အဘိဇ္ဈာ

ပါꩻနီဒုံ အမဉ်ꩻ "ဗွို့ယုဲင့်"အဝ်ႏတဖြာꩻ၊ ပါꩻနဝ်ꩻနဝ်ꩻ အသက်လꩻသွူ တဆီသွစ်ꩻတဲ့ အနမ်းတပေါက်ꩻပဲ့ပေႏ၊ နဝ်ꩻလွုမ်ꩻတကာႏတဝ်း ကတူႏဟ့းပိုမ်၊ နေ့ꩻဖူဟွစ်ꩻ၊ တငါတကွစ်ꩻ ဖြောင်းသမ်းလုဲင်း၊ ဖြောင်းဗီးတယုဲင်း မဲ့တနွာႏ၊ ယာႏဖြေင်းမေႏသွာႏ ခြူႏခြီႏဒွုန်၊ ဒေါ့ꩻတွိုင်ꩻမဟွုန် နားဟံႏထွူႏ နုဲင်းနဝ်ꩻယင်။ ကွဲႏတွော့ꩻ ပါꩻယိုနဝ်ꩻ ကျွားသဲင်ꩻတခြစ်ꩻမွေးစွဉ်ႏထာꩻ၊ လွေꩻပွယ်ꩻလွေꩻလမ်ꩻ မူႏနံꩻဖေႏနေးကထွားဝွေꩻတဲင် ကွီလနေးဝင်ꩻ အခြွိုင်းအခြိုꩻ၊ ဝင်ꩻဖေႏလလယ်ႏကွို့ꩻ ခွယ်ꩻလာꩻတခြိုတခြာ၊ စူသွို့ꩻတောင်ꩻ နားရီႏယ၊ ကတူႏပေါက်ꩻခွေႏပေႏ နုဲင်းနဝ်ꩻဖုံႏလွုမ်ꩻ။

"နာꩻတွမ်ႏဗွို့ယုဲင့် ထေင်လို့ဝင်ꩻ မာꩻထမုဲင်ꩻဟွဉ်ႏ မောင်ႏမတ်" "ပွယ်ꩻလိန်ꩻလဲဉ်းထိုꩻသွူ နီသွံနီꩻတဲ့ ဖေႏချာတဝ်း ခွေသွဉ်းအခြွိုင်းအခြိုꩻနဝ်ꩻမꩻ ခွေသွဉ်းထေင်ဗာႏဝွေꩻ နုဲင်းနဝ်ꩻ ဆရာႏ" "နာꩻမွော့ ဖေႏချာတဝ်း ဝင်ꩻအခြွိုင်းအခြိုꩻအီ ဗွို့ယုဲင့်" "ခွေကွီလခြေင်ဝွေꩻမွေးတဝ်းဆရာႏ၊ ခူႏဖေႏဗာႏဝွေꩻတရာႏအိန်ႏနဝ်ꩻ လင်ꩻပဉ်သိုမ်သောင်ꩻထာ၊ လို့ဖေႏပါ ဖိုးအေႏနဝ်ꩻ လစ်ꩻနီꩻ" "ဟား ဟား ဟား ဟား" "ဖေႏလလိုꩻတဲ့ ဖေႏကွို့ꩻနားရီႏယ၊ ဖေႏဆွကွို့ꩻ စူသွို့ꩻတောင်ꩻ" "နဝ်ꩻဟ နာꩻမွော့ သမ်းဆွအီ" "ပတ်နားရီႏယ-ဆွစူသွိုꩻ့တောင်ꩻ နုဲင်းယိုနဝ်ꩻ ယောင်ꩻဟံးတရေꩻမကောင် ယူႏနုဲင်းနဝ်ꩻဆရာႏ" "ဟား ဟား ဟား ဟား" "တပဲ့ꩻသီးဖုံႏဟွေး- ဆရာႏကအီႏသွဉ်ဖေႏ ဟန်ႏနီꩻယိုနဝ်ꩻ ဒုစရဲက်အမုဲင်သွစ်ꩻ၊ "အဘိဇ္ဈာ-မဲန်လꩻဝင်ꩻတခြိုꩻ"။ "အဘိဇ္ဈာ"ကရိုနဝ်ꩻ- "ဝင်ꩻစေꩻစိန်ႏတခြိုꩻယို မဉ်ႏထွာခွေထာꩻနဝ်ꩻ ယံငါႏမွေးမွော့ဟွေး"ယူႏနုဲင်းနဝ်ꩻတဲင် မဲန်လꩻရိုꩻရိုꩻလွုမ်ꩻတကာႏတဝ်း၊ မဲန်လꩻတငါ၊ မဲန်အွဉ်ႏထွာစွဉ်ႏ နီတခြိုꩻနုဲင်းနဝ်ꩻ။

ဝင်ꩻတခြိုꩻကရိုꩻနဝ်ꩻ- ဝင်ꩻကုသိုလ်ႏကံႏ တွမ်ႏဝင်ဉာဏ်ႏ ဝီရိယတဲင် ဝင်ꩻလꩻလွဉ်၊ ဝင်ꩻခြွေဝင်ꩻခြာႏ၊ ဝင်ꩻချမ်ꩻသာႏလွဉ် နုဲင်းနဝ်ꩻဒျာႏ။ မဲန်လꩻသဲင်တခြစ်ꩻ ဝင်ꩻတခြိုꩻနဝ်ꩻ ထွာထင်ႏလောဘ အကုသိုလ်ႏကံႏ၊ ကွပ်နဝ်ꩻမꩻ မဉ်ႏသီတဲ့ လင်ꩻထဲ့ဗာႏငါးရုဲင်ꩻ၊ မဉ်ႏသဲင်ꩻကွုတ်ယင်းလိုꩻပိုတဲ့ ကလိုႏတောင်ႏတအတွိုင်ꩻ တလꩻတဝ်း၊ ထွာဗာႏဒျာႏ လိုꩻကေန်ꩻလိုꩻခြော၊ ရန်ႏသူႏတဲ့လွိုင်ႏအာ၊ ထွာဗာႏနုဲင်းနဝ်ꩻ။ ကွပ်နဝ်ꩻမꩻ မဲန်လꩻဝင်ꩻတခြိုꩻတဲ့ တထွူထွာတဝ်း၊ အကုသိုလ်ႏအာထဲင်းလွုမ်ꩻတဲင် နေးတွမ်ႏဉာဏ်ႏ ဝီရိယကျိုꩻစာꩻ ခွုမ်မာꩻကုဲင်းကုဲင်းထွူတွော့ꩻ မဉ်ႏထိန်ꩻသိမ်ꩻဒါႏဒါႏ၊ မဉ်ႏသုံꩻစုဲင်ႏဒါႏဒါႏနဝ်ꩻ မဲ့ꩻစေꩻစိန်ႏတခြိုꩻ တိုꩻပွါꩻလွိုင်ႏအာလွေꩻဗာႏဒျာႏ" နီဆရာႏသျင်ꩻနယ်ဖေႏ နုဲင်းနဝ်ꩻထွူတွော့ꩻ တဲမ်းဖေႏပါ ကဗျာနုဲင်းယို- + ဝင်ꩻတခြိုꩻဟွေး - မဲန်နေးလွဉ်ꩻမာႏ ငါးရုဲင်ꩻထဲ့ဗာႏ - ချမ်ꩻသာႏကင်ꩻညာꩻ သဲင်ꩻကွုတ်လိုꩻပို - ခြောဖိုအာငါႏ မဲန်လꩻမွုန်း - မဉ်ႏယွုန်း ကျင်ꩻဟဝ်ထွာ။

ကဗျာယို မဉ်ႏပြန်ႏငေါဝ်းရိုꩻရိုꩻနောဝ်ꩻ - (ဝင်ꩻတခြိုꩻယို မဲန်လꩻမွေး၊ မဲန်နေးငါ သꩻလောဘ မဉ်ႏလွဉ်ꩻမာႏနုဲင်းနဝ်ꩻနဝ်ꩻ လင်ထဲ့ဗာႏငါးရုဲင်ꩻ၊ မဉ်ႏလင်ꩻထဲ့ငါးရုဲင်ꩻသူꩻနဝ်ꩻ ထာꩻချမ်ꩻသာႏ အဲန်ထဝ်းတစိꩻစိꩻ၊ မဉ်ႏသဲင်ꩻကွုတ်လိုꩻပိုတဲ့ သဲင်ꩻကေန်ꩻခြော ဒုက္ခဗာႏ၊ ကွပ်နဝ်ꩻမꩻ မဲန်လꩻတငါမွုန်း ဝင်ꩻတခြိုꩻ၊ မဉ်ႏယွုန်းထိုꩻနဝ်ꩻ ထွာလိုꩻအကျင်ꩻဟဝ်) ပြန်ႏဗာႏနုဲင်းနဝ်ꩻ။ "တပဲ့ꩻသီး ဖေႏနေးကထွာ လိုꩻအကျင်ꩻဟဝ်၊ ဖေႏနေးကထွာ လိုꩻယံနဝ်ꩻ မဲန်လꩻငါမွုန်း ဝင်ꩻတခြိုꩻနော" "ယိုတလဲင်ႏတဲ့ အခိန်ႏလꩻလဲန်း၊ အုံပဆားဒွိုန်းက၊ မင်္ဂလာႏဒျာႏ တပဲ့ꩻဖုံႏ" "မင်္ဂလာႏဒျာႏ ဆရာႏဗွေႏအော်"