အတာႏဆွာꩻထီ

"အတာႏဆွာꩻ ထီဖေႏကခြောဗာႏမွုန်း အီႏထိန်ꩻသိမ်ꩻလွေꩻဗာႏနုဲင်းမုဲင်ꩻ"

လိုꩻတဖြာꩻအတာႏ အဲဉ်ထဝ်းလꩻတဝ်းအကို ထီယိုအဝ်ႏပါနေနေနဝ်ꩻသွူ၊ စွုမ်ႏနီꩻစွုမ်ႏဟာ အံႏအွꩻရေꩻရာႏ အခန်ꩻကဏ္ဍကိုတဲ့နဝ်ꩻ၊ လိုꩻသီးနမ်းကြောင်းစင်ရေꩻအတာႏတဲ့နဝ်ꩻ၊ လိုꩻသီးအကျိုꩻစီꩻပွါꩻတာႏ ဆို့ꩻရုဲင်လိုပ်ꩻမာꩻရေꩻကိုတဲ့နဝ်ꩻ ထီယို ထွာစွဉ်ႏဒျာႏ အဓိကနဝ်ꩻသွူ။ နဝ်ꩻမꩻ ထီယို လိုꩻသီးအတာႏ အရေꩻတန်ခွုင်းမုဲင်ꩻကရိုꩻနဝ်ꩻ ဒေါ့ꩻတဝ်းဒုမ်အလုဲင်း၊ ခြုဲင်းတဝ်းဒုမ်အဆွာꩻတဲ့ လိုꩻတွိုင်ꩻစွုမ်ႏဖြာꩻယို ရမွော့အဝ်ႏသေထွူဒျာႏဝင်ꩻသွူ။

ကောပ်စွဉ်ႏထီယို အရေꩻတန်မွေးငါႏတဲင် လိုꩻသီးကအုံအဝ်ႏဒါႏ ရပ်ရာႏကိုယို ထီတအဝ်ႏတဝ်းလဲ့ ဖေႏကအဝ်ႏ၊ ထီတတွိုႏတဝ်းလဲ့ ထီဖေႏကတွိုႏနဝ်ꩻ တောမ်ႏအနယ်ꩻအမျိုꩻမျိုꩻတဲင် ကျံႏစဲႏထိုမ်ႏထူႏသဲင်ꩻနဝ်ꩻသွူ၊ လွေꩻထူႏသဲင်ꩻလွဉ်နေး အညာꩻတဲ့နဝ်ႏဒျာႏ၊ ဒုံကိုရပ်ထျꩻ ထီအိုင်ႏထီအိုအဝ်ႏတဲ့ အဝ်ႏဒျာႏ၊ ဆုဲင်ꩻယိုနဝ်ꩻ ခေတ်နယ်ꩻပညာႏပြွူႏဖြိုလွဉ်တဲင် ခူႏနေးတောမ်ႏစက်အဝီစိ အဝ်ႏလွဉ်နဝ်ꩻသွူ။ ထီယို သုင်ꩻအွꩻတာႏ၊ ပဆျူႏပသေ လူးဟွာႏစစွဉ်ႏကြောင်းစင်ရေꩻတာႏ၊ တောမ်ႏဆို့ꩻရုဲင်လိုပ်ꩻမာꩻအီတာႏဖုံႏယို ခမ်းထီလိုꩻဖြာꩻပေါင်ꩻယိန်းအာလွဉ်၊ ခမ်းသားလိုꩻဖြာꩻပေါင်ꩻ ယိန်းကွုန်ꩻဟွိုင်ꩻလွဉ်တဲင် ထီယိုတဲ့ ယိန်းအဝ်ႏလိုႏအာအာလွဉ်နဝ်ꩻသွူ။ နဝ်ꩻတဲင် ထွားထွားသွူ ခေတ်ဟန်ႏသနီꩻယိုနဝ်ꩻ အဝ်ႏလိုႏယူႏစဲင်းစဲင်းငါႏဝင်ꩻသွူ၊ အဝ်ႏလိုႏထီႏထွားဒါႏဒါႏငါႏလဲဉ်းဝင်ꩻသွူ၊ ထီႏထွားခရာႏဖိုင်ႏ အဝ်ႏတမုဲင်ꩻဟောင်းနဲးနဝ်ꩻ မဉ်းတွိုႏတွိုႏသွူ ခမ်းသဲင်ꩻလာခိန်ႏယို ရပ်ခင်ႏလမ်းဒေႏသ ကဲဉ်းအာအာနဝ်ꩻ မော့ꩻဗာႏထီခြော၊ ထီအဲဉ်ထဝ်းတဲင် တွိုႏဗာႏထာꩻအံႏမထီ အခေႏနေႏနဝ်ꩻ အဝ်ႏဟွုန်အဝ်ႏထီႏထွꩻဒျာႏဝင်ꩻသွူ၊ ယရပ်ရပ်နဝ်ꩻ ဆို့ꩻရုဲင်လိုပ်ꩻမာꩻတာႏ ထီခြောထီအဲဉ်ထဝ်းတဲင် နေးတောမ်ႏစက်အဝီစိထီအာႏ ဆို့ꩻရုဲင်လိုပ်ꩻမာꩻသားတဲ့ အဝ်ႏနဝ်ꩻသွူ။

ထီယိုနဝ်ꩻ သုင်ꩻကွို့ꩻတနေင်ႏနီနေင်ႏလုမ်ꩻတဲ့ တမွေးတဝ်း၊ မဉ်းအဝ်ႏထွာလိုꩻ ဗꩻစွဉ်ႏကသီထံ တသက်လုမ်း အီႏသုင်ꩻဗာႏနေဒွုန်းကထီနဝ်ꩻသွူ၊ ထီယို သုင်ꩻဒျာႏကွို့ꩻ နီယိုတစုတ်လုမ်ꩻလဲ့ တမွေးတဝ်း၊ လိုꩻတစုတ်ထွူတစုတ် တခေတ်ထွူတခေတ် မဉ်ႏတွိုႏဆုဲင်ꩻချာလဲ့ ပိုစိုးလီꩻစိုးသူꩻလဲ့ အီႏသုင်ꩻဗာႏဒျာႏထီနေနေနဝ်ꩻသွူ။ နဝ်ꩻမꩻ လိုꩻသီးအတာႏ အွꩻတာႏသုင်ꩻတာႏ ဆို့ꩻရုဲင်တာႏ ထီဖေႏကခြောဗာႏမွုန်းနဝ်ꩻ လိုꩻသီးမဉ်းလိုမ်ꩻလာꩻချာဒျာႏမꩻ အီႏထိန်ꩻသိမ်ꩻချာနွောင်ꩻနဝ်ꩻသွူ၊ မဉ်ႏတလိုမ်ꩻလာꩻတဝ်း လꩻရာꩻသုင်ꩻ၊ ယိုꩻရာꩻထူႏဗော့ꩻနေးနဝ်ꩻနဝ်ꩻ အခိန်ႏယိန်းညလွဉ် ထီယို အယိန်းခြောလွဉ်ကယ်ꩻထဲင်းယိုခါနဝ်ꩻသွူ။ လိုꩻသီးအတာႏ အစပေႏနဝ်ꩻ ထီႏထန်ႏတနွိုင်ဖုံႏအဝ်ႏ၊ သေင်ႏဝါႏကောင်ဖုံႏအဝ်ႏတဲင် အွꩻဗာႏသုင်ꩻဗာႏ ထီအိုထီထန်ႏဖုံႏနဝ်ꩻသွူ၊ ဆုဲင်ꩻယိုနဝ်ꩻ ဆို့ꩻရုဲင်တာႏရိုꩻတဲင် ခွဉ်းကုဲင်သေင်ႏဝါႏ ယားနေးဒျာႏခေါ်ခေါ်၊ စာအံႏဟံႏယာႏ သေင်ႏတနွိုင်ႏဝါႏခင်ဖုံႏ ယောမ်ꩻသဲင်ꩻဒျာႏခေါ်ခေါ်၊ ခူးလုံးကောင် လဲ့ꩻပꩻလုံးအောင်ဖုံႏခေါ်ခေါ် ကွဲညညနဝ်ꩻ ထီထန်ႏထီအိုဖုံႏယို ကုဲင်ထိုꩻလို့ထွူ ထီဖုံႏနဝ်ꩻ တထန်ꩻနွောင်ꩻတဝ်းဒုမ်၊ ထီခြောသဲင်ꩻဗာႏနဝ်ꩻသွူ။ ထီထွိုင်ႏခြောသွူလဲ့ လိုꩻသီးဖုံႏနဝ်ꩻ သဘာဝထီထန်ႏဖုံႏ ဖေႏကယောမ်ꩻထဲင်းမွုန်း၊ ဖေႏကအဝ်ႏစွူစွူနဝ်ꩻ တထိန်ꩻသိမ်ꩻတဝ်းတွော့ꩻ တောမ်ႏအဝီစိစက် စုတ်ꩻလင်ꩻထဲင်းစွဉ်ႏ အွိုးထီဟံႏဆလဖုံႏသူꩻနဝ်ꩻသွူ၊ ခူႏအဝီစိဖုံႏယိုတဲ့ လိုꩻဖုံႏပေါႏမိဉ်းတထိန်ꩻတဝ်း၊ ခွေတဲ့ခူႏနာꩻတဲ့ခူႏ ပေါႏမဉ်ႏအဝ်ႏခူႏသမ်းထဲင်းလွဝင်ꩻနုဲင်းယိုနဝ်ꩻ ယိုခါနဝ်ꩻ ခူႏလင်ꩻပေတရျာꩻနီရျာꩻလꩻထီလဲ့ မဉ်ႏတွိုႏဆုဲင်ꩻချာ ကေားခူႏသားမဉ်ႏအာနဝ်ꩻ ထီယိန်းခြောတဲင် ခူႏလင်ꩻသွူပေအရျာꩻအရေင်တဲ့ အီႏလꩻဗာႏထီနဝ်ꩻ ခုဲင်ႏထိုꩻဒါႏသွူ။

နဝ်ꩻမꩻ အဝ်ႏလိုႏသုင်ꩻတဝ်း ထာꩻစူꩻယိုꩻနယ်ꩻနုဲင်းယိုဖုံႏသွူ၊ ထီအို ထီထန်ႏ ဖေႏကထိုꩻမားဗာႏမွုန်းနဝ်ꩻ အဝ်ႏလိုႏလိုမ်ꩻလာꩻချာဒျာႏ နီသဘာဝအသောင်အရင်ꩻဖုံႏယိုဒျာႏသွူ။ ဆုဲင်ꩻယိုနဝ်ꩻ ထိန်ꩻထွားသဘာဝ အသောင်အရင်ꩻယို ဖေႏထာꩻသေပညာႏသား လိုꩻမုရေꩻအစွိုꩻအဗူႏဖုံႏ အဝ်ႏလွဉ်တဲင် ကအဝ်ႏထွူလဲဉ်းဒါႏ သေင်ႏကောင်ဖုံႏယို ထိန်ꩻသိမ်ꩻ၊ သေင်ႏတအဲဉ်ထဝ်းဒွုန်းအရပ်ကို ဆို့ꩻသေင်ႏပေႏဖုံႏ သေမာꩻလွဉ်ယင်းနဝ်ꩻ အဝ်ႏနေနေလဲ့ ကဆို့ꩻလဲဉ်းဒါႏ သေင်ႏပေႏဖုံႏယို ထိန်ꩻထွားဖျိုးမွဉ်းလွဉ်ꩻဖေႏတဝ်းတဲင် ကဆို့ꩻလဲဉ်းသေင်ႏပေႏဖုံႏနဝ်ꩻ အတတန်စပ်ꩻလꩻလို့တဝ်းနဝ်ꩻသွူ၊ နဝ်ꩻမꩻ ကဆို့ꩻလဲဉ်းဒါႏ သေင်ႏပေႏဖုံႏယို ဖေႏကတန်စပ်ꩻလꩻနဝ်ꩻ အဝ်ႏလိုႏထွားဖျိုးမွဉ်းလွဉ်ꩻဖေႏနဝ်ꩻသွူ။ သေင်ႏမွူးဖုံႏ မဉ်းအဝ်ႏအာနဝ်ꩻ လိုꩻသီးအတာႏ တလီꩻကြောင်းစင်(အောက်စီဂျင်)ဖုံႏ ထေဖေႏနွောင်ꩻ၊ ခမ်းခါ ထီကတန်ဒါႏထာꩻဖုံႏယိုလဲ့ သေင်ႏရွီးဖုံႏ အိုမ်စိုက်ꩻထိန်ꩻဖေႏနွောင်ꩻနဝ်ꩻသွူ။

နုဲင်းယိုခါ လိုပ်ꩻမာꩻသွို့ꩻခြံသား ကဆို့ꩻရုဲင်ခမ်းခါယို ဥတုရာႏသီႏ တလွောက်ꩻညီႏတဝ်းတဲ့နဝ်ꩻ၊ သေ့ꩻယားဒျာႏတဲ့နဝ်ꩻ လိုပ်ꩻမာꩻတထွာတဝ်းတဲင် အုံပွေါးဆို့ꩻရုဲင် လိုပ်ꩻမာꩻခမ်းသဲင်အလာသားတဲ့ အဝ်ႏနဝ်ꩻသွူ၊ ကောပ်စွဉ်ႏဒျာႏ လိုပ်ꩻမာꩻခမ်းခါတခီႏယို အံႏအွꩻလိုမ်းတဝ်းတဲင် လိုပ်ꩻမာꩻပါဗာႏ ခမ်းသဲင်အလာသားဖုံႏတဲ့ အီႏအဝ်ႏနဝ်ꩻသွူ။ နဝ်ꩻမꩻ မဉ်ႏလိုပ်ꩻမာꩻခမ်းသဲင်လာယို ချင်းခေႏတောမ်ႏထီအခေႏနေႏတဲင် အဝ်ႏလိုႏလိုပ်ꩻမာꩻနဝ်ꩻသွူ၊ နုဲင်းကရိုꩻကီယိုဟွဉ်ႏအတွိုင်ꩻ စုတ်ꩻသုင်ꩻထီအဝီစိဖုံႏယို အတာႏဒွေါင်ႏနဝ်ꩻ အဆင်ႏပြေႏအီလဲ့ အတာႏဆွာꩻတာႏနဝ်ꩻ မာꩻယပ်ꩻဆုဲင်ꩻဒါႏ နီလိုꩻသီးနဝ်ꩻသွူ။ နဝ်ꩻမꩻ ထွားတဝ်းထာꩻတာႏဒွေါင်ႏ၊ ထွားထာꩻတာႏဆွာꩻတဲင် သဘာဝ အနီꩻအရင်ꩻတဲ့ ဖေႏကခွိုင်းကုဲင်ဗာႏမွုန်း၊ ခမ်းသဲင်လာတဲ့ ဖေႏကလိုပ်ꩻမာꩻဗာႏနဝ်ꩻ နီဒုံထျꩻသောင်ဖုံႏယို ဟံႏလွစ်ဟံႏခြေင်မဉ်ႏအဝ်ႏနဝ်ꩻ အွဉ်ဝင်ꩻမာꩻခူႏခါꩻ ထီထွိုင်ꩻကန်ႏ (ဆည်ဖုံႏတရိုꩻတဝ်း)တဲင် ခမ်းခါ ထီကတန်ထီကလွန်းယို သော့ꩻထွိုင်ꩻခါꩻထွူ မဉ်ႏတွိုႏခမ်းသဲင် လိုပ်ꩻမာꩻအီခြံကောင်နဝ်ꩻ ထီခမ်းခါတဲ့ တသုမ်ꩻကုဲင်ဗာႏတဝ်း၊ ခမ်းသဲင်အတာႏတဲ့ အကျိုꩻအဝ်ႏအီနွောင်ꩻအကျောင်ꩻ ခမ်းသားငေါဝ်းအယ်ဒီတာစွိုꩻ တဲမ်းဖြုဲင်ꩻလွေꩻနယ်ဗာႏနဝ်ꩻသွူ။