဘာႏသာႏတွိုင်ꩻအကိုနဝ်ꩻ အံႏအော်ခရာႏ ကပိုန်းကယ်ꩻထဲင်းသဘာဝဖုံႏလဲ့ အဝ်ႏဗွေဗောႏဒျာႏသွူ။ ဘာႏသာႏတရာꩻနဝ်ꩻ ကမ္ဘာႏမဲ့ဆꩻအတာႏမွေးတဝ်း ထွာဒျာႏလောကုတ္တရာႏအတာႏဒျာႏသွူ၊ ထွာဒျာႏ ဘဝဆုဲင်ꩻတာႏအရေꩻတန်သွူ၊ မဲ့ဆꩻငါဘဝ ခွုမ်မာꩻလွဗာႏ အနာႏဂတ်အရေꩻဖုံႏ၊ ဘာႏသာႏတရာꩻနဝ်ꩻ အွဉ်ႏထွော့ဖေႏ လိုꩻသီးကျင်ꩻဝတ်၊ လိုꩻသီးဖုံႏ မဉ်ႏလွောက်ꩻနာႏလွ ဘာႏသာႏတရာꩻ ကသွဉ်ခါꩻဖေႏဒါႏ လိုꩻကျင်ꩻဝတ်အတွိုင်ꩻနဝ်ꩻ လိုꩻအစွိုꩻအဗူႏ အထင်ႏထိုအယံစားတဗာႏ ပေါႏလွဉ်ဗာႏအမန်ႏနဝ်ꩻသွူ။ လိုꩻသီးခြာ ယံဖေႏနေး စရဲက်လက္ခဏာႏကြောင်းစင်'အမျတ်မျိုꩻ ကထွန်ꩻကာꩻလွဉ်' ယံကစဲင်းလွဉ်နဝ်ꩻ ဘာႏသာႏတရာꩻတွိုင်ꩻ အွဉ်ႏနယ်ဖေႏတဖူꩻသွူ၊ ဘာႏသာႏတွိုင်ꩻသီး ကျမ်ꩻမျတ်နဝ်ꩻ နမ်းကျင်ꩻတရာꩻယံဖေႏကဟဝ်လွဉ် နေးတွမ်ႏအဝ်ႏအဖဲ့ꩻဖဲ့ꩻထွား' နေးတွမ်ႏအနယ်ꩻအမျိုꩻမျိုꩻတွော့ꩻ ကတဲမ်းဗွောင်သေꩻခါꩻဒါႏ ကျမ်ꩻဖုံႏဒျာႏသွူ။ လိုꩻကအုံဒါႏ ဘာႏသာႏတရာꩻသီး အဆုံꩻအမꩻလောင်းသားဖုံႏနဝ်ꩻ ထိန်ꩻတီဒျာႏ နမ်းဖြောင်းသꩻ ဣန္ဒြေႏသိုမ်ပါꩻတဲင် ခံႏဗာႏလိုꩻအာသီးရက်စိုမ်ꩻ' ခံႏနောမ်ꩻသွူ၊ မဉ်ႏဗွောင်နယ်ဗာႏ ဗုဒ္ဓဘာႏသာႏအလꩻနုဲင်းယိုနဝ်ꩻ ကာယကံႏ' ဝစီꩻကံႏ' မနော်ꩻကံႏကရိုꩻဒါႏ ကံႏသိုမ်ပါꩻဖုံႏအကို တခံႏမာꩻတဝ်း ဒုစရဲက်လာꩻလာꩻတွော့ꩻ သဘော်ꩻနဝ်ꩻ ထွာဒျာႏမာꩻဒျာႏကွို့ꩻ သုစရဲက်ဖုံႏလွုမ်ꩻနုဲင်းနဝ်ꩻသွူ။ နေးတွမ်ႏနမ်းတဲင် သျောင်ႏထိုꩻဒျာႏ အခွုမ်အမာꩻ ကအီႏခွေါင်းအီဒါႏဝင်ꩻ' ကအီႏမာꩻစဲင်ဆာဝင်ꩻ' ကအီႏမာꩻကုဲင်အီဒါႏဝင်ꩻဖုံႏ၊ နေးတွမ်ႏဖြောင်းတဲင် ဒေါ့ꩻတဝ်းငဝ်း အခွုမ်အမာꩻ ကအီႏခွေါင်းအီဒါႏဝင်ꩻ' ကအီႏမာꩻစဲင်ဆာဝင်ꩻ' ကအီႏမာꩻကုဲင်အီဒါႏဝင်ꩻဖုံႏ၊တွမ်ႏသꩻတဲင် ကျမ်ႏတဝ်း အခွုမ်အမာꩻ ကအီႏခွေါင်းအီဒါႏဝင်ꩻ' ကအီႏမာꩻစဲင်ဆာဝင်ꩻ' ကအီႏမာꩻကုဲင်အီဒါႏဝင်ꩻဖုံႏနဝ်ꩻသွူ။ အယူႏအတွေꩻနုဲင်းယိုနဝ်ꩻ ဘာႏသာႏတရာꩻအလောင်ႏအလင်တဲ့ အအီႏသွဉ်ဖေႏဒျာႏရင်ꩻရင်ꩻနဝ်ꩻသွူ။ နဝ်ꩻလွုမ်ꩻတကာႏတဝ်း ယံဖေႏကပွါꩻမေတ္တာႏနဝ်ꩻလဲ့ ဘာႏသာႏတွိုင်ꩻနဝ်ꩻ အဝ်ႏသွဉ်ဖေႏဒျာႏ၊ ဗုဒ္ဓဘာႏသာႏအကိုနဝ်ꩻတဲး ဖန်းဖြယ်အွဉ်ႏနယ်ဖေႏနေး မေတ္တာႏ' ကရုဏာႏ' မုဒိတာႏ'ဥပေက္ခာႏ-ကရိုꩻဒါႏ ဗျဟ္မစိုရ်ႏတရာꩻလစ်ꩻပါꩻသွူ၊ ဘာႏသာႏရေꩻအွဉ်ငါသားဖုံႏနဝ်ꩻ နမ်းကျင်ꩻတရာꩻယို လဲဉ်းအထိုသွတ်ꩻလွဉ်းလွဉ်းသွူ၊ ထွာခံႏနွောင်ꩻခြေင်းခြေင်းလꩻလွ ထာꩻဆင်ꩻရယ်ꩻပင်ႏပန်ႏတံႏ၊ အအံႏအအွꩻ အာဟာႏရ စေꩻစိန်ႏဥစ္စာႏဆေ့ꩻခြေားတံႏ၊ လိုꩻလင်စောက်ကာꩻနိပ်စက်တေက်ꩻနျꩻတံႏ-ဖုံႏနဝ်ꩻသွူ။ ဗုဒ္ဓနဝ်ꩻ စွန်ꩻထိုꩻခွန်စေꩻစိန်ႏချမ်ꩻသာႏထွူ ကံကျင်ꩻခြေင်းဗာႏမွေးစွဉ်ႏ ဒုက္ကရစရိယာႏ-ဟဲ့ꩻ အကျင်ꩻယပ်ꩻယပ်ꩻခုဲင်ႏခုဲင်ႏနဝ်ꩻ ၆-နေင်ႏဗွေဗွေစွဉ်ႏနဝ်ꩻသွူ၊ "ပေါႏတထီႏလꩻတဝ်းသစ္စာႏနဝ်ꩻ ခွေခံႏထွိုင်ႏတဝ်း"ကံကျင်ꩻနုဲင်းနဝ်ꩻသားတန်၊ ဘဝပေါင်ꩻအာအာ ခါးလားကထွာဘုရာꩻအခိန်ႏနဝ်ꩻ ဖေႏလူႏဖေႏတန်ꩻ၊ ကံကျင်ꩻသီႏလ၊ ထိုမ်ႏရောမ်ပညာႏ၊ သယ်ꩻခံႏယွုန်းယေား၊ သွဉ်ဒေါ့ꩻမဲဉ်ႏမဲဉ်ႏစွဉ်ႏစွဉ်ႏကျင်ꩻဒျာႏထာꩻ-စတဲင် ထဲမ်လွဉ်ဗာႏ ပါႏရမီႏဆီပါꩻဖုံႏနဝ်ꩻသွူ။ ကွပ်နဝ်ꩻမꩻ လိုꩻယွဲးတွိုင်ꩻသီး အဝ်ႏလိုႏလွူꩻထွားဟော်ꩻငါႏ နမ်းကယွုမ်းအံႏ ကိုꩻကွယ်ႏဒါႏ ဘာႏသာႏရေꩻအွဉ်ငါသီး အခရာႏအတ္ထုပ္ပတ္တိဖုံႏနဝ်ꩻယင်သွူ။ ဗုဒ္ဓဘာႏသာႏခွိုꩻသားအတာႏ မာလာလင်္ကာရ၊ ဇိနတ္ထပကာသနီ၊ မဟာဗုဒ္ဓဝင်-စတဲင် ကျမ်ꩻဖုံႏနဝ်ꩻနဝ်ꩻ ထွာကျမ်ꩻမုဲင်တမ်ꩻသေꩻခါꩻ ဗုဒ္ဓနမ်းတောႏသီး ဘဝထွာစဲဉ်ႏနဝ်ꩻသွူ၊ မဉ်ႏဟော်ꩻထွား နမ်းကယွုမ်းအံႏကိုꩻကွယ်ႏဒါႏ ဘာႏသာႏရေꩻအွဉ်ငါသီး အတ္ထုပ္ပတ္တိနုဲင်းယိုနဝ်ꩻ လꩻနွောင်ꩻအီလွ နမ်းအကျင်ꩻမျတ်ကြောင်းစင်ဆဲင်ႏရာꩻ နမူႏနာႏဖုံႏနဝ်ꩻသွူ။ လိုꩻပေႏခေတ်မဲ့ဆꩻလယိုခါဖုံႏနဝ်ꩻ ကွပ်အဖွီထိုꩻလွ ဘာႏသာႏရေꩻဖဲ့ꩻတဲင် အပုံႏအငုဲင်ꩻရွိုင်ꩻစွိုင်ꩻ အဒေါ့ꩻအဖြဝ်ႏ တွင်ႏလွဉ်လဲဉ်း- လိုꩻတန်သီး သꩻကုဲင်ငါႏတွော့ꩻ အဝ်ႏသောင်ခြင်ꩻထာꩻဖုံႏသွူ၊ ကွဲႏတွော့ꩻ သꩻကုဲင်လဲ့ အုံဗော့ꩻနုဲင်းယိုနဝ်ꩻ အကျိုꩻတအဲဉ်ထဝ်း၊ လိုꩻယွဲးဖုံႏ ဖေႏနေးသꩻကဝင်ႏစာꩻလွဉ် ဘာႏသာႏရေꩻ နေးတွမ်ႏအနယ်ꩻမျိုꩻစွုမ်ႏ ကအဝ်ႏလိုႏတမာဒါႏတာႏဝွန်ႏနဝ်ꩻ ထွာဒျာႏလိုꩻတန်သီးတာႏဝွန်ႏဒျာႏရင်ꩻသွူ။ ဗုဒ္ဓဘာႏသာႏလိုꩻယွဲးသီး ဖေႏနေးကမဉ်ထင်ႏကျောင်ꩻကန်ႏနဝ်ꩻ နေးတွမ်ႏအနယ်ꩻစွုမ်ႏတဲင် လိုꩻတန်သီး တဲက်တွန်ꩻတမာဖေႏဗာႏဒျာႏမꩻသွူ၊ ဘာႏသာႏအဒဝ်ႏဒဝ်ႏကိုနဝ်ꩻ ထိန်ꩻတီသီႏလ၊ ဖေႏလူႏဖေႏတန်ꩻ၊ စွဲးကမ်းကိုဝင်ꩻ၊ ယွုန်းယေားသယ်ꩻခံႏ၊ အွဉ်ႏသꩻတဲႏဆို့ꩻအဓိဋ္ဌာန်ႏ၊ နေးတွမ်ႏစိတ်ပတီꩻတဲင် မာꩻစွူဖြွိုးအီသꩻ-စတဲင် ထာꩻမာꩻစဲဉ်ႏမျတ်ဖုံႏ အဝ်ႏဒျာႏနဝ်ꩻသွူ။ ထာꩻမာꩻနုဲင်းယိုဖုံႏ လိုꩻဖြားလိုꩻသက်တန်သားဖုံႏနဝ်ꩻ မာꩻနွောင်ꩻလွအခိန်ႏဗွေဗွေလဲ့ လိုꩻသက်ရွယ်ႏပေႏသားအတာႏနဝ်ꩻ အီႏမာꩻနွောင်ꩻကွို့ꩻ အခိန်ႏတခူးတခဝ်လွုမ်ꩻ၊ အဖွိုႏသွတ်ꩻ ဝုဲင်ႏဘုရာꩻနဝ်ꩻ ကားတဲင်ဘာႏသာႏတွိုင်ꩻအဝ်ႏလို့သွူ၊ ဝုဲင်ႏဘုရာꩻယိုသွူသနယ် နေးတွမ်ႏသမာႏဓိစွူစွူ နေးအာႏရုံႏ ထေသꩻအာႏမဉ်ႏမာꩻမွေးနဝ်ꩻ တဲႏဆို့ꩻနွောင်ꩻ သꩻဓာတ်နပ်ဖြားမုꩻနဝ်ꩻသွူ။ လောကအကို လိုꩻကအောင်ႏမျင်ႏသားဖုံႏနဝ်ꩻ ခံႏထူႏပယွုမ်းယွုမ်းဒျာႏ လောကဓံႏသီး အတိုပ်ꩻအထောင်း' အခွေါင်းအဗာႏတဲင် ထွာဒျာႏသꩻဓာတ်နပ်ဖြား ကအီႏနွို့သွုပ်လွေꩻနွောင်ꩻ ဘဝတွိုက်ꩻပွယ်ꩻသားဖုံႏဒျာႏသွူ၊ သꩻပညာႏသျင်ႏသီးရိုꩻ"အရွယ်ႏလꩻထွူလိုꩻ ကလိုႏအွဉ်ႏငါႏ သဘော်ꩻစဲစ်မန်ႏ ဟာသဉာဏ်ႏအဝ်ႏ၊ ထိန်ꩻချုပ်နွောင်ꩻ တဟဝ်လိုႏတဝ်း အပုံႏအငုဲင်ꩻထာꩻမာꩻ၊ အုံပဉ်ဖဲ့ꩻတဝ်းထာꩻ-စတဲင်နုဲင်းယို မဉ်ႏအဝ်ႏနဝ်ꩻမꩻ" အီႏရိုꩻလꩻ လိုꩻသꩻဓာတ်နပ်ဖြားနုဲင်းနဝ်ꩻသွူ။ အရွယ်ႏတွိုႏခန်းတယဝ်း သꩻဓာတ်တနပ်ဖြားတဝ်းလိုꩻတဖြာꩻနဝ်ꩻ ဟဝ်လွုမ်ꩻနမ်းတာႏ၊ ဖေႏကတနꩻတွမ်ႏအထွာအကုဲင်မွေးနဝ်ꩻ စဉ်ꩻစာꩻဒါႏတဝ်း၊ ထိန်ꩻတီမုꩻအဲဉ်ထဝ်း၊ သေဒါႏတဝ်းတာႏဝွန်ႏ၊ အုံနောင်အာႏကွိုꩻလွဉ်ꩻငါႏဝင်ꩻ-စတဲင် အွဉ်ႏနယ်လွဒါႏ အသဘော်ꩻလက္ခဏာႏနုဲင်းနဝ်ꩻသွူ၊ ယံဖေႏနေး တလူႏတွူႏတရန်ရုဲင်း လောကဓံႏတရာꩻဖုံႏနဝ်ꩻ ဘာႏသာႏရေꩻသွဉ်ဖေႏ၊ မဉ်ႏကျုံႏတလူႏလွဉ် ထာꩻဆင်ꩻရယ်ꩻ၊ ထာꩻချမ်ꩻသာႏ၊ ထာꩻအံႏဖြာႏ၊ ထာꩻသဲ့ꩻသွမ်ꩻ၊ ထာꩻလꩻလာဘ်၊ ထာꩻတလꩻတဝ်းလာဘ်၊ သွꩻခွလွိုင်ႏအာ၊ သွꩻခွခြေား-စတဲင်နဝ်ꩻဖုံႏလဲ့ ယံဖေႏနေး ကတသွိုးမွုန်း' ဖေႏနေးကခံႏနွောင်ꩻ တဉ်ႏတဉ်ႏခွေါင်ခွေါင်-အသွဉ်ဖေႏနုဲင်းနဝ်ꩻသွူ။ အွဉ်ႏသေဖေႏ "ပါꩻမုဲင်ꩻမာꩻတမွေးတဝ်း၊ နမ်းမာꩻဒျာႏ"နုဲင်းနဝ်ꩻ၊ ယီးအွဉ်ႏနယ်ဖေႏ ယောနိသော မနသိကာရ-ယူႏအွဉ်ႏသꩻဖေႏကဒါႏအီသွူ၊ မာꩻပြွူႏဖြိုအီ နမ်းတွမ်ႏနမ်းအာႏကွိုꩻချာသꩻဓာတ်-အတ္တာ ဟိ အတ္တနော နာထော-ကရိုꩻနုဲင်းနဝ်ꩻသွူ၊ ဘာႏသာႏတရာꩻ ကသွဉ်ဖေႏဒါႏ သဘော်ꩻနုဲင်းကီယိုဖုံႏနဝ်ꩻ မာꩻပေါႏထွာအီဖေႏ သꩻပညာႏသျင်ႏသီးကယီးနယ်ဒါႏ သꩻဓာတ်နပ်ဖြားကရိုꩻဒါႏနဝ်ꩻတန်သွူ။ လိုꩻသꩻဓာတ်နပ်ဖြား ကစွူဖြွိုးသားဖုံႏနဝ်ꩻ ပရဟိတသꩻဗွေစွုမ်ႏ၊ တလူႏရုဲင်းနွောင်ꩻ အကုဲင်မျိုꩻ၊ နမ်းတွမ်ႏနမ်းထိန်ꩻတီနွောင်ꩻ၊ သေတာႏဝွန်ႏ ထူႏတာႏဝွန်ႏဒါႏ၊ အာႏကွိုꩻချာဒျာႏနမ်းတွမ်ႏနမ်း-စတဲင် လက္ခဏာႏဖုံႏအဝ်ႏလွနဝ်ꩻသွူ၊ အထီအသွီႏနုဲင်းနဝ်ꩻဖုံႏ ယံဖေႏနေးကဗွေစွုမ်ႏနွောင်ꩻနဝ်ꩻ ဘာႏသာႏရေꩻအသွဉ်အသင်ယို ထွာအီအစွဲးအကမ်းကရိုꩻနဝ်ꩻ ဒင်ႏပျꩻနယ်ဗာႏနုဲင်းယိုသွူ။ [၁][၂]