အံႏရော်ꩻဝင်ꩻတဒါႏတဝ်း

"အံႏရောꩻဝင်ꩻတဒါႏတဝ်း ထာꩻအံႏမျိုꩻဖုံႏ"

နီလိုꩻသီး ကအဝ်ႏအံႏဒါႏ ထာꩻအံႏယိုနဝ်ꩻ ဟန်ႏအိုမျိုꩻတရိုꩻတဝ်း၊ သေင်ႏရောင်ꩻသေင်ႏရာႏတရိုꩻတဝ်း၊ ထာꩻအံႏပဆိုးတခိုးမျိုꩻ တရိုꩻတဝ်း၊ တသီႏတရိုꩻတဝ်း ကဲန်းအာအာနဝ်ꩻ အံႏရော်ꩻတဝင်ꩻလꩻဒျာႏလဲ့ အဝ်ႏဒျာႏနေနေသွူ။ အံႏရော်ꩻတဝင်ꩻတဒါႏတဝ်းမျိုꩻဖုံႏယို မီႏအံႏရော်ꩻတဝင်ꩻနဝ်ꩻ လိတ်အုက်မန်းကို ယဟန်ႏနဝ်ꩻ ထွာဒါႏနုဲင်းယို၊ ထွာဒါႏနုဲင်းနဝ်ꩻနဝ်ꩻ အဝ်ႏတဲမ်းပါလဲ့ ယဟန်ႏနဝ်ꩻ တတဲမ်းပါတဝ်းတွော့ꩻ အံႏရော်ꩻတဝင်ꩻတဒါႏတဝ်း တဲမ်းဗော့ꩻနုဲင်းနဝ်ꩻလွုမ်ꩻသွူ။ အံႏရော်ꩻတဝင်ꩻ ကတဒါႏတဝ်းယိုနဝ်ꩻ ယဟန်ႏနဝ်ꩻ တထွာတဝ်း အသက်အန္တရာယ်ႏ၊ သီးမူꩻဒါႏ၊ သꩻတကုဲင်ဒါႏ၊ မဲန်အော့ꩻဒါႏ၊ သꩻတနွော့ꩻဒါႏ၊ သꩻတဖုံဒါႏ၊ ဓာတ်ချုက်ဒါႏ၊ ဟို့ꩻထိုꩻဒါႏနုဲင်းနဝ်ꩻလွုမ်ꩻလဲ့ ယဟန်ႏနဝ်ꩻ ထွာဒါႏ အသက်န္တရာယ်ႏ၊ သွီႏတိုꩻထင်ႏတမွိုꩻတမာꩻဒါႏ၊ သွီႏလင်ꩻတမွိုꩻတမာꩻဒါႏ၊ သꩻရာႏယွုတ်ꩻဒါႏ၊ သꩻရာႏပကျောက်ꩻမွိုင်လွဉ်ꩻဒါႏ၊ ထွာဒါႏအစွူႏ၊ အဆာႏခြုံတိုဒါႏ၊ ဖြေ့တိုဒါႏ-စတဲင်နုဲင်းနဝ်ꩻဖုံႏသွူ။

နီလိုꩻသီး ကအံႏဒါႏထာꩻအံႏယိုနဝ်ꩻ တတဲ့ꩻတဝ်းတွော့ꩻ အံႏရော်ꩻတဝင်ꩻမꩻတမွေးတဝ်း၊ အံႏဒျာႏတစွိုးတမျိုꩻချင်ႏလဲ့ တတဲ့ꩻတဝ်ႏနီသွီႏ၊ တတဲ့ꩻတဝ်းတွမ်ႏနီရောႏဂါႏလီꩻတွော့ꩻ ထွာဒါႏတစွိုးတမျိုꩻလဲ့ အဝ်ႏသွူ။ ထာꩻအံႏယင်ဟန်ႏနဝ်ꩻ မီႏအံႏဆေ့ꩻဆေ့ꩻ၊ မီႏအံႏတန်ႏတန်ႏနဝ်ꩻ ထွာတဝ်းမုဲင်ꩻမုဲင်ꩻလဲ့ မီႏအံႏအာလွဉ်ꩻငါႏ တလဲင်ႏချင်ꩻ၊ မီႏအံႏခွိုꩻအံႏဒွို့ꩻငါႏနဝ်ꩻ ထွာဒါႏတစွိုးစွိုးတမျိုꩻမျိုꩻ၊ မာꩻဒုက္ခဒါႏလိုꩻ၊ ထွာဒါႏအသက်အန္တရာယ်ႏလဲ့ အဝ်ႏသွူ။ ကွပ်နဝ်ꩻမꩻ ထာꩻအံႏသီးမျိုꩻယိုနဝ်ꩻ ဝင်ꩻလွူးခြေင်နေးခန်းလဲ့ အဝ်ႏလိုႏအံႏကြွို့ꩻတဝ်း၊ ဖြောင်းအွီႏတွိုင်ꩻလဲ့ အဝ်ႏလိုႏအံႏအာငါႏတဝ်း၊ ချင်းဒျာႏနီနမ်း၊ ချင်းဒျာႏနီဟို့ꩻ၊ ချင်းဒျာႏ နီရောႏဂါႏနဝ်ꩻ ဟဝ်သွူ။ အံႏထာꩻမုဲင်ꩻမုဲင်ꩻတယဝ်း အံႏတစွိုးတမျိုꩻချင်ႏဒျာႏလဲ့နဝ်ꩻ၊ အံႏရော်ꩻတဝင်ꩻလဲ့နဝ်ꩻ အံႏထွူတွော့ꩻ သꩻမီႏတဟဝ်တဝ်း၊ မီႏခံႏစာꩻဗာႏ လက္ခဏာႏထူꩻချာꩻ တစွိုးတမျိုꩻနဝ်ꩻ အဝ်ႏလိုႏအံႏချာမွိုင်မွိုင် တသီႏဖြေႏ၊ တသီႏမာႏဆာႏ တစွိုးတမျိုꩻသွူ။ အလွိုးမီႏတသက်သာႏတဝ်း၊ အလွိုးမီႏ တထူꩻချာတဝ်းနဝ်ꩻ အဝ်ႏလိုႏလွေꩻထေ့မွိုင်မွိုင်ဆရာႏ၊ အဝ်ႏလိုႏလွေꩻမွိုင်မွိုင် တသီႏခန်ꩻ တသီႏယုံႏသွူ။ ငါယိုနဝ်ꩻ တဲမ်းနယ်လွေꩻဗာႏ အံႏရော်ꩻတဝင်ꩻကတလꩻတဝ်း ထာꩻအံႏမျိုꩻဖုံႏသွူ။

• - ခေါင်ꩻ (ပုဇွန်)တွမ်ႏ တသီႏဗီတာမိဉ်သီ (မီႏအံႏနဝ်ꩻ ထွာဒါႏအစွူႏ)။
• - တသီႏအင်္ဂလေက် တသီႏနမ်းခိုးနမ်းလျား (အေအးမိပျောက်ဆေး)တွမ်ႏ Coke ဖျောႏထီ။ (ထွာဒါႏအစွူႏ)
• - ထိုဖူꩻတွမ်ႏ တဝတ်ꩻထီ (တမူထီ) (နားတအွိုင်၊ နားတေက်ꩻဒါႏ)။
• - မဝ်ထီကို (ရေညှိ)တွမ်ႏ ထော့ꩻပတ် (သွီႏခယ်ꩻ၊ ဓာတ်ချုက်ဒါႏ)။
• - နွေႏတွမ်ႏ ထထီႏရာႏ (ထွာဒါႏတခစ်)။
• - ဟန်ႏအိုတနျာႏ (ဖိုးပနားယာႏ)တွမ်ႏ တသာႏသိကျာꩻတညိုႏ (ဟို့ꩻဗွေ၊ ဟို့ꩻတအွောင်ႏဒါႏ)။
• - သိုꩻယာႏတွမ်ႏငွီႏ (အဆာႏခြုံ ဗွေတအွောင်ႏဒါႏ)။
• - ကွယ်သာႏယာႏတွမ်ႏ ဖက်ꩻစီꩻခယ်ႏ (တရုတ်နံနံ) (ကလူꩻလွꩻဒါႏ)။
• - ကမ်းပုဲင်း (ဘဲငန်း)ယာႏတွမ်ႏ တပုဲင်ႏရာႏ (ကျောက်ကပ်ကုဲင်ဒါႏ)။
• - အောင်ႏလျာရာႏတွမ်ႏ ထပေႏယိုႏ။
• - ဝါးကွူတွမ်ႏ နံးမန်ꩻဟန်ႏလွူး။
• - ငွီႏတွမ်ႏ ထာꩻသားခင်ႏလစ်ꩻပင်ယာႏ။
• - အေင်တွမ်ႏ သင်္ဘောꩻတုဲင်။
• - အေတွမ်ႏ ဝါးကွူယာႏ။
• - စံႏပြာ (စောင်းလျာ)ရာႏတွမ်ႏ စောက်ꩻသွီရာႏ။
• - စံႏပြာရာႏတွမ်ႏ ဝါးရွို့ယာႏ။
• - စံႏပြာရာႏတွမ်ႏ ဝါးကွူယာႏ။
• - သွီႏဒီႏဗွာ (စိမ်းစားဥ)တွမ်ႏ ချောက်ကလဲတ်။
• - သွီႏဒီႏဗွာ (စိမ်းစားဥ)တွမ်ႏ နို့အေးချောင်း။
• - သွီႏဒီႏဗွာတွမ်ႏ ရေခဲမုန့်။
• - ဗဲယာႏတွမ်ႏ ဆူးပန်းရွက်။
• - တလာꩻရာႏတွမ်ႏ နွေႏသေင်ႏ (ပလောပီနံ)ဒီႏ။
• - တောင်းလျက်ꩻထန်ꩻတွမ်ႏ တဖြေရာႏ။
• - ထန်ꩻထီတွမ်ႏ တကောက်ꩻတောင်ꩻ (ထော့ꩻပတ်ရာႏမွေးတဝ်း)။
• - ထွန်တွမ်ႏ သေယာႏ။
• - ဗဲယာႏတွမ်ႏ ပနားယာႏ။
• - နဲန်းထီအမျိုꩻမျိုꩻတွမ်ႏ ထာꩻဆျားအမျိုꩻမျိုꩻ (ထာꩻဆျာႏအမျိုꩻမျိုꩻကရိုꩻနဝ်ꩻ မောက်ꩻဖါး၊ စောက်ꩻသွီရာႏ-စတဲင်အရာႏဆျာႏမျိုꩻသွူ။
• - နဲန်းထီအမျိုꩻမျိုꩻတွမ်ႏ ဒဝ်အမျိုꩻမျိုꩻ။
• - နဲန်းထီအမျိုꩻမျိုꩻတွမ်ႏ သွန်ꩻအမျိုꩻမျိုꩻ။
• - နဲန်းထီအမျိုꩻမျိုꩻတွမ်ႏ ထပေႏအမျိုꩻမျိုꩻ။
• - နဲန်းထီအမျိုꩻမျိုꩻတွမ်ႏ ဒေႏယာႏ။
• - နဲန်းထီအမျိုꩻမျိုꩻတွမ်ႏ ဟန်ႏနွန်းသီး၊ ဟန်ႏနွန်းကြိုႏ။
• - တဝတ်ꩻထီတွမ်ႏ အုတ်သစ်ရာႏ။
• - တဝတ်ꩻထီတွမ်ႏ ဩဇာႏရာႏ။
• - တဝတ်ꩻထီတွမ်ႏ ဟန်ႏအိုထပေႏ။
• - ပိတ်တချင်ꩻလာႏတွမ်ႏ ဟန်ႏအိုထပေႏ။
• - ထီဆေ့ရာႏတွမ်ႏ ဝါးကီႏယာႏ။
• - မိဉ်းဂွတ်ရာႏတွမ်ႏ တသာႏသီကျာꩻ။
• - နွေႏသေင်ႏ (ပလောပီနံ)ဒီႏတွမ်ႏ အဆျာႏမျိုꩻ။
• - တသီႏအင်္ဂလေက် "ဘတ်စပရို"တွမ်ႏ မောက်ꩻဖါး၊ စောက်ꩻသွီရာႏ။
• - ဒဝ်တွမ်ႏ တသာႏသိကျာꩻ။
• - သွန်ꩻတတောက်တွမ်ႏဗင်ႏ။
• - ထော့ꩻယာႏတွမ်ႏ ဗေသေင်ဖြုံႏ (သွီႏတိုꩻထင်ႏအာလွဉ်ꩻဒါႏ)။
• - စောက်ꩻသွီရာႏတွမ်ႏ သွီႏဒီႏဗွာ (စိမ်းစားဥ)။
• - စောက်ꩻသွီရာႏတွမ်ႏ စံႏပြာႏရာႏ (စောင်းလျားသီး)။
• - စောက်ꩻသွီရာႏတွမ်ႏ မောက်ꩻအိုꩻရာႏ (ကျွဲကောသီး)။
• - မောက်ꩻဖါးရာႏတွမ်ႏ တသီႏအင်္ဂလေက်အမျိုꩻမျိုꩻ။
• - ထော့ꩻယာႏတွမ်ႏ ထိုဖူꩻယိဉ်း (သွီႏတိုꩻထင်ႏလွဉ်ꩻဒါႏ)။
• - စောက်ꩻသွီရာႏတွမ်ႏ နွေႏသေင်ႏဒီႏ (ပလောပီနံဥ)။
• - မောက်ꩻဖါးရာႏတွမ်ႏ မောက်ꩻအိုꩻရာႏ။
• - မောက်ꩻဖါးရာႏတွမ်ႏ နွေႏသေင်ႏ (ပလောပီနံ)။
• - ကမ်းပုဲင်းဒီႏ (ဆျာဒီႏ)တွမ်ႏ တဲင်ပူႏရာႏ။ (ထွာဒါႏအစွူႏ)

အံႏညီꩻအံႏသွိုတဝင်ꩻ တလꩻတဝ်း ထာꩻအံႏမျိုꩻနုဲင်းယိုဖုံႏနဝ်ꩻ ယဟန်ႏနဝ်ꩻ အီႏတနောက်ꩻ အီႏအံႏညီꩻဗာႏတဝင်ꩻနဝ်ꩻ တယိုꩻတဝ်း၊ တနောက်ꩻကြွို့ꩻတဝ်းလဲ့ ယဟန်ႏနဝ်ꩻ တနောက်ꩻဒါႏဒျာႏသွူ။ ကကုဲင်းတနောက်ꩻဒါႏ တဝင်ꩻမျိုꩻနဝ်ꩻ အဝ်ႏလိုႏမတ်တောင်ꩻတောင်ꩻခါꩻသွူ။ လိတ်စောင်ႏကိုပါလဲ့နဝ်ꩻ၊ ပါတဝ်းလဲ့နဝ်ꩻ အံႏညီꩻတဝင်ꩻတွော့ꩻ မီႏထွာလွဉ်တစွိုးစွိုး တမျိုꩻမျိုꩻနဝ်ꩻ အဝ်ႏလိုႏခြုဲင်းနယ်ဝင်ꩻ၊ အဝ်ႏလိုႏတဲမ်းသော့ꩻ လိတ်စောင်ႏကိုသွူ။