လွိုက်ရွေꩻပွယ်ꩻတာႏ

"လွိုက်ရွေꩻပွယ်ꩻတာႏ ဟော်ꩻခရာႏ" မဉ်ႏတွိုႏ လာနိုဝင်ဘာ(၈)နီꩻ တင်ꩻကျွစ်လာလောင်း(၁၁)နီꩻသူꩻနောဝ်ꩻ ဝင်ꩻအီႏမာꩻဖျင်သွူ ဒုတိယအလဲင်ႏ လွိုက်ရွေꩻပွယ်ꩻသွူ။ လွိုက်ရွေꩻပွယ်ꩻယိုနောဝ်ꩻ နဲင်ႏငန်ႏရေꩻပါတီ ပေႏပေႏတန်တန် တရျာꩻဗော့ꩻဗော့ꩻ အီႏနွို့ပြဲင်ႏသွူ။ အတန်သွတ်ꩻ နုဲင်ႏငန်ႏရေꩻပါတီနောဝ်ꩻ "ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ"သွူ။ အမျိုးသားဒီမိုကရေစီအဖွဲ့ချုပ်ပါတီလဲ့ အီႏနွို့ပြဲင်ႏ အောဝ်ႏဟွုန်သတင်ꩻနုဲင်းနောဝ်ꩻသွူ။ ခမ်းရင်ꩻသား လိုꩻမျိုꩻပေႏပါတီအကို ဖြောဝ်ꩻအမျိုꩻသာꩻ ဒီမိုကရေစီပါတီနောဝ်ꩻ ထွာအတန်သွတ်ꩻသွူ။ ခမ်းရင်ꩻသား လိုꩻမျိုꩻပေႏ ယဟန်ႏနောဝ်ꩻ ပါတီအောဝ်ႏထိုꩻ နီသွံပါတီတဲင် မဲးလီထိုꩻတွော့ꩻ အီႏနွောင်ꩻဗာႏ မန်းပါတီတန်နောဝ်ꩻ ယိုꩻတောဝ်းသွူ။ မန်းပါတီတန်(၂)ပါတီနောဝ်ꩻ လိုꩻကျွိုက်အာဒျာႏ ဖြာꩻမျိုꩻမျိုꩻတဲင် ဝွေꩻသီးကနွို့ပြဲင်ႏဒါႏ ဝေင်ꩻနယ်ႏနောဝ်ꩻ လိုꩻလင်အီႏနွောင်ꩻဗာႏ ဝွေꩻသီးနောဝ်ꩻ ယိုꩻတောဝ်းသွူ။ ပြည့်ထောင်စုကြံ့ခိုင်ရေးနှင့် ဖွံ့ဖြိုးရေးပါတီနောဝ်ꩻ ခမ်းသားထီသား ကျွိုက်ဝွေꩻသီးတဲ့နောဝ်ꩻ၊ ကျွိုက်တောဝ်းဝွေꩻသီးတဲ့နောဝ်ꩻ ဝွေꩻသီးပါတီ ဖေႏကနွောင်ꩻယင်းဒျာႏတွိုင်ꩻတွိုင်ꩻနောဝ်ꩻ လꩻရာꩻအနယ်ꩻ ဝွေꩻသီးအီႏကျိုꩻစာꩻယင်းဒျာႏသွူ။ ဒေါ်အောင်ဆန်းစုကြည်နောဝ်ꩻ မဲဉ်ထွာငါႏသမ္မတလဲ့ စဲ့ꩻအောဝ်ႏပေ့ꩻခါꩻတခါꩻတွမ်ႏ ဥပဒေႏတဲင် ထွာတလꩻတောဝ်းသွူ။ ခါးလား ၂၀၁၅-လွိုက်ရွေꩻပွယ်ꩻကတွိုႏ မဲဉ်ဖျင်ဥပဒေႏသားတွမ်ႏ မဲဉ်ဖျင်တောဝ်းဥပဒေႏ ကအောဝ်ႏထေင်၊ ကအောဝ်ႏဒေါ့ꩻလွဝင်ꩻ ဖြာꩻစွိုးစွိုး ဖြာꩻမျိုꩻမျိုꩻနောဝ်ꩻ မဲဉ်ဖျင်တောဝ်းသား နွောင်ꩻထိုꩻခန်းဒျာႏနောဝ်ꩻသွူ။ အခိန်ႏဆေ့ꩻ အခိန်ႏဗော့ꩻလဲဉ်းသွူတဲင် ပွိုင်းဝွို့တွမ်ႏ ဖျင်ဥပဒေႏကိစ္စနောဝ်ꩻ အုံယေန်အုံတေ့ꩻလွဒွိုန်းဝင်ꩻတွော့ꩻ ကျိုꩻစာꩻစီႏစဲဉ်ႏ၊ ကျိုꩻစာꩻခြပ်ရဲဉ်ႏလွခန်းဒျာႏ အီႏနွို့ပြဲင်ႏ မဲးပွယ်ꩻတာႏနောဝ်ꩻသွူ။ နုဲင်ႏငန်ႏရေꩻပါတီသားဖုံႏလဲ့ ဥပဒေႏအလꩻ နွို့ပြဲင်ႏဝွတ္တရာꩻကေႏထာꩻအောဝ်ႏ၊ မဲဉ်ယားပါꩻ ပါတီအာႏတွော့ꩻ နွို့ပြဲင်ႏလဲ့အောဝ်ႏ၊ မဲဉ်နွောင်ꩻမွေးတွော့ꩻ နွို့ပြဲင်ႏလဲ့အောဝ်ႏ၊ အောဝ်ႏအမျိုꩻမျိုꩻသွူ။ ဒီမိုကရေစီစနစ်ကရိုꩻနောဝ်ꩻ ကထွာနုဲင်ႏငံႏရေꩻပါတီသားလဲ့ သင်ꩻရာꩻဝေင်ꩻနယ်ႏ၊ သင်ꩻရာꩻခင်ႏလံးကိုယို ကျိုꩻစာꩻနွို့ပြဲင်ႏလွဝင်ꩻအတွိုင်ꩻ ကထွာခမ်းသားထီသားလဲ့ ကျွိုက်နေစ်သက်ရာꩻ နုဲင်ႏငန်ႏရေꩻပါတီယို အောဝ်ႏလိုႏထောက်ခံႏ၊ အောဝ်ႏလိုႏသော့ꩻဖေႏမဲးသွူ။ ကထွာဒါႏ ခမ်းသားထီသား ကအီႏသော့ꩻဒါႏမဲးသားနောဝ်ꩻ နီကအီႏသော့ꩻဒါႏမဲး၊ နီကအီႏထောက်ခံႏဒါႏ နုဲင်ႏငန်ႏရေꩻပါတီယို လိုꩻမျိုꩻမုဲင်ꩻ၊ ဘာႏသာႏမုဲင်ꩻ၊ အသမဲင်ꩻ ရာႏဇဝင်ႏ အောဝ်ႏနုဲင်းမုဲင်ꩻကရိုꩻယို ထွေထောင်စဲင်းစဲင်းသွူတွော့ အဗာႏထောက်ခံႏမꩻ ထောက်ခံႏမꩻ ထောက်ခံႏနောဝ်ꩻ ဟောဝ်သွူ၊ လိုႏထောက်ခံႏကြွို့ꩻကြꩻတောဝ်းထာꩻသွူ။ နီနောဝ်ꩻ ပအိုဝ်ႏလိုꩻမျိုꩻတဲင် မီႏထောက်ခံႏချာဒျာႏ၊ လွိုက်ရွေꩻချာဒျာႏ ပအိုဝ်ႏပါတီနောဝ်ꩻ အနယ်ꩻမဲဉ်ႏသွတ်ꩻ၊ အဟောဝ်သွတ်ꩻသွူ။ ပေါႏပအိုဝ်ႏပါတီနောဝ်ꩻ လိုꩻခိုမဲဉ်နွို့ပြဲင်ႏပြဲင်ႏ၊ လိုꩻမူႏမဲဉ်နွို့ပြဲင်ႏပြဲင်ႏ၊ လိုꩻဗားမဲဉ်နွို့ပြဲင်ႏပြဲင်ႏ နီထောက်ခံႏဒျာႏသွူ။ မဲးပွယ်ꩻလဲ့ ဗော့ꩻလွဉ်လဲဉ်း တနီꩻတစိꩻစိꩻတဲင် ကထွာနုဲင်ႏငန်ႏရေꩻပါတီသားလဲ့ ခမ်းသားထံꩻသာꩻ သော့ꩻမဲးဖေႏကဒါႏနောဝ်ꩻ အောဝ်ႏလိုႏကျိုꩻစာꩻ ဟော်ꩻခြုဲင်းလွေꩻဖေႏလဲဉ်း၊ ကထွာခမ်းသားထံꩻသာႏလဲ့ ဝင်ꩻကဟော်ꩻ၊ ဝင်ꩻကခြုဲင်းယို အောဝ်ႏလိုႏကျိုꩻစာꩻနာႏ၊ သော့ꩻမဲးဖေႏကဒါႏနောဝ်ꩻသွူ။ ၂၀၁၀-မဲးပွယ်ꩻ အမော့ꩻအကျုံႏအလꩻ ပအိုဝ်ႏယဟန်ႏနောဝ်ꩻ သက်တန်ငါႏလဲဉ်းလဲ့၊ ထွာသွူလိုꩻဝေင်ꩻလဲ့ ကဲစ်ꩻမဲးသော့ꩻမဲး တဒါႏတောဝ်းတွော့ꩻ ထွာထိုꩻမဲးပဲႏနောဝ်ꩻ အောဝ်ႏဟွုန်ဗာႏအာတန်သွူ။ ပွိုင်းဝွို့တွမ်ႏမဲးပွယ်ꩻတယောဝ်း၊ ကိစ္စလောင်ႏလင်တယောဝ်း ပါꩻတသဉ်ငေါဝ်းနွိုးနောဝ်ꩻ တလိုႏယွုမ်းထွꩻတောဝ်း စွိုးခွိုꩻငေါဝ်းခါႏကွေးနေား၊ ယွုမ်းကြွို့ꩻကြꩻမွုန်းဝင်ꩻငေါဝ်းလုဲင်းနေား။ နီလိုꩻမျိုꩻအတာႏ တာႏဝွန်ႏဝွတ္တရာꩻ ကေႏတကေႏတောဝ်းနောဝ်ꩻ နီသွုန်ႏသꩻခါႏ မဲးတဗာႏလဲ့ ဖေႏအီအဆုံꩻအဖျတ်နေနေတဲင် တာႏဝွန်ႏဖေႏကကေႏနောဝ်ꩻ ကျိုꩻစာꩻသွော့ဝင်ꩻဖုံႏနေား။ ယိုခါနောဝ်ꩻ မဲးဌာႏနတွိုင်ꩻ ကအီႏသော့ꩻဗာႏဒါႏမဲး လိုꩻစာႏရင်ꩻဖုံႏယို ဝင်ꩻအောဝ်ႏကျောႏညာႏနယ်လဲဉ်းသွူတဲင် နီမဉ်ꩻပါတပါတောဝ်း၊ ဖါမဉ်ꩻ မဲဉ်ႏတမဲဉ်ႏတောဝ်းယို လိုႏလွေꩻထွားသေꩻခါꩻကွေးနေား။ အစွိုးစွိုးလွိုက်ရွေꩻပွယ်ꩻကရိုꩻနောဝ်ꩻ ဒီမိုကရေစီစနစ် အပင်အလာႏ၊ ဒီမိုကရေစီစနစ် အင်္ဂါႏလက္ခဏာႏတမျိုꩻတဲင် ခမ်းသားထီသားဖုံႏနောဝ်ꩻ အွဉ်ႏဗာႏအရေꩻ၊ သော့ꩻဖေႏဗာႏမဲးသွူ။ ဒီမိုကရေစီဝါႏဒ၊ ဒီမိုကရေစီစနစ်ကရိုꩻယိုနောဝ်ꩻ တွမ်ႏဗုဒ္ဓဘာႏသာႏ ဘုရာꩻဝါႏဒနောဝ်ꩻ ဗွိုန်လွဝင်ꩻတဲင် ကမ္ဘာႏလောင်းယို ခမ်းတွိုင်ꩻ ခမ်းတွိုင်ꩻ မီႏထွာလို့လို့ ဒီမိုကရေစီဝါႏဒ အစဲစ်အမန်ႏနောဝ်ꩻမꩻ အီႏချံꩻသာႏ အီႏသာႏယာႏလို့သွူ။ ၂၀၁၅-လွိုက်ရွေꩻပွယ်ꩻယိုနောဝ်ꩻ မန်းခမ်းအုပ်ချုပ်ပွုံႏဥပဒေႏအလꩻ ထွာလဲဉ်းဒုတိယအလဲင်ႏ လွိုက်ရွေꩻပွယ်ꩻတဲင် ထွာခမ်းရင်ꩻသား လိုꩻမျိုꩻတဖြာꩻယို မီႏတသော့ꩻတောဝ်းမဲးလဲ့နောဝ်ꩻ၊ သော့ꩻဒျာႏတွော့ꩻ မီႏထွာထိုꩻ မဲးပယ်ႏလဲ့နောဝ်ꩻ သွုမ်ꩻငါႏထာꩻ ရိုꩻဗာႏနုဲင်းနောဝ်ꩻသွူ။ ခေတ်ယိုခါနောဝ်ꩻ လိုꩻဝေင်ꩻတယောဝ်း၊ လိုꩻတော်ꩻတယောဝ်း အုံထံ အောဝ်ႏထံ အုံကြွို့ꩻထာꩻ တလꩻတောဝ်းဒွုမ်ကွေးနေား၊ သေနာႏလိန်ႏမာႏဗာႏ ကူစွိုးကူꩻမျိုꩻနေား။