အိန်ကျောင်းကျောင်ꩻကို
"အိန်ကျောင်းကျောင်ꩻကို လိုႏလိတ်ပအိုဝ်ႏ" လိတ်ပအိုဝ်ႏနောဝ်ꩻ ထွာနီပအိုဝ်ႏတစွိုးခွိုꩻလွုမ်းအတာႏ အရွီးအခိုႏတမျိုꩻသွူ၊ ပအိုဝ်ႏဘဝ ပအိုဝ်ႏအဆင်ႏရန်း၊ ပအိုဝ်ႏဂွုဏ်ႏအင်္ဂါႏ၊ ပအိုဝ်ႏထာꩻမာꩻ၊ ပအိုဝ်ႏဇာတ်ခြောင်ꩻ၊ ပအိုဝ်ႏသမဲင်ꩻ၊ ပအိုဝ်ႏတဉ်ႏခွေါင်အီအတာႏ လိတ်ပအိုဝ်ႏယို ထောက်ကမ်းအီ၊ ပင်ႏတသွောင်းအီ၊ မုဲင်တောင်ꩻအီ ငင်းကမ်းထွာအီနောဝ်ꩻသွူ။ (၁)ပွိုင်းလဲင်ႏနောဝ်ꩻ လိတ်ပအိုဝ်ႏအောဝ်ႏဒျာႏ ထူႏသွုံꩻအာႏကွိုꩻဒျာႏလဲ့ လိတ်ပအိုဝ်ႏ လိုႏအပ်ချက်နောဝ်ꩻ သျင်ꩻတောဝ်း၊ အသွုံꩻလꩻလို့တောဝ်းတဲင် တဲမ်းရွစ်စွို့ꩻလို့တောဝ်းနောဝ်ꩻမꩻ ဖျင်လဲဉ်းမွဉ်းလဲဉ်း ခြပ်စီႏဟောဝ်လဲဉ်းနောဝ်ꩻသွူ၊ ကွဲတဲင် စွစ်ꩻလီတိုးလို့တောဝ်း၊ တသွောင်းငါႏတောဝ်းသွူ။ (၂)ခေတ်ယိုခါနောဝ်ꩻ လိတ်ပအိုဝ်ႏယို ထွားဟောဝ်ရွစ်ဟောဝ်လဲဉ်း၊ စွစ်ꩻလီတိုးညာꩻလဲဉ်း၊ တသွောင်းထိုလွဉ်လဲဉ်းနောဝ်ꩻသွူ၊ လိတ်စောင်ႏ၊ လိတ်လွီးလယ်ႏစတဲင် လိတ်အုပ်ဖုံႏ ထွားခရာႏ ရွစ်ခရာႏ၊ ထူႏပညာႏလꩻအီခရာႏ အောဝ်ႏအာလွဉ်လဲဉ်းသွူနေနေနောဝ်ꩻသွူ၊ ကွဲတဲင် တလုမ်းကုမ်ႏတောဝ်းဒွိုန်းသွူ။ (၃)ယိုငါငါယိုနောဝ်ꩻ လိတ်ပအိုဝ်ႏအတာႏယို ကအောဝ်ႏလိုႏငါႏဒွိုန်းနေနောဝ်ꩻ အတန်ꩻကျောင်ꩻ(အိန်ကျောင်း)သွုံꩻတာႏ အောဝ်ႏလိုႏနေကအာတန်သွူ။ မဉ်ႏနပ်ဗျာႏ မဉ်ႏတွက်ဗာႏလဲ့ စအောဝ်ႏဒျာႏ တယ်ႏခိုႏရန်း(မူကြို)လွုမ်ꩻသွူ၊ အောဝ်ႏလိုႏနေက အခေႏခံႏအရန်း ပထမ ဒုတိယစတဲင် ဗꩻစွဉ်ႏအရန်းတဆီ၊ ဗꩻတက္ကသိုလ်ႏအရန်းသွူ။ အိန်ကျောင်းကိုသွုံꩻတာႏ နုဲင်းကတဲမ်းထန်ႏထွူလဲဉ်းဒါႏ ပအိုဝ်ႏလိတ်မွူးတအုပ် ဖꩻခေါဝ်သွံအုပ်နောဝ်ꩻ မူလ ပထမ ဒုတိယဖုံႏယို တွမ်ႏလိုꩻပေႏအတန်ꩻ ကအွဉ်ႏထွော့ဒါႏနောဝ်ꩻ တငမ်ႏစာꩻတောဝ်း၊ တထွိုက်သင်ꩻတောဝ်း၊ တသေန်ႏလျောႏလို့တောဝ်းဒွိုန်းသွူ။ ပွိုးတမုဲင်ꩻနဲတဲင် လိတ်နောဝ်ꩻအာငါႏ၊ လိတ်အရန်းထိုငါႏတွော့ꩻ လိုꩻပေႏကအီႏသေနာႏ၊ ဒါႏထွꩻလွဉ်ꩻနောဝ်ꩻ တထွာနွောင်ꩻဒွိုန်းသွူ။ ဖေႏနေးကငမ်ႏစာꩻတွမ်ႏ လိုꩻပေႏအတန်ꩻ(အသက်အရွယ်ႏ)နောဝ်ꩻ အောဝ်ႏလိုႏဖျင်ယင်း၊ အောဝ်ႏလိုႏတဲမ်းတသာသာယင်းဒျာႏမꩻ အဆင်ႏအီႏပြေႏသွူ။ နောဝ်ꩻမ ပညာႏဒါႏ လိုꩻသေနာႏသားသီးဖုံႏဩ- ယိုခါနောဝ်ꩻ အောဝ်ႏလိုႏဝွေႏဖန်ႏစီႏရင်ႏ စဉ်ꩻစာꩻဖေႏလဲဉ်းသွူ၊ လိတ်အိန်ကျောင်းအတာႏ လိတ်အုပ်ခရာႏကရိုꩻနောဝ်ꩻ ဖေႏသေဗာႏ အကျံႏဉာဏ်ႏနုဲင်းယိုသွူ။ မဉ်ႏတဲက်ထွားတွမ်ႏခေတ်၊ တွမ်ႏဝင်ꩻလိုꩻမျိုꩻနောဝ်ꩻ လꩻနောဝ်ꩻလꩻ ထွꩻနောဝ်ꩻထွꩻတဲ့ တဆꩻတောဝ်းရိုꩻဗာႏနုဲင်းနောဝ်ꩻသွူ၊ ယေန်ႏကေႏတာႏ၊ ဘာႏသာႏတွက်တာႏနောဝ်ꩻ လို့ခိꩻတောဝ်းသွူ၊ အိန်ကျောင်းတာႏနောဝ်ꩻ အုပ်ꩻခရာႏအောဝ်ႏတောဝ်းဒွိုန်းသွူ။ အင်္ဂလိပ်၊ ဂဏန်ꩻ-တွမ်ႏ ကအီႏသွုံꩻသော့ꩻဒါႏ အတန်ꩻကျောင်ꩻ(အိမ်ကျောင်း)ကို လိတ်စောင်ႏနောဝ်ꩻ အောဝ်ႏတောဝ်းဒွိုန်းသွူ၊ မဉ်ႏရံꩻဆꩻဗာႏနောဝ်ꩻ ရအောဝ်ႏလဲဉ်းအကျံꩻ ထင်းနုဲင်းနောဝ်ꩻသွူ။ ယိုခါ လောကုတ်အနေႏ လိတ်လꩻပညာႏနောဝ်ꩻ အောဝ်ႏလုမ်းလဲဉ်းရိုꩻကီနောဝ်ꩻလဲ့ လောကီꩻအတန်ꩻကျောင်ꩻတာႏနောဝ်ꩻ လိုႏငါႏမရေႏမရာႏသွူ။ ကွပ်နောဝ်ꩻမꩻ အနယ်ꩻဆꩻပညာႏ လောကတာႏထာꩻသေ သွုပ်ဆွိုင်ꩻအုံအောဝ်ႏရေꩻ၊ လွူးနမ်းပညာႏရေꩻ ကအောဝ်ႏဒါႏပုဂ္ဂိုလ်ႏသီး အောဝ်ႏလိုႏဖန်ဆင်ꩻစဉ်ꩻစာꩻခန်းဝင်ꩻအကျောင်ꩻ-အွဉ်ႏထွူကနော ထွားလိတ်ဗွေႏခွန်နင်ꩻသီးဖုံႏဩ-[၁][၂]