အမာႏတရွို့ꩻ(၁)

အမာႏတရွို့ꩻဖျင်စွို့ꩻ(၂)

နီသွဉ်းသီး အသောင်အရင်ꩻဖုံႏယို တသေထွꩻလို့တဝ်း အခံႏအစဲစ်အမဲဉ်ႏတွော့ꩻ မာႏယို ထွိုင်ႏညလွဉ်နဝ်ꩻ ထွာလွဉ်ထိုꩻဒါႏ အမဲဉ်ႏနဝ်ꩻသွူ၊ နီသွဉ်းသီး ပအိုဝ်ႏလိုꩻမျိုꩻယို အမာႏထွာလွဉ် အမဲဉ်ႏဖုံႏနဝ်ꩻ အဝ်ႏအာငါႏ၊ ကွဲးတွော့ꩻ တသေထောင်ချာတဝ်း အရွီးအခိုႏဒျာႏ ခွေသွဉ်းခံႏထူႏနုဲင်းနဝ်ꩻသွူ။ နီသွဉ်းသီး ပအိုဝ်ႏလိုꩻမျိုꩻယို အဝ်ႏလိုႏဖျင်မွဉ်းလွေꩻခရာႏနဝ်ꩻ အာငါႏတဲင် ယိုခါ ကအဝ်ႏထွာအရေꩻကီꩻ အရေꩻတန်တဗာႏနဝ်ꩻ လိတ်ခရာႏတန်နဝ်ꩻသွူ၊ နီသွဉ်းသီးယို သက်တန်ꩻတဗာႏလုမ်းလုမ်းကို ကအဝ်ႏသွဉ်ထူႏလွေꩻဒါႏ ပအိုဝ်ႏလိတ်မွူးယိုနဝ်ꩻ နီသွဉ်းသီး သေထွꩻဗာႏ ဗွေႏဗွန်သုနန္ဒ ထီသိမ်ႏလိတ်မူနုဲင်းနဝ်ꩻသွူ။

ကွဲးတွော့ꩻ ဗွေႏဗွန်ထီသိမ်ႏလိတ်မူစဲစ်စဲစ်နဝ်ꩻ နုဲင်းမုဲင်ꩻ၊ လိတ်စောင်ႏနဝ်ꩻနုဲင်းမုဲင်ꩻ၊ ဗွေႏဗွန်ထီသိမ်ႏ မိန်းသေꩻခါꩻငေါဝ်း အဝ်ႏနုဲင်းမုဲင်ꩻနဝ်ꩻ ကဲဉ်းအာအာ သက်သိုမ်ဆီရပ် လိုꩻဖုံႏနဝ်ꩻ တသေထွꩻတဝ်းဒွုမ်သွူ၊ ပွိုးတမုဲင်ꩻနဲးနဝ်ꩻ ဗွေႏဗွန်ထီသိမ်ႏ ကတဲမ်းထေဖေႏဒါႏ ပအိုဝ်ႏလိတ်မွူးတသာယို ထွူဖြီႏစီႏနဝ်ꩻ သက္ကရာဇ် ၁၃၀၉-ဗာႏခိန်ႏကာႏ၊ ထွိုင်ႏဖျင်မွဉ်းထွူ ထွတ်ထေလွေꩻနဝ်ꩻ သက္ကရာဇ် ၁၃၁၉-ဗာႏနုဲင်းနဝ်ꩻသွူ။ ခွေသွဉ်းရွမ်ဖြုဲင်ꩻယိုနဝ်ꩻ မဉ်ယားလီချာ လွောင်ႏဗူႏရေꩻ၊ မဲ့ꩻဗွေႏသံႏဃာႏသီးကေꩻဇူꩻ၊ မဲ့ꩻဆရာႏသီးကေꩻဇူꩻနုဲင်းနဝ်ꩻ တမွေးတဝ်းကရိုꩻနဝ်ꩻ ရီးသွတ်ꩻဒေါ့ꩻလောဝ်းလွေꩻဖေႏဗာႏသွူꩻ ပွိုးတမုဲင်ꩻနဲးတဲင် ပအိုဝ်ႏယို မဉ်ႏပတ်သဲစ်သွူ တွမ်ႏလိတ်ခရာႏနဝ်ꩻ စွဉ်ꩻလွေꩻဗာႏနေးစွဉ်ႏ သွီႏသက်သားဖုံႏ၊ ခံႏဗာႏမွေးစွဉ်ႏ အနေစ်နာႏဖုံႏ၊ ခံႏလို့ဗာႏမွေးအခိန်ႏဖုံႏ အာမွေးငါႏကရိုꩻနဝ်ꩻ တဲမ်းလိတ်သား ခွေသွဉ်းသေနာႏဒျာႏသွူ။ ကွဲးတွော့ꩻ အမာႏတရွိုꩻအဝ်ႏယို မဉ်ႏတဖျင်စွိုꩻဖေႏတဝ်းနဝ်ꩻ အမာႏယိုည ထွာလွဉ်အမဲဉ်ႏတဲင် ကထွာဒါႏ လိုꩻမျိုꩻတာႏလဲ့ မဲ့ꩻထဲ့သုမ်ꩻထိုꩻဒါႏ ယူႏနုဲင်းနဝ်ꩻတွော့ꩻ တဲမ်းဖောႏနယ်လွေꩻဗာႏဒျာႏသွူ၊ ယိုခါ ထေလိတ်စောင်ႏသားဖုံႏ ကအဝ်ႏကျုံႏမော့ꩻဗာႏဒါႏ ပျဿနာႏနဝ်ꩻ လိတ်ဖုံႏတလိုမ်းကိုမ်ႏတဝ်း၊ ဝေါဟာရစုမ်ႏတဝ်း၊ ရမ်ꩻဟောꩻဗာႏနေး၊ လိတ်တဖြုံႏ အငဝ်းထန်ႏနီသိုမ်မျိုꩻဖုံႏယို အဝ်ႏမော့ꩻအယပ်ꩻခုဲင်ႏသွူ၊ အယပ်ꩻခုဲင်းနုဲင်းယိုတဲ့ ဖေႏကဖြေႏသျင်ꩻနွောင်ꩻရေႏနုဲင်းနဝ်ꩻတွော့ꩻ တာႏဝွန်ႏကအဝ်ႏသားတွမ်ႏ ပညာႏဒါႏသီးဖုံႏ တွိုင်ႏပင်ႏရော့ꩻရော့ꩻ၊ ချော့ꩻလွဝင်ꩻမာႏန၊ စွိုးခွိုꩻတာႏအွဉ်ႏဆꩻငါ တွမ်ႏစေႏတနာႏဗွာဗွာတွော့ꩻ ပအိုဝ်ႏလိတ်ခရာႏ ယံဖေႏကဖြေႏသျင်ꩻနွောင်ꩻ ရေႏမိုးလွေꩻဒျာႏနုဲင်းနဝ်ꩻသွူ။

နဝ်ꩻမꩻ ထေလိတ်စောင်ႏသားဖုံႏတဲ့ သုင်ꩻလွေꩻဒျာႏတဖြုံႏချင်ႏ၊ ကေားထွားသားဖုံႏတဲ့ ဖေႏကဒါႏယိုꩻ၊ သေနာႏယိုꩻ ဖြောင်စဲင်းနဝ်ꩻ အရေꩻကီꩻငါႏလဲဉ်းသွူ၊ မဉ်ႏတမွေးတဝ်းနဝ်ꩻ တဲမ်းလိတ်သား တဲမ်းတမျိုꩻ၊ ဟောꩻထွားသားရိုꩻတစားတွော့ꩻ အဖြုံႏမုဲင်ꩻနဝ်ꩻမဲဉ်ႏ၊ အဖြုံႏမုဲင်ꩻနဝ်ꩻမာႏကရိုꩻယို ခွယ်ꩻချာꩻတလꩻတဝ်းသွူꩻ အီႏယွူးဗာႏပါꩻမုဲင်ꩻမာႏ၊ အီႏယွူးဗာႏပါꩻမုဲင်ꩻမဲဉ်ႏ၊ တရာꩻခံႏတအဝ်ႏတဝ်း ထွာထိုꩻနုဲင်းနဝ်ꩻတွော့ꩻ ပအိုဝ်ႏချင်ꩻချင်ꩻ လွောင်ႏဗူႏရေꩻယို ယိန်းကုဲင်အာ ထွာဗာႏနုဲင်းနဝ်ꩻသွူ။ နဝ်ꩻတွော့ꩻ နီသွဉ်းသီး တသေထွꩻတဝ်းဒါႏ လိတ်မွူးထီသိမ်ႏယို ခွေသွဉ်းထွိုင်ႏထီႏထွားဗာႏနဝ်ꩻ တွမ်ႏနီသွဉ်းသီး ကသွဉ်ထူႏဒါႏ လိတ်မွူးယိုခါနဝ်ꩻ ကွာႏအာငါႏနဝ်ꩻမꩻ ဝင်ꩻမဉ်ႏရိုꩻလိတ်ယိုနဝ်ꩻ ထီသိမ်ႏမူနုဲင်းနဝ်ꩻနဝ်ꩻ နီသွဉ်းအနေႏ တမွေးတဝ်းဒွုမ် မဲဉ်ရိုꩻနုဲင်းနဝ်ꩻသွူ။ ပွိုးနုဲင်းမုဲင်ꩻတဲ့ ထွာထိုꩻဒျာႏသွဉ်ဗာႏအာ၊ မဉ်ႏဒေါ့ꩻယင်းတနယ်ꩻ အမျာꩻသုင်ꩻ ထွာထိုꩻဒျာႏနုဲင်းနဝ်ꩻ၊ အမဲဉ်ႏနဝ်ꩻ ထီသိမ်ႏမူစဲစ်စဲစ် တမွေးတဝ်းဒွုမ်သွူ။

ထီသိမ်ႏမူကရိုꩻနဝ်ꩻ ဗွေႏဗွန်ထီသိမ်ႏ ကတဲမ်းထွင်ႏသေꩻခါꩻဒါႏ လိတ်မွူးစောင်ႏယို ဗွေႏဗွန်ဉာဏ ကျောင်ꩻထမ်းဘုရာꩻ မွဉ်းဖျင်ဖေႏ လိတ်မွူးစောင်ႏယို ထုဲင်ႏပွုံႏကိုအတွိုင်ꩻနဝ်ꩻဒျာႏသွူ၊ နဝ်ꩻမ လိတ်မွူးစောင်ႏယိုနဝ်ꩻနဝ်ꩻ ကထွာဒါႏ နီသွဉ်းသီး သက်သိုမ်ဆီလွိုသားခွိုꩻသွုပ်ဖုံႏနဝ်ꩻ တထီႏထွꩻလို့ဗာႏတဝ်းတဲင် ဖေႏကထီႏထွꩻဗာႏနဝ်ꩻ အီႏဒင်ႏနယ်လွေꩻဖေႏနဝ်ꩻသွူ။ နဝ်ꩻမꩻ အမဲဉ်ႏမဲဉ်ႏ ဖေႏကထွာလွဉ်၊ နုဲင်ႏငံႏတောႏ ကအဝ်ႏဖေႏခွင်ꩻလဲဉ်းသွူ ခမ်းရင်ꩻသားတာႏ အတန်ꩻကျောင်ꩻကို ကျောင်ꩻခိန်ႏအထန်ႏ (ကျောင်းချိန်ပြင်ပ)သွဉ်ချာလိုꩻမျိုꩻလိတ်လုဲင်ꩻလꩻလဲဉ်းနဝ်ꩻ အီႏအောင်ႏမျင်ႏယိုꩻ ယူႏနုဲင်းနဝ်ꩻသွူ။

အမာႏတရွို့ꩻ-ဖျင်စွို့ꩻ(၃)

တဲမ်းလိတ်သား အဝ်ႏရန်ႏကုန်ႏ အဝ်ႏထင်ႏသွဉ်တန်ꩻခိန်ႏတွင်ꩻ နေင်ႏနဝ်ꩻ ၂၀၁၂-ရပ်ခိန်ႏ တွမ်ႏသွꩻပေႏ ထေင်ဗာႏဖိုလွဝင်ꩻ၊ ရွို့ꩻရန်ႏဝင်ꩻတမွေးတဝ်း၊ နုဲင်းအေန်းကလေတ်နဝ်ꩻ ဟဲ့ꩻဒီဗေက်၊ ထုဲင်ႏမန်းနဝ်ꩻ စကားရည်လု နုဲင်းနဝ်ꩻဒျာႏ၊ ထေင်သွူလွဝင်ꩻ အခိန်ႏညညလဲ့ အဖြေႏတထန်ႏလွဉ်တဝ်းသွူ၊ ကထေင်ဗာႏဝင်ꩻ အခရာႏနဝ်ꩻ နုဲင်းယိုသွူ- "ပအိုဝ်ႏ"လိတ်ဖြုံႏယိုနဝ်ꩻ လိုꩻမျိုꩻတွိုင်ꩻ ဟောꩻထွားတလꩻတဝ်း၊ တဒါႏတဝ်းတဲင် လိုႏအွဉ်ႏကုဲင်ထိုꩻခန်း ဝသွတ်ꩻ၊ တဲမ်းငါ"အိုႏ"နုဲင်းနဝ်ꩻငါ၊ သွꩻပေႏနဝ်ꩻ သဖောꩻအဝ်ႏနုဲင်းနုဲင်းနဝ်ꩻသွူ။

တဲမ်းလိတ်သားနဝ်ꩻ သမ်းတသေစဲင်းငါႏတဝ်းဒွုန်း လိတ်ခရာႏ၊ သꩻကိုနဝ်ꩻ သော့ꩻဝသွတ်ꩻယိုမꩻ ပအိုဝ်ႏလိတ်မဲဉ်ႏ၊ အထီထွူႏ၊ မတ်ထူႏဒျာႏနုဲင်းနဝ်ꩻတဲင် အဝ်ႏထေင်ချာငါဗာႏလွဝင်ꩻ လိတ်ဖြုံႏ"ပအိုဝ်ႏ"တွမ်ႏ"ပအိုႏ"နဝ်ꩻသွူ၊ မဉ်ႏတဲမ်း "ပအိုဝ်ႏ"ယိုနဝ်ꩻ လိုꩻမျိုꩻတွိုင်ꩻ ဟောꩻထွားလွေꩻ အငေါဝ်းထန်ႏလွေꩻတေားဒျာႏ"ပအိုင်း"ပအုဲင်း-နုဲင်းနဝ်ꩻသွူ။ ကဟောꩻနုဲင်းယိုနဝ်ꩻ တွိုႏယိုခါ တပြောင်ꩻလုဲင်ႏတဝ်းဒွုန်းသွူ၊ နုဲင်းမုဲင်ꩻမုဲင်ꩻတယဝ်း "ပအိုဝ်ႏ"လိတ်ဖြုံႏယိုနဝ်ꩻ အထီယန်းထွူႏ၊ ပအိုဝ်ႏဖုံႏတဲ့ အဝ်ႏခံႏထူႏလဲဉ်းနုဲင်းနဝ်ꩻတဲင် လိုꩻလင်ꩻဟောꩻထွားဒါႏတဲ့နဝ်ꩻ၊ ဟောꩻထွားဒါႏတဝ်းတဲ့နဝ်ꩻ အွဉ်ႏရေꩻတဝ်း၊ လိတ်ယိုနဝ်ꩻ လိုꩻမျိုꩻလင်တာႏ တမွေးတဝ်း၊ ပအိုဝ်ႏတာႏဒျာႏတဲင် အဓိကဒျာႏ ပအိုဝ်ႏလိုꩻမျိုꩻ ထူႏဂုဏ်ႏချာ၊ သွဉ်ချာဒျာႏသွူ။ နဝ်ꩻတွော့ꩻ တဲမ်းလိတ်သား ကအဝ်ႏထေင်ဗာႏဝင်ꩻ အခရာႏယိုနဝ်ꩻ ထွိုင်ႏထောင်ထွား စဲစ်ဆေꩻလွေꩻထဲင်းထဲင်းယင်းနဝ်ꩻ ပအိုဝ်ႏလိတ်မွူးစောင်ႏယို လိတ်မူနဝ်ꩻ ဗွေႏဗွန်ထီသိမ်ႏလိတ်မူ သေထွꩻနုဲင်းနဝ်ꩻတဲင် ဟောꩻထွားလွေꩻဗာႏယင်း ဗွေႏဗွန်လိတ်မွူးတသာနဝ်ꩻသွူ၊ ကွဲးတွော့ꩻ လိတ်ထီသိမ်ႏမူ ပအိုဝ်ႏလိတ်မွူးတသာယိုနဝ်ꩻ တဲမ်းလိတ်သားသီးတွမ်ႏ ခွိုꩻသွုပ်တသာသီး ကအဝ်ႏသွဉ်ထူႏဒါႏ ယိုခါခါနဝ်ꩻ ကွာႏအာထိုꩻလဲဉ်းသွူဝင်ꩻနဝ်ꩻသွူ။

အကွာနုဲင်းမုဲင်ꩻနဲးနဝ်ꩻ နီသွဉ်းသီး ကအဝ်ႏသွဉ်ဒါႏ လိတ်ယိုခါခါနဝ်ꩻ ဆောင်ႏအွံနေး အလင်္ကာႏပေႏအဝ်ႏ"နီ လစ်ꩻ သူခါ၊ အမုဲင်ပါ၊ ငေါဝ်းငွါထန်ႏပအိုဝ်ႏ"တဲ့၊ လိတ်မွူးတွယ်ꩻကို နီဖြုံႏကို၊ လစ်ꩻဖြုံႏကိုတွမ်ႏ သူဖြုံႏကိုနဝ်ꩻ အမုဲင်ပါတွော့ꩻ ငေါဝ်းအွဉ်ႏထင်ႏအွဉ်ႏလင်ꩻ ထွာအီထိုꩻနုဲင်းနဝ်ꩻသွူ၊ နဝ်ꩻသွူတကာႏတဝ်း ဗျည်းတဲ့ အဝ်ႏ ၃၃-ဖြုံႏလုမ်ꩻနဝ်ꩻသွူ။ ကွဲးတွော့ꩻ လိတ်ထီသိမ်ႏမူစဲစ်စဲစ်နဝ်ꩻ နုဲင်းနဝ်ꩻ တမွေးတဝ်းသွူ၊ ဗျည်းယို အဝ်ႏစွဉ်ႏ ၃၆-ဖြုံႏသွူ၊ -ႏ၊ -း၊ ပ-လာဆန်ꩻပမာႏယိုတဲ့ သော့ꩻရောꩻလွေꩻဗျည်းကိုနဝ်ꩻ ထီႏဗာႏသွူ။ နဝ်ꩻသွူတကာႏတဝ်း "ပအိုဝ်ႏ"ယိုလဲ့ တဲမ်းဒျာႏ"ပအိုႏ"အဆꩻကီနဝ်ꩻ လာဆန်ꩻပမာႏ အဝ်ႏဒင်ႏလူးနုဲင်းနဝ်ꩻသွူ။ ပအိုဝ်ႏလိတ်မွူးတသာ ဗွေႏဗွန်ထီသိမ်ႏလိတ်မူကိုနဝ်ꩻ အမုဲင်ဖုံႏတဲ့ အွဉ်ႏထွော့သေꩻခါꩻပါတဝ်း၊ အဝ်ႏဒျာႏ လာဆန်ꩻသိုမ်ဟာပုံႏ(လချမ်း)ပွုံႏ ကအဝ်ႏဒင်ႏဆꩻကီနဝ်ꩻ ထွာအမုဲင်ပါနုဲင်းနဝ်ꩻသွူ၊ နီ လစ်ꩻ သူပါ အမုဲင်ကပါယိုနဝ်ꩻ ထုဲင်ႏထီသိမ်ႏမူ အွဉ်ႏသော့ꩻလုဲင်ႏဒျာႏ လာဆန်ꩻပွုံႏ အဝ်ႏထေင်းဆꩻကီဖဲ့ꩻနုဲင်းနဝ်ꩻသွူ။

ကအွဉ်ႏထွော့ဗာႏ လာဆန်ꩻပမာႏယိုလဲ့ ဗွေႏဗွန်ထီသိမ်ႏမိန်းဟောꩻလွေꩻဖေႏပါနုဲင်းယို-"ပအိုဝ်ႏစထွိုင်ႏ ခေတ်တသာ၊ တရေင်သိုမ်ရျာꩻ လွိုတကီ၊ ဆီပုဲင်တဗာႏ လာဝါႏခေါင်ႏ၊ လောင်းလင်ꩻငတ်ꩻနီꩻ အယံတွင်ꩻ၊ ပအိုဝ်ႏအရင်ꩻ ကတဲႏစ၊ ဗꩻစွဉ်ႏထန်ႏနီꩻ ဖြွမ်းလွဝင်ꩻ၊ နဝ်နဝ်ထင်ꩻထင်ꩻ တွို့ꩻတွမ်ႏကွဉ်ႏ၊ ဖူးဝေးစွဉ်ႏလွဉ်းလွဉ်း ပအိုဝ်ႏချင်ꩻ၊ လွောင်ႏဗူႏလွဝင်ꩻ ကကျိုꩻစာꩻ၊ အာႏကွဲးတန်တန် ထုဲင်ႏလာဆန်ꩻ၊ သဏ္ဌာန်ႏလာမင်ꩻ သိုမ်ဟာပေါႏ၊ တောႏတောႏမွေးတဝ်း ဆုဲင်ꩻချာတာႏ၊ ပအိုဝ်ႏအက္ခရာႏ သင်္ကေတ၊ လချမ်းလာခေါဝ် ကအွဉ်ႏဗာႏ၊ ပညာႏရှိပုဂ္ဂိုလ်ႏဒါႏ ကအွဉ်ႏသေꩻ၊ ပအိုဝ်ႏအရေꩻ အီႏဟဝ်လွဉ်၊ ထွာစွဉ်ႏပုဗ္ဗ နိမိတ်ဒါႏ၊ ဗျည်းအက္ခရာႏ လာတခေါဝ်၊ အီႏထွာနုဲင်းနဝ်ꩻ မွေးအမန်ႏ၊ သဏ္ဌာန်ႏလာဆန်ꩻ သင်္ကေတ၊ ပွိုးထွာပအိုဝ်ႏ နီမိတ်ထွာ၊ လာဆန်ꩻလာခေါဝ် သင်္ကေတ၊ ကျိုꩻစာꩻလွဝင်ꩻ သွဉ်ဒါႏဒါႏ၊ ဆုဲင်ꩻချာအတာႏ ပအိုဝ်ႏရင်ꩻ၊ အီႏစီꩻပွာꩻထင်ႏ မကင်ꩻဖို၊ ပအိုဝ်ႏပိုလီꩻ အားလုံးတဉ်ဟွေး"နုဲင်းနဝ်ꩻသွူ။

နဝ်ꩻမꩻ အမုဲင်ခင်ႏလမ်းကိုနဝ်ꩻ ဗွေႏဗွန်ထီသိမ်ႏ အွဉ်ႏထွော့လွေꩻနေးဒျာႏ လာဆန်ꩻသိုမ်ဟာပွုံႏစံႏ လာတခေါဝ်၊ ဆုဲင်ꩻယိုမꩻ လိတ်ပအိုဝ်ႏစွစ်ꩻလီတာႏ ဗဟိုႏသံႏဃာႏသီးဖုံႏ မွဉ်းဖျင်အွဉ်ႏထွာလွေꩻယင်း အမုဲင်ဖုံႏ၊ "ပအိုဝ်ႏ"ယိုလဲ့ သော့ꩻလွေꩻယင်း ဝသွတ်ꩻကရိုꩻနဝ်ꩻ သေထွꩻဗာႏသွူ။ နဝ်ꩻသွူတကာႏတဝ်း ဗွေႏဗွန်ထီသိမ်ႏကထွင်ႏလွေꩻဒါႏ ပအိုဝ်ႏအက္ခရာႏဖုံႏယိုနဝ်ꩻ ကေားကအီႏထူႏသွဉ်ဒါႏ ပအိုဝ်ႏလိုꩻမျိုꩻသီးတာႏ သွဉ်ထူႏဖေႏကယိုꩻ ယူႏနုဲင်းနဝ်ꩻတဲင် အထျꩻထွင်ႏလွေꩻယိုꩻယိုꩻပေႏ ရိုꩻနုဲင်းနဝ်ꩻသွူꩻ နဝ်ꩻတွော့ꩻ လိတ်ပအိုဝ်ႏစွစ်ꩻလီတာႏ ဗဟိုႏသံႏဃာႏစွိုꩻအွဉ်ငါတဲင် ပအိုဝ်ႏလိုꩻမျိုꩻ သွဉ်ထူႏလိတ်ပအိုဝ်ႏ ဖေႏကဒါႏယိုꩻ၊ လိတ်ပအိုဝ်ႏ ဖေႏကစွစ်ꩻတိုးလီယိုꩻ ရေႏနုဲင်းနဝ်ꩻတွော့ꩻ မွဉ်းဖျင်လွေꩻယင်းလိတ်ဖုံႏ ခွေသွဉ်းခံႏထူႏနုဲင်းနဝ်ꩻသွူ။ ပွိုးတမုဲင်ꩻနဝ်ꩻ ထွာနွောင်ꩻဆရာႏ လိတ်ပအိုဝ်ႏ ဗဟိုႏသွဉ်တန်ꩻယို သက်တန်ꩻသိုမ်ဆီလွိုလဲဉ်း၊ လိတ်ပအိုဝ်ႏ ဖေႏကစွစ်ꩻတိုးလီနဝ်ꩻလဲ့ တာႏဝွန်ႏအဝ်ႏသားဖုံႏ ခံႏယပ်ꩻခံႏပင်ႏပန်ꩻတွော့ꩻ ရုဲင်ꩻတသွိုးလွေꩻ အနေင်ႏပေါင်ꩻနဝ်ꩻလဲ့ ညလဲဉ်းရင်ꩻနဝ်ꩻသွူ၊ မဉ်ႏထွားနုဲင်း လိတ်ထီသိမ်ႏမူ ဗွေႏဗွန်ကတဲမ်းထွင်ႏထွူနေင်ႏ ၁၃၁၉-ဗာႏယို တွက်နပ်ချာနဝ်ꩻ နေင်ႏငတ်ꩻဆီလွိုလဲဉ်းရင်ꩻနဝ်ꩻသွူ။

အွိုးနဝ်ꩻခါကာႏ လိတ်ပအိုဝ်ႏယို အခေႏခံႏလွေꩻဒျာႏစွဉ်ႏ ဗုဒ္ဓဘာႏသာႏ ပါဠိဘာႏသာႏတဲင် လိတ်ယို ပါꩻမုဲင်ꩻပဲင်ႏ မဉ်ႏရီနုဲင်းနဝ်ꩻနဝ်ꩻ ဗွေႏရဟန်ꩻသီးဖုံႏပဲင်ႏ ဒေါ့ꩻရိုꩻနုဲင်းနဝ်ꩻ လꩻဒျာႏသွူ၊ လိတ်ဖေႏကစွစ်ꩻလီ၊ ဖေႏကတိုးလီလဲ့ အထျꩻဗွေႏသံႏဃာႏသီးဖုံႏ အွဉ်မာꩻဒျာႏ၊ တကာႏလိုꩻလမ်းဖုံႏနဝ်ꩻ ထောကမ်းလွေꩻပစ္စေꩻလစ်ꩻပါꩻ ဆရာႏတကာႏလွောင်ႏဗူႏလွဝင်ꩻတဲင် လိတ်ပအိုဝ်ႏယို အောင်ႏမျင်ႏထင်ႏထိုလွဉ်ဗာႏနဝ်ꩻသွူ။ နဝ်ꩻမꩻ လိတ်ထီသိမ်ႏမူယို တဲႏစနုဲင်းမုဲင်ꩻ၊ လိတ်မူစဲစ်မဲဉ်ႏ အဝ်ႏနုဲင်းမုဲင်ꩻကရိုꩻနဝ်ꩻ ကထွာခွိုꩻသွုပ်တသာသီး ဖေႏကသေထွꩻတဲင် တခူးတခဝ် တဲမ်းဖောႏလွေꩻဖေႏဗာႏနုဲင်းယိုသွူ။

အမာႏတရွို့ꩻ ဖျင်စွို့ꩻ(၄)

မဉ်ႏတအဝ်ႏတဝ်းနဝ်ꩻ ထွင်ႏ၊ မဉ်ႏအဝ်ႏထွူနဝ်ꩻ ဖေႏကကွင်ႏနွောင်ꩻ လိုႏပင်ႏ၊ အဒေ့ꩻတအဝ်ႏတဝ်းဒွုန်းခိန်ႏနဝ်ꩻ လိုႏအွဉ်ထွင်ႏ၊ ဒေ့ꩻမဉ်ႏအဝ်ႏသွူနဝ်ꩻ ဖေႏကကွင်ႏနွောင်ꩻနဝ်ꩻ လိုႏပင်ႏထဲင်းဝင်ꩻသွူ၊ နီသွဉ်းသီး ကအဝ်ႏအုံသော့ꩻဒါႏ လိုꩻအခမ်းတန်ယိုနဝ်ꩻ တွမ်ႏအမာႏတရွို့ꩻ တကင်ꩻတဝ်းလွဝင်ꩻတဲင် မဉ်ႏမာႏတဲ့ ထောက်နယ်ဒေါ့ꩻနယ် ခြုဲင်းနယ်တွော့ꩻ ကမာႏမာႏကိုယို ရော့ꩻဖျင်တဲ့ဖျင်၊ ရော့ꩻထဲမ်တဲ့ထဲမ်းနုဲင်းနဝ်ꩻသွူ။ ဗွေႏဘုရာꩻမဉ်ႏတဲ့ အဝ်ႏကျင်ꩻသွုံꩻဒျာႏတွမ်ႏ မဇ္ဈိမပဋိပဒါ ထာꩻဖူꩻအထာႏဝ၊ လꩻလွေꩻသဗ္ဗညုတဉာဏ်ႏတောႏနဝ်ꩻသွူ၊ နီသွဉ်းသီး လိုꩻယိုတဲ့ ခုမ်သဲဉ်ꩻတဉ်ႏငါႏမွုန်းတဝ်း ပဉ်မျိုꩻမျိုꩻနုဲင်းနဝ်ꩻမꩻ၊ မဉ်ႏလိုႏချော့ꩻတဲ့ ချော့ꩻပသာႏသာႏ၊ မဉ်ႏလိုႏငင်ႏတဲ့ ငင်ႏပသာႏသာႏယင်းနုဲင်းနဝ်ꩻမꩻ အစွို့ꩻစွဉ်ႏယို အီႏလꩻဗာႏသွူ။

ပွိုးတမုဲင်ꩻ တဲမ်းလိတ်သားမွော့ အဝ်ႏဒေါ့ꩻဗာႏတွိုးနုဲင်းယိုနဲးနဝ်ꩻ ယိုခါ အခေႏနေႏအလꩻ လိတ်ပအိုဝ်ႏယို ပါꩻမုဲင်ꩻပဲင်ႏ၊ ပါꩻမုဲင်ꩻတာႏဝွန်ႏအဝ်ႏ၊ ပါꩻမုဲင်ꩻအာႏဏာႏအဝ်ႏ၊ ပါꩻမုဲင်ꩻဒေါ့ꩻခွင်ꩻအာႏကရိုꩻနဝ်ꩻ တသေထွꩻတဝ်းလဲ့ ပျဿနာႏနဝ်ꩻ အဝ်ႏထွာလွဉ်လဲဉ်းသွူ လိတ်မူနီမူနဝ်ꩻသွူ၊ ယိုနီမူနဝ်ꩻ တွိုင်ႏပင်ႏဒေါ့ꩻရီလွဝင်ꩻလꩻတဝ်းဟောင်း ကရိုꩻနဝ်ꩻ တဲမ်းလိတ်သား ခွေသွဉ်း အဝ်ႏယူႏသေႏသေႏသွူတကာႏတဝ်း လိုꩻကယူႏဒါႏ နုဲင်းတဲမ်းလိတ်သားယိုတဲ့ ရအီႏအဝ်ႏအာတန်ဒျာႏသွူ။ နဝ်ꩻမꩻ ဝါႏဒကသန်ဒါႏသားဖုံႏနဝ်ꩻ ကွပ်ပွိုးတမုဲင်ꩻ နီသွဉ်းသီး တသေထွꩻတဝ်းလဲ့ ကရိုꩻဒါႏ ထီသိမ်ႏမူမꩻ နီကျွိုက်၊ နီလက်ခံႏ ကရိုꩻဒါႏ နုဲင်းနဝ်ꩻသားဖုံႏနဝ်ꩻ ခွေသွဉ်းတသေနာႏတဝ်းတွော့ꩻ ထီသိမ်ႏမူအဝ်ႏနုဲင်းမုဲင်ꩻကရိုꩻနဝ်ꩻ ထောင်ထွားလွေꩻဗာႏသွူတွော့ꩻ ခြုဲင်းနယ်ဗာႏချာယင်း လိုꩻကမဉ်သေဒါႏသားဖုံႏနုဲင်းယိုသွူ။ အဝ်ႏလိတ်ခြုဲင်းနယ် နုဲင်းယိုစားမဉ်ႏထွူနဝ်ꩻ တဲမ်းလိတ်သား မဉ်လꩻဒျာႏ ပအိုဝ်ႏလိုꩻမျိုꩻ အကျိုꩻစီꩻပွာꩻတာႏ ကထွာအီဒါႏ လိတ်မျိုꩻ ဖေႏကထွာလွဉ် ရေႏဒျာႏနုဲင်းနဝ်ꩻသွူ၊ ဖေႏကပꩻလီထဲင်းနဝ်ꩻတဲ့ တယူႏခံႏဖိုတဝ်းဒျာႏရင်ꩻတွော့ꩻ ဖေႏကခြွဉ်းညီꩻလꩻ ရေႏနုဲင်းနဝ်ꩻ တဲမ်းလိတ်သားသꩻရင်ꩻဒျာႏသွူ။

နဝ်ꩻတွော့ꩻ ယိုတလဲင်ႏနဝ်ꩻ မဉ်ဒေါ့ꩻနယ်ယင်း လိတ်မွူးယိုခါတွမ်ႏ ထီသိမ်ႏမူဇာႏတိ အကွာႏဝင်ꩻပွုံႏနဝ်ꩻသွူ၊ ပအိုဝ်ႏလိတ်မွူးယိုခါခါ နီသွဉ်းသီး ကအဝ်ႏသွဉ်ထူႏဒါႏနဝ်ꩻ နီသွဉ်းသီး ထေထွꩻဒျာႏ ပအိုဝ်ႏသရစဲဉ်ႏ အဝ်ႏ ၁၆-ဖြုံႏနုဲင်းနဝ်ꩻသွူ၊ အဝ်ႏနုဲင်းမုဲင်ꩻနဲးနဝ်ꩻ အအာ အိအီ အုအူ အေ့အေ အဲ့အဲ အုဲင့်အုဲင် အော့အော် အို့အို အငေါဝ်းဒွေါင်ႏတွမ်ႏ အငေါဝ်းဆွာꩻ အဝ်ႏနုဲင်းနဝ်ꩻသွူ။ အငေါဝ်းဒွေါင်ႏနဝ်ꩻ ဟဲ့ꩻရဿသရ၊ အငေါဝ်းဆွာꩻနဝ်ꩻ ဒီဃသရ သွဉ်ထူႏလွေꩻဗာႏနုဲင်းနဝ်ꩻသွူ၊ ယိုနဝ်ꩻ ပအိုဝ်ႏသရလွဉ်းလွဉ်း ပါဠိသရပါတဝ်းသွူ။ ထီသိမ်ႏမူရင်ꩻရင်ꩻ လိတ်မွူးတသာစောင်ႏကိုနဝ်ꩻ ပအိုဝ်ႏအက္ခရာႏ သရစဲဉ်ႏယို အဝ်ႏ ၁၂-ဖြုံႏဒျာႏသွူ၊ တမုဲင်ꩻနဲးနဝ်ꩻ အအာ ဣဤ ဥဦ ဧ အဲ အုဲင် ဩ ဪ အို နုဲင်းယိုလုမ်ꩻသွူ၊ သရယိုနဝ်ꩻ ပအိုဝ်ႏခြေင်ခြေင်မွေးတဝ်း ထူႏတွယ်ꩻရောꩻဒျာႏ ပါဠိသရ၊ နုဲင်း ဣဤ ဥဦ ဧ ယိုနဝ်ꩻ ပါဠိသရဒျာႏသွူ၊ သရမဉ်ႏအဝ်ႏအာနဝ်ꩻ အငေါဝ်းထန်ႏတွိုင်ꩻ တဲမ်းလွဉ်ꩻလꩻ နီသွဉ်းသီး သေထွꩻဗာႏနုဲင်းနဝ်ꩻသွူ။

နဝ်ꩻသွူတကာႏတဝ်း နီသွဉ်းသီး ကအဝ်ႏသွဉ်ထူႏဒါႏ ယိုခါခါ မဉ်ႏဒေါ့ꩻဗာႏ အမျာꩻသုံꩻ လိတ်မွူးယိုခါခါနဝ်ꩻ သွဉ်ခဏ်ꩻဖုံႏ အဝ်ႏနေးပဉ်ခဏ်ꩻခဏ်ꩻသွူ၊ သွဉ်ခဏ်ꩻကိုဖုံႏနဝ်ꩻ သွုံꩻလွေꩻဒျာႏ က-ရီးဗည်းဖုံႏလုမ်ꩻသွူ၊ အဝ်ႏနဝ်ꩻကိုမꩻ ထဲမ်သော့ꩻလွေꩻ ဗျည်းလင်ကလꩻဒါႏ ခင်ႏလမ်းနဝ်ꩻ သော့ꩻလွေꩻဖေႏ သွုံꩻအာ ဗျည်းနုဲင်းနဝ်ꩻသွူ။ ကွဲးတွော့ꩻ ထီသိမ်ႏမူနဝ်ꩻကိုနဝ်ꩻ အဝ်ႏသော့ꩻလွေꩻဒျာႏ ဗျည်းအလွောက်ꩻဖုံႏသွူ၊ ပွုံႏစံႏသွဉ်ခဏ်ꩻ တဗာႏကိုနဝ်ꩻ သွုံꩻလွေꩻ က-ရီးဗျည်းလဲ့ သွဉ်ခဏ်ꩻယင်း တခဏ်ꩻနဝ်ꩻ သွုံꩻလွေꩻဒျာႏ ခ-ရီးဗျည်းနုဲင်းနဝ်ꩻသွူ၊ အမုဲင်ဖုံႏနဝ်ꩻတဲ့ ထုဲင်ႏကဒေါ့ꩻနယ် ကရီးတလဲင်ႏကိုနဝ်ꩻအတွိုင်ꩻ မုဲင်ငါ၊ မုဲင်ပက်ငါဖုံႏယို တသွုံꩻတဝ်း၊ တအဝ်ႏတဝ်းသွူ၊ လာဆန်ꩻသိုမ်ဟာ ပွုံႏစံႏအဝ်ႏဒင်ႏဆꩻကီဖဲ့ꩻ နဝ်ꩻမဉ်ႏပါနဝ်ꩻ ထွာအမုဲင်နုဲင်းနဝ်ꩻသွူ။

ယိုခါ ကအဝ်ႏသွုံꩻဒါႏနဝ်ꩻ နီ လစ်ꩻ သူခါ အမုဲင်ပါ-နုဲင်းနဝ်ꩻအတွိုင်ꩻ ထီသိမ်ႏမူရင်ꩻနဝ်ꩻလဲ့ နီ လစ်ꩻ သူဖြုံႏကိုနဝ်ꩻ လာဆန်ꩻသိုမ်ဟာ သင်္ကေတ အဝ်ႏပါဆꩻကီဖဲ့ꩻနဝ်ꩻသွူ၊ ယိုနဝ်ꩻတဲ့ ဟောꩻထွားသားဖုံႏနဝ်ꩻ အမုဲင်ပါကရိုꩻယိုနဝ်ꩻ သေနာႏဗာႏနုဲင်းနဝ်ꩻသွူ၊ နဝ်ꩻသွူတကာႏတဝ်း ယိုခါ ကအဝ်ႏသွုံꩻဒါႏ လိတ်ဖြုံႏ"ဝေင်ꩻ"ယိုနဝ်ꩻ ကရီးခါ သွုံꩻဒျာႏ"ဝိန်ꩻ"နုဲင်းနဝ်ꩻသွူ။ နဝ်ꩻမꩻ လိုꩻကရီးခါဖုံႏ မဉ်ႏတဲမ်းသွူ လိတ်ပအိုဝ်ႏနဝ်ꩻ "ဝေင်ꩻ"ယို တဲမ်းရောင်ဒျာႏ "ဝိန်"နုဲင်းနဝ်ꩻလဲ့ ထီႏဗာႏသွူ၊ ယိုနဝ်ꩻ သရကွာႏတဲင် အငေါဝ်းထန်ႏတဲ့ ထန်ႏကွာႏ၊ နဝ်ꩻမꩻ လိတ်ဖြုံႏမဲဉ်ႏမဲဉ်ႏ၊ အငေါဝ်းမဉ်ႏအွဉ်ႏထန်ႏမဲဉ်ႏမဲဉ်ႏနဝ်ꩻ "ဝေင်ꩻ"ယိုမꩻမဲဉ်ႏသွူ၊ ပွိုးတမုဲင်ꩻနဲးနဝ်ꩻ ဝေင်ꩻယို အဝ်ႏ"အေ"သရလွဉ်၊ အွဉ်ႏတွယ်ꩻတွမ်ႏ "င"သွတ်ꩻတွော့ꩻ ထွာလွဉ်"အေင်"၊ အဝ်ႏ"အေင်"ယို သော့ꩻလွဉ်ꩻမုဲင်ငါတဲင် ထွာလွဉ်ဗာႏ"အေင်ꩻ"နုဲင်းနဝ်ꩻသွူ၊ "အေင်ꩻ"ယိုနဝ်ꩻ မဉ်ႏတွယ်ꩻသော့ꩻလုဲင်ႏ"ဝ"ဗျည်းနဝ်ꩻ ထွာ"ဝေင်ꩻ"နုဲင်းနဝ်ꩻသွူ။ "ဝိန်"ယိုနဝ်ꩻ ထွာဒျာႏ"အိ"သရတဲင် မာꩻနုဲင်းမုဲင်ꩻမုဲင်ꩻတယောဝ်း အငေါဝ်းတထန်ႏနွောင်ꩻတဝ်း ဝေင်ꩻသွူ၊ မဉ်ႏလုဲင်ႏသော့ꩻ က-ဗျည်းနဝ်ꩻ ကိန်၊ သော့ꩻအမုဲင် ကိန်ꩻ၊ ဗွေႏရဟန်ꩻကိန်ꩻတလွာꩻထာꩻ အီႏထန်ႏလွဉ်နုဲင်းနဝ်ꩻသွူ၊ နဝ်ꩻမꩻ လိတ်တဖြုံႏ ငေါဝ်းတငွါ ဖေႏကထန်ႏနဝ်ꩻ ထောင်ထွားချာယင်း သရယိုမꩻ အငေါဝ်းမဲဉ်ႏဖုံႏ အီႏထန်ႏလွဉ်ချာနဝ်ꩻသွူ။

ဗျည်းတွမ်ႏသရယို မဉ်ႏအွဉ်ႏတွယ်ꩻသွူဝင်ꩻနဝ်ꩻ အငေါဝ်းထန်ႏလွဉ်နဝ်ꩻမꩻ ငေါဝ်းစုမ်ႏနဲ့ တစုမ်ႏတဝ်းနဲ့နဝ်ꩻ တဲမ်းလိတ်သား တဒေါ့ꩻတဝ်းသွူ၊ ကွဲးတွော့ꩻ ငေါဝ်းထန်ႏမဲဉ်ႏမဲဉ်ႏ လိတ်ဖြုံႏသွုံꩻမဲဉ်ႏမဲဉ်ႏမဉ်ႏအဝ်ႏနဝ်ꩻ ကထေဒါႏလိတ်အုပ်၊ လိတ်စောင်ႏသားဖုံႏတဲ့ အီႏဆင်ႏပြေႏ တဲမ်းလိတ်သား ယူႏနုဲင်းနဝ်ꩻသွူ။ ဥပဒေႏယိုတဲ့ လိုꩻတွဲမ်းထွင်ႏ အွဉ်ႏထွော့ဒျာႏ၊ လိုꩻဖုံႏလွောက်ꩻလွဉ်ꩻဗာႏဒျာႏ၊ သမဲင်ꩻယိုတဲ့ လိုꩻသီးအွဉ်ႏထွော့ဒျာႏ၊ လိုꩻသီးထောင်ထွားဗာႏချာဒျာႏတဲင် လိတ်သမဲင်ꩻယိုနဝ်ꩻ အဝ်ႏအယပ်ꩻအခုဲင်ႏအခါႏကို ပြွန်ထန်ႏ၊ ဖြွဉ်ထင်ႏလွဉ်ဒျာႏကရိုꩻနဝ်ꩻတဲ့ တွမ်ႏလိတ်စောင်ႏ၊ တွမ်ႏဖြောင်းသမဲင်ꩻအလꩻ နီသွဉ်းသီး သေထွꩻဗာႏသွူ။

ကွဲးတွော့ꩻ ယဟန်ႏနဝ်ꩻ အမာႏအဝ်ႏနေတဲင် အမာႏယိုမဉ်ႏညနဝ်ꩻ ထွာဒါႏအမဲဉ်ႏနုဲင်းနဝ်ꩻတွော့ꩻ ဖေႏကမာႏထဲင်းမွုန်းနဝ်ꩻ ဖြွမ်းလွဝင်ꩻဒျာႏ၊ လိုႏထီႏတဝ်းလွဝင်ꩻ အပဲစ်တွော့ꩻ တွမ်ႏအပျုသဘောꩻ ယီႏနယ်၊ ဆွေꩻနွေꩻခြိꩻထူႏလွဝင်ꩻဒျာႏသွူ။ နဝ်ꩻမꩻ ယိုတပတ်နဝ်ꩻ တဲမ်းခြုဲင်းနယ်လွေꩻဗာႏယင်း တစူးတစိꩻပေႏ၊ ကွပ်စွဉ်ႏလိတ်ခရာႏတွော့ꩻ ပအိုဝ်ႏဖုံႏ လိုႏလွောင်ႏဗူႏလဲဉ်းဝင်ꩻ တဲမ်းလွေꩻနယ်ဗာႏနုဲင်းနဝ်ꩻသွူ။

အမာႏတရွို့ꩻ ဖျင်စွို့ꩻ(၅)

ကွပ်စွဉ်ႏလိတ်ခရာႏယိုတဲင် ပအိုဝ်ႏကအုံဒါႏ ဒေႏသအလွောက်ꩻနဝ်ꩻ တမျိုꩻထွူတမျိုꩻ (ကွဲပြား)တဗွိုန်ဝဝ်းလွဝင်ꩻဖုံႏတဲင် ကထေဒါႏ လိတ်အုပ်လိတ်စောင်ႏသားဖုံႏနဝ်ꩻ မော့ꩻလွဉ်ဗာႏအယပ်ꩻအခုဲင်ႏသွူ၊ မဉ်ႏမဲဉ်မော့ꩻတဝ်း အယပ်ꩻအခုဲင်ႏနဝ်ꩻ သုင်ꩻဒျာႏသွော့ ဝင်ꩻကအွဉ်ႏထွော့ဒါႏ ထီသိမ်ႏမူနုဲင်းနဝ်ꩻတဲ့ အဝ်ႏဒျာႏ၊ သုင်ꩻဒျာႏသွဗာ့ ဝင်ꩻကအဝ်ႏသုင်ꩻအာနဝ်ꩻနုဲင်းနဝ်ꩻတဲ့ အဝ်ႏဒျာႏ၊ ကဒေါ့ꩻလွဉ်၊ ကဖေႏလွဉ်ဒါႏနုဲင်းနဝ်ꩻသားဖုံႏတဲ့ ကထေလိတ်အုပ်လိတ်စောင်ႏသားဖုံႏနဝ်ꩻ မဉ်ႏသုင်ꩻတဲ့ အမဲဉ်ႏတရာꩻ သမ်းတွိုႏလွဉ်တဝ်း၊ မဉ်ႏသုင်ꩻတဝ်းတဲ့ ဝင်ꩻအီႏတဖျ၊ ဝင်ꩻအီႏဝွေႏဖန်ႏ ဒေါ့ꩻရောင်အပဲစ်နုဲင်းနဝ်ꩻဖုံႏတဲ့ ခံႏဗာႏလွဉ်နဝ်ꩻသွူ။

နဝ်ꩻသွူတကာႏတဝ်း မဉ်ႏသုင်ꩻမွေး လိတ်ဖြုံႏအမဲဉ်ႏဖုံႏယို လိုꩻတကျွိုက်တဝ်းသားဖုံႏ၊ လိုꩻအာႏဏာႏအဝ်ႏသားဖုံႏနဝ်ꩻ အီႏရိုꩻရောင် ထွာလိုꩻယားထာꩻသား၊ ယားကုဲင်လွောင်ႏဗူႏရေꩻသားနုဲင်းနဝ်ꩻဖုံႏ အမျိုꩻမျိုꩻစွဉ်ႏသွူ၊ နဝ်ꩻတွော့ꩻ ကထေဒါႏ လိတ်အုပ်လိတ်စောင်ႏသားတာႏနဝ်ꩻ ဝွေꩻသီးနမ်းထွင်ႏချာလိတ်ဖုံႏ၊ ဝွေꩻသီးတွမ်ႏဝွေꩻသီး ယွုမ်းအံႏနမ်းတဲင် မာꩻလွေꩻသုင်ꩻလွေꩻ လိတ်ဖြုံႏဖုံႏတဲ့ အီႏတမွေးတဝ်းကရိုꩻနဝ်ꩻ အဝ်ႏထေထိုလိတ်အုပ်လိတ်စောင်ႏသား ခွေသွဉ်းယူႏနုဲင်းနဝ်ꩻသွူ။ ကွပ်စွဉ်ႏလိတ်ဝင်ꩻကအဝ်ႏသုင်ꩻအာ ကရိုꩻဒါႏ နုဲင်း"တွမ်ႏ"ယိုနဝ်ꩻ နီသွဉ်းသီး မဉ်ႏတွက်နေးသရနဝ်ꩻ ထွာ"အ"သရတွော့ꩻ အွောန်ႏတယ်ꩻ ဝဟွဲး၊ မဉ်ႏထွူ တွယ်ꩻပါယင်း မသွတ်ꩻ၊ "မသွတ်ꩻ"ယိုနဝ်ꩻ "တောမ်ႏ"မုဲင်ကီယို အငေါဝ်းထန်ႏဗွိုန်ဝင်ꩻ နီသွဉ်းသီးသေနုဲင်းနဝ်ꩻတဲင် တွမ်ႏယိုနဝ်ꩻ အငေါဝ်းတထန်ႏတဝ်း တောမ်ႏနဝ်ꩻသွူ။ တယို အွောန်ႏတွယ်ꩻ တဟွဲးတဲင် အငေါဝ်းထန်ႏ တဝ၊ အွောန်ႏတွယ်ꩻယင်း မသွတ်ꩻတဲင် တွ ဝမ်နုဲင်းနဝ်ꩻသွူ။ မဉ်ႏနုဲင်းဒျာႏ အော သရတွော့ꩻ အွောန်ႏတွယ်ꩻယင်း မသွတ်ꩻနဝ်ꩻ အငေါဝ်းထန်ႏအောမ်၊ မဉ်ႏလုဲင်ႏ တဆုဲင်ꩻဗျည်းနဝ်ꩻ အငေါဝ်းအီႏထန်ႏလွဉ် တောမ်၊ သော့ꩻယင်းမုဲင်ပက်ငါတဲင် တောမ်ႏနုဲင်းနဝ်ꩻသွူ၊ သရတဲ့မဲဉ်ႏ၊ အငေါဝ်းတဲ့မဲဉ်ႏ၊ ကွဲးတွော့ꩻ ယိုနဝ်ꩻ လိုꩻသုင်ꩻအာ သမ်းမွေးတဝ်းနုဲင်းနဝ်ꩻတဲင် ကသုင်ꩻသားနဝ်ꩻ ထွာအီတေားစွဉ်ႏ ဝင်ꩻရန်ႏသူႏသွူ။

ယင်း လိတ်မူထီသိမ်ႏကို ကအဝ်ႏသုင်ꩻဒါႏ သရကိုလဲ့ အော သရယို တအဝ်ႏတဝ်းသွူ၊ နဝ်ꩻတွော့ꩻ သုင်ꩻဗာႏ တွံနုဲင်းနဝ်ꩻ၊ မဉ်ႏလွတ်ꩻထိုꩻမုဲင်ကီ သော့ꩻလုဲင်ႏ မသွတ်ꩻနဝ်ꩻ အီႏထန်ႏလွဉ် တွမ်နုဲင်းနဝ်ꩻသွူ၊ နဝ်ꩻတွော့ꩻ ယိုခါ ထွာထိုꩻအမျာꩻသုင်ꩻ တွမ်ႏ နုဲင်းနဝ်ꩻသွူ၊ ဝွေꩻယိုနဝ်ꩻ သရမဲဉ်ႏတဝ်း ဒေါ့ꩻရိုꩻနုဲင်းနဝ်ꩻ လꩻဒျာႏသွူ။ ယိုခါ နီသွဉ်းသီး ကအဝ်ႏသုင်ꩻလွေꩻဒါႏ ဝဟွဲးယိုနဝ်ꩻ အွိုးထီသိမ်ႏလိတ်မူစဲစ်စဲစ်ကို သုင်ꩻလွေꩻဒျာႏ "ဝဆွယ်ꩻ"နုဲင်းနဝ်ꩻသွူ၊ ယိုနဝ်ꩻ ရထူႏလွဉ်ꩻမန်းလိတ်ဖြုံႏ၊ မဉ်ႏတဲမ်းတယ်ꩻဒျာႏ "ဝဆွဲ"နုဲင်းနဝ်ꩻတဲ့ သမ်းမွေးတဝ်း၊ ပအိုဝ်ႏငေါဝ်း ဆ-ရီးယိုနဝ်ꩻ မဉ်ႏနုဲင်းမန်း မန်းကဟဲ့ꩻဒါႏ ဝဆွဲ၊ ပအိုဝ်ႏဟဲ့ꩻ ဝဟွဲတဲင် ထီသိမ်ႏမူကိုနဝ်ꩻ ထူႏလွဉ်ꩻဒျာႏမန်း ထီႏသေဗာႏနုဲင်းနဝ်ꩻသွူ။ နဝ်ꩻသွူတကာႏတဝ်း ထီသိမ်ႏမူကို ကအဝ်ႏတဲမ်းဒါႏ အွော် အွော် အွော့ အွော့ အွော အွောယိုနဝ်ꩻ သေနာႏစဲင်းတဝ်း၊ ထုဲင်ႏနီသွဉ်းသီး ကအဝ်ႏသွဉ်ဗာႏဒါႏ လိတ်မွူးယိုခါနဝ်ꩻ စရီးနဝ်ꩻ အွော့ အွော့ꩻ အွော် အွော်ꩻ အွေား အွေားနုဲင်းနဝ်ꩻ၊ ယိုနဝ်ꩻ အွော် အွော် လွဉ်ရီးဒျာႏတွော့ꩻ အငေါဝ်းအီႏအွောန်ႏထန်ႏလွေꩻနုဲင်းမုဲင်ꩻနဝ်ꩻ သေနာႏတဝ်းသွူ။ ယင်း နီသွဉ်းသီးကရိုꩻဒါႏ ဝင်ꩻသုင်ꩻအာ ပွုံႏ ယိုနဝ်ꩻ အွိုးထီသိမ်ႏမူစဲစ်စဲစ်ကို သုင်ꩻလွေꩻဒျာႏ ပုံ နုဲင်းနဝ်ꩻသွူ။ ခူးကုံႏယို သမ်းသုင်ꩻမုဲင်ကီ မုဲင်ပက်ငါတဲင် အဖြုံႏမုဲင်ꩻမဲဉ်ႏဟောင်း ကထွာဒျာႏ တဲမ်းလိတ်သားဖုံႏသူꩻ ယူႏသူႏသေတဝ်းဒွုမ်သွူ၊ ယင်းတစွိုး သမ်းအဝ်ႏဖျင် ရန်ႏကုန်ႏတဲ့ သုင်ꩻနုဲင်းယိုသားတဲ့ သမ်းအဝ်ႏဒျာႏနေနေ၊ အငေါဝ်းဖုံႏနဝ်ꩻ ထန်ႏဗွိုန်ဝင်ꩻ၊ ကွာႏဒျာႏ ဗျည်းလုမ်ꩻလဲ့ သုင်ꩻနယ်ꩻနဝ်ꩻ သမ်းအဝ်ႏအစွိုးစွိုးသွူ။

နုဲင်းယင်း ကအဝ်ႏသုင်ꩻလွေꩻဒါႏ သွဉ်ယိုခါခါနဝ်ꩻ ထီသိမ်ႏမူစဲစ်စဲစ်ကို အဝ်ႏသော့ꩻလွေꩻ သွဉ်နုဲင်းနဝ်ꩻသွူ၊ သော့ꩻလွေꩻပါ ထေင်းခွဉ်းနုဲင်းနဝ်ꩻသွူ၊ ယိုခါ ကရိုꩻဒါႏ အမျာꩻသုင်ꩻနဝ်ꩻတဲးတဲ့ "သွဉ်"နုဲင်းနဝ်ꩻသွူ၊ ဝွေꩻယို မဉ်ႏမဲဉ်လꩻမွေး အငေါဝ်းမဲဉ်ႏ သရမဲဉ်ႏ၊ လိတ်ဖြုံႏမဲဉ်ႏနဝ်ꩻ လိုႏတဲမ်းအီဒျာႏတွမ်ႏ"အော်"သရသွူ။ အဝ်ႏအော် သရတွော့ꩻ အွဉ်ႏတွယ်ꩻလွေꩻ သ ဗျည်းတဲင် သော် ထန်ႏနုဲင်းနဝ်ꩻ၊ ယိုနဝ်ꩻ ပြောင်ꩻလွေꩻယင်း သွောန်ယိုနဝ်ꩻ အငေါဝ်းမဲဉ်ႏ၊ လိတ်ဖြုံႏမဲဉ်ႏ သရမဲဉ်ႏ နီသွဉ်းသီး သထွꩻဗာႏနုဲင်းနဝ်ꩻသွူ၊ ကွဲးတွော့ꩻ လိတ်ဖြုံႏ"သွောန်"ယိုနဝ်ꩻ ခွိုꩻသွုပ်သီးတရိုꩻတဝ်း လိုꩻကဒါႏထွူလဲဉ်းသားဖုံႏ တရိုꩻတဝ်းနဝ်ꩻ ထီႏဆန်ꩻ၊ ဟွိုန်ဆန်ꩻတွော့ꩻ စူꩻရောင်တဝ်းနုဲင်းနဝ်ꩻဒျာႏသွူ။ ယင်းတဗာႏနဝ်ꩻ ကထွာဒါႏ အမျာꩻသုင်ꩻ ကက် ဗျည်းတွယ်ꩻယိုတဗာႏလဲ့ မဉ်တဲမ်းနယ်လွေꩻငါႏသွူ၊ ထီသိမ်ႏမူကိုစဲစ်စဲစ်နဝ်ꩻ အဝ်ႏနုဲင်းမုဲင်ꩻနဲးတဲင် တဲမ်းနယ်ꩻ ကက် တဲ့ အငေါဝ်းထန်ႏဒျာႏ ကဲက်နုဲင်းနဝ်ꩻ၊ ငေါဝ်းကထန်ႏဒျာႏ ကက် ယိုနဝ်ꩻ သော့ꩻပါဒျာႏ ငေါ်ꩻလ ကာက် နုဲင်းနဝ်ꩻသွူ၊ ယိုနဝ်ꩻ ထီသိမ်ႏတွမ်ႏ ကအဝ်ႏသုင်ꩻအာယိုခါနဝ်ꩻ ကွာႏလွဝင်ꩻ တဲမ်းနယ်လွေꩻဗာႏ နုဲင်းနဝ်ꩻဒျာႏသွူ။

နဝ်ꩻမꩻ ယိုတပတ်နဝ်ꩻ ထီသိမ်ႏမူစဲစ်စဲစ်တွမ်ႏ ကသုင်ꩻအာဒါႏ လိတ်မွူး ကွာႏလွဝင်ꩻပုံႏယို တဲမ်းဖောႏနယ်လွေꩻ ဖေႏကသေထွꩻနုဲင်းနဝ်ꩻသွူ၊ မဉ်ႏသေထွꩻဗာႏမꩻ အမာႏယိုတရွို့ꩻ ဖေႏကစွို့ꩻစွဉ်ႏနဝ်ꩻ အီႏဖျင်လွေꩻနွောင်ꩻနုဲင်းနဝ်ꩻသွူ။ ရေႏမိုးလွေꩻဒျာႏ ပအိုဝ်ႏလိုꩻမျိုꩻ လွောင်ႏဗူႏမုꩻအာႏယံတလာနုဲင်းနဝ်ꩻတွော့ꩻ ခွိုင်းကသေ တဲမ်းဖြုဲင်ꩻနယ်လွေꩻဗာႏနုဲင်းနဝ်ꩻဒျာႏသွူ။

အမာႏတရွို့ꩻ-ဖျင်စွို့ꩻ(၆)

ဖေႏကသေနာႏစဲင်း၊ ဖေႏကသေငါꩻစဲင်း ထီသိမ်ႏမူတွမ်ႏ ယိုခါ နီသွဉ်းသီးကအဝ်ႏသွဉ်ထူႏဖုံႏယိုတဲင် ခွိုင်းကသေထီႏထွꩻနဝ်ꩻ တဲမ်းခြုဲင်းနယ်လွေꩻယင်းသွူ၊ ယိုတလဲင်ႏနဝ်ꩻ နီသွဉ်းသီးကအဝ်ႏသုင်ꩻဒါႏ လိတ်မွူးယိုခါခါ ပဲင်၊ ထဲင်၊ ယဲင် လိတ်ဖြုံႏယိုနဝ်ꩻသွူ၊ လိတ်မွူးယိုခါကိုနဝ်ꩻ အဝ်ႏသော့ꩻ ကဲက် ကဲက်ꩻ ကဲင် ကဲင်ꩻ ကဲင်း ကဲင်ႏ၊ မဉ်ႏသော့ꩻ ပ ဗျည်းလဲ့ ထွာ ပဲက် ပဲက်ꩻ ပဲင် ပဲင်ꩻ ပဲင်း ပဲင်ႏ၊ မဉ်ႏသော့ꩻ ထဆုဲင်ꩻဗျည်းလဲ့ ထဲက် ထဲက်ꩻ ထဲင် ထဲင်ꩻ ထဲင်း ထဲင်ႏ၊ မဉ်ႏသော့ꩻ ယဗျည်းလဲ့ ယဲက် ယဲက်ꩻ ယဲင် ယဲင်ꩻ ယဲင်း ယဲင်ႏ နုဲင်းနဝ်ꩻသွူ။

အဝ်ႏ အဲ သရတွော့ꩻ အွဉ်ႏတွယ်ꩻလွေꩻတောမ်ႏ ဗီႏသွတ်ꩻ နုဲင်းနဝ်ꩻတဲင် အငေါဝ်းထန်ႏလွဉ် သေနာႏနုဲင်းနဝ်ꩻသွူ၊ ကွဲးတွော့ꩻ ထီသိမ်ႏမူကိုနဝ်ꩻ အဝ်ႏသော့ꩻနုဲင်းနဝ်ꩻ တမွေးတဝ်းသွူ၊ အဲ သရယို အဝ်ႏဒျာႏလဲ့ သုင်ꩻတဝ်း၊ သုင်ꩻလွေꩻဒျာႏ ဒင်ႏဝွိုန်ꩻ ထွို့ꩻခင်ႏတလီး င သွတ်ꩻနုဲင်းနဝ်ꩻ ထီႏဗာႏသွူ။ ထွားနုဲင်းပုန်ႏကိုယိုနဝ်ꩻ ကဟဲ့ꩻဒါႏ "အပဲင်အမင်ꩻ"ယိုတဲမ်းဒျာႏ "အပိုင်အမာင်"၊ ကောဝ်ႏထဲင်ꩻယို တဲမ်းဒျာႏ "ကောဝ်ႏထိုင်"နုဲင်းနဝ်ꩻတဲင် နီသွဉ်းသီး ကသွဉ်ထူႏဒါႏ လိတ်မွူးပအိုဝ်ႏယိုခါခါတွမ်ႏ ထီသိမ်ႏမူနဝ်ꩻ ကွာႏထိုꩻဝင်ꩻနုဲင်းနဝ်ꩻသွူ၊ မဉ်ႏတသေထောင်ထွားချာတဝ်းနဝ်ꩻ နုဲင်းယိုစား၊ နီသွဉ်းသိး တသေထွꩻဗာႏတဝ်းတွော့ꩻ ဝင်ꩻမဉ်ႏရိုꩻ ယိုနဝ်ꩻ အမဲဉ်ႏတဲ့ မဲဉ်ႏလွောန်ꩻဒျာႏဝင်ꩻ၊ ဝင်ꩻမဉ်ႏရိုꩻအမာႏလဲ့ မာႏလွောန်ꩻဒျာႏဝင်ꩻနုဲင်းနဝ်ꩻသွူ။ ယင်းနီသွဉ်းသီး ကအဝ်ႏသွဉ်ထူႏဒါႏ ရွဉ်ကုမ်ꩻဗီႏ လိတ်မွူးကို ကအဝ်ႏတဲမ်းနုဲင်းနဝ်ꩻနဝ်ꩻ သရအနေႏ ထွာဒျာႏ အု သရသွူ၊ ရွဉ်ကွံꩻဗီႏတဲ့ အဝ်ႏသုင်ꩻဒျာႏ၊ ရွဉ်ကုမ်ꩻဗီႏလဲ့ အဝ်ႏသုင်ꩻဒျာႏနဝ်ꩻ အဝ်ႏထီႏဗာႏသွူ၊ နဝ်ꩻက အဖြုံႏမုဲင်ꩻနဝ်ꩻ မဲဉ်ႏအီ နီသွဉ်းသီး ရီခရာႏအဝ်ႏလွဉ်စွဉ်ႏသွူ။ မဉ်ႏနုဲင်းဒျာႏ ထီသိမ်ႏလိတ်မူအတွိုင်ꩻကိုနဝ်ꩻ ဗျည်းသရတွယ်ꩻလိတ်ဖြုံႏ သုင်လွေꩻဒျာႏ ကုမ်ꩻဗီႏနဝ်ꩻ သေႏချာႏသွူ၊ ထွာမုဲင်ꩻနဲးတဲင် သုင်ꩻတဝ်း ကရီးဗျည်း ကအဝ်ႏသုင်ꩻဒျာႏ တောမ်ႏဗျည်းအလင်ဖုံႏ နုဲင်း"ဆုမ်"ယိုနဝ်ꩻ အဝ်ႏသုင်ꩻလွေꩻနေနေသွူ၊ "တသာႏဆုမ်"သုင်ꩻလွေꩻဒျာႏ လိတ်ဖြုံႏနုဲင်းနဝ်ꩻသွူ။ အမဲဉ်ႏနဝ်ꩻ လိတ်ဖြုံႏယို အငေါဝ်းတဲ့မဲဉ်ႏ၊ လိတ်ဖြုံႏတဲ့မဲဉ်ႏ၊ သရတဲ့ မဲဉ်ႏနုဲင်းနဝ်ꩻနဝ်ꩻ သုင်ꩻဗာႏဒျာႏ အိုသရမꩻမဲဉ်ႏသွူ၊ အဝ်ႏ"အို"သရယို အွဉ်ႏတွယ်ꩻတွမ်ႏ ကရီးဗျည်းနဝ်ꩻ ကို၊ အွဉ်ႏသွတ်ꩻလွေꩻတောမ်ႏ မသွတ်ꩻနဝ်ꩻ ထန်ႏလွဉ် ကိုမ် နုဲင်းနဝ်ꩻသွူ၊ နုဲင်းလိတ်မွူး နီသွဉ်းသီး ကအဝ်ႏသွဉ်ကိုနဝ်ꩻ လိတ်ဖြုံႏယိုတဲ့ အဝ်ႏသွူ။

ကိုပ် ကိုပ်ꩻ ကိုမ် ကိုမ်ꩻ ကိုမ်း ကိုမ်ႏ အဝ်ႏသော့ꩻနုဲင်းယိုတဲင် ရွဉ်ကိုမ်ꩻဗီႏ မဉ်ႏသုင်ꩻနုဲင်းနဝ်ꩻနဝ်ꩻ အငေါဝ်းထန်ႏတဲ့မဲဉ်ႏ၊ လိတ်ဖြုံႏမဲဉ်ႏ သေထွꩻဗာႏနုဲင်းနဝ်ꩻသွူ၊ နဝ်ꩻမꩻ မဉ်ႏသုင်ꩻသော့ꩻလုဲင်ႏမွိုင် ဆရီးဗျည်းနဝ်ꩻမွိုင် ဆိုပ် ဆိုပ်ꩻ ဆိုမ် ဆိုမ်ꩻ ဆိုမ်း ဆိုမ်ႏ-တသာႏဆိုမ် သုင်ꩻနုဲင်းနဝ်ꩻနဝ်ꩻမဲဉ်ႏ ခံႏထူႏနုဲင်းနဝ်ꩻသွူ။ လိတ်မွူးထီသိမ်ႏမူကို ကအဝ်ႏသုင်ꩻဒါႏ သော့ꩻရုမ်းဝင်ꩻယိုနဝ်ꩻ မဉ်ႏသုင်ꩻနေးဒျာႏမွိုင် အိုသရတွော့ꩻ "သော့ꩻရိုမ်းဝင်ꩻ"နုဲင်းနဝ်ꩻမွိုင် အငေါဝ်းတဲ့မဲဉ်ႏ၊ လိတ်ဖြုံႏမဲဉ်ႏ၊ သရမဲဉ်ႏ ဒေါ့ꩻရိုꩻဗာႏနုဲင်းနဝ်ꩻသွူ၊ ကွဲးတွော့ꩻ ကအဝ်ႏသုင်ꩻဒါႏ "တသာႏဆုမ်"လိတ်ဖြုံႏယိုနဝ်ꩻ အဝ်ႏထီႏဗာႏလဲဉ်းသွူတွမ်ႏ ပွုံႏစံႏလဲ့ တထွောင်းကိုနဝ်ꩻ ရွဉ်တကိုမ်ꩻယို သုင်ꩻလွေꩻဒျာႏတမျိုꩻနဝ်ꩻ ထီႏဗာႏသွူ။ သုင်ꩻလွေꩻနုဲင်းမုဲင်ꩻနဲးနဝ်ꩻ "ရွမ်တကွမ်ꩻ"တဲ့၊ "လိုမ်းကိုမ်ႏနေ"ယိုနဝ်ꩻ သုင်ꩻလွေꩻဒျာႏနုဲင်းယို "လွမ်းကွမ်ႏနေ"တဲ့ ယိုနဝ်ꩻ သရတွမ်ႏ အငေါဝ်း တမဲဉ်ႏတဝ်း ရိုꩻနုဲင်းနဝ်ꩻတဲ့ အဝ်ႏလꩻသွူ၊ ကွဲးတွော့ꩻ လိတ်ဖြုံႏဖုံႏနုဲင်းယိုနဝ်ꩻ ယထွောင်းထွောင်း လိတ်မူထီသိမ်ႏ အရသာႏပြောင်ꩻတဝ်းနုဲင်းနဝ်ꩻတွော့ꩻ ပအိုဝ်ႏလိတ်လုဲင်ꩻစွစ်ꩻလီတာႏ ဗွေႏသံႏဃာႏသီးအွဉ်ငါတွော့ꩻ မွဉ်းဖျင်လွဉ်ဖုံႏနဝ်ꩻလဲ့ အဝ်ႏထီႏလွဉ်ဗာႏလဲဉ်းနဝ်ꩻသွူ။ အွိုးကအွဉ်ႏတီႏထွူလဲဉ်းဒါႏ ထီသိမ်ႏမူယို ထွာအမျာꩻသုင်ꩻ၊ နေးတွမ်ႏအမျာꩻ အွဉ်ႏထွော့လွေꩻနုဲင်းနဝ်ꩻ၊ ဗွေႏရဟန်ꩻတန် ပညာႏအဝ်ႏသီး ခွိုꩻပအိုဝ်ႏလိုꩻတန်သီးဖုံႏတဲ့ သဘောꩻတူႏ အွဉ်ႏတီႏထွူလဲဉ်း ထီသိမ်ႏမူယိုတဲင် ထေလိတ်စောင်ႏ ဖေႏကစွစ်ꩻတိုးလီ ကျိုꩻစာꩻသွဉ်လွေꩻဖေႏနဝ်ꩻ ဟွိုန်ဟဝ်နစ်သက်ကေꩻဇူꩻတင်ႏငါႏ ကောအွဉ်သား ဗွေႏရဟန်ꩻ၊ ကေꩻဇူꩻဗွေႏတွမ်ႏ ခွိုꩻပအိုဝ်ႏလိုꩻတန်သီးဖုံႏသွူ။

ပအိုဝ်ႏလိုꩻမျိုꩻယို ဖေႏကဒါႏချာ လိတ်ပအိုဝ်ႏတွော့ꩻ ကအွဉ်မာꩻလွေꩻဖေႏဒါႏသားနဝ်ꩻ အီႏမော့ꩻဗာႏ အယပ်ꩻအခုဲင်ႏအာ ကရိုꩻနဝ်ꩻလဲ့ ဖြောင်းသမဲင်ꩻ၊ လိတ်စောင်ႏသမဲင်ꩻကို ကအဝ်ႏတဲမ်းနယ်ဖုံႏနဝ်ꩻလဲ့ ဟောꩻဗာႏထီႏဗာႏတွော့ꩻ ရမ်ꩻဆလꩻဒျာႏ အဆုံးအယော့ဖုံႏနဝ်ꩻသွူ၊ ထွိုင်ႏမာꩻလွဉ် ကျိုꩻစာꩻလွဉ်နုဲင်းနဝ်ꩻတဲင် ယိုခါ အရွယ်ႏပေႏပေႏ၊ တလောင်ꩻဖုံႏနဝ်ꩻ သွဉ်လွဉ်ဗာႏချာ လိတ်ပအိုဝ်ႏ၊ ဒါႏချာဗာႏ လိတ်ပအိုဝ်ႏဖုံႏနဝ်ꩻသွူ။ အစနဝ်ꩻ ပအိုဝ်ႏလိတ် ဖေႏကစွစ်ꩻတိုး အဝ်ႏကျိုꩻစာꩻရောင်မာꩻရောင်တွော့ꩻ အောင်ႏမျင်ႏလွဉ်လဲဉ်းကရိုꩻနဝ်ꩻ ထီႏဗာႏလဲဉ်းဒျာႏ အဒီႏအရာႏနဝ်ꩻသွူ၊ ကွဲးတွော့ꩻ နေင်ႏပေါင်ꩻထွိုင်ႏအာ ခေတ်အခေႏနေႏအလꩻ ပြောင်ꩻလုဲင်ႏလွဉ်လဲဉ်းတဲင် လိတ်အာႏပေႏချက်ဖုံႏယို ကွဲးအဝ်ႏအာအာလွဉ်ဖုံႏနဝ်ꩻလဲ့ ထီႏလွဉ်ဗာႏစွဉ်ႏနဝ်ꩻသွူ၊ ကောကထေဒါႏ လိတ်စောင်ႏသားဖုံႏနဝ်ꩻ ယိန်းသေသေတဲင် လိတ်လိုႏအပ်မုတွမ်ႏ လိတ်ခရာႏဖုံႏ၊ လိတ်အကျောင်ꩻဖုံႏယို ကွဲးသေသေလွဉ်တွော့ꩻ ယဟန်ႏနဝ်ꩻ ထူႏလွူးစွဉ်ႏ ဝင်ꩻလိတ်ဖြုံႏဖုံႏနုဲင်းနဝ်ꩻတဲ့ အဝ်ႏသွူ။ နဝ်ꩻသွူတကာႏတဝ်း ခမ်းထီစနစ် ပြောင်ꩻလုဲင်ႏလွဉ်တွော့ꩻ အစိုꩻရသွဉ်လိတ်ကျောင်ꩻကိုဖုံႏလဲ့ ကျောင်ꩻခိန်ႏအထန်ႏ (ကျောင်းချိန်ပြင်ပ)ခိန်ႏယို သွဉ်ထူႏလွေꩻချာ ခမ်းရင်ꩻသားလိတ်လုဲင်ꩻ အခွင်ꩻအရေꩻဖုံႏတဲ့ အဝ်ႏလွဉ်စွဉ်ႏသွူ၊ ယိုနဝ်ꩻ ခမ်းရင်ꩻသားလိုꩻမျိုꩻတာႏ အခွင်ꩻရေꩻဟဝ်တဗာႏ မတ်ထူႏနုဲင်းနဝ်ꩻ လꩻဒျာႏသွူ။ ကွဲးတွော့ꩻ တွမ်ႏအခွင်ꩻရေꩻအလွောက်ꩻ ကလꩻအတွိုင်ꩻ အဝ်ႏလိုႏထူႏနုဲင်းနဝ်ꩻလဲ့ ပအိုဝ်ႏလိတ် ကအဝ်ႏလိုႏဒါႏယိုလဲ့ လိုႏထဲမ်၊ ပအိုဝ်ႏတစွိုးခွိုꩻလုမ်းတာႏ ဖေႏကထွာနွောင်ꩻဒါႏ လိတ်တမူယိုလဲ့ အဝ်ႏလိုႏကျိုꩻစာꩻနေနေ နီသွဉ်းသီး ထီႏနုဲင်းနဝ်ꩻသွူ၊ နဝ်ꩻမꩻ အာႏပေႏချက်၊ အာႏတလာချက်ဖုံႏယို သုင်ꩻသပ်ထွူတွော့ꩻ ထဲမ်ဖျင်မွဉ်း အဝ်ႏလိုႏမာꩻလွေꩻလဲဉ်းသွူ။

လွောင်ႏဗူႏရေꩻယို အွဉ်ႏအထျꩻတွော့ꩻ ပအိုဝ်ႏလိတ်ယိုတဲ့ ထွာအရေꩻတန်တဗာႏနေနေနဝ်ꩻသွူ၊ ကွပ်စွဉ်ႏ ပအိုဝ်ႏလိတ်ယို တဗူႏညီႏတဝ်းဝင်ꩻတဲင် အဝ်ႏခွယ်ꩻနေကဒျာႏ ပအိုဝ်ႏယို ခမ်းကောင်၊ ခမ်းဒေါမ် နုဲင်းနဝ်ꩻဖုံႏသွူ၊ မဉ်ႏထောင်ထွားစဲင်းစဲင်းယင်း လိတ်ခရာႏယိုနဝ်ꩻ ခမ်းဒေါမ်လဲ့ ချော့ꩻဆေ့ꩻဆေ့ꩻ၊ ခမ်းကောင်လဲ့ ချော့ꩻဆေ့ꩻဆေ့ꩻ မဉ်ႏမာꩻနွောင်ꩻငါနုဲင်းနဝ်ꩻငါ ဗူႏနွောင်ꩻလဲဉ်းဒျာႏနဝ်ꩻသွူ။ နဝ်ꩻမꩻ ယိုတပတ်တာႏနဝ်ꩻ တဲမ်းခြုဲင်းနယ်လွေꩻဗာႏ တခွုင်းယိုတဲင် အမာႏတရွို့ꩻ ဖေႏကစွို့ꩻနဝ်ꩻ အဝ်ႏပက်ထွို့ꩻသော့ꩻလွေꩻ၊ ဖေႏကထွာလွေꩻ တစွိုးခွိုꩻလုမ်း လွောင်ႏဗူႏရေꩻတာႏ နုဲင်းနဝ်ꩻသွူ။

အမာႏတရွို့ꩻ-ဖျင်စွို့ꩻ(၇)

လိုꩻမျိုꩻတမျိုꩻ အရွီးအခိုႏယို အထျꩻအဝ်ႏလိတ်လုဲင်ꩻတဲင် လိုꩻမျိုꩻပေႏဖုံႏယို အခွင်ꩻရေꩻထွိုင်ႏအဝ်ႏတွော့ꩻ အွဉ်ထွင်ႏလွဉ်ချာ စွိုးခွိုꩻလိတ်လုဲင်ꩻဖုံႏသွူ၊ ယိုခါ အစိုꩻရတသာစူကိုနဝ်ꩻ ပထမအရီးသွတ်ꩻ အွဉ်မာꩻလွေꩻလဲဉ်းသွူ ခမ်းရင်ꩻသား လိုꩻမျိုꩻပေႏ လိတ်လုဲင်ꩻယေန်ႏငဲမုပွယ်ꩻတန်ဖုံႏနဝ်ꩻသွူ၊ မန်းခမ်းတခမ်းလုမ်းအနေႏ စောက်ꩻခမ်းနယ်ႏကိုနဝ်ꩻ အွဉ်မာꩻလွေꩻရီးရီးလဲဉ်း ဘာႏအံဝေင်ꩻနယ်ႏကို တဲႏ ဖေဖော်ဝါရီ ၉-နီꩻ ဗꩻလွေꩻ ၁၂-နီꩻနဝ်ꩻသွူ။

နဝ်ꩻအကိုနဝ်ꩻ ခမ်းရင်ꩻသား လိုꩻမျိုꩻပေႏအတာႏ ယေန်ႏငဲရေꩻထာꩻကျူႏ၊ ကွဉ်ကꩻခြွိုင်းခြိုꩻ၊ အသုံꩻအဆောင်ႏဖုံႏ၊ စွိုးခွိုꩻယိုꩻယာႏဖုံႏ၊ ငဝ်းသချင်ꩻဖုံႏ၊ ယိုꩻယာႏအအံႏအအွꩻဖုံႏယို ဖေႏဝင်ꩻကသေတွော့ꩻ အချင်ꩻချင်ꩻ ဖလုဲင်ႏလဝင်ꩻပွယ်ꩻတန် ရိုꩻဗာႏနုဲင်းနဝ်ꩻသွူ၊ နဝ်ꩻအကိုနဝ်ꩻ လိတ်လုဲင်ꩻယို အွဉ်ႏအထျꩻတွော့ꩻ တဲမ်းစုမာꩻ(စာတမ်း)ရွစ်ဟောꩻနယ်ဗာႏ ခမ်းရင်ꩻသားလောင်ႏလင်ဖုံႏနဝ်ꩻသွူ။ စောက်ꩻခမ်းနယ်ႏကို ကအဝ်ႏဒါႏ ပအိုဝ်ႏဖုံႏနဝ်ꩻ ခံႏတဝ်းထဲ့ဆုဲင်ꩻဝင်ꩻတွော့ꩻ ခမ်းရင်ꩻသားလိုꩻမျိုꩻတမျိုꩻယို ဝင်ꩻထွဉ်ႏဒင်ႏလွေꩻ (စာတမ်း)သိုမ်စောင်ႏတဲင် ခမ်းရင်ꩻသားအလင်ဖုံႏနဝ်ꩻ တဒင်ႏနွောင်ꩻတဝ်း၊ ကွဲးတွော့ꩻ ပအိုဝ်ႏနဝ်ꩻ ဒင်ႏနွောင်ꩻလို့စွဉ်ႏ သိုမ်စောင်ႏလုမ်းနဝ်ꩻသွူ။ စောက်ꩻခမ်းနယ်ႏကိုနဝ်ꩻ ပအိုဝ်ႏလိုꩻမျိုꩻဖြာꩻခြွဉ်း ရမ်ꩻဆအလꩻ အဝ်ႏလဲဉ်း နီသိန်ႏလွိုလဲ့ အစိုꩻရတထေပြန်ႏနယ်တဝ်း ပအိုဝ်ႏခမ်းရင်ꩻသားရေꩻရာႏဝွန်ႏတန်လီꩻ ဗို့ꩻဆေ့ꩻတေ့ꩻလွေꩻနေးဒျာႏ ဖဉ်းမွိုတ်ရာꩻထျꩻတဲင် သေထွꩻဗာႏနုဲင်းနဝ်ꩻသွူ၊ နဝ်ꩻတွော့ꩻ ပအိုဝ်ႏလိုꩻမျိုꩻယို အလွောင်ႏဗူႏတန်ဒျာႏကရိုꩻနဝ်ꩻလဲ့ ထီႏဗာႏသွူ၊ လိတ်လုဲင်ꩻယေန်ႏငဲးရေꩻပွယ်ꩻ ဘားအံစောက်ꩻခမ်းနဝ်ꩻ ခမ်းကောင်ဖဲ့ꩻ တောင်ႏကီꩻဝေင်ꩻနယ်ႏ လိတ်လုဲင်ꩻတွမ်ႏယေန်ႏငဲးရေꩻအစွိုꩻလဲ့ လင်ꩻဖေႏအာႏ၊ လွယ်ခံꩻဒုံသားတဲ့ လင်ꩻကူႏညီႏဒုံဖေႏမောင်းမွူး၊ ပျꩻခန်ꩻကိုနဝ်ꩻ အွဉ်ႏနယ်ပါတွမ်ႏ မောင်းဆွိုင်ꩻဖုံႏ၊ မောင်းမွူးဖုံႏတဲင် ဒုံႏမောင်းမွူးဒါႏလျင်ႏသားယို တအဝ်ႏတဝ်းတွော့ꩻ ဖေႏကဒုံႏဒါႏနဝ်ꩻတဲ့ အဝ်ႏကူႏညီႏလွေꩻဖေႏနဝ်ꩻသွူ၊ နဝ်ꩻလုမ်ꩻတကာႏတဝ်း တရောပ်တန်သား၊ သထုံႏသားဖုံႏတဲ့ လွဉ်ဖေႏအာႏကို၊ ရွစ်ယံ ခမ်းကောင်ဖဲ့ꩻ ခွန်လှမင်းသီး၊ ခွန်ခမ်းခြွိုင်ꩻသီးလဲ့ လင်ꩻထွားဖေႏကိုတဲင် ပွယ်ꩻနဝ်ꩻ ကွိုန်ꩻတရေꩻမွေးစွဉ်ႏထာꩻနဝ်ꩻသွူ။

မဉ်ႏထွားနုဲင်းယိုနဝ်ꩻ ပအိုဝ်ႏလိုꩻမျိုꩻယို လွောင်ႏဗူႏမုꩻအဝ်ႏဒျာႏမွော့နဲးကရိုꩻနဝ်ꩻ ထီႏဗာႏသွူ၊ ကွဲးတွော့ꩻ ခမ်းကောင်ဖဲ့ꩻနဝ်ꩻ နဲင်ႏငံႏရေꩻပါတီသားတဲ့နဝ်ꩻ၊ လိတ်လုဲင်ꩻတွမ်ႏယေန်ႏငဲးရေꩻဗဟိုႏတဲ့နဝ်ꩻ လင်ꩻလွဉ်၊ ကူႏညီႏလွဉ် တမျိုꩻတစားနဝ်ꩻတဲ့ ထီႏဗာႏတဝ်းတဲင် သꩻတဟဝ်တဝ်းသွူ။ နဝ်ꩻသွူတကာႏတဝ်း စောက်ꩻခမ်းနဝ်ꩻ လꩻလွေꩻပအိုဝ်ႏခမ်းရင်ꩻသားရေꩻရာႏဝွန်ႏတန်နုဲင်းနဝ်ꩻတဲင် ယိုခါ ကအဝ်ႏထွာဝွန်ႏတန် ခွန်မျိုးတင့်နဝ်ꩻ ဒေါ့ꩻရိုꩻနုဲင်းယို"ပအိုဝ်ႏလိတ်ယို ခမ်းကောင်ဖဲ့ꩻနဝ်ꩻ အဝ်ႏလွေꩻဒျာႏ တွမ်ႏထီသိမ်ႏမူ၊ အဝ်ႏသုင်ꩻလွေꩻနုဲင်းနဝ်ꩻ၊ ခမ်းဒေါမ်ဖဲ့ꩻယိုနဝ်ꩻ အဝ်ႏကျင်ꩻသုင်ꩻလွေꩻတွမ်ႏ အလံတရာမူ၊ ဖေႏကပေါင်ꩻခြွဉ်းလꩻဝင်ꩻနဝ်ꩻ လွတ်တောႏကိုတဲ့ အဝ်ႏခြိꩻထူႏလွေꩻ၊ မာꩻခြေင်းငါႏတဲ့ လꩻတဝ်း၊ ခြိꩻထူႏလွေꩻဗာႏနေး တလဲင်ႏတစိꩻစိꩻ"တဲ့ အဝ်ႏယုမ်းအံႏလွေꩻနုဲင်းနဝ်ꩻသွူ။

ပအိုဝ်ႏကအဝ်ႏဒါႏ မဲင်ꩻခမ်း၊ စောက်ꩻခမ်းကိုဖုံႏနဝ်ꩻတဲ့ သꩻအဝ်ႏဗော့ꩻလွေꩻဒျာႏ၊ လိတ်ခရာႏယိုတဲ့ အဝ်ႏမဉ်ထွို့ꩻဗူႏဒျာႏကရိုꩻနဝ်ꩻလဲ့ အပုင်ႏအငုဲင်ꩻ အဝ်ႏဒေါ့ꩻလွေꩻနေနေနဝ်ꩻသွူ၊ နဝ်ꩻတွော့ꩻ ပျꩻခန်ꩻကိုနဝ်ꩻ ပအိုဝ်ႏလိတ်ပွိုင်းလဲင်ႏ ပျူခေတ်ဖုံႏ၊ လုံးခေတ်ဖုံႏ သက်သေႏနုဲင်းနဝ်ꩻဖုံႏတဲ့ အဝ်ႏအွဉ်ႏနယ်လွေꩻနဝ်ꩻ ထီႏဗာႏနဝ်ꩻသွူ။ နဝ်ꩻတွော့ꩻ ပအိုဝ်ႏ(စာတမ်း)တစောင်ႏကိုနဝ်ꩻ အဝ်ႏစုရွမ်လွေꩻ "ပအိုဝ်ႏ"လိတ်ဖြုံႏခရာႏအဝ်ႏပါနဝ်ꩻသွူ၊ ပွိုးတမုဲင်ꩻမွော့ ဟဲ့ꩻဗာႏတွိုႏ ပအိုဝ်ႏနုဲင်းနဝ်ꩻ၊ ခမ်းရင်ꩻသား အလင်ဟောꩻဒါႏတဝ်းနုဲင်းနဝ်ꩻ အကျောင်ꩻခရာႏယို ခြုဲင်းနယ်လွေꩻပါ အလုဲင်းနဝ်ꩻသွူ၊ လိတ်ကိုနဝ်ꩻ ပအိုဝ်ႏလိုꩻမျိုꩻယို ဝင်ꩻအဝ်ႏဟဲ့ꩻတောင်သူတွော့ꩻ တွိုႏ ၁၉၈၄-ဗာႏ ဝေင်ꩻသထုံႏ မော်ကျော့ရပ်ကွက် ဗွေႏဗွန်ကျောင်ꩻကို ပအိုဝ်ႏလိုꩻမျိုꩻဖုံႏ စုလွဝင်ꩻတွော့ꩻ ဝင်ꩻကဟဲ့ꩻဒါႏ တောင်သူယို ဖေႏကဟဲ့ꩻလွေꩻ"ပအိုဝ်း"နုဲင်းနဝ်ꩻတွော့ꩻ ကွီကော့ꩻ ပျꩻလွေꩻဆန္ဒ ခမ်းခြွဉ်းဗူႏအစိုꩻရထျꩻတဲင် ခမ်းခြွဉ်းဗူႏအစိုꩻရလဲ့ ပအိုဝ်းကရိုꩻဒါႏ အဟဲ့ꩻဟောင်အသုင်ꩻယို အွဉ်ႏတီႏလွေꩻဖေႏခန်းဒျာႏနဝ်ꩻသွူ။

နဝ်ꩻတွော့ꩻ ပအိုဝ်ႏ မဉ်ႏရိုꩻသွူနုဲင်းနဝ်ꩻနဝ်ꩻ ခမ်းရင်ꩻသား လိုꩻလင်သီးဖုံႏ အဝ်ႏရိုꩻဒျာႏတမုဲင်ꩻလိုꩻမျိုꩻနဲးနုဲင်းနဝ်ꩻ၊ တ‌ေသငါꩻတဝ်းနဝ်ꩻ ကဲဉ်းအာအာနုဲင်းနဝ်ꩻသွူတကာႏတဝ်း ပအိုဝ်းကရိုꩻဒါႏ ဝ သွတ်ꩻပါလိတ်ယို ဝင်ꩻလင်တဟောꩻဒါႏတဝ်းနုဲင်းနဝ်ꩻလဲ့ အဝ်ႏဒေါ့ꩻရိုꩻဒျာႏသွူ။ နဝ်ꩻတွော့ꩻ ဆရာႏမူႏဒေါက်တာ နန်းသန်းသန်းဝင်း၊ တွယ်ꩻဖက်ပါမောက္ခ နိုင်ငံတကာသွုပ်ဆွိုက်ရေꩻဌာႏန၊ ရန်ႏကုန်ႏတက္ကသိုလ်ႏ ကစုရွမ်ဒါႏ (စာတမ်း)ကိုနဝ်ꩻ ဝ သွတ်ꩻ "ဝ်"ယိုနဝ်ꩻ ဗွိုန်ထွားဟောꩻလိတ်လုံးနယ်ꩻ သော့ꩻလွေꩻ ဝ်၊ ဝ်၊ ဝ် နုဲင်းနဝ်ꩻအကျောင်ꩻ ခြုဲင်းနယ်လွေꩻအလုဲင်းနဝ်ꩻ ထီႏဗာႏနဝ်ꩻသွူ။ နဝ်ꩻသွူတကာႏတဝ်း ကသုင်ꩻလွေꩻဒါႏ ပအိုဝ်ႏလိတ်ရန်း က ကꩻ ကာ ကာꩻ ကား ကာႏ အငေါဝ်းအဝ်ႏသူဖြုံႏယိုလဲ့ ဒေါ့ꩻသျင်ꩻဖေႏနဝ်ꩻ ယိုလိတ်ခမ်းကောင်ဒျာႏ ဒေါ့ꩻရိုꩻဗာႏနုဲင်းနဝ်ꩻသွူ။ လိတ်ရန်းအငေါဝ်းထန်ႏသူဖြုံႏယိုနဝ်ꩻ အခေႏခံႏလွေꩻဒျာႏတွမ်ႏ ထီသိမ်ႏလိတ်မူဒျာႏသွူ၊ ကွဲးတွော့ꩻ ပအိုဝ်ႏငေါဝ်းယိုနဝ်ꩻ ထီသိမ်ႏမူကို တဲမ်းလွေꩻဒျာႏ ပအိုႏ ဝ သွတ်ꩻတပါတဝ်းစားဒျာႏနဝ်ꩻလဲ့ ခွေသွဉ်းအဝ်ႏတဲမ်းခြုဲင်းနယ်လွေꩻလဲဉ်းဒျာႏ အွိုးချာနဝ်ꩻသွူ၊ နဝ်ꩻသွူတကာႏတဝ်း ပအိုဝ်ႏလိတ်ယို အွိုးလိတ်ပထမခေတ် မွိုင်ꩻပျိုꩻဆရာႏတောႏ ထွင်ႏတဲမ်းလွေꩻအခရာႏယိုလဲ့ (စာတမ်း)ကို အဝ်ႏတဲမ်းလွေꩻပါတဲင် မဉ်ႏယူႏနုဲင်းယိုနဝ်ꩻ ပအိုဝ်ႏခမ်းဒေါမ်ဖဲ့ꩻသူꩻ မဉ်ႏပတ်သဲစ်တွမ်ႏ လိတ်ခရာႏယို ခြိꩻထူႏဝင်ꩻအီႏယိုꩻကရိုꩻနဝ်ꩻ ရမ်ꩻဆလꩻဒျာႏသွူ။ ခမ်းကောင်ဖဲ့ꩻလဲ့ ပအိုဝ်ႏလိတ်ကျောင်ꩻဆရာႏတဖြာꩻနဝ်ꩻ ဒေါ့ꩻခြုဲင်းနယ်ဖိုနုဲင်းယို"ပအိုဝ်ႏလိတ် ဖေႏကထွာလွေꩻ တမူချင်ႏနဝ်ꩻ နုဲင်ႏငံႏတောႏ ထေလွေꩻဖေႏရွဉ် အနီꩻအရင်ꩻတွော့ꩻ ထွဉ်ႏခြိꩻထူႏလွဝင်ꩻ အွိုးကျောင်ꩻထီသိမ်ႏကို အဝ်ႏဖိုတဲ့၊ ကွဲးတွော့ꩻ ခမ်းကောင်ဖဲ့ꩻလိုꩻတန် တာႏဝွန်ႏအဝ်ႏသားဖုံႏနဝ်ꩻ လွဉ်တဝ်းတွော့ꩻ ခြိꩻထူႏမု အောင်ႏမျင်ႏတဝ်း"တဲ့ ယိုနဝ်ꩻ ဝွေꩻနမ်းမော့ꩻတွော့ꩻ ခြုဲင်းနယ်တဲင် သေထွꩻဗာႏသွူ။ ကအီႏခြိꩻထူႏဒါႏကိုနဝ်ꩻ ဝွေꩻတဲ့ ပါသော့ꩻနေနေတွော့ꩻ ခြုဲင်းနယ်တဲမ်းလိတ်သားတဲင် သေထွꩻဗာႏနဝ်ꩻသွူ၊ နုဲင်းယိုစားနဝ်ꩻ တဲမ်းလိတ်သားယူႏဒျာႏ ပတ်သဲစ်တွမ်ႏလိတ်ယိုနဝ်ꩻ အွဉ်ႏဗော့ꩻနုဲင်းယိုနဲ့၊ ခြိꩻထူႏတဝ်းဒွုမ်ဝင်ꩻနဲ့နဝ်ꩻ ငေါဝ်းရီယို ပါꩻမုဲင်ꩻအီႏဖြေႏဖေႏဟောင်း၊ ကရီဗာႏနုဲင်းယိုလဲ့ ကွပ်စွဉ်ႏမဉ်လꩻငါႏ ပအိုဝ်ႏယို အဝ်ႏတအိုဝ်ႏချင်ႏ၊ ပအိုဝ်ႏယို အဝ်ႏတလွောင်ႏချင်ႏနုဲင်းနဝ်ꩻဒျာႏသွူ။ ဖေႏကအဝ်ႏတအိုဝ်ႏချင်ႏ၊ တလွောင်ႏချင်ႏနဝ်ꩻ ခွိုꩻသွုပ်တဲ့နဝ်ꩻ၊ တာႏဝွန်ႏအဝ်ႏသားတဲ့နဝ်ꩻ၊ ဗွေႏသံႏဃာႏသီးတဲ့ လိုႏထိုမ်ႏရောင်ငါႏလဲဉ်းဝင်ꩻ အဖြေႏသွူ၊ မဉ်ႏအဝ်ႏခြေင်းဗော့ꩻနုဲင်းနုဲင်းဝင်ꩻနဝ်ꩻတဲ့ မဲ့ꩻပအိုဝ်ႏတာႏ အကျိုꩻသုမ်ꩻထိုꩻဒါႏ ယူႏဗာႏနုဲင်းနဝ်ꩻတဲင် တဲမ်းခြုဲင်းလွေꩻဗာႏနုဲင်းယိုသွူ။

အမာႏတရွို့ꩻဖျင်စွို့ꩻ(၈)

တဲမ်းလိတ်သား တဲမ်းခြုဲင်းလွဉ် အမာႏတရွို့ꩻဖျင်စွို့ꩻယိုနဝ်ꩻ တွိုႏလွဉ်လဲဉ်းသွူ အမုဲင်(၈)ကိုလဲဉ်း၊ ကောပ်စွဉ်ႏ ပအိုဝ်ႏလိတ်ယို အဝ်ႏကွဲꩻလွဝင်ꩻ၊ အဝ်ႏပြုဲင်လွဝင်ꩻနုဲင်းနဝ်ꩻတွော့ꩻ မဉ်ထွို့ꩻဗူႏလွေꩻငါႏတဲ့ပါပါ၊ ယဟန်ႏနဝ်ꩻ အမာႏယို ထင်းအမဲဉ်ႏတွော့ꩻ ကအဝ်ႏသုင်ꩻလွေꩻဖုံႏနဝ်ꩻတဲ့ ဖေႏကသေနာႏချာတဲ့ပါပါ၊ ပအိုဝ်ႏလိတ်လုဲင်ꩻစွစ်ꩻတိုးလီသွူတွော့ꩻ ဖေႏကပြွူႏဖြိုထဲင်းထဲင်းတဲ့ပါပါ-ရေႏရောႏနုဲင်းနဝ်ꩻတဲင် တဲမ်းခြုဲင်းလွေꩻဖေႏဗာႏနဝ်ꩻသွူ။

မန်းကဝ်ႏရိုꩻဒါႏ (နုတ်တစ်ရာ-စာတစ်လုံး)ယိုနဝ်ꩻ ဒေါ့ꩻပျင်ႏဒေါ့ꩻခြေင်ထာꩻ တမွေးတဝ်း၊ ပအိုဝ်ႏသမဲင်ꩻ၊ ပအိုဝ်ႏယိုꩻယာႏ၊ ပအိုဝ်ႏခြွိုင်းခြိုꩻ၊ ပအိုဝ်ႏလိုꩻမျိုꩻ ဓလေ့ꩻဖုံႏယို မဉ်ႏတတဲမ်းခါꩻတဝ်း တွမ်ႏလိတ်ပအိုဝ်ႏယိုနဝ်ꩻ ဆုဲင်ꩻချာပအိုဝ်ႏကရိုꩻယို ထီႏဗော့ꩻအရုတ်လုမ်ꩻ၊ မဲ့ꩻဗွိုန်ထို တဲမ်းသော့ꩻလိတ်ထီကိုနဝ်ꩻသွူ။ ပအိုဝ်ႏလိတ်ယိုနဝ်ꩻ အရေꩻကီꩻငါႏသွူတခွုင်းယိုမဉ်ႏတဲ့ လိုꩻတသေနာႏတဝ်းသားဖုံႏနဝ်ꩻ အဝ်ႏအာငါႏ၊ ပအိုဝ်ႏလိတ်ယို ဒါႏခရာႏတလိုႏတဝ်း၊ မဉ်ႏဒါႏလိတ်ပအိုဝ်ႏယိုနဝ်ꩻ အီႏလွေꩻသုင်ꩻကဲးမုဲင်ꩻကို စစွဉ်ႏနုဲင်းယိုဖုံႏတဲ့ အဝ်ႏခံႏထူႏသားဖုံႏတဲ့ အဝ်ႏနဝ်ꩻသွူ၊ စုမ်ႏနေင်ႏ ကျောင်ꩻပေ့ꩻခိန်ႏ တွိုႏခမ်းသဲင်တွင်ꩻယို ပအိုဝ်ႏရပ်ရာႏကိုနဝ်ꩻ အဝ်ႏသွဉ်လွေꩻလိတ်ပအိုဝ်ႏဖုံႏ အဝ်ႏသွူ။ ကွဲးတွော့ꩻ လိုꩻသꩻဝင်ႏစာꩻမွေးမွေး လိတ်ပအိုဝ်ႏတွော့ꩻ သွဉ်လွေꩻနဝ်ꩻ ကဲဉ်းဆေ့ꩻဆေ့ꩻ၊ ဝင်ꩻထွဉ်ႏတွော့ꩻ၊ လိုꩻတန်ထွဉ်ႏတွော့ꩻ၊ ဗွေႏရဟန်ꩻထွဉ်ႏတွော့ꩻ သွဉ်ဗာႏဒျာႏသားဖုံႏနဝ်ꩻ ကဲဉ်းအာအာနဝ်ꩻသွူ၊ ကွပ်စွဉ်ႏထွဉ်ႏနေးတွော့ꩻ သွဉ်ဗာႏနဝ်ꩻတဲ့ အဝ်ႏလက်ခံႏဒျာႏ၊ ကွဲးတွော့ꩻ အဝ်ႏလိုႏသꩻဝင်ႏစာꩻပါ၊ အဝ်ႏလိုႏသွဉ်မွေးမွေး၊ သွဉ်ဒါႏဒါႏပါ၊ အဝ်ႏလိုႏသေနာႏစဲင်းစဲင်းလွေꩻပါ လိတ်အကျောင်ꩻခရာႏဖုံႏနုဲင်းနဝ်ꩻသွူ။

ယထွောင်းထွောင်းနဝ်ꩻ နီသွဉ်းသီး သေထွꩻနုဲင်းမုဲင်ꩻနဲးနဝ်ꩻ ကောသွဉ်ဖေႏဒါႏလိတ် ကထွာဆရာႏနမ်းယိုသွူမဉ်ႏတဲ့ လိတ်အကျောင်ꩻ တဲပ်တဲပ်နဲပ်နဲပ် တသေစဲင်းတဝ်း၊ ဒါႏတကြိꩻတကြွꩻနေးလုမ်ꩻလဲ့ ထူႏတာႏဝွန်ႏ သွဉ်ဖေႏချာဗာႏလဲဉ်းဝင်ꩻဖုံႏတဲ့ အဝ်ႏသွူ၊ ယိုနဝ်ꩻ ပျဿနာႏတန်မွေးစွဉ်ႏထာꩻသွူ။ ကထွာဆရာယိုꩻ လွူꩻတဲးတဲးဝါးဝါး တဲပ်တဲပ်နဲပ်နဲပ်လဲဉ်းလိတ်၊ ဒါႏကေႏကေႏလဲဉ်းလိတ်နုဲင်းနဝ်ꩻမꩻ အဝ်ႏလိုႏဖေႏတာႏဝွန်ႏ၊ အဝ်ႏလိုႏထွဉ်ႏသွဉ်ဖေႏ ခွိုꩻသွုပ်ဆꩻချာသားဖုံႏသွူ၊ မဉ်ႏတမွေးတဝ်းနဝ်ꩻ ကထွာဆရာႏယို ဒါႏတကြိꩻတကြွꩻ သွဉ်ဖေႏခွိုꩻသွုပ်ဆꩻချာ ကျောင်ꩻသားလိုꩻပေႏဖုံႏတဲ့ ဒါႏတကြိꩻတကြွꩻနုဲင်းတွော့ꩻ လိတ်ပအိုဝ်ႏအမဲဉ်ႏဖုံႏယို တသေထွꩻတဝ်းဒွုမ်နဝ်ꩻသွူ။

ပွိုင်းလဲင်ႏနဝ်ꩻ လိတ်ပအိုဝ်ႏယို ဖေႏကစွစ်ꩻလီအတာႏ အွဉ်ႏအထျꩻ မာꩻလွေꩻလဲ့ ယိုခါနဝ်ꩻ အဝ်ႏလိုႏပြောင်ꩻလုဲင်ႏခါႏခါႏလဲဉ်းမူနဝ်ꩻသွူ၊ ယိုခါနဝ်ꩻ အဝ်ႏလိုႏလုဲင်ႏလဲဉ်းဒျာႏ လျင်ႏလျင်ႏဗာႏလိတ်ပအိုဝ်ႏ၊ ဒါႏတဲပ်တဲပ်ဗာႏ လိတ်ပအိုဝ်ႏနုဲင်းနဝ်ꩻမꩻသွူ၊ လိတ်ပအိုဝ်ႏယို မဉ်ႏကေႏလယ်ႏ၊ အခေႏခံႏနဝ်ꩻတဲးတဲ့ လိတ်ခရာႏဖုံႏယို အမဲဉ်ႏအမာႏဖုံႏယို အီႏသေလွဉ်ပါ၊ အီႏခြုဲင်းနယ်ဝင်ꩻတဲ့ဒါႏနုဲင်းနဝ်ꩻသွူ။ နဝ်ꩻတွော့ꩻ ပအိုဝ်ႏလိတ်ယို လိုꩻဖေႏကမဉ်သွဉ်၊ လိုꩻဖေႏကမဉ်ဒါႏသား ဖေႏကအာလွဉ်နဝ်ꩻ လိတ်ယိုတဲ့ အဝ်ႏလိုႏစုမ်ႏ၊ အဝ်ႏလိုႏသွဉ်ယိုꩻယိုꩻ၊ ဆရာႏအထီအသွီႏဗွေဗွေတဲ့ အဝ်ႏလိုႏအဝ်ႏနုဲင်းနဝ်ꩻသွူ၊ ဆရာႏမဉ်ႏယံမꩻ ကေားသွဉ်သားယိုတဲ့ ဒါႏယိုꩻ၊ သꩻဝင်ႏစာꩻမု အဝ်ႏအဝ်ႏတဲ့ သွဉ်ဖေႏနွောင်ꩻ-စစွဉ်ႏအချက်နုဲင်းယိုဖုံႏနဝ်ꩻတဲ့ အဝ်ႏလိုႏနေနေသွူ။ သွဉ်ပုင်ႏသွဉ်နယ်ꩻဖုံႏယိုတဲ့ အဝ်ႏလိုႏတဲမ်းထွို့ꩻနေး(စကယ်ကျူး)(သင်ရိုးညွန်းတမ်း)နုဲင်းနဝ်ꩻဖုံႏ၊ အဝ်ႏလိုႏဗွောင်လွေꩻဖေႏပါ ထွာနွောင်ꩻဆရာႏကျောင်ꩻဖုံႏနဝ်ꩻစားသွူ၊ အဝ်ႏထွာနွောင်ꩻဆရာႏ ဗဟိုႏသွဉ်တန်ꩻလင်ꩻလုမ်ꩻတွော့ꩻ သဲင်ꩻသွဉ်ဖေႏချာနဝ်ꩻ တဲပ်နဲပ်မုꩻ ဆေ့ꩻငါႏထီႏနုဲင်းနဝ်ꩻသွူ၊ ယဟန်ႏနဝ်ꩻ ထင်ႏဗဟိုႏသွဉ်တန်ꩻတာႏ ဒုံထောက်ကမ်းတွော့ꩻ အဝ်ႏသွဉ်တန်ꩻသဲင်ꩻ သဲင်ꩻသွဉ်ဖေႏချာစွဉ်ႏနုဲင်းနဝ်ꩻနဝ်ꩻ တွိုႏခြောင်ꩻမု အဝ်ႏငါႏတဝ်းသွူ။

နဝ်ꩻသွူတကာႏတဝ်း ထင်ႏဗာႏထွာနွောင်ꩻဆရာႏ ဗဟိုႏသွဉ်တန်ꩻ မွူးနီꩻဒွေါင်ႏဒွေါင်ႏ တလဲင်ႏပေႏလုမ်ꩻနဝ်ꩻ ထွာထွိုက်တဝ်းဒွုန်းဆရာႏအရန်း၊ အဆေ့ꩻသွတ်ꩻ မဉ်ႏထင်ႏဗာႏ လစ်ꩻငတ်ꩻလဲင်ႏနုဲင်းနဝ်ꩻမꩻ အဗွေႏနမ်းတာႏလဲ့ဗွေ၊ သွဉ်ဖေႏချာလဲ့ သေႏချာႏသွူ၊ တဲမ်းလိတ်သား နမ်းမော့ꩻအလꩻနဝ်ꩻ သွဉ်တနေင်ႏလုမ်ꩻ သဲင်ꩻသွဉ်ဖေႏချာနဝ်ꩻ အဆင်ႏတပြေႏနွောင်ꩻတဝ်းသွူ။ နဝ်ꩻမꩻ တာႏဝွန်ႏအဝ်ႏသားတဲ့နဝ်ꩻ၊ ရက်ခွိုꩻပအိုဝ်ႏသီးဖုံႏတဲ့နဝ်ꩻ၊ ဗွေႏရဟန်ꩻသီးဖုံႏတဲ့နဝ်ꩻ မဉ်ႏထီႏမွေး ပအိုဝ်ႏလိုꩻမျိုꩻတာႏ လိတ်လုဲင်ꩻစွစ်ꩻတိုးလီတာႏနဝ်ꩻ အဝ်ႏလိုႏမာꩻသေႏသေႏချာႏချာႏနေးစွဉ်ႏ ထွာနွောင်ꩻဆရာႏ လိတ်ပအိုဝ်ႏသွဉ်တန်ꩻကျောင်ꩻဖုံႏသွူ၊ သွဉ်တန်ꩻကျောင်ꩻကိုနဝ်ꩻ သော့ꩻလွေꩻစုမ်ႏစုမ်ႏ သွဉ်ပုင်ႏသွဉ်နယ်ꩻဖုံႏ၊ သွဉ်သား သꩻဖေႏကလွꩻမွုန်းနဝ်ꩻ သော့ꩻရောꩻလွေꩻပါ ထာꩻခုမ်ပဆိုးဖုံႏ၊ ထာꩻတယွို့ဖုံႏ၊ ဖေႏဗာႏသွဉ်ထူႏခိန်ႏဖုံႏ၊ အွဉ်ႏထွော့လွေꩻဗာႏ သက်ရွယ်ႏဖုံႏနုဲင်းနဝ်ꩻ အဝ်ႏမꩻသွူ။ ဗွေႏရဟန်ꩻကအွဉ်မာꩻဒါႏ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏအွဉ်ငါနဝ်ꩻလဲ့ အဝ်ႏမာꩻစွူစွူဒျာႏ၊ ထွာနွောင်ꩻဆရာႏသွဉ်တန်ꩻကျောင်ꩻဖုံႏတဲ့ အဝ်ႏမာꩻလွေꩻဒျာႏနုဲင်းနဝ်ꩻမꩻ လိတ်ပအိုဝ်ႏယို အီႏထင်ႏထိုလွဉ်၊ ပြွူႏဖြိုလွဉ်နဝ်ꩻသွူ။

ပအိုဝ်ႏလိတ်လုဲင်ꩻယို ပွိုင်းလဲင်ႏခါနဝ်ꩻ သွဉ်ထူႏခွင်ꩻအဝ်ႏတဝ်း၊ သွဉ်ဗာႏတဝ်း၊ ကေားသွဉ်သားအဝ်ႏတဝ်း-စစွဉ်ႏ အယပ်ꩻခုဲင်ႏအမျိုꩻမျိုꩻဖုံႏ အဝ်ႏကရိုꩻနဝ်ꩻလဲ့ အဝ်ႏသေနာႏဒျာႏသွူ၊ ကွပ်စွဉ်ႏ တာႏဝွန်ႏအဝ်ႏသားတွမ်ႏ ဗွေႏသံႏဃာႏသီးဖုံႏ အွဉ်ငါမာꩻလွေꩻတွော့ꩻ စွစ်ꩻတိုးလီလွဉ်လဲဉ်း တခွိုင်းယိုနဝ်ꩻလဲ့ ဟွိုန်ဟဝ်နေက်သက်မွေးငါႏ၊ ကေꩻဇူꩻတင်ႏမွေးငါႏသွူ။ ကွဲးတွော့ꩻ လိတ်ဖုံႏယိုနဝ်ꩻ တစုမ်ႏတဝ်း၊ သွဉ်ပုင်ႏသွဉ်နယ်ꩻဖုံႏ တစုမ်ႏတဝ်းဒွုန်းကရိုꩻယိုလဲ့ အဝ်ႏလိုႏလက်ခံႏနေနေသွူ၊ မဉ်ႏလက်ခံႏနွောင်ꩻယိုမꩻ လိတ်ကအဝ်ႏကွဲꩻဒါႏဝင်ꩻနီမူ ခမ်းကောင်၊ ခမ်းဒေါမ်မူယိုနဝ်ꩻ အီႏပေါင်ꩻစပ်လွေꩻဝင်ꩻနွောင်ꩻနဝ်ꩻသွူ။ ပအိုဝ်ႏလိတ်မူ ထီသိမ်ႏယိုနဝ်ꩻ ကွပ်စွဉ်ႏပအိုဝ်ႏတာႏ အဝ်ႏလိုႏမွိုင်ကြွိုင်ငါႏနုဲင်းနဝ်ꩻတဲင် တဲမ်းထွင်ႏလွေꩻဖေႏဗာႏကရိုꩻနဝ်ꩻ ဗွေႏဗွန်ထီသိမ်ႏဩဝါဒကို အဝ်ႏပါလွေꩻနုဲင်းနဝ်ꩻသွူ၊ အဝ်ႏလိုႏမွိုင် အရေႏပေါႏနုဲင်းနဝ်ꩻတွော့ꩻ ထွင်ႏလွေꩻတဲင် ယိုခါနဝ်ꩻ ခေတ်အခေႏနေႏဖုံႏ ပြောင်ꩻလုဲင်ႏလဲဉ်းနဝ်ꩻမꩻ အဝ်ႏလိုႏပေါင်ꩻစပ်ခန်းလွဝင်ꩻသွူ။

ဗွေႏဗွန်ထီသိမ်ႏ ဩဝါဒနိဂုံးကိုနဝ်ꩻ ကွပ်စွဉ်ႏရွဉ်ဆေ့ꩻ လိတ်သမ်းအဝ်ႏလိုႏမွိုင်တဲင် ပအိုဝ်ႏအက္ခရာႏယို ထွင်ႏလွေꩻဗာႏ၊ မဉ်ႏတွိုႏဆုဲင်ꩻချာ မာꩻချာယင်းတစား ကရိုꩻနဝ်ꩻ လိတ်ယို မဉ်ႏတဗွေလိုမ်းတဝ်းလဲ့ ဆုဲင်ꩻချာနဝ်ꩻ ထဲမ်းသော့ꩻယင်း အဝ်ႏလꩻဒျာႏ အဓိပ္ပါယ်ႏလꩻနုဲင်းနဝ်ꩻသွူ။ ဗွေႏဗွန်ထီသိမ်ႏနမ်းမဉ်ႏတဲ့ သဘော်ꩻထာꩻအဝ်ႏတန်နဝ်ꩻ ကထွာဒါႏ တာႏဝွန်ႏအဝ်ႏသား ကထိန်ꩻသိမ်ꩻလွေꩻဒါႏ လိတ်လုဲင်ꩻသားဖုံႏနဝ်ꩻလဲ့ အဝ်ႏလိုႏသဘော်ꩻထာꩻတန်ဗာႏနေနေသွူ၊ သဘောꩻထာꩻမဉ်ႏတတန်တဝ်းနဝ်ꩻ ကမဉ်လꩻဒါႏ ပအိုဝ်ႏတစွိုးခွိုꩻလုမ်း လွောင်ႏဗူႏရေꩻယိုလဲ့ အယပ်ꩻခုဲင်ႏထွာအီဒါႏသွူ၊ ပအိုဝ်ႏဖုံႏ မဉ်ႏလွောင်ႏဗူႏလွေꩻလွဝင်ꩻမꩻ ကအဝ်ႏမဉ်လꩻဒါႏ ပအိုဝ်ႏခမ်းထီယို တညတဝ်းအခိန်ႏသူꩻ အီႏလꩻလွဉ်ဗာႏသွူ။ ပအိုဝ်ႏလိုꩻမျိုꩻ ဖေႏကလွောင်ႏဗူႏနဝ်ꩻ လိတ်လုဲင်ꩻယိုတဲ့ ထွာအီအထျꩻနေနေတဲင် လိတ်ယို အဆင်ႏမဉ်ႏပြေႏမꩻတဲ့ ခြိꩻထူႏဒေါ့ꩻရီလွဝင်ꩻအီႏလꩻ ကရိုꩻနဝ်ꩻ တဲက်တွန်ꩻလွေꩻဗာႏနဝ်ꩻသွူ။

အမာႏတရွို့ꩻ-ဖျင်စွို့ꩻ(၉)

တဲမ်းလိတ်သား ခွေသွဉ်းတဲမ်းခြုဲင်းနယ်လွေꩻဖေႏ လိတ်ခရာႏယိုနဝ်ꩻ အဗွေလိုမ်းကိုမ်ႏလဲဉ်းဒျာႏ၊ အဝ်ႏကုဲင်ဒျာႏ မာꩻတမာꩻတဝ်း၊ စဲစ်ဆေꩻတစဲစ်ဆေꩻတဝ်းနဝ်ꩻတဲ့ တာႏဝွန်ႏအဝ်ႏသား ကားကအဝ်ႏ ယူႏထွားစဉ်ꩻစာꩻခရာႏဒျာႏသွူ၊ ယိုတလဲင်ႏနဝ်ꩻ တဲမ်းလိတ်သား တဲမ်းနယ်လွေꩻယင်း နီသွဉ်းသီးပအိုဝ်ႏလိုꩻမျိုꩻအကို ထာꩻယူႏမာႏ၊ ထာꩻထင်းမာႏ၊ ထာꩻထင်းကွင်တရွို့ꩻ ကအဝ်ႏဒါႏ တစူးတစိꩻပေႏဖုံႏနဝ်ꩻသွူ။

တမုဲင်ꩻနဲးတဲင် ပအိုဝ်ႏလိုꩻမျိုꩻယို မီဒီယာတအဝ်ႏဖိုဖိုတဝ်းဒွုန်းတဲင် မီဒီယာထွိုင်ႏအဝ်ႏလွဉ်တွော့ꩻ ဟွုန်ငမ်းထိုꩻတမျိုꩻ၊ ဟွုန်နေက်သက်တဝ်းမျိုꩻ၊ ထင်းယားကုဲင်ထာꩻတမျိုꩻ၊ ရိုꩻဒေါ့ꩻဝင်ꩻမဉ်ꩻပွုံႏ-စစွဉ်ႏစစွဉ်ႏအမျိုꩻစုမ်ႏ ပအိုဝ်ႏဖုံႏ အဝ်ႏထင်းရောင်နုဲင်းနဝ်ꩻတဲင် အမာႏတန်၊ အတရွို့ꩻတန်ဒျာႏကရိုꩻနဝ်ꩻ မဉ်တဲမ်းသျင်ꩻနယ်လွေꩻငါႏနဝ်ꩻသွူ၊ ယိုနဝ်ꩻ အွိုးမီဒီယာ အကျောင်ꩻခရာႏ လိုႏသေနာႏကိုလဲ့ အဝ်ႏတဲမ်းသော့ꩻဖိုလဲဉ်းနေနေလဲ့ အမာႏအတရွို့ꩻနဝ်ꩻ တွိုႏယိုခါ တပြောင်ꩻလုဲင်ႏတဝ်းဒွုန်းတဲင် တဲမ်းသျင်ꩻနယ်ဗာႏယင်းဒျာႏသွူ။ နီသွဉ်းသီး မန်းခမ်းယိုနဝ်ꩻ တဲႏ ၂၀၁၀-မာꩻလွဉ်ယို ကွပ်စွဉ်ႏ ၂၀၀၈-အခေႏခံႏဥပဒေႏအလꩻတွော့ꩻ ကျင်ꩻသုင်ꩻလွဉ် ပါတီစုံဒီမိုကရေစီစနစ်နုဲင်းနဝ်ꩻသွူ၊ ထွိုင်ႏကျင်ꩻသုင်ꩻလွဉ်နုဲင်းနဝ်ꩻတွော့ꩻ မာꩻလွဥ္ဗာႏ လွိုက်ရွေꩻပွယ်ꩻဖုံႏနဝ်ꩻသွူ၊ အဝ်ႏလွိုက်ရွေꩻပွယ်ꩻနဝ်ꩻတွော့ꩻ အစိုꩻရ၊ လွတ်တောႏဖုံႏယို ပေါႏလွဉ်ဗာႏနဝ်ꩻသွူ။ နဝ်ꩻတွော့ꩻ မီဒီယာလွစ်တခြင်ခွင်ꩻ တအဝ်ႏဖိုဖိုတဝ်း မန်းခမ်းယိုနဝ်ꩻ အွဉ်ႏထွော့လွဉ်စွဉ်ႏ မဏ္ဍိုင်ႏတဗာႏတွော့ꩻ လွစ်တခြင်ခွင်ꩻ တောႏတောႏတန်ႏတန်ႏနဝ်ꩻ လꩻလွဉ်၊ ခမ်းထန်ႏမီဒီယာဖုံႏတဲ့ လွစ်တခြင်လွဉ်၊ ဗွောင်နွောင်ꩻလွဉ်စွဉ်ႏရုမ်ꩻချွုတ် မန်းခမ်းကိုဖုံႏနဝ်ꩻသွူ။

လွတ်တောႏဖုံႏပေါႏလွဉ်၊ အစိုꩻရတဲ့ အဝ်ႏခေါ်ခေါ်လွဉ်၊ စီႏရင်ႏတရာꩻရေꩻယိုလဲ့ အဝ်ႏခေါ်ခေါ်လွဉ်တွော့ꩻ နုဲင်ႏငံႏတောႏအသုဲင်အမောင်ꩻ အာႏဏာႏ ကထွာဒါႏ အိုပ်ချွုတ်ရေꩻ၊ စီႏရင်ႏတရာꩻရေꩻတွမ်ႏ မာꩻဥဒပေႏ(လွတ်တောႏ)ယို အဝ်ႏလွဉ်နဝ်ꩻသွူ၊ နဝ်ꩻအကို နုဲင်ႏငံႏတောႏသမ္မတ ဦးသိန်းစိန်နမ်းတဲင်ႏနဝ်ꩻ ဒေါ့ꩻလွဉ်မီဒီယာယို အွဉ်ႏထွော့လွေꩻ စတုတ္ထမဏ္ဍိုင်ႏနုဲင်းနဝ်ꩻသွူ။ စတုတ္ထမဏ္ဍိုင်ႏကရိုꩻနဝ်ꩻအတွိုင်ꩻ တွမ်ႏမဏ္ဍိုင်ႏသိုမ်ဗာႏ အွိုးကီနဝ်ꩻ ထိန်ꩻတီချာငါဗာႏလွဝင်ꩻနဝ်ꩻသွူ၊ ပွုံႏစံႏနဝ်ꩻ ထောက်နယ်၊ ယီးနယ်ဗာႏ မဏ္ဍိုင်ႏသိုမ်ဗာႏသီး မာꩻထာꩻမာႏဖုံႏ ဖေႏကသေနမ်းချာနဝ်ꩻ ထောက်နယ်၊ ယီးနယ်လွေꩻဗာႏနုဲင်းနဝ်ꩻသွူ၊ မဉ်ႏတမွေးတဝ်းနဝ်ꩻ တာႏဝွန်ႏတကေႏတဝ်း ထွာထိုꩻဗာႏနုဲင်းနဝ်ꩻသွူ။

ကွဲးတွော့ꩻ ပအိုဝ်ႏဒေႏသကိုနဝ်ꩻ မီဒီယာအကျောင်ꩻယို ထွိုင်ႏတသေနာႏတဝ်းနဝ်ꩻ ထင်းတေားဒျာႏ ယားကုဲင်ထာꩻ၊ ဒေါ့ꩻလိုꩻတန်မဉ်ꩻဖုံႏ၊ လိုꩻတန်ဖုံႏ လွꩻထီႏတေားဒျာႏနုဲင်းနဝ်ꩻဖုံႏသွူ၊ ကထွာလိုꩻတန်တွမ်ႏ လိုꩻမာꩻနုဲင်ႏငံႏရေꩻသားယိုနဝ်ꩻ မဉ်ႏတခံႏနွောင်ꩻတဝ်း ဝင်ꩻဝွေႏဖန်ႏယီးနယ်၊ ထောက်နယ်နဝ်ꩻ ထွာထွိုက်သင်ꩻတဝ်းဒွုန်း လိုꩻတန်သွူ၊ မီဒီယာသီးနဝ်ꩻ ဝွေꩻတာႏဝွန်ႏအဝ်ႏအတွိုင်ꩻ ခမ်းသားဖုံႏ ဖေႏကသာႏ၊ ခမ်းသားအမျာꩻ အကျိုꩻအတာႏ အုံထွိုင်ႏဖေႏဗာႏဒျာႏတဲင် အမဲဉ်ႏတရာꩻယို အမဲဉ်ႏအတွိုင်ꩻ ဖောႏနယ်၊ တဲမ်းနယ်၊ ယီးနယ်လွေꩻဗာႏနဝ်ꩻ တာႏဝွန်ႏအဝ်ႏသွူ။ မီဒီယာယို မဉ်ႏအဝ်ႏမꩻ လိုꩻတန်ဖုံႏ ကမဉ်မာꩻဒါႏ ထာꩻဗဉ်ႏထာꩻဗꩻဖုံႏ၊ ခမ်းသားဖုံႏ ကအဝ်ႏခံႏဗာႏဒါႏ ယားကုဲင်ခမ်းသား အခွင်ꩻအရေꩻ၊ လိုꩻအခွင်ꩻအရေꩻဖုံႏယို အီႏဆေ့ꩻသဲင်ꩻ တလဲင်ႏတစိꩻစိꩻ၊ တရာꩻဥပဒေႏ ဒို့ꩻတခြို့မုꩻဖုံႏယိုတဲ့ အီႏအဝ်ႏလွဉ်ယင်းနဝ်ꩻသွူ။ နဝ်ꩻသွူတကာႏတဝ်း လိုꩻမျိုꩻတမျိုꩻ စီꩻပွာꩻတိုꩻတက်မုယို၊ လိုꩻမျိုꩻသမဲင်ꩻဖုံႏယို၊ ယိုꩻယာႏဓလေ့ꩻထုံꩻစံႏဖုံႏယို ဝင်ꩻလိုꩻမျိုꩻလင် ဖေႏကသေနဝ်ꩻ မီဒီယာယို ဖောႏထန်ႏနယ်လွေꩻဗာႏနဝ်ꩻသွူ။

အရေꩻသွတ်ꩻနဝ်ꩻတဲးတဲ့ ထောက်နယ်ဗာႏဝင်ꩻ အမာႏဖုံႏနဝ်ꩻသွူ၊ ကွဲးတွော့ꩻ ထွိုင်ႏထောက်နယ်မွေးဝင်ꩻ အမာႏဖုံႏယိုတဲင် လိုꩻကခံႏဗာႏဝင်ꩻထောက်နယ်သားဖုံႏနဝ်ꩻ မဉ်ခံႏတဝ်း၊ နမ်းမာႏလဲဉ်း ဝင်ꩻဒေါ့ꩻနယ်လဲ့ အုဲင်ႏစူꩻတဝ်း၊ ရိုꩻတေားဒျာႏ ဝင်ꩻဟဝ်တဝ်းနဝ်ꩻ ထုံꩻစံႏဒျာႏသွူ၊ ကထွာဒါႏ မဏ္ဍိုင်ႏသိုမ်ဗာႏဖုံႏနဝ်ꩻလဲ့ နုဲင်းနဝ်ꩻနေနေ၊ မဉ်ႏထောက်နယ်၊ ယီးနယ်နဝ်ꩻ အအီႏတခံႏတဝ်းဒျာႏရင်ꩻရင်ꩻနဝ်ꩻသွူ။ ကွပ်နဝ်ꩻမꩻ အဝ်ႏဖေႏလဲဉ်းသွူ မီဒီယာလွစ်တခြင်ခွင်ꩻလဲ့ တဖဲ့ꩻကိုနဝ်ꩻ အဝ်ႏတေက်ꩻနျꩻလွေꩻဒျာႏသွူ၊ ၂၀၀၈-အခေႏခံႏဥပဒေႏကို အခန်ꩻ(၈)ကိုနဝ်ꩻ အဝ်ႏဖောႏလွေꩻနယ်လဲဉ်းသွူ လွစ်တခြင်(ထုတ်ဖော်ပြောဆိုခွင့်)ထေဖောႏခွင်ꩻ၊ ဒေါ့ꩻခွင်ꩻ၊ တဲမ်းခွင်ꩻဖုံႏလဲ့ အစဲစ်မဲဉ်ႏနဝ်ꩻ တလꩻမွေးတဝ်းနဝ်ꩻလဲ့ အဝ်ႏခံႏဗာႏဒျာႏသွူ။ မဉ်ႏရိုꩻယင်း မီဒီယာယို မာꩻတငီႏတငါဒျာႏထာꩻ၊ မီဒီယာတုဖုံႏဒျာႏနုဲင်းနဝ်ꩻလဲ့ မီဒီယာတုဖုံႏယို အဝ်ႏလိုႏထိန်ꩻလွေꩻဒျာႏ တွမ်ႏဥပဒေႏဖုံႏဒျာႏသွူ၊ မီဒီယာ အစဲစ်မဲဉ်ႏဖုံႏနဝ်ꩻ အုံထွိုင်ႏတနွောင်းလွေꩻဒျာႏ တွမ်ႏကျင်ꩻဝတ်ဖုံႏတဲင် ကလွိုဆန်ဒါႏ ကျင်ꩻဝွတ်ဖုံႏယိုနဝ်ꩻ အဝ်ႏလိုႏထိန်ꩻအီဒျာႏ တွမ်ႏဥပဒေႏဖုံႏဒျာႏသွူ။ ယိုနဝ်ꩻ တမွေးတဝ်း၊ လွေꩻလွောက်ꩻနာႏကျင်ꩻဝွတ်နဲ့၊ လွောက်ꩻနာႏတဝ်းနဲ့ သေတဝ်း၊ ပေါႏရိုꩻမီဒီယာနဝ်ꩻ ထီႏစွဉ်ႏထာꩻတဟဝ်တဝ်းလွဉ်းလွဉ်းဖုံႏနဝ်ꩻ မာႏတန်သွူ၊ မီဒီယာယိုနဝ်ꩻ လိုꩻမျိုꩻတမျိုꩻ အဝ်ႏလိုႏသုင်ꩻဒါႏဒါႏငါႏဒျာႏသွူ၊ "အသံကြောင့် ဖါးသေ"ကရိုꩻယိုနဝ်ꩻ အဝ်ႏမွေးဒျာႏ၊ မီဒီယာသားတဲ့ ဝင်ꩻအဝ်ႏထိန်ꩻဒျာႏ ကျင်ꩻဝွတ်နေနေ၊ အီႏမာꩻတငီႏတငါထာꩻလဲ့ တမာꩻတဝ်း၊ ကွဲးတွော့ꩻ အမဲဉ်ႏတရာꩻ ကလိုႏဖောႏထန်ႏဒါႏယိုနဝ်ꩻလဲ့ ဖောႏနယ်ဗာႏနဝ်ꩻသွူ။

မဉ်ႏပတ်သဲစ်တွမ်ႏ အသုဲင်အမောင်ꩻ အာႏဏာႏခရာႏဖုံႏ၊ ထွာအီဒါႏ ပဋိပက္ခဖုံႏနဝ်ꩻတဲ့ ဝင်ꩻအဝ်ႏချင်းထိန်ꩻဒျာႏ၊ ကွဲးတွော့ꩻ ယိုခါ လိုꩻတွိုင်ꩻစုမ်ႏဖြာꩻ အဝ်ႏသုင်ꩻလွေꩻ (ဆိုရှယ်မီဒီယာ)တဲင် မီဒီယာသားစဲစ်မဲဉ်ႏနဝ်ꩻ ကျင်ꩻဝွတ်အဝ်ႏဒျာႏလဲ့ (ဆိုရှယ်မီဒီယာ)နဝ်ꩻ ကျင်ꩻဝွတ်တအဝ်ႏတဝ်း၊ ထိန်ꩻတဲ့ တယိုꩻတဝ်းနေနေသွူ။ နုဲင်းမုဲင်ꩻမုဲင်ꩻတယဝ်း ယိုခါ နီသွဉ်းသီး ပအိုဝ်ႏအခါႏကိုနဝ်ꩻ ဗွေႏရဟန်ꩻဖုံႏတဲ့နဝ်ꩻ၊ လိုꩻတန်ဖုံႏတဲ့နဝ်ꩻ အဝ်ႏလွꩻထီႏ အဝ်ႏလွꩻထွား တမဲဉ်လꩻတဝ်း မီဒီယာသားနဝ်ꩻ အာငါႏသွူတကာႏတဝ်း နီတွမ်ႏနီမာꩻမꩻမဲဉ်ႏ၊ ပေါ့ꩻဝင်ꩻမာꩻနဝ်ꩻ မဲဉ်ႏတဝ်း-နုဲင်းနဝ်ꩻစားဖုံႏနဝ်ꩻ အာငါႏတဲင် ယိုနဝ်ꩻ လက္ခဏာႏတဟဝ်တဝ်းသွူ၊ နီကအဝ်ႏမာꩻထာꩻမာꩻယို ထွားနီဖဲ့ꩻနဝ်ꩻ အဝ်ႏမဲဉ်ႏဒျာႏလဲ့ အွိုးတဖဲ့ꩻမဉ်ႏထွားနဝ်ꩻ အမာႏဖုံႏအဝ်ႏဒါႏနဝ်ꩻမꩻ မီဒီယာသီး သဘောꩻတရာꩻအလꩻ မဉ်ႏထောက်နယ် ယီးနယ်မꩻ အမဲဉ်ႏစွို့ꩻစွဉ်ႏယို ထွာလွဉ်အီဒါႏသွူ။ လိုꩻကသုင်ꩻဒါႏ မီဒီယာခမ်းရင်ꩻသားအစွိုꩻနဝ်ꩻ လိုꩻဒါႏလိုꩻလက်ꩻလဲဉ်၊ အခွင်ꩻအရေꩻ လꩻအာမွေးစွဉ်ႏကရိုꩻနဝ်ꩻ မဉ်ႏထွားချာ မန်းခမ်းကိုအခေႏနေႏ အဝ်ႏသေထွꩻဒျာႏသွူ၊ အစိုꩻရစွိုꩻ ဝွေꩻသီးယို သုင်ꩻမီဒီယာဒါႏမွေးစွဉ်ႏထာꩻ၊ သုင်ꩻတဲ့သုင်ꩻမွေးစွဉ်ႏနဝ်ꩻမꩻ ဝွေꩻသီးယို ပါꩻမုဲင်ꩻမုဲင်ꩻလဲ့ တထွꩻတဝ်းသွူ၊ နဝ်ꩻသွူ နုဲင်းခင်လိုꩻမျိုꩻယိုလဲ့ ကထွာဒါႏ တွိုက်ꩻပွဲꩻတွမ်ႏမန်းနဝ်ꩻ တဖဲ့ꩻကို ဟဲ့ꩻလွဉ်တခွန်ꩻလုဲင်ႏ ခမ်းထန်ꩻမီဒီယာတွော့ꩻ စာအံႏလုဲင်ႏတေားစွဉ်ႏ စဲ့ꩻမန်းတဟဝ်တဝ်းအကျောင်ꩻ ဖောႏနယ်လွေꩻနုဲင်းနဝ်ꩻတဲင် မန်းခမ်းကို သတင်ꩻဖုံႏနဝ်ꩻ ထန်ႏဒျာႏစဲ့ꩻမန်းဖဲ့ꩻ အဟဝ်လုမ်ꩻလဲ့ တဖဲ့ꩻကိုနဝ်ꩻ ခမ်းအဒဝ်ႏဒဝ်ႏ သေထွꩻစွဉ်ႏ စဲ့ꩻမန်းခင်ႏခြောင်ꩻဖုံႏတွော့ꩻ ခမ်းထန်ႏသားဖုံႏနဝ်ꩻ (ပိတ်ဆို့)လွေꩻလုဲင်ႏစွဉ်ႏ စဲ့ꩻမန်းအတန်အကယ်ႏသီးဖုံႏနဝ်ꩻသွူ။

နုဲင်းနဝ်ꩻနေနေ ခမ်းထန်ႏမီဒီယာသားဖုံႏနဝ်ꩻ ပေါ့ꩻခုမ်စူခြွိုင်း ခမ်းရင်ꩻသားစွိုꩻဖုံႏ ကားကအဝ်ႏနဝ်ꩻ မော့ꩻခွဲးဒေါ့ꩻရီထူႏလွေꩻသွူ အချက်အလျက်ဖုံႏတွော့ꩻ ထေထန်ႏနွောင်ꩻစွဉ်ႏ သုတေသန လိတ်စောင်ႏဖုံႏနဝ်ꩻလဲ့ သက်သေႏအဝ်ႏသေꩻခါꩻနဝ်ꩻသွူ၊ တွိုႏဒျာႏ နီသွဉ်းသီး လိုꩻမျိုꩻပေႏယိုနဝ်ꩻ သုင်ꩻတဒါႏတဝ်း၊ ခမ်းသားတာႏ အုံထွိုင်ႏတနွောင်းဒါႏ မီဒီယာမဉ်ႏအဝ်ႏနဝ်ꩻ ဖေႏကအုံထွိုင်ႏတနွောင်းလꩻမွုန်းလဲ့ နေးတွမ်ႏအနယ်ꩻအမျိုꩻမျိုꩻ တေက်ꩻနျꩻလွေꩻဒျာႏဖုံႏသွူ။ ရိုꩻမွုန်းတဝ်း အီႏဖေႏအာႏ၊ အွဉ်ႏထန်ႏဖိုတဝ်း၊ အဝ်ႏထီႏသွူ အတက်ဆားယိုလဲ့ ကဉ်ႏကုဲင်ထိုꩻဒျာႏ အစော့ꩻနဝ်ꩻစားဖုံႏတဲင် မာႏတန်ကရိုꩻနဝ်ꩻ မဉ်ဒေါ့ꩻလွေꩻငါႏနုဲင်းနဝ်ꩻသွူ၊ ခမ်းသားတာႏ ဖြောင်ဒေါင်မုဖေႏကအဝ်ႏ၊ တရာꩻဒို့ꩻတခြို့ရေꩻ ဖေႏကအဝ်ႏ ဖောႏထန်ႏနယ်လွေꩻဖေႏ၊ လိုꩻတန်လိုꩻယံ ဖေႏကပေါႏ၊ လွောင်ႏဗူႏရေꩻ ဖေႏကအဝ်ႏတွမ်ႏ ပအိုဝ်ႏလိတ်လုဲင်ꩻ ဖေႏကတဉ်ႏခွေါင်ယိုနဝ်ꩻ ပအိုဝ်ႏကို မီဒီယာ အဝ်ႏလိုႏပေါႏထန်ႏအာအာထဲင်းငါႏသွူ။ မီဒီယာမဉ်ႏအာမဲ့ꩻ ခမ်းသားဖုံႏလဲ့ လွိုက်ရွေꩻဒျာႏ၊ မီဒီယာဌာႏန အဗာႏမုဲင်ꩻနဝ်ꩻ ဟဝ်အာႏကွိုꩻလꩻ၊ အဗာႏမုဲင်ꩻနဝ်ꩻ ဟဝ်တဝ်း၊ အဝ်ႏလိုႏထိန်ꩻတီနုဲင်းနဝ်ꩻစားဖုံႏနဝ်ꩻ ထွာလွဉ်ဗာႏသွူ၊ အစိုꩻရသီးဖုံႏနဝ်ꩻ ပအိုဝ်ႏတယဝ်း၊ မန်းတယဝ်း မဉ်ႏထွာသွူအစိုꩻရနဝ်ꩻ ရိုꩻစွဉ်ႏ မီဒီယာကထောက်နယ်၊ ယီးနယ်ဒါႏယိုနဝ်ꩻ အဝ်ႏဒျာႏ(အနုတ်)လက္ခဏာႏလွဉ်းလွဉ်း ခံႏထူႏလွေꩻစွဉ်ႏနုဲင်းနဝ်ꩻသွူ။ အမဲဉ်ႏနဝ်ꩻ တမွေးတဝ်း၊ တွမ်ႏကျင်ꩻဝွတ်ညီႏညီႏ မာꩻလွေꩻမီဒီယာတွမ်ႏ ကျင်ꩻဝွတ်လွောက်ꩻနာႏတဝ်းတွော့ꩻ မာꩻလွေꩻမီဒီယာ ကွာႏနုဲင်းနဝ်ꩻစားဒျာႏသွူ၊ တလွောက်ꩻနာႏတဝ်း မီဒီယာကျင်ꩻဝွတ် မီဒီယာနဝ်ꩻ အဝ်ႏလိုႏထိန်ꩻတီအီဒျာႏ တွမ်ႏမီဒီယာဥပဒေႏဒျာႏကရိုꩻနဝ်ꩻ တဲမ်းခြုဲင်းလွေꩻဗာႏနုဲင်းနဝ်ꩻသွူ။