အဓိဋ္ဌာနပါႏရမီႏ

အဝ်ႏ ဝီခီပီးဒီးယား ကို

၁။ "အဓိဋ္ဌာနပါႏရမီႏကရိုꩻနောဝ်ꩻ" မဟာကရုဏာႏတောႏ တွမ်ႏဥပါယ ကောသလ္လဉာဏ်ႏယို မာꩻခင်ႏကန်တဲင် တသွိုးတောဝ်း ရုဲင်ꩻတောဝ်း ခွေါင်တဉ်ႏစွူ ဆောက်တယ်ႏ ဓိဋ္ဌာန်ႏထာꩻကျံႏ ထာꩻမာꩻ ကုသိုလ်ႏတရာꩻဖုံႏယို ဟဲ့ꩻဗာႏ "အဓိဋ္ဌာနပါႏရမီႏ"နဝ်ꩻသွူ။ ၂။ "အဓိဋ္ဌာနပါႏရမီႏအကျိုꩻကဗျာ" - ထာꩻကျံႏထာꩻမာꩻ - ရေႏရွယ်ႏခါꩻဒါႏ လောင်ꩻဆားထွာတွင်ꩻ - ဓိဋ္ဌာန်ႏလင်ꩻဗာႏ ဘုရာꩻလဲ့ထွာ - ချွစ်ပါသတ္တဝါႏ နိဗ္ဗာန်ႏခမ်း - ကျွꩻသမ်း ဖျော်တွိုႏငါ။ ၃။ "အဓိဋ္ဌာနပါႏရမီႏ ပဋိပက္ခတရာꩻနောဝ်ꩻ" တကျင်ꩻနွောင်ꩻတောဝ်း သꩻတဖြောဝ်းနောဝ်ꩻသွူ။ ၄။ "အဓိဋ္ဌာနပါႏရမီႏယို" (က) အဓိဋ္ဌာနပါႏရမီႏ၊ (ခ) အဓိဋ္ဌာနဥပပါႏရမီႏ (ဂ) အဓိဋ္ဌာနပရမတ္ထပါႏရမီႏ ပွါꩻယင်းသွံပါꩻသွူ။ ၅။ "အဓိဋ္ဌာနပါႏရမီႏ ၃-ပါꩻအထူꩻ" (က) နီပိုမာ ပစ္စေꩻဥစ္စာႏကုဲင်ထိုꩻလဲ့ သꩻတဝꩻတောဝ်း၊ သꩻတသွိုးစံꩻတောဝ်း၊ အွဉ်ႏတဉ်ႏတဉ်ႏသꩻတဲင် ကကျိုꩻစာꩻဆောက်တယ်ႏဒါႏနဝ်ꩻ ဟဲ့ꩻဗာႏ"အဓိဋ္ဌာနပါႏရမီႏ"သွူ။ (ခ) နီစူခင်ႏ အင်္ဂါႏပေႏတန် ကုဲင်ထိုꩻလဲ့ သꩻတဝꩻတဝ်း၊ သꩻတသွိုးစံꩻတောဝ်း၊ အွဉ်ႏတဉ်ႏတဉ်ႏသꩻတဲင် ကကျိုꩻစာꩻဆောက်တယ်ႏဒါႏနဝ်ꩻ ဟဲ့ꩻဗာႏ"အဓိဋ္ဌာနဥပပါႏရမီႏ"သွူ။ (ဂ) နီအသက် ကုဲင်ထိုꩻစွဉ်ႏလဲ့ သꩻတဝꩻတဝ်း၊ သꩻတသွိုးစံꩻတဝ်း၊ အွဉ်ႏတဉ်ႏတဉ်ႏသꩻတဲင် ကကျိုꩻစာꩻဆောက်တယ်ႏဒါႏနဝ်ꩻ ဟဲ့ꩻဗာႏ"အဓိဋ္ဌာနပရမတ္ထပါႏရမီႏ"သွူ။ ၆။ "အဓိဋ္ဌာန်ႏတံꩻခိုꩻ ကျိုꩻဆီမျိုꩻ" (၁) အဓိဋ္ဌာနဣဒ္ဓိ - ခွုင်းသꩻလိုႏအတွိုင်ꩻ နမ်းတဖြာꩻဒျာႏယို ဓိဋ္ဌာန်ႏယံကထွာ အရျာꩻအရေင်လဲ့လꩻ၊ (၂) ဝိကုဗ္ဗနဣဒ္ဓိ - ခွေယို ဖေႏကထွာနဂါꩻ၊ ဖေႏကထွာဂဠုန်ႏ ဖန်ဆင်ꩻတဲ့လꩻ၊ (၃) မနောမယိဒ္ဓိ - သꩻယူႏတွိုင်ꩻထွာ၊ သꩻငါတွိုင်ꩻပေါႏ၊ (၄) ဉာဏဝိပ္ဖါရိဒ္ဓိ - တွမ်ႏဉာဏ်ႏအစွန်ꩻတဲင် စွစ်ꩻစွစ်ꩻစဲစ်စဲစ်ꩻ ဖွစ်ꩻဖဲစ်ꩻလို့ထံ ထွာစွဉ်ႏနုဲင်းနဝ်ꩻ၊ အံႏဖြာႏခရာႏ၊ (၅) သမာဓိဝိပ္ဖါရိဒ္ဓိ - တွမ်ႏသမာဓိအစွန်ꩻတဲင် ကမာꩻလွဉ်ဒါႏ ထာꩻအံႏဖြာႏ၊ (၆) အရိယိဒ္ဓိ - အာႏရု့ႏအမျိုꩻမုဲင်ꩻတရိုꩻတဝ်း နမ်းကမဉ်အွဉ်ႏထွာအတွိုင်ꩻ ထွာစွဉ်ႏဒျာႏ၊ (၇) ကမ္မဝိပါကိဒ္ဓိ - ကံႏလီꩻကရီးခါ အကျိုꩻဖေႏအတွိုင်ꩻ ထွာစွဉ်ႏ၊ (၈) ပုညိဒ္ဓိ - လွေꩻကောင်ႏကင်ႏ ထင်ႏမို့ꩻလောင်းလꩻ (စကျာႏဝတေႏခွန်)၊ (၉) ဝိဇ္ဇာမယိဒ္ဓိ - နေးတွမ်ႏဂါႏထာႏ မန္တန်ႏစုက်တဲင် ထွာစွဉ်ႏ (၁၀) ကမ္မပယောဂိဒ္ဓိ - ထာꩻမာꩻကိစ္စယို မာꩻဗာႏတဝ်းဟဝ်ဟဝ်ဒါႏဒါႏ ထွာလွဉ်ဒျာႏ။ ၇။ "အဓိဋ္ဌာန်ႏ ၃-မျိုꩻ" (က) ပုဗ္ဗနိမိတ္တအဓိဋ္ဌာန်ႏ - နိမိတ်ပျꩻဖေႏကရီးတဲင် နေးတွမ်ႏသꩻဆောက်တယ်ႏ၊ (ခ) အာသီသအဓိဋ္ဌာန်ႏ - နီကမဉ်လꩻဒါႏ ထာꩻတမျိုꩻမျိုꩻယို နေးတွမ်ႏသꩻဆောက်တယ်ႏ၊ (ဂ) ဝတအဓိဋ္ဌာန်ႏ - ကျင်ꩻဝွတ္တရာꩻဖုံႏယို အီႏကျင်ꩻလွေꩻယူႏနုဲင်းနဝ်ꩻတဲင် နေးတွမ်ႏသꩻဆောက်တယ်ႏ။ ၈။ "အဓိဋ္ဌာန်ႏပါႏရမီႏတွမ်ႏ တေမိယဇာတ်တောႏ" (၁) ပရိယာယ်ႏမဉ်ႏဒါႏ ထွာဗာႏတောဝ်းခွန် (၂) လင်ꩻထဲ့ဗာႏတောဝ်း ငါးရုဲင်ꩻ။ (က) ခမ်းနောဝ်ꩻ - ဗာႏရာႏဏသီႏ (ခ) အဖါမဉ်ꩻ - ကာသိရာဇ်ခွန် (ဂ) အမွိုးမဉ်ꩻ - စန္ဒာဒေႏဝီႏနင်ꩻ (ဃ) အပိုခိုမဉ်ꩻ - တေမိယကုမာရ (င) ထီꩻဗွာပွေါးသား - နင်ꩻလူꩻမူႏ ပုဏ္ဏာꩻမူꩻမတ်သီးတွမ်ႏ တခွန်ꩻဝင်ꩻလစ်ꩻ (စ) ရထာꩻဝါးသား - သုနန္ဒာႏ။ မော့ꩻလဲင်ႏစခါ ဗာႏရာႏဏသီႏခမ်းကို ကအုပ်စိုꩻပွိုင်းဒါႏ ခွန်ကာသိကရာဇ် နင်ꩻစန္ဒာဒေႏဝီႏသီးနောဝ်ꩻ ပိုအဲဉ်ထဝ်း၊ ခမ်းမွီႏထီမွီႏအတွက်တာႏ ခမ်းသားထီသား တောင်ꩻပြန်ႏနင်ꩻစန္ဒာဒေႏဝီႏ ဆောက်တယ်ႏခန်း သီႏလသွစ်ꩻပါꩻ၊ သီႏလအဓိဋ္ဌာန်ႏတံꩻခိုꩻ အကျိုꩻဖေႏနောဝ်ꩻမꩻ လꩻခန်း ပိုပေႏတဖြာꩻ၊ အမိဉ်ꩻနောဝ်ꩻ "ခွန်တေမိ(တေမိယ)"နောဝ်ꩻသွူ။ အပိုတေမိ ကထင်ႏတန်လွဉ်ပသာႏ သေနာႏလို့ငေါဝ်းငွါ အယံတွင်ꩻကို အဖါခွန်ဟော်ခံꩻ အဝ်ႏယွော့သꩻအင်လောင်းခိန်ႏ ဝင်ꩻအွဉ်လွဉ် တခွန်ꩻဝင်ꩻလစ်ꩻတဲင် အဖါခွန်ဟော်ခံꩻလဲ့ ဖေႏအမိန်း ထွဉ်ႏလွေꩻမာꩻသီထိုꩻခန်း တခွန်ꩻဝင်ꩻလစ်ꩻနောဝ်ꩻသွူ။ အပိုပေႏ တေမိယ ကအောဝ်ႏဒင်ႏ အဖါသꩻအင်လောင်းနောဝ်ꩻ ထွိုင်ႏဟွုန်တဲင် ငမ်းသꩻဝꩻဗွုက်စွဉ်ႏ တလဲင်ႏချင်ꩻ၊ နေးတွမ်ႏဇာတိဿရဉာဏ်ႏ ကထင်ႏထွားချာ ဝွေꩻဘဝကရီးခါ ဝွေꩻလဲ့ထွာဗာႏဖိုခွန်ဟော်ခံꩻ၊ မာꩻသီဗာႏလိုꩻတဲင် လင်ꩻထဲ့ဗာႏငါးရုဲင်ꩻ၊ လင်ꩻတွိုႏဗာႏဖိုလဲဉ်း ငါးရုဲင်ꩻခမ်းနဝ်ꩻမꩻ ငမ်းသꩻငါႏ ထွာဗာႏခွန်တွော့ꩻ "ခွေမဉ်ႏတန်လွဉ်တနီꩻခါ ယံထွာဗာႏမွုန်းခွန်နောဝ်ꩻ ခွေအီႏမာꩻဗာႏနုဲင်းမုဲင်ꩻဟွေး"ယူႏစွေးစဉ္စာꩻနုဲင်းနောဝ်ꩻတဲင် ထီꩻဗွာပွေါးနင်ꩻလူꩻမူႏနဝ်ꩻ ဖေႏသတိခန်း ခွန်တေမိနုဲင်းယို- "နာꩻမဉ်ႏမဉ်ထွာတောဝ်းခွန်နောဝ်ꩻ ခံႏယပ်ꩻနမ်းတဲင် အွဉ်ႏတအွိုင်တအာႏသွော့ နာꩻနမ်းလုဲင်း၊ ဒေါ့ꩻမွုန်းတောဝ်းထာꩻ၊ နာꩻမဉ်ႏမာꩻနုဲင်းနောဝ်ꩻနဝ်ꩻ နာꩻထွာဗာႏတောဝ်းခွန်၊ တနီꩻခါမꩻ နာꩻအလိုႏဆန္ဒ အီႏဗွေဒျာႏ"ဒေါ့ꩻနယ်ဖေႏခန်းနုဲင်းနောဝ်ꩻသွူ။ နောဝ်ꩻမꩻ အလောင်ꩻတောႏ ခွန်တေမိလဲ့ သဖော်ꩻကျလွောက်ꩻနာႏလွဉ်ꩻ၊ အွဉ်ႏတအွိုင် တအာႏခန်းဒျာႏအနမ်း၊ ဒေါ့ꩻဒွုမ်ထာꩻတဲင် ဆောက်တယ်ႏခန်းဒျာႏ အဓိဋ္ဌာန်ႏပါႏရမီႏနောဝ်ꩻသွူ၊ ဟို့ꩻခိုးနဲဉ်းလဲ့ ငွိုးတောဝ်း၊ တခြေ့တကျင်အဲင်ႏလဲ့ ငွိုးတောဝ်းထာꩻ၊ တအွူးတအဲ့လဲ့ အဲဉ်ထောဝ်း၊ ပကတိစွဉ်ႏဒျာႏ လိုꩻတအွိုင်တအာႏနောဝ်ꩻသွူ။ ယံဖေႏဝွေꩻကဒေါ့ꩻထာꩻတဲင် မွိုးဖါစံꩻထွားခန်း အမျိုꩻမျိုꩻနုဲင်းယိုသွူ- အသက်လꩻတနိန်ႏ(နေင်ႏ)အတွင်ꩻကို အွဉ်ႏမမို့မို့နဲဉ်းထီ အောဝ်ႏစွူစွူ၊ နီနိန်ႏနောဝ်ꩻ စံꩻပျꩻနယ်တွမ်ႏတခိုး၊ သွံနိန်ႏနောဝ်ꩻ စံꩻတွမ်ႏသိန်ႏရောင်ꩻသိန်ႏရာႏ၊ လစ်ꩻနိန်ႏနောဝ်ꩻ စံꩻတွမ်ႏထာꩻခွုမ်ပဆိုး၊ ငတ်ꩻနိန်ႏနောဝ်ꩻ ထာꩻအံႏ၊ သူနိန်ႏနောဝ်ꩻ ယံဖေႏဝွေꩻသꩻဝꩻလဲ့ ဝွေꩻသုမ်းမေႏ၊ နွုတ်ꩻနိန်ႏနဝ်ꩻ လောက်ꩻစံꩻတွမ်ႏဆင်ကုဲင်၊ သွစ်ꩻနိန်ႏနောဝ်ꩻ လောက်ꩻစံꩻတွမ်ႏရူး၊ ကွတ်ꩻနေင်ႏနောဝ်ꩻ စံꩻတွမ်ႏပွယ်ꩻသဖင်ႏ၊ နိန်ႏဆီနောဝ်ꩻ ယိုန်းတွမ်ႏနꩻသန်လျက်၊ ဆီပုဲင်တနိန်ႏနောဝ်ꩻ အူရောင်စွော့ꩻငွီႏဗွာ၊ ၁၂-နိန်ႏနောဝ်ꩻ စံꩻဒုံႏရောင်စွော့ꩻထုံတန်၊ ၁၃-နိန်ႏနောဝ်ꩻ အွဉ်ႏသော့ꩻဝွေꩻ ခန်ꩻခေ့ꩻကိုတဲင် တဲစ်ꩻလေစွော့ꩻမေႏတေန်ꩻ၊ ၁၄-နိန်ႏနောဝ်ꩻ သူႏဖြွꩻဝွေꩻနမ်း တွမ်ႏနမ်းကဲင်းတဲင် အွဉ်ႏအဲင်ႏဟုမ်တခြေ့၊ ၁၅-နိန်ႏနောဝ်ꩻ အွဉ်ႏသော့ꩻတရာႏအိန်ႏကို အွဉ်ႏအဲင်ႏဟုမ်ဖေ့ꩻထူꩻ၊ ၁၆-နိန်ႏနောဝ်ꩻ အွဉ်ႏမုတ်ꩻတွမ်ႏဖွိုင်ꩻဖုဲင်လူး၊ ၁၇-နိန်ႏနဝ်ꩻ စံꩻတွမ်ႏကာႏမဂုဏ်ႏအာႏရုံႏ၊ နင်ꩻကျူႏနင်ꩻဝဲဉ်၊ တဆီနွတ်ꩻနေင်ႏလုမ်းလုမ်း ယံဖေႏဝွေꩻကဒေါ့ꩻ မာꩻစွဉ်ႏနုဲင်းမုဲင်ꩻမုဲင်ꩻလဲ့ အောဝ်ႏဒျာႏစွူစွူနောဝ်ꩻသွူ။ ချောက်တလဲင်ႏ လောက်ꩻတခြွိုက် စံꩻအမျိုꩻမျိုꩻလဲ့ အပိုခို ခွန်တေမိနောဝ်ꩻ တတသွိုးတောဝ်း၊ တရုဲင်ꩻတဝ်းသွူ၊ နဝ်ꩻမꩻ အဖါခွန်ဟော်ခံꩻ အာႏရꩻတောဝ်းတဲင် ရီခန်းပုရောဟိတ် ပုဏ္ဏာꩻသီး၊ ပုဏ္ဏာꩻသီးလဲ့ "ထွာအီမွိုးဖါ ခမ်းထီအန္တရာယ်ႏ၊ ဒင်ႏတွမ်ႏလောရထာꩻတဲင် လွေꩻမာꩻသီ ပလို့တေ့ꩻတေ့ꩻထိုꩻခန်းလုဲင်း"ရိုꩻဖေႏနုဲင်းနောဝ်ꩻတဲင် ခွန်ဟော်ခံꩻလဲ့ သဖော်ꩻတူႏခန်းဒျာႏနောဝ်ꩻသွူ။ အမွိုးကထင်ႏဟွုန်တဲင် တောင်ꩻပြန်ႏခန်း ခွန်ဟော်ခံꩻ ထွဉ်ႏထွားစံꩻ ခွန်ဟော်ခံꩻနဝ်ꩻသွူ၊ အမွိုးအဖါသီးလဲ့ တွမ်ႏဖွါꩻဖက် အမတ်ငတ်ꩻရျာꩻ ရံႏခူထွူတဲင် ဒင်ႏဖေႏခန်း ခွန်ဟော်ခံꩻအရာႏ၊ ခွင်ꩻဖေႏနွုတ်ꩻနီꩻနောဝ်ꩻသွူ၊ အောဝ်ႏထွာခွန်ဟော်ခံꩻအတွင်ꩻ အမွိုးနင်ꩻစန္ဒာႏဒေႏဝီႏနောဝ်ꩻ အပိုခို ယံဒေါ့ꩻခန်းငေါဝ်းနောဝ်ꩻ တောင်ꩻပြန်ႏခြုဲင်းနယ်အမျိုꩻမျိုꩻလဲ့ ဘုရာꩻလောင်ꩻတေမိ ငမ်းငါႏအဓိဋ္ဌာန်ႏကုဲင်တဲင် အုံဒျာႏစွူစွူနောဝ်ꩻသွူ။ နွုတ်ꩻနီꩻကထင်ႏဗွေနောဝ်ꩻ ထူꩻချာꩻတောဝ်းတမုဲင်ꩻမုဲင်ꩻနဝ်ꩻမꩻ အမွိုဖါသီးနောဝ်ꩻ "လိုꩻတအွိုင်တအာႏယို တွမ်ႏခမ်းထီနဲင်ႏငန်ႏ တတန်ႏတောဝ်း"ရိုꩻထွူနုဲင်းနောဝ်ꩻတဲင် ဟဲ့ꩻစွဉ်ႏသုနန္ဒ ရထာꩻ သေလောဝါးသား"တေမိမင်ꩻသꩻယို ဒင်ႏထန်ႏထိုꩻတွမ်ႏရထာꩻလော အွိုးသင်ႏခဲင်ꩻကိုတဲင် ခူႏထာꩻအောင် တွဲႏပꩻအကတူႏတွော့ꩻ ပလို့ꩻထိုꩻခန်းလုဲင်း"ဖေႏအမိန်း ထွဉ်ႏခန်းနုဲင်းနောဝ်ꩻသွူ။ ရထာꩻလောဝါးသားလဲ့ ဘုရာꩻလောင်ꩻ တေမိယို ဒင်ႏစွဉ်ႏရထာꩻလောင်းတဲင် ဝါးထန်ႏလွေꩻကွဉ်ႏစွဉ်ႏ မဲင်ႏသွံဆီလွိုအရပ် တခြာတန်ကိုနောဝ်ꩻသွူ။ ဘုရာꩻလောင်ꩻနောဝ်ꩻ "ဟန်ႏနီꩻယို ခွေထာꩻလိုႏဗွေသွူ"ယူႏသꩻကိုနုဲင်းနောဝ်ꩻတဲင် သွိုꩻသွင်ႏမွေးစွဉ်ႏထာꩻ၊ ရထာꩻဝါꩻသားလဲ့ ထင်ႏတွိုႏလွေꩻတခြာကို လောလဲ့အွဉ်ႏချꩻ၊ ဘုရာꩻလောင်ꩻလဲ့ ဗွောင်ႏထိုꩻမင်ꩻသာꩻခြွိုင်းတဲင် အွဉ်ႏဗုဲင်ဖေႏတွမ်ႏ ပိတ်ခေါဝ်ထွူမꩻ မဗော့ꩻမညာꩻ လွေꩻခူႏခန်း ထာꩻအောင်နောဝ်ꩻသွူ။ ခိန်ႏနောဝ်ꩻတွင်ꩻ ဘုရာꩻလောင်ꩻတေမိလဲ့ ရုဲင်ꩻခန်းထာꩻ၊ အာႏရဲင်ꩻအောဝ်ႏ တအောဝ်ႏတဝ်း ထွိုင်ႏစံꩻထွားစံꩻတဲင် အာႏအောဝ်ႏဒျာႏနောဝ်ꩻမꩻ သီကျာꩻဖေႏ ခွန်ခြွိုင်းတွမ်ႏ လူꩻခွမ်ꩻလာꩻယို ကꩻထွိုင်ဝင်ꩻတဲင် လွေꩻထေ့မိုးစွဉ်ႏ ရထာꩻလောဝါးသား ကအောဝ်ႏခူႏထာꩻအောင်ထျꩻနောဝ်ꩻသွူ။ ဝွေꩻဒေါ့ꩻနယ်ဖေႏ ရထာꩻဝါးသားနုဲင်းယို- "ခွေယိုနဝ်ꩻ မဉ်လꩻတောဝ်းငါႏ ခွန်စေꩻစိန်ႏနောဝ်ꩻမꩻ ခွေအွဉ်ႏတအွိုင်တအာႏမို့မို့ဒျာႏ ခွေနမ်း"စတဲင်စားယို ဒေါ့ꩻခြုဲင်းနယ်ဖေႏ၊ ဟော်ꩻဖေႏတရာꩻထွူတဲင် "ခွေယို ဗုဲင်ရဟန်ꩻတဲင် အီႏအုံဗော့ꩻအရပ်ကိုယို၊ နာꩻလဲ့ သဲင်ꩻချာတဲင် သဲင်ꩻဒေါ့ꩻနယ်ပါ ခွေမွိုးဖါလုဲင်း"ရိုꩻထွူနုဲင်းနောဝ်ꩻတဲင် အွဉ်ႏစွꩻသဲင်ꩻချာခန်း ရထာꩻလောဝါးသားနဝ်ꩻသွူ။ ရထာꩻလောဝါးသား သုနန္ဒာႏနောဝ်ꩻ အလောင်ꩻတေမိက ထင်ႏဒေါ့ꩻစွော့ꩻထာꩻတဲင် ဟွုန်ထူꩻဆန်ꩻငါႏနောဝ်ꩻမꩻ နဲတ်လောႏသဲင်ꩻအွဉ်ႏဒေါ့ꩻဟွုန်ခန်း အမွိုးဖါ ခွန်ဟော်ခံꩻနောဝ်ꩻသွူ၊ နဝ်ꩻမꩻ အဖါခွန်ဟော်ခံꩻနောဝ်ꩻ တွမ်ႏမူꩻမတ် ပရိသတ်ခမ်းသား ထီသားဖုံႏ နဲစ်လွေꩻခန်း ဘုရာꩻလောင်ꩻထျꩻ။ "ယံသဲင်ꩻထွာယင်း ခွန်အကျောင်ꩻ"တောင်ꩻပြန်ႏလဲ့ လꩻတဝ်းဒွုမ်၊ တေမိယို ဗုဲင်ထိုꩻလဲဉ်း သောဝ်ႏဖေ့ꩻ၊ မာꩻလဲဉ်းနမ်းရသေ့ꩻတွော့ꩻ အားထုတ်တရာꩻတဲင် လꩻခန်း ဈာန်ႏအဘိညာဉ်ႏထွူခါ အုံမို့ꩻလောင်း ဟော်ꩻဆွုမ်ႏဖေႏစွဉ်ႏ ဝွေꩻသီးစွိုးဖုံႏတရာꩻနောဝ်ꩻသွူ၊ မွိုးဖါတွမ်ႏ ပရိသတ်သီးအားလုံး လꩻလို့ဝင်ꩻ သံဝေဂတွော့ꩻ ဗုဲင်လို့ခန်းဒျာႏ ရသေ့ꩻနောဝ်ꩻသွူ။ ကွဲညညတဲင် သတင်ꩻကျောႏတွိုႏစွစ်ꩻလို့စွဉ်ႏ နွုတ်ꩻခမ်း၊ ခွန်ဟော်ခံꩻ နွုတ်ꩻခမ်းလဲ့ လွဉ်နာႏဝင်ꩻ တေမိတရာꩻတဲင် ဟွုန်ဟဝ်နိက်သက်ငါႏနောဝ်ꩻမꩻ နွုတ်ꩻခမ်းလုမ်း ဗုဲင်လို့စွဉ်ႏဝင်ꩻ ရသေ့ꩻ၊ အားထုတ်တရာꩻ ပွာꩻဘာႏဝနာႏတွော့ꩻ ထင်ႏသီတဲင် တွိုႏထင်ႏရောင်ခန်း ဗြဟ္မာႏခမ်းသူꩻသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ပါႏရမီႏဆီပါꩻ
  2. ပအိုဝ်ႏလိတ်လုဲင်ꩻစွစ်ꩻလီတာႏအစွိုꩻ