သောကျာႏနီꩻ လွူးဘုရာꩻလောင်ꩻခန်ꩻ

အဝ်ႏ ဝီခီပီးဒီးယား ကို

နင်ꩻတန်မဟာမဟာႏဒေႏဝီႏနဝ်ꩻ သန္ဓေႏနမ်းလောင်းကီ၊ ကထင်ႏလꩻ အလာတဆီနောဝ်ꩻခါ၊ မဉ်သဲင်ꩻလယ်ႏချာ မွိုးဖါရပ်တဲင်၊ လဝ်းဟွုန်ကွီခွင်ꩻခန်း ခွန်တန်သုဒ္ဓေါဓနနဝ်ꩻသွူ၊၊ ခွန်တန်သုဒ္ဓေါဒန အွဉ်ႏစွꩻခွင်ꩻဖေႏထွူတဲင်၊ ကပိလဝတ်ခမ်းတွမ်ႏ ဒေဝဟခမ်း အခါႏလယ်ႏကိုနဝ်ꩻ၊ တင်ႏတယ်ႏအထူꩻ ဖျင်ခြိုင်းတဖူꩻထွူတဲင်၊ တွမ်ႏအသွဉ်းသယ်ႏ တင်ႏတယ်ႏချွေႏရံႏ၊ ထွဉ်ႏအလိုꩻထံႏသဲင်ꩻ နမ်းပဲင်ꩻမဟာႏမယာႏဒေႏဝိီႏနဝ်ꩻသွူ၊၊ ထင်ႏတွိုႏဖျော်လွေꩻ ဥယျာဉ်ႏလုမ္ဗိနီႏ၊ နင်ꩻတန်ကထွိုင်ႏထီႏ အင်းချင်းတုဲင် တရေꩻရဲ့ထာꩻ စတဲင်နုဲင်းနဝ်ꩻဖုံႏတွော့ꩻ၊ အွဉ်ႏယေန်ရွိုးလွား အုံပဆားခန်းရပ်နဝ်ꩻကိုသွူ၊၊ အဝ်ႏအုံပဆားနဝ်ꩻကိုအတွင်ꩻ၊ မဟာႏမယာႏဒေႏဝီႏနင်ꩻယို မဉ်လွူးလင်ꩻအပိုတဲင်၊ ချွေႏရံႏသွဉ်းမူႏ လောႏထူႏဖုဲင်ကင်း၊ ယွိုင်ႏခူဖေႏခန်း တလဲင်ႏချင်ꩻနဝ်ꩻသွူ၊၊ ကွပ်ပွိုးနဝ်ꩻမꩻ ဘုရာꩻလောင်ꩻအုံသန္ဓေႏအလာတဆီ(မွူးနီꩻပေါင်ꩻ-၂၉၅)၊ မဟာႏသက္ကရာဇ်-၆၈ဗာႏ၊ ဒဲဉ်ရုတ်ꩻလာဗွေနီꩻ၊ မွူးနီꩻသောကျာႏနဝ်ꩻ၊ လွူးဖွာꩻလင်ꩻခန်းဒျာႏ ဘုရာꩻလောင်ꩻနဝ်ꩻသွူ၊၊

တောင်ꩻခါꩻ=

  • ၁၊၊ ဘုရာꩻလောင်ꩻလွူးစ ကျွꩻထင်ꩻလွေꩻ(၇)ကာ
  • ၂၊၊ ပါꩻမုဲင်ꩻငမ်းတဝ်း၊ ဒေါ့ꩻငဝ်းတျက်တျက် (၅)ငွါ

(က) အဂ္ဂေါဟ မသ္မိ လောကဿ - လောကကိုယို ခွေမျတ်လွိုလဲဉ်းဝင်ꩻ၊၊ (ခ) ဇေဋ္ဌောဟ မသ္မိ လောကဿ - လောကကိုယို ခွေထွာအတန်သွတ်ꩻ၊၊ (ဂ)သေဋ္ဌောဟ မသ္မိ လောကဿ- လောကကို ခွေယို ဟဝ်အံႏဖြာႏကယ်ႏဝင်ꩻ၊၊ (ဃ)အယ မန္တိမာ ဇာတိ - ခွေကအုံသန္ဓေႏယိုနဝ်ꩻ ထွာအဆုဲင်ꩻသွတ်ꩻ၊၊ (င) နတ္ထိ ဒါနိ ပုနဗ္ဘဝေါ - ယိုခါ ခွေအီႏကွုတ်ထဲင်းခရာႏ အဝ်ႏဒွုမ်၊၊

  • ၃၊၊ ဘုရာꩻလောင်ꩻလွူးစ ဒေါ့ꩻဒါႏထာꩻ(၃)ဘဝ

(က) မဟောႏသဓာႏဘဝ (ခ) ဝေဿန္တရာႏဘဝ (ဂ) အဆုဲင်ꩻသွတ်ꩻယို(သိဒ္ဓတ္ထ) ဘဝ ယိုသွံဘဝ နဝ်ꩻသွူ၊၊

  • ၄၊၊ လွူးသွိုဘုရာꩻလောင်ꩻ (၇)

(က) ယသောႏဓရာႏ (ခ) အာနန္တာႏ(အာနန္ဒာႏ) (ဂ) ဆန္ဒအမတ်(ငဆန်ႏ) (ဃ) သေထီးဗွာ(ကဏ္ဍက) (င) မဟာႏဗောဓိ(ညောဝ်ႏမွူး) (စ) ကာဠုဒါႏယီႏအမတ် (ဆ) ခံꩻဖွိုင်ꩻလစ်ဖြုံႏ = ဇာတက အဋ္ဌကထာ (ပထမ)-၆၃ = ဒီဃနိကာယ မဟာဝဂ္ဂအဋ္ဌကထာ -၁၈ = ဗုဒ္ဓဝံသ အဋ္ဌကထာ-၃၂၂

  • ၅၊၊ ဘုရာꩻလောင်ꩻနဝ်ꩻ ဖန်ဖေႏအမဉ်ꩻ

သိဒ္ဓတ္ထ(ခွန်သီႏဓာတ်) နဝ်ꩻသွူ၊၊

  • ၆၊၊ လွူးဘုရာꩻလောင်ꩻထွူ ကထင်ႏလꩻ နွတ်ꩻနီꩻနဝ်ꩻ၊ ဘုရာꩻလောင်ꩻမွိုး သက်တန်ꩻကထင်ႏလို့ဆွိုးတဲင်၊ ဘဝတသာ ပြောင်ꩻငါခန်းဒျာႏ၊ ထင်ႏထွာတေားလူꩻခို၊ တုသိတာႏခမ်း "သန္တုဿိတ" ခွန်လူꩻနဝ်ꩻသွူ၊၊


ငဝ်းလင်္ကာႏ[မွဉ်းဖျင် | မွဉ်းဖျင်အရွီးခိုႏ]

   အုံထွူသန္ဓေႏ         မွိုးနမ်းကီ
   အလာတဆီ        ကထင်ႏလꩻ
   မွိုးဗွေႏအသꩻ        သေနန်းချာ
   မွိုးယိုတွမ်ႏဖါ       ဖူးဝေးချင်ꩻ
   လဝ်းနယ်ဝါꩻရင်ꩻ     ခွန်ရာႏဇာႏ
   လယ်ႏခွင်ꩻဖေႏဒျာႏ   အီႏထမ်ႏပြွတ်
   ကပိလဝတ်         ခွန်ဌာႏန
   ဒေဝဒဟ         မာနင်ꩻခမ်း
   နီဖဲ့ꩻခင်ႏလမ်း       အခါႏလယ်ႏ
  မာꩻယံတင်ႏတယ်ႏ     ဖျင်တဖူꩻ
  ခွန်လိုꩻရံႏစူꩻ        သဲင်ꩻလယ်ႏချာ
  တွိုႏလွေꩻဗꩻငါ        လုမ္ဗိနီႏ
  နင်ꩻမျတ်ထင်ႏထီႏ      အင်းချင်းတုဲင်
  ခွꩻသꩻစွုမ်းပြုဲင်         အုံပဆား
  အင်းချင်းပင်ယွား       အုံထွိုင်ႏဖွို့ꩻ
  တလီꩻလောႏထွို့ꩻ       အီႏလွူးသွူ
  သွꩻမူႏသေထွူ        ဆေင်ႏဖုဲင်ကင်း
  မွိုးဟို့ꩻကိုနင်း         ပလ္လင်ႏကီ
  လောင်ꩻမျတ်ပေႏအီ    ကျွꩻထန်ႏလင်ꩻ
  ကျွꩻငါလွေꩻထင်ꩻ     ခင်ႏနွုတ်ꩻကာ
  ဒေါ့ꩻငဝ်းငတ်ꩻငွါ       ထူꩻဆန်ꩻငါႏ
  လူꩻလိုꩻဗျဟ္မာႏ        ယိုဖုံႏရင်ꩻ
  ခွေမျတ်လွိုဝင်ꩻ         ထွာအတန်
  အံႏဖြာႏထွိုက်သန်     သန္ဓေႏယဝ်း
  ကွုတ်ထဲင်းဒွုမ်တဝ်း   ဆုဲင်ꩻတလဲင်ႏ
  ရုဲင်းဟန်ဒေါ့ꩻပဲင်ႏ        ငမ်းတဝ်းဝင်ꩻ
  သူသွစ်ꩻနေင်ႏတွင်ꩻ     ဒဲဉ်ရုတ်ꩻလာ
  ဗွေနီꩻနဝ်ꩻခါ         ထွာသောကျာႏ
  ကလွူးဖွာꩻဒါႏ         ခွန်ပေႏဆား
 ဖုတ်ဖဲ့ဗွာလွား          သꩻကိုယူႏ
 ခွꩻသꩻရောင်းရျူႏ        စူတဆီ
ကတောင်လောင်းကီ   ယွော့အွဉ်ႏဒင်ႏ
ရိုႏသေႏဝုဲင်ႏထင်ႏ      ခွန်ပေႏနီဗွေႏဩ။ 

 လွူးဖွာꩻခန်ꩻနေား      ကဝုဲင်ႏဗာႏ
 နိဗ္ဗာန်ႏချမ်ꩻသာႏ       ယံလꩻမွေး
 မဉ်ႏလꩻဒွိုန်းဟွေး      အယံတွင်ꩻ
 စွုမ်ႏဘဝရင်ꩻ         မဉ်ႏလွူးခွေ
 သောင်ထျꩻစေႏထွေ    ဆရာႏမူႏ
 အ၀်ႏခူအဝ်ႏဗူႏ         မနန်းခီ
 နုဲင်းစွဉ်ႏစဲစ်ထီ         လွူးယိုꩻမာꩻ
 မွိုးဖါနီဖြာꩻ         အဝ်ႏစွုမ်ႏဒျာႏ
 ဟဝ်လက္ခဏာႏ       ယောင်ꩻကရေꩻ
 ထွာဒျာႏသဌေꩻ        မွိုးဖါခြွေ
 သဲစ်လွူးဖွါꩻခွေ        ကလိုႏရာꩻ
 အဝ်ႏတထွူထာꩻ       စုံႏစုံႏလင်ႏ
 ဘုံꩻကံႏထိုထင်ႏ        တငါငါ
 ကေားရက်သားအာ   ရိမ်ယွော့ဖင်ꩻ
 ယံလွိုလဲဉ်းဝင်ꩻ      စစရာႏ
 စွုမ်ႏဖြာꩻချမ်ꩻသာႏ   ဆုတောင်ꩻနုဲင်းနဝ်ꩻဩ။[၁]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ဗွေႏဗွန်သီႏသဲင်ႏ (တဲမ်း)၊ ဘာႏသာႏရေꩻဗဟုသုတ အမုဲင်(၃)