ဟို့ꩻထိုꩻဓာတ်ကုဲင်

အဝ်ႏ ဝီခီပီးဒီးယား ကို

"ဟို့ꩻထိုꩻဓာတ်ကုဲင်ရောႏဂါႏတွမ်ႏ တသီႏနယ်ꩻဖုံႏ"

ဟို့ꩻထိုꩻကရိုꩻနဝ်ꩻ ထိုꩻပုံႏထိုꩻနယ်ꩻ အဝ်ႏအမျိုꩻမျိုꩻ၊ အကျောင်ꩻတရာꩻ အဝ်ႏအမျိုꩻမျိုꩻ၊ ဟို့ꩻထိုꩻလုံးဖြော့ꩻခရာႏနဝ်ꩻ တဲမ်းခေါ်ခေါ်လဲန်း ရွမ်ဖြုဲင်ꩻတပုတ်တဲင် ယိုနဝ်ꩻ အီႏတဲမ်းနယ်လုဲင်ႏ ဟို့ꩻဓာတ်ဓာတ်ကုဲင်ရောႏဂါႏအကျောင်ꩻသွူ။ ဟို့ꩻထိုꩻဓာတ်ကုဲင်လဲ့နဝ်ꩻ၊ ဟို့ꩻထိုꩻလုံးဖြော့ꩻလဲ့နဝ်ꩻ၊ ဟို့ꩻထိုꩻရိုꩻရိုꩻလဲ့နဝ်ꩻ မူလအကျောင်ꩻတရာꩻနဝ်ꩻ အဝ်ႏဓာတ်မေႏအာႏပေႏ၊ ဆာႏတကေႏတဝ်းတဲင် ကဲန်းအာအာနဝ်ꩻ ထွာခမ်းခါ၊ ဒဲန်ရုတ်ꩻ ဒဲန်စေတ်ꩻလာဖုံႏသွူ။ ခမ်းခါယိုနဝ်ꩻ လိုꩻသီးဓာတ်မေႏ အာႏပေႏသွူတကာႏတဝ်း ဟို့ꩻကထိုꩻအီဒါႏ မောက်ကြင်ꩻ၊ တခေါ့ꩻ-စတဲင် သေင်ႏရောင်ꩻသေင်ႏရာႏဖုံႏနဝ်ꩻလဲ့ လွိုင်ႏအာခမ်းခါတွော့ꩻ ကွပ်အံႏအာ အံႏမာႏသေင်ႏရာႏ ဆာႏတကေႏတဝ်းမျိုꩻဖုံႏတွော့ꩻ ထွာလွေꩻဟို့ꩻရောႏဂါႏနဝ်ꩻ ကဲန်းအာအာသွူ။

ခမ်းခါနဝ်ꩻ ဓာတ်မေႏအာႏပေႏလာတဲင် ပေါႏလွေꩻအံႏအာ အဆာႏတကေႏတဝ်းမျိုꩻနဝ်ꩻ ကုဲင်းထွာဒါႏဟို့ꩻရောႏဂါႏအမျိုꩻမျိုꩻသွူ။ ဟို့ꩻရောႏဂါႏအမျိုꩻမျိုꩻကရိုꩻနဝ်ꩻ ဟို့ꩻဓာတ်ကုဲင်၊ ဟို့ꩻထိုꩻလုံးဖြော့ꩻ၊ ဟို့ꩻထိုꩻရိုꩻရိုꩻ၊ ဟို့ꩻဗွေဟို့ꩻတအွောင်ႏ၊ ဟို့ꩻခြေ့-စတဲင်နုဲင်းနဝ်ꩻဖုံႏသွူ။ လိုꩻသီးဓာတ်မေႏ အာႏပေႏခိန်ႏနဝ်ꩻ မီႏလွေꩻအံႏမာႏ၊ မီႏလွေꩻအံႏအာ အာဟာႏရ အဆာႏတကေႏတဝ်းမျိုꩻဖုံႏ၊ ဒဲန်ခွꩻ ဟန်ႏအိုခွꩻ၊ ဒဲန်ဆော့ဟန်ႏအိုဆော့ဖုံႏ၊ သေင်ႏရာႏကမိဉ်လွဉ်ꩻထာꩻဖုံႏ၊ ဖေ့ထူꩻကဟိုမ်ဒါႏ ထာꩻအံႏမျိုꩻဖုံႏနဝ်ꩻ ကုဲင်းထွာဒါႏ ဟို့ꩻရောႏဂါႏသွူ။ ဟို့ꩻထိုꩻဓာတ်ကုဲင်ကရိုꩻယိုနဝ်ꩻ ဟို့ꩻလွေꩻခွိုꩻ၊ ဟို့ꩻလွေꩻအထီ၊ ဟို့ꩻလွေꩻပဲစ်ꩻ၊ ဟို့ꩻကလွေꩻနဝ်ꩻ အဗို့ꩻကုဲင်းပါ၊ ယလဲင်ႏလဲင်ႏ သꩻတကုဲင် မဲန်အော့ꩻပါထာꩻ၊ အံႏထာꩻလဲ့ တအွီႏငါႏတဝ်း၊ အံႏထွူလဲ့ ဆာႏတကေႏတဝ်းတဲင် အုံထာꩻတဟဝ်ငါႏတဝ်း-စတဲင် လက္ခဏာႏနုဲင်းယိုနဝ်ꩻ ဟဲ့ꩻဟို့ꩻထိုꩻဓာတ်ကုဲင်ရောႏဂါႏသွူ။ ဟို့ꩻလွေꩻယွဲး လိုꩻပဲစ်ꩻလွေꩻအထီ လဲင်ႏစိꩻစိꩻ တမွေးတဝ်းတွော့ꩻ ကလွေꩻထီ လွေꩻအာဒါႏပိဉ်လဲင်ႏလဲင်ႏနဝ်ꩻ ဟဲ့ꩻဟို့ꩻထိုꩻရိုꩻရိုꩻသွူ။ ဟို့ꩻထိုꩻရိုꩻရိုꩻနုဲင်းယိုနဝ်ꩻတဲ့ အကျောင်ꩻမာꩻထွာ ဓာတ်မေႏအာႏပေႏ ဆာႏတကေႏတဝ်းနေနေတဲင် တွမ်ႏဟို့ꩻထိုꩻဓာတ်ကုဲင်နဝ်ꩻ တပွိုင်းကွာႏငါႏတဝ်း၊ တသီႏလဲ့ ဗွိုန်ဒျာႏတဝင်ꩻ ကဲန်းအာအာသွူ။ ခမ်းခါ ဓာတ်မေႏအာႏပေႏခိန်ႏယိုနဝ်ꩻ ကတဲမ်းနယ်ဒါႏအတွိုင်ꩻ ကုဲင်းထွာဒါႏ ဟို့ꩻရောႏဂါႏတဲင် ချင်းအုံချင်းအဝ်ႏ၊ ချင်းအံႏချင်းအွꩻဗာႏသွူ။ ထာꩻအံႏဆာႏနန်ꩻကေႏမျိုꩻ၊ သေင်ႏရာႏမိဉ်လွဉ်ꩻထာꩻ၊ ဒဲန်ဆော့ဟန်ႏအိုဆော့ဖုံႏနဝ်ꩻ အဝ်ႏလိုႏအံႏတဝ်းသွူ။ ပွိုင်းဝွို့တွမ်ႏဟို့ꩻတဲင် မီႏသေနာႏသွူ တစွိုးစွိုး တမျိုꩻမျိုꩻနဝ်ꩻ အဝ်ႏလိုႏအံႏမွိုင်မွိုင် တသီႏဆာႏကေႏ၊ တသီႏအရသာႏလိုမ်ꩻဗွောင်ဖုံႏသွူ။

မိဉ်ႏထွာ မိဉ်ႏမော့ꩻဒါႏ ဟို့ꩻထိုꩻဓာတ်ကုဲင်၊ ဟို့ꩻထိုꩻရိုꩻရိုꩻဖုံႏနဝ်ꩻ ကသုံꩻကအွꩻဒါႏ ထီယိုလဲ့ အဝ်ႏလိုႏအွꩻတဝ်း ထီတသဉ်၊ အဝ်ႏလိုႏအွꩻဒါႏ ထီလိုမ်ꩻခွꩻ (ထီမိဉ်)ဖုံႏသွူ။ ထာꩻအံႏထာꩻအွꩻဖုံႏလဲ့ အဝ်ႏလိုႏဒို့ꩻဟဝ်ဟဝ်၊ အဝ်ႏလိုႏအံႏကြောင်းကြောင်း၊ အဝ်ႏလိုႏအံႏလိုမ်ꩻလိုမ်ꩻသွူ။ ထာꩻအံႏတစွိုးစွိုး တမျိုꩻမျိုꩻယို အံႏအွီႏတွိုင်ꩻလဲ့ အဝ်ႏလိုႏအံႏအာငါႏတဝ်း၊ ချင်းနီဟို့ꩻ၊ ချင်းနီဓာတ်မေႏအာႏတဲင် အဝ်ႏလိုႏချင်းအံႏချင်းအွꩻသွူ။ မီႏထွာလဲန်းသွူ ဟို့ꩻရောႏဂါႏတမျိုꩻမျိုꩻနဝ်ꩻ ပျုစုလိုမ်ꩻလာꩻချာဗာႏ အနယ်ꩻနုဲင်းဆꩻလဖုံႏယိုအတွိုင်ꩻသွူ။

ဟို့ꩻထိုꩻရောႏဂါႏ တသီႏနယ်ꩻဖုံႏ[မွဉ်းဖျင် | မွဉ်းဖျင်အရွီးခိုႏ]

  • ၁။ ဟို့ꩻမီႏထိုꩻနဝ်ꩻ ထိုꩻအမျိုꩻမုဲင်ꩻတယဝ်း ဖေႏကယွုတ်ꩻချာနဝ်ꩻ မောက်ꩻမူးရာႏတဖြုံႏယို တောက်ꩻဗွပ်ꩻသွူတွော့ꩻ သော့ꩻထီနီဗွီႏရပ် ခြွူလꩻလꩻညညသွူတွော့ꩻ အွꩻဖေႏအံႏဖေႏတွမ်ႏ ဇာတိဝင်္က (ဇာႏတိဝင်ႏ)စတဲင် တသီႏအရသာႏ လိုမ်ꩻဗွောင်တမျိုꩻမျိုꩻ၊ အံႏဖေႏခွိုꩻခွိုꩻ တနီꩻလစ်ꩻငတ်ꩻလဲင်ႏနဝ်ꩻ ဟဝ်ခွုန်ꩻ၊ ယွုတ်ꩻခွုန်ꩻဒျာႏသွူ။
  • ၂။ ဟို့ꩻမီႏထိုꩻနဝ်ꩻ မဲန်ထိုꩻအနယ်ꩻမုဲင်ꩻထိုꩻ ဟူထာဝဖိုးနဲန်းထီဗုတ်ꩻယို ငိုးတသီးသွူတွော့ꩻ သော့ꩻဝန်ႏဟံးတန်တန်ထွူတွော့ꩻ ဆျာꩻသော့ꩻလွဉ်ꩻထီ၊ ဆျာꩻဟံးအာအာ ပေါႏတအွိုယေန် ဟံးခွꩻခွꩻသွူလဲ့ ဆျာꩻထန်ႏ အွꩻဖေႏခွိုꩻခွိုꩻနဝ်ꩻ ဟဝ်ဒျာႏသွူ။ ပေါႏထီလို့လဲ့ ဆျာꩻသော့ꩻသံးယင်းထီတွော့ꩻ စဲးယင်းအွꩻယင်း အဝ်ႏလꩻဒျာႏသွူ။ မီႏမဲန်ဟဝ်မွိုင်မွိုင်နဝ်ꩻ အထီယို သော့ꩻနေးထွန်ထီစွူနဝ်ꩻ ယိန်းဟဝ်မွိုင်မွိုင်။
  • ၃။ ဟို့ꩻမီႏထိုꩻနဝ်ꩻ မဲန်ထိုꩻအမျိုꩻမုဲင်ꩻထိုꩻ၊ မဲန်ထိုꩻအနယ်ꩻမုဲင်ꩻထိုꩻ အယိုꩻသွတ်ꩻ အဟဝ်သွတ်ꩻ တသီႏနယ်ꩻတနယ်ꩻနဝ်ꩻ တခေါ့ꩻလာႏ (တခေါ့ꩻထာꩻမုဲင်ꩻမုဲင်ꩻတယဝ်း)အမောင်ꩻထျꩻ၊ အမောင်ꩻပိုမ်ယို ထွားဟို့ꩻအခေႏအနေႏ၊ ထွားလိုꩻနမ်းပေႏတန် အခေႏအနေႏတဲင် အဆေ့ꩻသွတ်ꩻ ၅-ဗာႏ၊ အအာသွတ်ꩻ ၈-ဗာႏရပ်ယို စုဲင်ပဲစ်ꩻပဲစ်ꩻတွော့ꩻ အံႏနဝ်ꩻ ဟဝ်ငါႏရိုꩻနဝ်ꩻသွူ။ အံႏတလဲင်ႏ မီႏရနွောင်ꩻတဝ်းဒွိုန်းလဲ့ အံႏဖျင်တလဲင်ႏနဝ်ꩻ ဟဝ်ဗာႏအမန်ႏသွူ။

တသီႏဟို့ꩻပိတ်အလင်နဝ်ꩻ ဟို့ꩻပိတ်သွူလဲ့ သꩻဟဝ်တဝ်း၊ ဟို့ꩻဗွေ၊ ဟို့ꩻတချဒါႏ၊ အော့ꩻဒါႏ၊ ဖြောင်းအွီႏတဝ်း၊ ထွာဒါႏနုဲင်းနဝ်ꩻလဲ့ တခေါ့ꩻမောင်ꩻပိုမ်ယိုနဝ်ꩻ ထွာတဝ်းနုဲင်းမုဲင်ꩻမုဲင်ꩻ၊ တလိꩻလွေꩻဒျာႏ၊ ဟို့ꩻတခြင်ဒျာႏ၊ ဖြောင်းအွီႏဒျာႏရိုꩻနဝ်ꩻသွူ။

  • ၄။ တသီႏဟို့ꩻထိုꩻဟဝ်နယ်ꩻ ထဲင်းတနယ်ꩻနဝ်ꩻ အေင်တသိဉ်တွမ်ႏအေင်ခြိမ်ꩻလာႏ (ပင်စိမ်းရွက်)ယို ထောင်းပဲစ်ꩻညီႏတဝင်ꩻ ဆိုမ်ႏကြောင်းကြောင်းကိုတွော့ꩻ စေ့ꩻအထီ၊ တသီႏယိုအထီ တစောအံႏဟန်ႏအိုတွမ်ႏ တဝတ်ꩻထီဆေ့ꩻဆေ့ꩻတွော့ꩻ အွꩻဖေႏနဝ်ꩻလဲ့ ဟို့ꩻထိုꩻယွုတ်ꩻနေနေသွူ။
  • ၅။ ဟို့ꩻမီႏထိုꩻနဝ်ꩻ ထိုꩻအနယ်ꩻမုဲင်ꩻတယဝ်း တမာႏလာႏတဆ၊ ထီ(၃)ဆ ခြွူသွူတွော့ꩻ ပေါႏထီအဝ်ႏကုဲင် တဆလဲ့ လင်းလင်ꩻအွဉ်ႏခွꩻထွူတဲင် တမာႏလာႏခြွူထီ စေားအံႏဟန်ႏအို တထာဝယို အွꩻဖေႏ ၄-နားရီႏတလြင်ႏနဝ်ꩻ ဟဝ်ဒျာႏရိုꩻနဝ်ꩻသွူ။
  • ၆။ ဟို့ꩻမဲန်ထိုꩻအနယ်ꩻမုဲင်ꩻထိုꩻ တစေꩻတတွာမောက်ꩻကြဲင်ႏခူꩻ ၂-ခူꩻရပ်၊ ပြူးလာႏ အဗီႏ (၁၀)၊ ခြေင်ႏပန်လာႏ (ကြောင်ပန်းရွက်) စူတဆုတ်ꩻယို သော့ꩻထီတပလဲင်ꩻတန်ရပ် ခြွူသိုမ်ထီတထီတွော့ꩻ ကအဝ်ႏကုဲင်ထီယို အွꩻဖေႏ ၃-လဲင်ႏနဝ်ꩻ ဟဝ်ဒျာႏသွူ။
  • ၇။ ဟို့ꩻထိုꩻရောႏဂါႏနဝ်ꩻ ထထီႏဆျာႏ (ဖီးကြမ်းငှက်ပျောသီး) အမိုယို အိုႏထိုꩻအပီတွော့ꩻ သွတ်ꩻနေးတရိုꩻတဝ်း၊ ဖို့ꩻနေးတရိုꩻတဝ်း မီႏအံႏဖေႏနဝ်ꩻ ဟဝ်ဒျာႏသွူ။ အဆေ့ꩻအအာနဝ်ꩻ ချင်းသွတ်ꩻချင်းဖို့ꩻ ချင်းအံႏဒျာႏသွူ။ အလွဉ်ꩻအမာႏ တအဲန်ထဝ်းသွူ။
  • ၈။ ဟို့ꩻမီႏထိုꩻနဝ်ꩻ တခေါ့ꩻစော့ꩻဆား တရိုꩻတဝ်း၊ မောက်ကြဲင်ႏစော့ꩻဆားတရိုꩻတဝ်း သော့ꩻနွုမ်ꩻနွုမ်ꩻထေင်ဗွာတွော့ꩻ မီႏကြူးအံႏဖေႏနဝ်ꩻလဲ့ ဟဝ်ဒျာႏနေနေသွူ။

တခေါ့ꩻစော့ꩻနဝ်ꩻ သွတ်ꩻဗာႏနေး၊ မောက်ကြဲင်ႏစော့ꩻနဝ်ꩻ သွတ်ꩻခရာႏလိုႏတဝ်းသွူ။ ကကြူးနဝ်ꩻ သော့ꩻပုဲင်ႏဒွုမ်ခဲန်ႏမꩻဟဝ်သွူ။

  • ၉။ ဟို့ꩻထိုꩻဓာတ်ကုဲင်တွော့ꩻ ဟို့ꩻလဲ့ဖေႏကယွုတ်ꩻ၊ အာႏလဲ့ ဖေႏကထွာနဝ်ꩻ ခြွူလꩻလꩻဆျာယာႏတွော့ꩻ အွꩻဖေႏဆျာယာႏခြွူထီနဝ်ꩻလဲ့ ဟဝ်နေနေသွူ။

ဆျာယာႏယို ငိုးမိဉ်သွူတွော့ꩻ သွယ်ꩻဗွိုဗွို ကြူးတွမ်ႏပခေါ် ဖက်ꩻဗိုႏ ခုံꩻဆျာႏ စောက်ꩻသွီထီနဝ်ꩻလဲ့ ဟို့ꩻယွုတ်ꩻထွာအာႏနေနေသွူ။

  • ၁၀။ ဟို့ꩻထိုꩻဖေႏကယွုတ်ꩻနဝ်ꩻ အဝ်ႏလိုႏတသီႏ အရသာႏတချꩻတဲင် အံႏအဲင်ႏဖေႏ တခေါ့ꩻခူꩻအကိုဗွာဗွာလဲ့နဝ်ꩻ၊ တခေါ့ꩻခူꩻယို အွဉ်ႏသဲင်ထောင်းဖွန်ႏတွော့ꩻ ချင်းအံႏဖေႏလဲ့နဝ်ꩻ ဟဝ်ဒျာႏယွုတ်ꩻဒျာႏနေနေသွူ။
  • ၁၁။ ဟို့ꩻမီႏထိုꩻနဝ်ꩻ ခြွူအွꩻမောက်ꩻစင်းဖေ့ꩻလဲ့နဝ်ꩻ၊ အံႏစုဲင်မောက်ꩻစင်းစော့ꩻလဲ့နဝ်ꩻ မောက်စင်းနဝ်ꩻ အရသာႏတချꩻတဲင် ဟဝ်ဒျာႏနေနေသွူ။
  • ၁၂။ ဟို့ꩻထိုꩻရိုꩻရိုꩻ တရိုꩻတဝ်း၊ ဟို့ꩻထိုꩻလုံးဖြော့တရိုꩻတဝ်း၊ ဟို့ꩻဗွေဟို့ꩻအွောင်ႏတရိုꩻတဝ်း ဖေႏကဟဝ် ဖေႏကရေꩻနဝ်ꩻ စွုမ်ႏဒုံစွုမ်ႏရပ် ဆဲင်ႏတွိုင်ꩻကအဝ်ႏစာဒါႏ တသီႏမဟာဖြေဆေး (ကေရုတ်)ယို ချင်းဟို့ꩻချင်းနမ်း အခေႏအနေႏတွော့ꩻ အံႏဖေႏတွမ်ႏထီလိုမ်ꩻနဝ်ꩻလဲ့ ဟဝ်ဒျာႏနေနေသွူ။
  • ၁၃။ ဟို့ꩻမီႏထိုꩻနဝ်ꩻ သေင်ႏမဲးသက်ꩻ (ကျွန်းပင်)အဖေ့ꩻယို အွဉ်ႏသဲင်ထောင်းဖွန်ႏသွူတွော့ꩻ စဲးတွမ်ႏထီလျားတစ်ꩻတစ်ꩻ အွꩻဖေႏလဲ့နဝ်ꩻ၊ မဲးသက်ꩻဖေ့တသိဉ်ယို ပသေကြောင်းကြောင်း တဒွေါ့ꩻပဲစ်ꩻတွော့ꩻ စဲးတွမ်ႏထီလျားတစ်ꩻတစ်ꩻ အွꩻဖေႏလဲ့နဝ်ꩻ ဟဝ်နွောင်ꩻဒျာႏသွူ။ မဲးသက်ꩻဖေ့ꩻထီယိုနဝ်ꩻ ဆီႏခြောက် (ကျောက်တည်)ရောႏဂါႏဖုံႏလဲ့ ဟဝ်အီခြီအီနွောင်ꩻသွူ။
  • ၁၄။ ဟို့ꩻမီႏထိုꩻအာနဝ်ꩻ ရွိုးအွန်းအာႏလို့ဒါႏတြင် အာႏဖေႏကဗွေချာနဝ်ꩻ အွꩻဖေႏဗာႏ "ဓာတ်ဆား"ထီသွူ။ ဓာတ်ဆားနဝ်ꩻ ဆဲင်ႏတွိုင်ꩻဝင်ꩻအဝ်ႏစာဒျာႏသွူ၊ ဓာတ်ဆားတလွမ်နဝ်ꩻ ဖျောႏတွမ်ႏ "ရေသန့်"တပလဲင်ꩻတန်တဲင် အွꩻအာအာဖေႏဗာႏသွူ။ ဖျောႏဟန်ႏနီꩻ အွꩻလို့ဗာႏဟန်ႏနီꩻ၊ အွဉ်ႏတွိုႏမွူးရဝ်ꩻနီꩻနဝ်ꩻ ဟဝ်တဝ်းသွူ။
  • ၁၅။ ဟို့ꩻထိုꩻသားတာႏ ဓာတ်ဆာႏစာ မီႏအဲန်ထဝ်းနဝ်ꩻ ဖျောႏခေါ်ဒျာႏနုဲင်းအနယ်ꩻ လယိုအတွိုင်ꩻတွော့ꩻ အွꩻဖေႏနဝ်ꩻလဲ့ လꩻဒျာႏသွူ။

ဓာတ်ဆားဖျောႏနယ်ꩻနဝ်ꩻ ထီလိုမ်ꩻခွꩻ ၂-ပလဲင်ꩻတန်၊ တသာႏဆိုမ်နဝ်ꩻ စေားနေင်းထီနွိုး တထာဝ၊ တသာႏသိကျာꩻနဝ်ꩻ စေားအံႏဟန်ႏအို (၈)စေား၊ သော်တာအံႏ စေားနေင်းထီနွိုး တထာဝ၊ ယို (၄)မျိုꩻ ဖျောႏရော်ꩻတဝင်ꩻနဝ်ꩻ ထွာဓာတ်ဆားထီတဲင် အွꩻလို့လို့ဖေႏဗာႏ တနီꩻချင်ႏသွူ။ တသာႏသိကျာꩻ မီႏအဲန်ထဝ်းနဝ်ꩻ သော့ꩻလုဲင်ႏတောင်းလျက်ꩻထန်ꩻ (၈)လုံꩻလဲ့ လꩻဒျာႏသွူ။

  • ၁၆။ ဟို့ꩻထိုꩻသားယို အံႏပုဲင်ႏ အာဟာႏရဆွော့ꩻတွော့ꩻ အံႏဖေႏဒဲန်ပနဲဉ်ႏ (တဝ်းလဲ့) ဒွိုႏအံႏနေးဒဲန်ပဲစ်ꩻ (ဆန်ပြုတ်)နဝ်ꩻ ဟဝ်သွူ။
  • ၁၇။ ဟို့ꩻထိုꩻနဝ်ꩻ ထိုꩻအမျိုꩻမုဲင်ꩻတယဝ်း မီႏထိုꩻအာလွဉ်ꩻ၊ အာႏမီႏယွမ်ꩻလွဉ်ꩻထာꩻနဝ်ꩻ လိုႏသွင်ꩻနေးတသီႏအာႏ ဗုတ်ꩻတန်စားလဲ့ သွင်ꩻဗာႏသွူ။ ဆရာႏသွင်ꩻဖေႏ မီႏအဲန်ထဝ်း ဒုံကိုရပ်ကိုနဝ်ꩻ ပသာဗာႏတသီႏယုံႏဝေင်ꩻကိုသွူ။
  • ၁၈။ ဟို့ꩻထိုꩻသားနဝ်ꩻ ဖေႏအွꩻဗာႏတဝ်း ထီတသဉ်၊ အွꩻဗာႏဒျာႏ ထီလိုမ်ꩻခွꩻသွူ။ ဟို့ꩻထိုꩻသားတာႏ အွꩻခရာႏထီယို မီႏအွဉ်ႏဖေႏသေႏသေႏ ဟူငိုးထီတရိုꩻတဝ်း၊ ဒဲန်ဖို့ꩻထီတရိုꩻတဝ်း ချင်းသော့ꩻတွမ်ႏတသာႏသိကျာꩻ၊ သော့ꩻပါတွမ်ႏ တသာႏဆိုမ်ဆေ့ꩻဆေ့ꩻနဝ်ꩻ တသီႏလဲ့ထွာ၊ ဟို့ꩻလဲ့ယွုတ်ꩻအီတဲင် မာႏခရာႏအဲန်ထဝ်းသွူ။
  • ၁၉။ ဟို့ꩻထိုꩻရောႏဂါႏမန်ႏသမျနဝ်ꩻ ဓာတ်မေႏအာႏပေႏတွော့ꩻ ဆာႏတကေႏတဝ်း၊ တလီꩻတကေႏတဝ်း လွဉ်းလွဉ်းတဲင် သိန္ဓော်ꩻ၊ ဇဝက်သာꩻ၊ သွီႏနွိုး (နွယ်ချို)၊ ပရုပ်ကပါဒါႏ တသီႏဆာႏကေႏ (လျက်ဆား)ဖုံႏယိုလဲ့ အဝ်ႏလိုႏအံႏဖေႏခွိုꩻခွိုꩻသွူ။ အံႏတဲစ်ꩻခွိုꩻခွိုꩻနေးလဲ့ လꩻဒျာႏသွူ။[၁]

ခြွိုင်ႏသန်ꩻရေꩻ အမော့ꩻအကျုံႏ(၇)[မွဉ်းဖျင် | မွဉ်းဖျင်အရွီးခိုႏ]

နေင်ႏ ၁၃၃၉-ဗာႏနဝ်ꩻ ခွန်ကုဝေ အဝ်ႏအုံဗွောင် လူထုတန်ꩻကျောင်ꩻ ဇာႏတိရပ်ရာႏ ဒုံလဲင်းခါႏကိုသွူ။ အနေင်ႏယို လာဒဲဉ်စေစ်ꩻလောင်းရပ်နဝ်ꩻ အဆာႏခြုံတလီꩻဆာ ဟံးထွာသန်သွူ။ ဟို့ꩻကိုအဆာႏ အာဟာႏရမီႏတခြင်ခိန်ႏနဝ်ꩻ ဟို့ꩻအဆာႏခြုံရပ်နဝ်ꩻ သေနာႏအတအွစ်ꩻ၊ သေနာႏအခြေ့ပအွုမ်ထာꩻသွူ။ မီႏအံႏသော့ꩻယင်း အာဟာႏရတစွိုးစွိုးလဲ့ ထိုꩻမားယင်းဒျာႏသွူ။ ကွယ်ႏတွော့ꩻ အုံအဝ်ႏထာꩻနဝ်ꩻ ဟဝ်ငါႏ သျင်ꩻငါႏလဲ့ တမွေးတဝ်း၊ မန်းကရိုꩻ "မအီမသာ"၊ အဆာႏခြုံကိုနဝ်ꩻ နုဲင်းစွဉ်ႏအီႏထွာတစွိုးစွိုး တမျိုꩻမျိုꩻနုဲင်းနဝ်ꩻသွူ။

နဝ်ꩻတွော့ꩻ တွိုႏလွေꩻဒဲဉ်စေစ်ꩻလောင်း (၁၃)နီꩻနဝ်ꩻ ကိစ္စအွိုးတောင်ႏကီꩻအဝ်ႏတဲင် အဝ်ႏကျောင်ꩻလဲင်းခါႏ ထန်ႏလင်ꩻခန်း နမ်းခုတ်သွူ။ အခိန်ႏနဝ်ꩻနဝ်ꩻ ဟိုပုံꩻမုဲင်းကောင်ကာꩻတဖူꩻဖဲ့ꩻထင်ꩻ မောက္ကထဝ်ဖဲ့ꩻနဝ်ꩻ တဟဝ်တဝ်းဒွိုန်း၊ ကာꩻလွေꩻသဲင်ꩻ တအဲန်ထဝ်းတွော့ꩻ လွေꩻသဲင်ꩻခင်ႏအာဒျာႏဖဲ့ꩻနမ်းခုတ်သွူ။ အနီꩻနဝ်ꩻနဝ်ꩻ မွူးလွဲꩻ ၄-နားရီႏရပ် တွိုႏလင်ꩻခန်း နမ်းခုတ်တွော့ꩻ လင်ꩻချꩻခန်း စင်ꩻဖါကမ္မာႏဝီꩻ+စင်ꩻမွိုးလွိုလံးသွူ။ စင်ꩻဖါကမ္မာႏဝီꩻယိုနဝ်ꩻ လိုꩻဇာႏတိပင်ကလာꩻဒျာႏ၊ ဗော့ꩻဖူးဗော့ꩻဝေးဒျာႏသွူ။ အုံစင်ꩻဖါကမ္မာႏဝီလံး ထွိုင်ႏလꩻတနားရီႏလွိုလွိုနဝ်ꩻ သေနာႏဖျင်ခန်း ဟို့ꩻခြေ့ပအွုမ်နုဲင်းပွိုင်းနီꩻအတွိုင်ꩻနဝ်ꩻသွူ။ သေနာႏလဲ့ သံးထွာလိုꩻကျောင်ꩻ၊ သံးမာꩻထဉ်ႏဒျာႏဝင်ꩻတဲင် အီႏကွီအံႏသော့ꩻ တစွိုစွိုးလဲ့ တမွေးတဝ်းတွော့ꩻ အဝ်ႏခံႏဗော့ꩻဒျာႏတေ့ꩻတေ့ꩻသွူ။ ခံႏလဲ့ ကွဲးအုံအုံ ကွဲဟဝ်ဟဝ်သဲင်ꩻ တမွေးတဝ်း၊ ကွဲးညကွဲးခြေ့သန်သန်တောတွော့ꩻ လွေꩻနွိုင်ႏနွိုင်ႏ၊ လွေꩻတကောင်ႏကောင်ႏ၊ လွေꩻဖြေꩻအံႏခန်း တသီႏစင်ꩻဖါလွန်း+စင်ꩻမွိုးမငယ်သီးဆဲင်ႏ အွိုးကလာꩻတဖူꩻတန်ထျꩻတွို့ꩻနဝ်ꩻသွူ။

ထွိုင်ႏလွေꩻတထွူးဗာႏနဝ်ꩻ ယိန်းခြေ့သန်သန်တဲင် ရင်းအီႏတတွိုႏလꩻဒွုမ်ဆဲင်ႏသွူ။ ထွိုင်ႏတွိုႏဆဲင်ႏနဝ်ꩻ အုံထွိုင်ႏနေးဒါႏဒွုမ်၊ ဗေင်ႏဗာႏစွဉ်ႏ တလဲင်ႏချင်ꩻသွူ။ စင်ꩻဖါလွန်းသီးလဲ့ ထေဖေႏခန်း တသီႏတလီꩻဟို့ꩻခြေ့၊ တသီႏအစာအိမ်ဖုံႏသွူ။ တသီႏအစာအိမ် ကိမ်ꩻရုဲင်ꩻရုတ်၊ တသီႏခယ်ႏ "ပို့ကျံကျွေ့"စတဲင် တသီႏဖုံႏယို ၁၅-မိနေစ်၊ မိနေစ် ၂၀-တလဲင်ႏ အံႏသော့ꩻလဲ့ အခြေ့တသက်သာႏတဝ်းသွူ။ ကွဲးညညနဝ်ꩻ ခြေ့လွဉ်ꩻငါႏတဲင် တသိုꩻသျဉ်ထန်ႏတွော့ꩻ သင်္ကန်ꩻသဲင်ꩻစဝ်ႏနေးစွဉ်ႏသွူ။ အဟာနဝ်ꩻနဝ်ꩻ သဲင်ꩻချာစင်ꩻဖါကမ္မာႏဝီꩻလံး ဒါႏဒွုမ်တွော့ꩻ ကိန်ꩻတငါဗာႏစွဉ်ႏ စင်ꩻဖါလွန်းလံးသွူ။ အွဉ်ႏလွေꩻဟဲ့ꩻချာ စင်ꩻဖါကမ္မာႏဝီꩻတဲင် စင်ꩻဖါကမ္မာႏဝီꩻလဲ့ လွဉ်ဗေင်ႏပွေါးဗာႏစွဉ်ႏ စင်ꩻဖါလွန်းလံးကိုသွူ။ မွူးထွိုင်ႏကွိုꩻနာꩻခန်းမꩻ အခြေ့ဟံးသက်သာႏတွော့ꩻ ဗေင်ႏလꩻခန်း၊ မဲ့ဗေင်ႏခန်း ဆေ့ꩻဆေ့ꩻသွူ။ နုဲင်းမွူးရဝ်ꩻနီꩻနဝ်ꩻ သံးတနꩻဆေꩻနီꩻတဲင် ပေါႏထာꩻလေပသာႏသာႏလဲ့ သဲင်ꩻချာယွယွခန်း စင်ꩻဖါကမ္မာႏဝီꩻလံးသွူ။ အခြေ့နဝ်ꩻ သက်သာႏနေးလွုမ်ꩻ တဟဝ်လွစ်တဝ်းတဲင် စင်ꩻဖါကမ္မာႏဝီꩻလွေꩻဟဲ့ꩻဖေႏဆရာႏ ခွန်ရဲမောင် (ထွက်ဝိနယ)တွော့ꩻ ဆဲ့ꩻဗာႏနေးတသီႏသွူ။ မွူးရဝ်ꩻခိုႏတဗာႏ၊ မွူးယာခိုႏတဗာႏ၊ မွူးဟာထာꩻခေ့ꩻစနဝ်ꩻတဗာႏ၊ ဒဲဉ်စေစ်ꩻမားနီꩻနဝ်ꩻ ဆရာႏခွန်ရဲမောင် ဆဲ့ꩻဖေႏတသီႏသိုမ်ဗာႏလဲ့ တဟဝ်လွစ်တဝ်း၊ အုံလꩻအဝ်ႏလꩻ၊ ခံႏဒါႏနေးလွုမ်ꩻတဲင် ဆရာႏခွန်ရဲမောင် ဖေႏကျံႏဉာဏ်ႏအလꩻ ဝါႏဆိုႏဆန်ꩻတနီꩻနဝ်ꩻ ထင်ႏခန်းဒျာႏ စဝ်းစံထွန်းတသီႏယွုံႏ ဝေင်ꩻတောင်ႏကီꩻကိုသွူ။

တွိုႏတသီႏယွုံႏ "ပြင်ပလူနာဌာန"နဝ်ꩻ ဆရာႏဝွန်ႏစဲစ်ဆေꩻထွားသွူထာꩻဆာ၊ နာႏထွားနားကြပ်ဖုံႏတွော့ꩻ တွမ်ႏစူနုံစိထွားခန်း ခွန်ကုဝေဟို့ꩻသွူ။ ထွူနဝ်ꩻ ဆရာႏဝွန်ႏ "အရှင်ဘုရား ဗိုက်ဖောင်းပြီးတော့ တအားတင်းနေတယ်၊ အရှင်ဘုရား အစာအိမ်ပေါက်သွားပြီထင်တယ်၊ ဆေးရုံတက်လိုက်ပါ"ရိုꩻနုဲင်းနဝ်ꩻတွော့ꩻ တခြိုꩻထာꩻမုဲင်ꩻမုဲင်ꩻ တပါတဝ်းလဲ့ ထင်းခန်းဒျာႏ တသီႏယွုံႏသွူ။ ထွိုင်ႏလꩻသွူ ခင်ႏလံးနဝ်ꩻ ကပါထင်ႏဒါႏသွꩻ ဗွေႏခေမိဿရနဝ်ꩻ အုံရွသွꩻ ၂-နားရီႏရပ်လွုမ်ꩻတဲင် သဲင်ꩻထူႏခန်းဒျာႏ ကလိုႏအပ်ဒါႏ တခြိုꩻအွိုးကျောင်ꩻတန်သွူ။ ဗွေႏခေမိဿရ ကသဲင်ꩻထူႏဒါႏ တခြိုꩻကျောင်ꩻတန်နဝ်ꩻ ထာꩻခေ့ꩻသွူလဲ့ တဖျော်ချာတဝ်း၊ သဲင်ꩻကိန်ꩻတငါဒျာႏကျောင်ꩻတန်တဲင်တွော့ꩻ အဟာနဝ်ꩻနဝ်ꩻ နေးတွမ်ႏဆေးရုံသား ကဖေႏဒါႏ အဒို့ꩻအဒါတဲင်တွော့ꩻ ခွန်ကုဝေ အုံဗာႏဒျာႏတပါꩻပါꩻသွူ။ ကထင်ႏတသီႏယွုံႏနဝ်ꩻ တဲႏမွူးရဝ်ꩻခိုႏ နားရီတဆီနဝ်ꩻကာႏ ဗꩻတွိုႏလွေꩻ ထာꩻခေ့ꩻနားရီႏတဆီနဝ်ꩻ တသီႏယွုံႏသား မာꩻဖေႏတဝ်းနုဲင်းမုဲင်ꩻမုဲင်ꩻ၊ ဆရာႏဝွန်ႏလဲ့ တလွဉ်ထွားတဝ်းတဖြာꩻဖြာꩻသွူ။ ထွိုင်ႏတွိုႏထာꩻခေ့ꩻ နားရီႏတဆီနဝ်ꩻ လေားဆောင်ႏသားလွဉ်ဒင်ႏ၊ အွဉ်ႏလင်ꩻတွယ်ႏဓာတ်မန်ႏ ဆေးရုံအရန်းလကိုသွူ။

ထွိုင်ႏတွိုႏနားရီႏတဆီပုဲင်နဝ်ꩻ ဆရာႏမူႏတဖြာꩻ လွဉ်အွဉ်ႏနယ်ဓာတ်မန်ႏ၊ အဆာႏခြုံ အတိုအဝ်ႏ၊ ဖြဲ့ꩻနေးမꩻလꩻ၊ မီႏဖြဲ့ꩻလဲ့ တဲမ်းစူမုဲင်၊ ဖြဲ့ꩻခန်းယိုခါ ရိုꩻနဝ်ꩻသွူ။ ဖြဲ့ꩻတဖြဲ့ꩻတဝ်းနဝ်ꩻ တွိုင်ႏပင်ႏခရာႏ သွꩻအဲန်ထဝ်းတဲင် နမ်းတွမ်ႏနမ်းဆုံꩻဖျတ်၊ တဲမ်းစူမုဲင်တွော့ꩻ ဖြဲ့ꩻခန်းဒျာႏနဝ်ꩻသွူ။ ကနွို့ဖြဲ့ꩻခန်ꩻညခွိုင်းမုဲင်ꩻ သေတဝ်း၊ တသီႏတဖေင်ꩻထွိုင်ႏစွုတ်ꩻနဝ်ꩻ အဝ်ႏချာလဲဉ်းခင်ႏလံးကို၊ ဟို့ꩻလဲ့ သေနာႏလဲဉ်းအဆာ၊ တသီႏပလဲင်ꩻလဲ့ အဝ်ႏသွင်ꩻလဲန်း စူဗောင်လောင်း၊ တသီႏတဖေင်ꩻထွိုင်ႏစွုတ်ꩻ၊ ထွိုင်ႏရုဲင်ꩻထာꩻနဝ်ꩻ တကာႏမန်းတဖြာꩻ အဝ်ႏပွေါးဖေႏတွော့ꩻ လောႏသဲန်ꩻတဉ်ႏခါꩻခန်း ခွန်ကုဝေစူလောင်ꩻသွူ။ အခိန်ႏနဝ်ꩻနဝ်ꩻ မွူးကွို့ꩻနာꩻ ခွိုင်းမုဲင်ꩻနားရီႏလဲ့ သေတဝ်းသွူ။ ဖြဲ့ꩻထွူ ၃-နီꩻအတွင်ꩻနဝ်ꩻ ထာꩻမုဲင်ꩻမုဲင်ꩻ ဖေႏအဝ်ႏတဝ်း၊ ထီလဲ့ ဖေႏအွꩻတဝ်း၊ သွင်ꩻဗော့ꩻတသီႏဗုတ်ꩻတန် တဗုတ်ꩻထွူတဗုတ်ꩻလွုမ်ꩻတဲင် ခွန်ကုဝေ အာႏဆေ့ꩻမွေးစွဉ်ႏထာꩻသွူ။ အခိန်ႏ ၃-နီꩻနဝ်ꩻ ခွန်ကုဝေ ယူႏစဉ်ꩻစာꩻချာနမ်းနဝ်ꩻ အာႏပေႏငါႏတဲင် "မီႏသီထာꩻနဝ်ꩻ အလွိုးယိုꩻငါႏ"နုဲင်းနဝ်ꩻသွူ။ သိုမ်နီꩻအတွင်ꩻ ကသွင်ꩻဒါႏတသီႏထီယို ပေါႏနွို့အာအဆာႏခြုံကိုလဲ့ ဆရာႏမူႏသီးတွမ်ႏတထꩻ (ဆရင်း)တန်တန် စုတ်ꩻထန်ႏထိုꩻယင်းဒျာႏသွူ။ ပြောင်ႏစုတ်ꩻထန်ႏအီနဝ်ꩻ သော့ꩻနေးနေ့ꩻဖူဖဲ့ꩻတွော့ꩻ စိတွိုႏလင်ꩻစွဉ်ႏ အဆာႏခြုံကိုသွူ။ ဖြဲ့ꩻထွူလꩻသိုမ်နီꩻမꩻ ဖေႏအွꩻထီ၊ လစ်ꩻနီꩻကိုမꩻ ဖေႏအွꩻဒဲဉ်ပဲစ်ꩻ၊ (ဆန်ပြုတ်ပြာပြာသွူ)၊ တဲႏလစ်ꩻနီꩻမာꩻငါနဝ်ꩻ အွꩻလွေꩻဗာႏ ဒဲဉ်ပဲစ်ꩻစွုမ်ႏနီꩻနီꩻ၊ ထွိုင်ႏဗွေ ၈-နီꩻမꩻ ဖေႏအံႏစဒဲဉ်ပနဲဉ်ႏနဲဉ်ႏ၊ ဖေႏအံႏဆေ့ꩻဆေ့ꩻလွုမ်ꩻသွူ။ ထွိုင်ႏလꩻ ၉-နီꩻမꩻ ကွဲးစေထိုꩻဖေႏ "ချုပ်ရိုး"သွူ။ စေချုပ်ရိုးထွူ နုဲင်းမွူးရဝ်ꩻနီꩻနဝ်ꩻ မဲဉ်သဲင်ꩻငါႏလဲန်းတဲင် ကွီသဲင်ꩻလဲ့ ဖေႏသဲင်ꩻတဝ်းဒွိုန်း၊ နုဲင်းမွူးရဝ်ꩻ ဝါႏဆိုႏဆန်ꩻ (၁၁)နီꩻ ကွဲးသဲင်ꩻလꩻသွူ။ ဖြဲ့ꩻထွူထွိုင်ႏလꩻ (၇)နီꩻနဝ်ꩻ စင်းအုံတဝ်းတဲင် လယ်ႏချာငါထာꩻ ဆေးရုံလောင်းတွော့ꩻ တွိုႏလင်ꩻပါစွဉ်ႏ "ထိခိုက်ဒဏ်ရာ"ဆောင်၊ ဆေးရုံတန် အထဝဆောင်ကိုသွူ။ အထဝဆောင်ကိုနဝ်ꩻ လင်ꩻထီႏစွဉ်ႏ ထွက်တေစ်နဝ်ꩻ ယွောင်မွေးမုဲင်းထာꩻ၊ သွီႏယာႏလဲ့ နုဲင်းစွဉ်ႏသွီႏအဲန်ထဝ်း၊ ဗွာတီႏတုဲင်လွစ်ꩻထွစ်ꩻနေးစွဉ်ႏသွူ။ ထွိုင်ႏရီရောႏဂါႏနဝ်ꩻ ကအံႏဒါႏ အာဟာႏရယို တခံႏညတဝ်း၊ တကေႏပဲစ်ꩻတဝ်းဟို့ꩻကိုတွော့ꩻ အံႏထွူတညတဝ်း၊ အံႏထာꩻမုဲင်ꩻမုဲင်ꩻလဲ့ ထန်ႏချာ (အေႏချာ)ထာꩻမုဲင်ꩻ ရိုꩻနဝ်ꩻသွူ။ ဆရာႏဝွန်ႏ ကျံႏဖြဲ့ꩻဖေႏလဲ့ အာႏအဲန်ထဝ်းတွော့ꩻ ဖြဲ့ꩻလꩻတဝ်းဒွိုန်း၊ သွင်ꩻအာအာဒွိုန်းတသီႏအာႏ ရိုꩻနဝ်ꩻသွူ။ ခွန်ကုဝေသꩻကိုနဝ်ꩻ "ပါꩻယိုအမျိုꩻထွာလိုꩻ တမွေးတဝ်း၊ အလွိုးတအောင်ႏတဝ်း"ယူႏစွဉ်ႏနုဲင်းနဝ်ꩻသွူ။

ဆရာႏဝွန်ႏထွိုင်ႏရိုꩻ "သဲင်ꩻလꩻလဲန်း"နဝ်ꩻ ဖြဲ့ꩻခြောင်ꩻအပဲင်ယို ဖေႏကဗွေယိုꩻနဝ်ꩻ အီႏအံႏဗာႏထာꩻမုဲင်ꩻကရိုꩻယို ယူႏလꩻခန်းတဲင် ရီခန်းဆရာႏမူႏနီႏသွမ်ႏ တဖြာꩻသွူ။ ဆရာႏမူႏရိုꩻ အံႏအာအာအယာႏရိုꩻနဝ်ꩻတဲင် သဲင်ꩻတွိုႏချာကျောင်ꩻလဲင်းခါႏနဝ်ꩻ သဲင်ꩻအံႏဆျာယာႏ၊ ထော့ꩻယာႏဖုံႏတွော့ꩻ အပဲင်ခြောင်ꩻနုဲင်းမီꩻထောင်ꩻနဝ်ꩻ ခြေင်းကတွောင်၊ ပွစ်ꩻတရွစ်ထိုꩻစွဉ်ႏတဲင်တွော့ꩻ ထွိုင်ႏလꩻနီသိုမ်လာနဝ်ꩻ ပနဲဉ်ႏချာလဲ့ အပဲင်နဝ်ꩻ တန်ဒျာႏစွူစွူသွူ။ ထွိုင်ႏအီႏလင်ꩻ တသီႏယွုံႏ ထွားရွဉ်လို့စာႏရင်ꩻနဝ်ꩻ အုံတသီႏယွုံႏ အနီꩻတဆီအကို အစွိုးစွိုး လို့ရွဉ်နဝ်ꩻ(၁၂၅ိ)လွုမ်ꩻသွူ။ မီႏတဲက်ဆဲင်ႏတွမ်ႏ ခေတ်ယိုခါနဝ်ꩻ ယွုမ်းခရာႏတအဲန်ထဝ်းသွူ။ ထဲင်းတစွိုး ယူႏယူႏချာနဝ်ꩻ အဆာႏခြုံတိုနုဲင်းယိုနဝ်ꩻ တိုတဝ်းအွိုးဝေင်ꩻတွော့ꩻ မီႏတိုမွိုင်အွိုးဒုံနဝ်ꩻ သီဒါႏ၊ ယိုနဝ်ꩻ တိုအွိုးဝေင်ꩻ ထင်ႏတသီႏယွုံႏ ဖြဲ့ꩻဗာႏမွိုင်တွော့ꩻ ခွန်ကုဝေ ကံႏဟဝ်ငါႏ ရိုꩻဗာႏနုဲင်းနဝ်ꩻသွူ။ ထဲင်းတစွိုး၊ ဖြဲ့ꩻထွူလꩻအနီꩻတဆီလဲ့ အဝ်ႏနမ်းခုတ် သဲင်ꩻခင်ႏထင်ႏကောင် ၇-နားရီႏ တဖူꩻကအဝ်ႏဒါႏနဝ်ꩻ ခွန်ကုဝေယူႏချာလဲ့ တဖြောင်တဝ်းသွူ။

ဖြဲ့ꩻထွူ ထွိုင်ႏလꩻ ၈-လာ၊ ဒဲဉ်သီႏလာဗွေနဝ်ꩻ ပွယ်ꩻတန်မွူးနီꩻခွိုꩻပအိုဝ်ႏ အဝ်ႏဝေင်ꩻတောင်ႏကီꩻ၊ နောင်ယာသုဲင်ꩻစခန်ꩻကိုတဲင် ခွန်ကုဝေနဝ်ꩻ ဗွေႏစင်ꩻတန်ဉာဏဝံသ (ဗွေႏဗွန်အောင်မင်္ဂလာ၊ တောင်ႏကီꩻ)ကျောင်ꩻနမ်းဟုတ် ဟဲ့ꩻလင်ꩻမာꩻပျခန်ꩻ အွိုးနောင်ယာသုဲင်ꩻပွယ်ꩻကို၊ တွမ်ႏတကာာႏ စောက္ကဆျာႏ အဖြာꩻတဆီလွို၊ လင်ꩻအုံဗာႏ (၁၅)နီꩻ တပြက်ꩻလာသွူ။ ပွယ်ꩻရဝ်ꩻနဝ်ꩻ ခွန်ကုဝေ ဟို့ꩻခြေ့ဖျင်ဒျာႏ၊ ဒဲဉ်သီႏဗွေနီꩻ ဝင်ꩻနွို့ပွယ်ꩻအခြပ်အရဲဉ်ႏဖုံႏနဝ်ꩻ ခွန်ကုဝေတဲ့ တထီႏဗာႏတဝ်းသွူ။ ငမ်းအဆာႏခြုံတိုခွုန်ꩻတဲင် ပေါႏနာႏအကျိုꩻထွူလဲ့ ခွန်ကုဝေနဲစ်သဲင်ꩻ၊ သဲင်ꩻထင်ႏချာခန်းဒျာႏ စဝ်းစံထွန်းတသီႏယွုံႏသွူ။ ဒဲဉ်သီႏဗွေဟာနဝ်ꩻ သဲင်ꩻဗေင်ႏချာ တသီႏယွုံႏ၊ ဆရာႏဝွန်ႏထွိုင်ႏစဲစ်ဆေꩻထွားနဝ်ꩻ အဆာႏခြုံအဝ်ႏဟဝ်ဒျာႏ၊ အံႏမာႏအစွိုးစွိုးတွော့ꩻ ခြေ့ဒျာႏရိုꩻနုဲင်းနဝ်ꩻသွူတကာႏတဝ်း အခြေ့လဲ့ ဟဝ်ချာယင်းတွော့ꩻ ဗေင်ႏတသာ သဲင်ꩻထိုꩻယင်းဒျာႏသွူ။

ခွန်ကုဝေ ထွိုင်ႏတွိုႏချာ တသီႏယွုံႏအလဲင်ႏယိုနဝ်ꩻ ထီႏခန်းပါꩻတဖြာꩻ အဝ်ႏဗေင်ႏသို့ထာꩻ ဆေးရုံအင်္ဂတေလောင်းတဲင် ထွားစဲင်းပသာႏခန်းသွူ။ ထွိုင်ႏထွားစဲင်းစဲင်းနဝ်ꩻ တနꩻစွဉ်ႏထွက်တေစ် (ခွန်သက်ဆွာꩻ) ဒုံလီꩻတန်သွူ။ ထွိုင်ႏဒေါ့ꩻရီနဝ်ꩻ ဝင်ꩻဖြဲ့ꩻလဲန်းဝွေꩻဟို့ꩻ ၈-လဲင်ႏ၊ ထိုမ်ႏထာꩻဆာမော့ꩻတဝ်း၊ ဟဝ်လဲ့တဟဝ်တဝ်း၊ သီလဲ့ တသီတဝ်း-ရိုꩻနုဲင်းနဝ်ꩻသွူ။ ထွက်တေစ်ယိုခါနဝ်ꩻ ယွောင်ပဲင်၊ ယာႏဗွာတီႏတုဲင်ထာꩻ နုဲင်းကထီႏအွိုးဝါႏဆိုႏနဝ်ꩻ မွေးတဝ်းဒွုမ်၊ မဲ့ငါဗိုမ်းသူꩻ ယာႏဖြေင်းရစ်ꩻထိုꩻတေားလဲန်းသွူ။ ထွက်တေစ်နဝ်ꩻ ခွန်ကုဝေ ထင်းအသီလဲ့ တသီတဝ်း၊ ဟဝ်ချာယင်းဒျာႏ၊ သက် ၅၀-လွိုမꩻသီ၊ ဝွေꩻကဟဝ်ချာဗာႏယို တွိုႏဆုဲင်ꩻ ခွန်ကုဝေထွိုင်ႏရီထွားနဝ်ꩻ ဝွေꩻရောႏဂါႏနဝ်ꩻ ဆရာႏဝွန်ႏတောင်ႏကီꩻ လိုမ်ꩻလာꩻတဒါႏဒွုမ်တွော့ꩻ ထွဉ်ႏဝွေꩻလင်ꩻလိုမ်ꩻလာꩻရန်ႏကုန်ႏရိုꩻနဝ်ꩻသွူ။

နဝ်ꩻတွော့ꩻ ဆရာႏမူႏနီႏသွမ်ႏတဖြာꩻ ဖေႏဝွေꩻအကျံႏဉာဏ်ႏ အွဉ်ႏလိုမ်ꩻလာꩻနေး ပယောဂနယ်ꩻတွော့ꩻ ဝွေꩻလိုမ်ꩻလာꩻထေ့ခန်း မနောစိတ္တုပ္ပါဒ်ဆရာႏထျꩻ ရိုꩻနဝ်ꩻနသွူ။ မနောစိတ္တုပ္ပါဒ်ဆရာႏ ထွိုင်ႏစဲစ်ဆေꩻထွားနဝ်ꩻ ပယောဂမွေးရိုꩻနဝ်ꩻတဲင် မနောစိတ္တုပ္ပါဒ်ဆရာႏ လိုမ်ꩻလာꩻဝွေꩻတွော့ꩻ ဟဝ်ယင်းဒျာႏရိုꩻနဝ်ꩻသွူ။ ထွိုင်ႏဟဝ်နဝ်ꩻ ဝွေꩻလဲ့ နွို့တငါခန်းဒျာႏ မနောစိတ္တုပ္ပါဒ်ဂိုဏ်ꩻ၊ ဗꩻစွဉ်ႏဖြားထံ၊ သီထံသွူ။ ကထွိုင်ႏသီနဝ်ꩻ သီဒျာႏတွမ်ႏရောႏဂါႏလင်သွူ။ ယိုနဝ်ꩻ တဲမ်းနယ်လွေꩻဗာႏယင်း ခွန်ကုဝေ ဖြဲ့ꩻဗာႏဟို့ꩻအကျောင်ꩻ ခြွိုင်ႏသန်ꩻရေꩻ အမော့ꩻအကျုံႏ တလဲင်ႏတခြွိုက်သွူ။[၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခွန်ကုဝေ-မုဲင်းကောင်၊ ခမ်းသားငဝ်း အမုဲင်-၅၊ အစဲဉ်ႏ-၄၈
  2. ခွန်ကုဝေ-မုဲင်းကောင်၊ ခမ်းသားငဝ်း အမုဲင်-၅၊ အစဲဉ်ႏ-၂၁