လွောင်ႏဗူႏခွုမ်မာꩻ

အဝ်ႏ ဝီခီပီးဒီးယား ကို

လွောင်ႏဗူႏခွုမ်မာꩻ နီစီꩻပွာꩻ[မွဉ်းဖျင် | မွဉ်းဖျင်အရွီးခိုႏ]

ခမ်းထီတဖြုံႏလဲ့နောဝ်ꩻ၊ လိုꩻမျိုꩻတမျိုꩻလဲ့နောဝ်ꩻ၊ ဘာႏသာႏလဲ့နောဝ်ꩻ စီꩻပွာꩻရေꩻယို အရေꩻတန်ငါႏသွူ၊ စီꩻပွာꩻရေꩻအာႏတလာမꩻ ခမ်းထီပျဿနာႏ၊ လိုꩻမျိုꩻပျဿနာႏဖုံႏယို အီႏဖျတ်ကာႏတွူႏတရန် ထန်ႏလꩻနွောင်ꩻနောဝ်ꩻသွူ။ ခေတ်ယိုတဗာႏနောဝ်ꩻ တကမ္ဘာႏလွုမ်းလွုမ်းယို ဝင်ꩻမာꩻလွဉ်လဲဉ်း ငိမ်ꩻချမ်ꩻရေꩻစွုမ်ႏခမ်းခမ်းတဲင် ကအီႏတွိုက်ꩻခꩻဗာႏဝင်ꩻ တွမ်ႏစူခွုမ်လက်နက်ဖုံႏနောဝ်ꩻ တအောဝ်ႏကြွို့ꩻတောဝ်းဒွုမ်နောဝ်ꩻသွူ၊ ယိုခါနောဝ်ꩻ တွိုက်ꩻခꩻဒျာႏဝင်ꩻ တွမ်ႏစီꩻပွာꩻရေꩻစူခွုမ်တဲင် ခမ်းမုဲင်ꩻစီꩻပွာꩻအာႏပေႏလဲ့ ခမ်းနောဝ်ꩻနောဝ်ꩻ ထွာဗာႏစွဉ်ႏစီꩻပွာꩻရေꩻ စူတန်သားသွဉ်းနောဝ်ꩻသွူ။

ထွာဗော့ꩻခယ်ႏလိုꩻမျိုꩻနောဝ်ꩻ ကမ္ဘာႏလောင်းယိုခါ ဝွေꩻနွို့တွိုက်ꩻခꩻတွမ်ႏစီꩻပွာꩻရေꩻလက်နက်တဲင် အာသျတွိုက်၊ ဥရောပတွိုက်အာဖရိကတွိုက်ကိုဖုံႏ ခယ်ႏစီꩻပွာꩻရေꩻ တခြို့ဒို့ဗဉ်ႏလꩻလို့လဲဉ်းနောဝ်ꩻသွူ။ "ဂျပန်နောဝ်ꩻ စက်၊ လက်နက်နောဝ်ꩻ အမေႏရိကန်ႏ၊ စီꩻပွာꩻရေꩻနောဝ်ꩻ ခယ်ႏအံႏ"ငဝ်းတွိုင်ꩻလဲင်ꩻအောဝ်ႏလွဉ်တဲင် ဂျပန်အမေႏရိကန်ႏနောဝ်ꩻ မာꩻနွောင်ꩻတခြိုꩻယံ အငိုꩻတန်အခန်ထိုတွော့ꩻ လိုꩻတွိုင်ꩻတသွိုꩻနွောင်ꩻတောဝ်း၊ ခယ်ႏနောဝ်ꩻ ထွားလိုꩻအရန်း ထေတခြိုꩻ၊ အငိုꩻဖုဲင်ႏ အခန်ꩻဖွိုႏတွော့ꩻ ဝင်ꩻသွုံꩻအာဒျာႏ ခယ်ႏတခြိုꩻနောဝ်ꩻသွူ။ လိုꩻအရန်းထိုသားသွုံꩻတာႏလဲ့ မာꩻဖေႏယံယံဒါႏ၊ လိုꩻအရန်းထာႏဝသားလဲ့ မာꩻဖေႏအငိုꩻအင်းတူႏအင်းတန်ႏဒါႏ၊ လိုꩻအရန်းဖွိုႏသားလဲ့ မာꩻဖေႏဟမ်းပေါင်းညမ်းညမ်းစားတဲင် လိုꩻတွိုင်ꩻသွုံꩻနွောင်ꩻရောင်လွဝင်ꩻနောဝ်ꩻမꩻ ခယ်ႏစီꩻပွာꩻရေꩻ ဒို့ꩻတခြို့ဗဉ်ႏနွောင်ꩻဝင်ꩻနောဝ်ꩻသွူ။ နီပအိုဝ်ႏစီꩻပွာꩻရေꩻလဲ့ ဟဝ်ထွားနုဲင်းလွဉ်ꩻငါႏ ခယ်ႏထာꩻနယ်ꩻနောဝ်ꩻသွူ၊ မန်းခမ်း တနီꩻတနီꩻယို ကာꩻအပေင် တဆီနီစာႏရင်ꩻအလꩻ (ဆွိုင်ꩻ)ပေါင်ꩻ တရေင်တယွမ်ꩻတောဝ်း တနီꩻနီꩻအကျောင်ꩻ သေထွꩻဗာႏ မူဆယ်ကွန်ႏနွို့ထန်ႏစာႏရင်ꩻကိုနောဝ်ꩻသွူ။ ကာꩻဆွိုင်ꩻပေါင်ꩻ ယွမ်ꩻတောဝ်းတရေင်အကို နီပအိုဝ်ႏကွန်ႏဖုံႏ ပါအာလွိုဝင်ꩻနောဝ်ꩻသွူ၊ နီပအိုဝ်ႏကွန်ႏပါအာလွိုစွဉ်ႏဝင်ꩻကီလဲ့ နီပအိုဝ်ႏထာꩻလုပ်ꩻသား အမွူးသားအတာႏ တချံꩻသာႏတောဝ်း၊ နီးခန်အောဝ်ႏတွိုးတိန်ဒျာႏ စွုမ်ႏနေင်ႏနေင်ႏနောဝ်ꩻသွူ၊ ပွိုးတမုဲင်ꩻနဲးတဲင် နီကွန်ႏတွမ်ႏ နီကွန်ႏယို ပွိုးစွဉ်ႏ နီလိုꩻတရုမ်သဲင်ꩻချာနွောင်ꩻတောဝ်းဝင်ꩻနောဝ်ꩻသွူ။

နီကွန်ႏတွိုႏဝင်ꩻထျꩻနောဝ်ꩻ အငိုꩻတန်၊ အခန်ထိုဒျာႏလဲ့ နီလုဲင်းလုပ်ꩻခြံမာꩻသား ကခံႏစူယာꩻလျားအတာႏ တချံꩻသာႏတောဝ်း၊ အောဝ်ႏခံႏဗာႏစွူစွူဒျာႏ ထာꩻယပ်ꩻခုဲင်ႏတံႏနောဝ်ꩻသွူ။ ပွိုးတမုဲင်ꩻနဲတဲင် လုဲင်းလုပ်ꩻခြံမာꩻသားထျꩻနောဝ်ꩻ ဝင်ꩻတေက်ꩻနျꩻမွေးစွဉ်ႏအရန်းရန်း၊ ဝင်ꩻထင်းဖွီထီႏပေႏမွေးစွဉ်ႏအစားစား၊ ဝင်ꩻချာႏတဗူႏတဗန်ႏ ဗားဗီးမွေးစွဉ်ႏအမျိုꩻမျိုꩻတဲင် စာဖက်ꩻဖေါ်တရျာꩻနောဝ်ꩻ အီႏဖြေႏအံႏငါဒဲဉ်တတာႏလဲ့ အောဝ်ႏယူႏဆွာꩻဗာႏကထာꩻနောဝ်ꩻသွူ။ နီလုဲင်းလုပ်ꩻခြံမာꩻသားဖုံႏယို ကဲဉ်းအာအာ ကတွိုးသေတောဝ်း၊ ဗွိုတောဝ်း၊ ကျင်ႏလယ်ႏတောဝ်းတဲင် ကထွာလိုꩻကေားဖြေꩻသား လိုꩻဗွို၊ လိုꩻသေသားဖုံႏနောဝ်ꩻ မေတ္တာႏ သမ်းတအွဉ်ႏဒင်ႏတောဝ်းထဲင်း၊ သမ်းအံႏဆျာႏ၊ အံႏတေက်ꩻနျꩻဆွုမ်ႏထဲင်းနောဝ်ꩻ နီသွို့ꩻခြံသားမုဲင်ꩻခါမꩻ ထာꩻခိုးလျားအီႏလွစ်ထန်ႏလꩻဟောင်း?။ နီလိုꩻချင်ꩻချင်ꩻဒျာႏမဉ်ႏတဲ့ အောဝ်ႏအံႏတေက်ꩻနျꩻချာလဲဉ်းဝင်ꩻ နုဲင်းယိုက ခယ်ႏကလာꩻလိုꩻမျိုꩻလင်ထဲင်းနောဝ်ꩻ ဒေါ့ꩻခရာႏအီႏလိုႏပွဲဒွုမ်ဟောင်း၊ လုပ်ꩻခေါက်ခယ်ႏ လꩻအယာႏခဉ်ႏတရျာꩻနောဝ်ꩻ လꩻချာဒျာႏဝင်ꩻဟံႏဩဇာႏတအိတ်လွုမ်ꩻ၊ ဖက်ꩻခေါ်အယာႏခဉ်ႏ နီရျာꩻမꩻ လꩻအီဟူတအိတ်လွုမ်ꩻနောဝ်ꩻ နီပအိုဝ်ႏစီꩻပွာꩻ အီႏမာꩻနုဲင်းမုဲင်ꩻ ယုဲင်ခြူလွဉ်ꩻဝင်ꩻထွꩻနွောင်ꩻဟောင်း?။ လုပ်ꩻမာꩻသေင်ႏလာႏ တနေင်ႏခေါင်ꩻ တလမ်းလွုမ်းလွုမ်းမာꩻ လꩻအယာႏခဉ်ႏငတ်ꩻရျာꩻတရေင်တဲင် ထွိုင်ႏဗဲ့ꩻချာငါနောဝ်ꩻ အနာလွိုလꩻသဲင်ꩻဟူတအိတ်လွုမ်ꩻ၊ အီႏအံႏငါးထူႏထဲင်းအတသာတွော့ꩻ ခွပ်နေင်ႏလာ ရွဉ်အေႏထွိုင်ထောင်းနောဝ်ꩻ လုဲင်းလုပ်ꩻခြံမာꩻသား ထွာဗာႏလို့လဲဉ်း ဝင်ꩻသွဉ်းနောဝ်ꩻသွူ။

စွိုးခွိုꩻအွဉ်ငါသား လိုꩻတဲးဝါး လိုꩻဒါႏဖုံႏလဲ့ အောဝ်ႏလိုႏထီႏပါငါႏ နီလုဲင်းလုပ်ꩻခြံမာꩻသားအလောင်းနောဝ်ꩻသွူ၊ နီခမ်းသားမွိုးဖါ စွုမ်ႏနီꩻဟာ ကအောဝ်ႏသောင်ခြင်ꩻဗာႏထာꩻယို အဓိပကပျဿနာႏတမုဲင်ꩻကရိုꩻနောဝ်ꩻ အောဝ်ႏလိုႏစေဖြွောင်ႏ ကုဖေႏငါႏနောဝ်ꩻသွူ။ နီပအိုဝ်ႏဒေႏသ ကထန်ႏလွဉ်ဒါႏ ကွန်ႏမန်ႏသမျနောဝ်ꩻ သွို့ꩻခြံသား ဖေႏကစာဗာႏအငိုꩻထိုထိုယို နီအီႏပွိုင်ဆင်ဖေႏဗာႏနုဲင်းမုဲင်ꩻ၊ နီအီႏဒေါ့ꩻရီငါလွေꩻဗာႏ လိုꩻဖြေꩻသားခမ်းမုဲင်ꩻ၊ နီအီႏထွို့ꩻဗာႏ ဆေꩻခင်တဖူꩻရဲဉ်ႏနုဲင်းမုဲင်ꩻကရိုꩻနောဝ်ꩻ အောဝ်ႏလိုႏယူႏသော့ꩻကိုဖေႏငါႏဝင်ꩻနောဝ်ꩻသွူ။ နုဲင်းတဲမ်းလိတ်သားအနေႏနောဝ်ꩻ နီပအိုဝ်ႏပွယ်ꩻစာꩻတန်ဖုံႏ အောဝ်ႏလိုႏလွူးငါႏ သꩻဓာတ်ရက်စွိုးခွိုꩻ လိုꩻမျိုꩻတန်တန်အာအာတဲင် ပွယ်ꩻစာꩻကားကအောဝ်ႏ လွောင်ႏဗူႏလွေꩻနေး အစွုမ်ꩻအစွိုꩻတန်တဗာႏတွော့ꩻ နီဒေႏသကို ကထန်ႏလွဉ်ဒါႏ ကွန်ႏမန်ႏသမျနောဝ်ꩻ ယံရုပ်သဲဉ်ꩻချာနွောင်ꩻ၊ နီကွန်ႏယို ခမ်းမုဲင်ꩻဖြေꩻအငိုꩻထိုလွိုဝင်ꩻ နုဲင်းနောဝ်ꩻလဲ့ အောဝ်ႏလိုႏထွို့ꩻသွꩻနွောင်ꩻနွောင်ꩻ၊ တဲမ်းထွို့ꩻနွောင်ꩻစူမုဲင်နောဝ်ꩻသွူ။

နီဒေႏသကို ကထန်ႏဒါႏ ကွန်ႏမန်ႏသမျနောဝ်ꩻ ခမ်းတွို့ꩻ၊ ခမ်းကွဉ်ႏ၊ ခမ်းနောဝ်၊ ခမ်းထင်ꩻ အခန်ဖေႏကအောဝ်ႏဗာႏ တတွောင်းချင်ႏနောဝ်ꩻ အောဝ်ႏလိုႏထွို့ꩻနွောင်ꩻနွောင်ꩻဖေႏငါႏနောဝ်ꩻသွူ။ နီပအိုဝ်ႏချင်ꩻချင်ꩻ မဉ်ႏတရက်ချာတောဝ်းဝင်ꩻ၊ မဉ်ႏတပင်ႏထိုဖေႏချာ လူႏလုဲင်ႏတဝ်းဝင်ꩻနောဝ်ꩻ တမုဲင်ꩻတလွဉ်ရက်သော့ꩻဖေႏတောဝ်း၊ နီလိုꩻချင်ꩻချင်ꩻဒျာႏမဉ်ႏတဲ့ မဉ်ႏအောဝ်ႏတေက်ꩻနျꩻ လူႏလုဲင်ႏချာဗော့ꩻဝင်ꩻနောဝ်ꩻ လိုꩻလင်ထဲင်းက ဒေါ့ꩻခရာႏလိုႏပဲဒွုမ်ဟောင်း?။ မာꩻထာꩻမာꩻအမျိုꩻမုဲင်ꩻတယောဝ်း စွိုးခွိုꩻရေꩻမဉ်ႏတပါတောဝ်းနောဝ်ꩻ နီထာꩻမာꩻယို အမျတ်ထန်ႏဆေ့ꩻငါႏနောဝ်ꩻသွူ၊ နီတဖြာꩻတာႏ အံႏဗာႏအီ၊ ချံꩻသာႏအီရိုꩻကီလဲ့ စွိုးခွိုꩻတာႏအကျိုꩻ မဉ်ႏတအောဝ်ႏအီတောဝ်း၊ စွိုးခွိုꩻသွီႏ မဉ်ႏခြီထိုꩻပါထဲင်းနောဝ်ꩻ သဲင်ꩻကွုတ်ထွာဗာႏ လိုꩻမျိုꩻနောဝ်ꩻတမျိုꩻတာႏ ထွာဒျာႏအဟောသိကံႏတန်နောဝ်ꩻသွူ။ ခယ်ႏကလာꩻ ကလွဉ်ထုမ်ႏသော့ꩻစီꩻပွာꩻ နီနာꩻခြာယိုနောဝ်ꩻ ဝင်ꩻစွိုးခွိုꩻတာႏ တွက်ပါလဲဉ်း နီပွန်းတပွန်းနောဝ်ꩻသွူ၊ ဖြေꩻစာလုပ်ꩻမာꩻ ဝင်ꩻမဉ်ႏမျတ်တရေင်လဲ့ ဝင်ꩻစွိုးခွိုꩻတာႏ တွက်ဖေႏပါလဲဉ်းတစွဲးနောဝ်ꩻသွူ။ ခယ်ႏကတွိုႏလွေꩻ ဆွီဒင်၊ ဟော်လန်၊ ဂျပန်၊ အမေႏရိကန်ႏသူꩻတတယဝ်း ဝင်ꩻအာႏခꩻမဉ်ႏလꩻ တရေင်နောဝ်ꩻ သော့ꩻသဲင်ꩻချာဖေႏ ခယ်ႏခမ်းတန်တစွဲနောဝ်ꩻသွူ၊ ကလာꩻဖုံႏတယဝ်း ဝင်ꩻစာဆဲင်ႏတနီꩻယို မဉ်ႏဖျတ်တသောင်ႏလဲ့ တရေင်နောဝ်ꩻ ဝင်ꩻအွဉ်ႏဖေႏ ဝင်ꩻစွိုးခွိုꩻဘာႏသာႏတာႏနောဝ်ꩻသွူ။

နီပအိုဝ်ႏတစွိုးခွိုꩻလွုမ်းလွုမ်း စွုမ်ႏဖြာꩻဖြာꩻ မာꩻထာꩻမာꩻ မဉ်ႏအွဉ်ႏဖေႏဒါႏ နီစွိုးခွိုꩻတာႏနောဝ်ꩻ တနီꩻတနီꩻယို နီပအိုဝ်ႏရွဉ်တောင်ꩻ လꩻနေးသိန်ႏအရေင်ရျာꩻတန်နောဝ်ꩻသွူ၊ ပအိုဝ်ႏစွုမ်ႏဖြာꩻ မာꩻထာꩻမာꩻဖေႏကအွဉ်ႏဒါႏဒါႏ သꩻဓာတ်ရက်စွိုးခွိုꩻ လိုꩻမျိုꩻဘာႏသာႏနောဝ်ꩻ အောဝ်ႏလိုႏငါႏ ပငါပရာꩻနောဝ်ꩻသွူ။ ပအိုဝ်ႏစွုမ်ႏဖြာꩻ မဉ်ႏသေရက်ချာမွေးစွိုးခွိုꩻ လိုꩻမျိုꩻ၊ မာꩻထာꩻ မဉ်ႏတွက်ဖေႏပါဒါႏ စွိုးခွိုꩻလိုꩻမျိုꩻတွက်တာႏ ရွဉ်တောင်ႏတာႏနောဝ်ꩻ တညတောဝ်းဒွုမ်ခိန်ႏခါႏ နီပအိုဝ်ႏခမ်းထီတွမ်ႏဟော်နန်ꩻ ငိမ်ꩻချမ်ꩻရေꩻတွမ်ႏ ထာꩻခခါꩻသꩻနောဝ်ꩻ တမဲဉ်လꩻတောဝ်းလဲ့ အီႏလꩻဗာႏနောဝ်ꩻသွူ။ ကွပ်နောဝ်ꩻမꩻ ခွိုင်းယိုမာꩻငါ ပအိုဝ်ႏပွယ်ꩻစာꩻ စွုမ်ႏဖြာꩻဖြာꩻ လွူးသွူသꩻဓာတ်ရက်စွိုးခွိုꩻ လိုꩻမျိုꩻတွော့ꩻ လွောင်ႏဗူႏသွူ အစွုမ်ꩻစွိုꩻတန်တဲင် ရုပ်ဗူႏခွုမ်သဲဉ်ꩻချာလꩻလꩻသွော့ ပအိုဝ်ႏစီꩻပွာꩻရေꩻတွော့ꩻ နွို့ဒိုတွူႏဖါႏကမ္ဘာႏစီꩻပွာꩻရေꩻ ဆေꩻခင်ဖေႏကနွောင်ꩻနောဝ်ꩻ အောဝ်ႏလိုႏထေနယ်ငါႏလဲဉ်းဝင်ꩻ စွန်ꩻထီထင်ထင်တန်အကျောင်ꩻ----။ နမ်းသꩻနီပါꩻ ယံချံꩻသာႏ ခွိုင်းယိုမာꩻငါ ပအိုဝ်ႏစီꩻပွာꩻရေꩻဆေꩻခင် ဖေႏကပယွုမ်းဗာႏ နုဲင်ႏငံႏကမ္ဘာႏလောင်းကီကရိုꩻနောဝ်ꩻ-[၁]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ကံႏထွိုက်ရော့ꩻ(ပင်သာႏ)၁-၃-၂၀၁၆၊ မောင်းမွူးခံꩻ အမုဲင်-၃၉၊ မဲ့ငါ-၂၀၊ အမုဲင်(၇၉)၊ မဲ့ငါ(၁၇)