သုပ္ပဗုဒ္ဓမော့ꩻရောႏဂါႏ
"သုပ္ပဗုဒ္ဓကုဋ္ဌိသုတ်(က) (သုပ္ပဗုဒ္ဓ မော့ꩻရောႏဂါႏ ကတွတ်ꩻဗာႏအကျောင်ꩻ)"
အွိုးခꩻတလဲင်ႏ နီဗွေႏဘုရာꩻအဝ်ႏအုံ ရာႏဇဂျိုဟ်ႏခမ်း၊ ကျောင်ꩻဝေဠုဝွန်ႏအတွင်ꩻ "သုပ္ပဗုဒ္ဓ"တကာႏတဖြာꩻနဝ်ꩻ မော့ꩻရောႏဂါႏတန် စူနုံတရွတ်ꩻ၊ ခင်ႏနုံတပွတ်ꩻ၊ ထွာလိုꩻတွတ်ꩻတဖြာꩻ၊ ဖူးဝေးမွိုးဖါ အဲဉ်ထဝ်းဒွုမ်၊ ရာႏဇဂျိုဟ်ႏ တခမ်းလိုမ်းလိုမ်းကို ဝွေꩻယိုထွာစွဉ်ႏ "မနုဿ ဒလိဒ္ဒေါ-လိုꩻခြော၊ မနုဿ ကပဏော-လိုꩻကေန်ꩻ၊ မနုဿ ဝရာကော-လိုꩻဝင်ꩻပသို့ꩻ"တဲင် သုပ္ပဒုဂ္ဂတော-ထွာစွဉ်ႏလိုꩻဒုက္ခသွတ်ꩻသွတ်ꩻနဝ်ꩻသွူ။ တွိုႏခꩻတနီꩻ- ဗွေႏသံဃာႏတွမ်ႏ တကာႏပရိသတ်ဖုံႏနဝ်ꩻ အဝ်ႏခြပ်ဗွေဗိတ်သော့ꩻစွဉ်ႏဒျာႏ မင်္ဂလာႏမဏ္ဍပ်တန်ကို၊ ဗွေႏမျတ်ဗွန်ထို အဝ်ႏဟော်ꩻတရာꩻ၊ သုပ္ပဗုဒ္ဓ အဝ်ႏညာꩻထီႏလွေꩻတဲင် ဝွေꩻယူႏ "ဝင်ꩻမာꩻပွယ်ꩻလူႏပွယ်ꩻတန်ꩻ၊ မဲ့သျင်ႏရဟန်ꩻသီးဖုံႏ ဖေႏဗဲင်းဝွေꩻဒဲဉ်ကင်ဟန်ႏကင်"ဝွေꩻယူႏနုဲင်းနဝ်ꩻတွော့ꩻ လွေꩻဗော့ꩻမဏ္ဍပ်ထျꩻ။ တောႏတနꩻဒျာႏ ဗွေႏဘုရာꩻအဝ်ႏဟော်ꩻတရာꩻတွင်ꩻ ဝွေꩻထွားငါလွေꩻ ဗွေႏဘုရာꩻတဲ့ သပ္ပါယ်ႏမွေးစွဉ်ႏထာꩻ၊ ထွားဗွေႏသံဃာႏတဲ့ ကေႏညိုႏခရာႏ ဟောဝ်မွေးစွဉ်ႏထာꩻ၊ "ခွေတဲ့ နာႏနုဲင်းနုဲင်းကတရာမꩻ"ချꩻသꩻနုဲင်းနဝ်ꩻထွူခါ ဝွေꩻလွေꩻအုံခန်း "ပရိသ ပရိယန္တေ-ပရိသတ်အမော့"ခင်ႏလမ်းတထွောင်းကိုနဝ်ꩻသွူ။ ဗွေႏဘုရာꩻ အဝ်ႏပလင်ႏလောင်းထီႏလွေꩻ ဝွေꩻအဝ်ႏအုံခေါ်ဗာႏဝင်ꩻ၊ "ပါꩻမုဲင်ꩻ အီႏထွာနွောင်ꩻအရိယာႏ၊ ပါꩻမုဲင်ꩻအီႏလꩻမဂ်ဖိုလ်ႏဟောင်း" ဉာဏ်ႏတောႏထာꩻသေ၊ ကထင်ႏအွဉ်ႏလေလွေꩻ သံဃာႏပရိသတ်၊ လိုꩻပရိသတ်ခြာသူꩻနဝ်ꩻ ဉာဏ်ႏစက်ဝွိုင်ꩻကိုယို "ဆဲင်ꩻသဲ့သဲ့သသတဖြဲ့က်-ကွဉ်ꩻတိုတိုတာတာတယဲ့က်၊ အွဉ်ႏတကုတ်ꩻကတူႏ နေးထူႏတရာꩻ၊ ပါꩻသုပ္ပဗုဒ္ဓတဖြာꩻ"ပေါႏသော့ꩻနောဝ်ꩻသွူ။ နာႏတရာꩻထွူ ပရိသတ်ခွန်နင်ꩻ ဝင်ꩻသဲင်ꩻထိုꩻလို့လဲဉ်းတဲင် ဝွေꩻလွေꩻထေ့ ဗွေႏဘုရာꩻ၊ နာႏဗာႏ "ဒါနကထာ-ဒါႏနခရာႏ၊ သီလကထာ-သီႏလခရာႏ"စတဲင်နုဲင်းနဝ်ꩻနဝ်ꩻ နစ်သက်ဟောဝ်ငါႏ၊ "ခွေသွဉ်းယိုနဝ်ꩻ မတ်ဒျာႏသွော့ ဗုဒ္ဓဘာႏသာႏ-ဥပါႏသကာႏ"တဖြာꩻ၊ လောဝ်းဗွေႏဘုရာꩻနုဲင်းနဝ်ꩻထွူတဲင် ထွိုင်ႏသဲင်ꩻထိုꩻခန်းနဝ်ꩻသွူ။ သုပ္ပဗုဒ္ဓ ကခြောဒုက္ခဗာႏ၊ ကတွတ်ꩻဗာႏအကျောင်ꩻနဝ်ꩻ ရဟန်ꩻသီးဖုံႏရီတဲင် ဗွေႏဘုရာꩻရိုꩻ- "ရဟန်ꩻသီးဖုံႏဟွေး- သုပ္ပဗုဒ္ဓနဝ်ꩻ ထွာဗာႏဖို ရာႏဇဂျိုဟ်ႏ သဌေꩻပိုခိုတဖြာꩻ၊ ဝွေꩻလွေꩻဥယျာဉ်ႏခြံ၊ တဖူꩻလောင်းနဝ်ꩻ ခွဲဆွုမ်ႏ'တဂ္ဂရသိခီ ပစ္စေကဗုဒ္ဓါႏ'တဲင် ဝွေꩻရိုꩻ'ပါꩻခြောဒုက္ခ၊ ပါꩻမွလိုꩻတွတ်ꩻ'တွော့ꩻ 'ပထူယုဲင်ꩻထီလွေꩻထိုꩻ'၊ ထွိုင်ႏသီနဝ်ꩻ ထဲ့ငါးရုဲင်ꩻ နေင်ႏပေါင်ꩻကညမရမက ပဉ်တကားမုဲင်ꩻမုဲင်ꩻ၊ ယိုခါမꩻ လွစ်ထန်ႏလꩻ ငါးရုဲင်ꩻ၊ အဆုဲင်ꩻသွတ်ꩻ သဲင်ꩻထွာလိုꩻတွတ်ꩻ သုပ္ပဗုဒ္ဓနောဝ်ꩻသွူ။ သုပ္ပဗုဒ္ဓတဖြာꩻ နာႏတရာꩻထွူ အောဝ်ႏဗွေႏဘုရာꩻထျꩻသဲင်ꩻ တွိုႏတဖူꩻလောင်းနဝ်ꩻ ဖိုးမွူးပေႏသားတဗာႏ ထောင်းသီခန်းဒျာႏ ဝွေꩻနောဝ်ꩻသွူ။ ရဟန်ꩻသီးဖုံႏ လွေꩻထီႏ၊ သဲင်ꩻလောဝ်းဗွေႏဘုရာꩻ၊ ရီပါနုဲင်းယို- "ဩဗွေႏ ဘုရာꩻမျတ်ဗွေႏဩ- သုပ္ပဗုဒ္ဓ သီထိုꩻလဲဉ်းသွူ၊ ဝွေꩻတွိုႏလွေꩻ ဘွုံႏဘဝမုဲင်ꩻ ဗွေႏဩ" "ရဟန်ꩻသီးဖုံႏဟွေး- သုပ္ပဗုဒ္ဓနဝ်ꩻ ရိုႏရိုႏသေႏသေႏ၊ နာႏတရာꩻထွူ လꩻတမဂ်တဖိုလ်ႏ၊ ထွာသောတာႏပန်ႏပုဂ္ဂိုလ်ႏတဲင် ယိုခါ အဝ်ႏထင်ႏထွာလဲဉ်း' လူꩻတာဝတိံသာႏ၊ အယောင်ꩻအဆင်ꩻတဲ့ တရေꩻလဲဉ်းလူꩻလင်၊ အချွေႏအရံႏဖုံႏတဲ့ အာလဲဉ်းလူꩻလင်" ဗွေႏဘုရာꩻဟော်ꩻနယ် နုဲင်းနောဝ်ꩻသွူ။ ဖိုးမွူးကထောင်းသီဗာႏဝွေꩻနဝ်ꩻ ကွပ်ပွိုးအကျောင်ꩻအဝ်ႏနုဲင်းယိုသွူ- အွိုးစခါ ဝွေꩻထွာဖိုသဌေꩻပိုတဖြာꩻ၊ ဝွေꩻဟဲ့ꩻတွမ်ႏ ဝွေꩻသွꩻပေႏသွံဖြာꩻတဲင် "ခတ်ꩻလွေꩻပါꩻမူႏယောင်ꩻရေꩻ"တဖြာꩻ၊ လွေꩻမွန်းပျောႏ ဥယျာဉ်ႏခြံကို တနီꩻမွူးမွူးစွဉ်ႏဒျာႏ၊ ပျောႏမရေႏမရာႏမွေးစွဉ်ႏထာꩻနောဝ်ꩻသွူ။ ပါꩻမူႏစူကိုနဝ်ꩻ ရွဉ်တရေင်တဲ့အဝ်ႏ၊ အငွဉ်ꩻဟွဲးခံꩻတဲ့အဝ်ႏ၊ ကွပ်နဝ်ꩻမꩻ မွူးတိန်ႏဟာတွော့ꩻ ပါꩻမူႏနဝ်ꩻ ဝွေꩻသီးအီႏမာꩻသီထိုꩻ၊ အီႏထူႏပါꩻမူႏနဝ်ꩻ ရွဉ်ခံꩻတဲင် ပါꩻမူႏခတ်ꩻနဝ်ꩻ ငွိုးထာꩻတောင်ꩻပြန်ႏအမျိုꩻမျိုꩻ၊ "လွူꩻခွေတဲ့ယဝ်း၊ ထူႏခွေရွဉ်ခံꩻတဲ့ယဝ်း၊ မာꩻသီမွုန်းခွေ"ဒေါ့ꩻငွိုးဒေါ့ꩻငွိုး တောင်ꩻပြန်ႏနုဲင်းနောဝ်ꩻ။ ဝွေꩻရီအသွꩻဖုံႏ "မာꩻနုဲင်းမုဲင်ꩻယို ပါꩻစားနောဝ်ꩻ" "ပါꩻမူႏယိုနောဝ်ꩻ ယွုမ်းအငေါဝ်းတလꩻတဝ်း၊ ဝွေꩻမဉ်ႏသဲင်ꩻတွိုင်ႏခွန်မဲ့ နီဝင်ꩻလစ်ꩻယို သီဗာႏလို့သနယ်၊ ကွပ်နဝ်ꩻမꩻ မာꩻသီတဝ်းထွာတဝ်း၊ မာꩻသီမꩻ" ပါꩻမူႏခတ်ꩻနောဝ်ꩻ တောင်ꩻပြန်ႏနုဲင်းမုဲင်ꩻတောင်ꩻပြန်ႏတဲ့ တရလွစ်ဒွုမ်တဲင် သꩻလျားတောစွဉ်ႏထာꩻ၊ "သီနဝ်ꩻ ထွာသွူလိုꩻခိုဖုံႏတဲ့ ကတိသစ္စာႏအဲဉ်ထဝ်း၊ ထာꩻဝင်ꩻသꩻအဲဉ်ထဝ်း၊ ထာꩻသညင်ꩻအဲဉ်ထဝ်း၊ ကိလေႏသာႏတရွူꩻ လွူꩻသွူခွေဗွိုႏဗွိုႏတွော့ꩻ မဉ်လꩻခြေင်ထဲင်းက ခွေရွဉ်ခံꩻ၊ အွဉ်ႏလင်ꩻမဲ့ထီ တောင်ꩻပြန်ႏသီတဲ့ တလꩻတဝ်း၊ သီမာꩻသီခွေ ယိုတလဲင်ႏလွုမ်ꩻ၊ ခွေအီႏမာꩻသီချာကသီ ဘဝပေါင်ꩻ အရေင်အရျာꩻနေး"အံႏခါꩻငေါဝ်းဒိုႏနုဲင်းနဝ်ꩻ၊ သီထွူ လွေꩻထွာဘီလူꩻမူႏ၊ ဖန်ဆင်ꩻအနမ်း ဖိုးမွူးပေႏသား၊ ထောင်းသီဝွေꩻသီး ကားမုဲင်ꩻဇာတ်ဇာတ်လဲဉ်းနောဝ်ꩻသွူ။ တွိုႏဗွေႏဘုရာꩻ ဂေါတမစိုးယို ဝွေꩻသီးလစ်ꩻဖြာꩻနဝ်ꩻ သဲင်ꩻထွာ "ခွန်ပက္ကုသာတိ၊ ဗာဟိယဒါရုစီရိယတက္ကတွဉ်ꩻ၊ တမ္ဗဒါဌိက (မာꩻသီစွန်တခွန်ꩻ၊ လိုꩻစူရုဲင်း) လိုꩻတွတ်ꩻသုပ္ပဗုဒ္ဓကုဋ္ဌိ"ယိုလစ်ꩻဖြာꩻဖုံႏသွူ။(သုတ္တန်ႏပိဋကတ်၊ ဥဒါနပါဠိ၊ အဋ္ဌကထာ၊ သုပ္ပဗုဒ္ဓကုဋ္ဌိသုတ်)[၁][၂]