၂၀၂၂-အဆုဲင်ꩻသွတ်ꩻနီꩻစူခူꩻ
"၂၀၂၂-အဆုဲင်ꩻသွတ်ꩻ စူခူꩻ" အွိုးတလဲင်ႏ ဗွေႏမျတ်ဘုရာꩻ တွမ်ႏရဟန်ꩻဖုံႏ အပါꩻငတ်ꩻရျာꩻ ကျွꩻလွေꩻအင်္ဂတုံးတဲင် တွိုႏလွေꩻခန်း စမ္ပာႏဝေင်ꩻ၊ ဗွေႏမျတ်ဘုရာꩻ သတင်ꩻသုံꩻခန်း ဂဂ္ဂရာႏထီနောင်ဖင်ႏ၊ အတွင်ꩻနဝ်ꩻခါ စမ္ပာႏဝေင်ꩻယို လိုꩻတဲ့ကွုန်ꩻ' မီꩻသိုႏဖုံႏတဲ့လွိုင်ႏ' ဗွူဟူဖုံႏတဲ့လွိုင်ႏ' ဗွန်နုဲင်းစွဉ်ႏခွန်သီးစေꩻစိန်ႏ' မာဂဓခမ်းဗွေႏ ခွန်တန်ဗိမ္ဗိသာရဖေႏအပ်ပဲင်ႏနေးစွဉ်ႏတဲင် သောဏဒဏ္ဍပုဏ္ဏာꩻနဝ်ꩻ အဝ်ႏအိုပ်စိုꩻ ဝေင်ꩻစမ္ပာႏနဝ်ꩻသွူ။ ဝေင်ꩻစမ္ပာႏသား ပုဏ္ဏာꩻခြွေဖုံႏနဝ်ꩻ ဟွုန်ထွꩻလွခန်း "အဝ်ႏသာႏကီႏဝင်ႏခွန်ခွိုꩻ ဗုဲင်ထိုꩻရဟန်ꩻ ရဟန်ꩻဂေါတမနဝ်ꩻ တွမ်ႏရဟန်ꩻအပါꩻပေါင်ꩻအာ ငတ်ꩻရျာꩻပဉ်တဲင် ကျွꩻလွေꩻတဖူꩻအင်္ဂတုံးတဲင် အဝ်ႏအုံသတင်ꩻသုံꩻ ဂဂ္ဂရာႏထီခြောင်ႏဖင်ႏတဲ့၊ ဗွေႏမျတ်ဘုရာꩻနဝ်ꩻနဝ်ꩻ အဂုဏ်ႏသတင်ꩻဟဝ် ကျောႏစွစ်ꩻစဲစ်ꩻစွဉ်ႏနုဲင်းယို ' ခွုင်းကပူႏဇောႏယို ခံႏထူႏထွိုက်ငါႏ' ဆရာႏအဲဉ်ထဝ်း ဗွေႏစဝ်းနမ်းဒျာႏ သေငါꩻကြောင်းကြဲ့တရာꩻ' အကျင်ꩻတွမ်ႏထာꩻသေ ဗွေလိုမ်းကိုမ်ႏငါႏ' ဒေါ့ꩻဒျာႏငဝ်းဟဝ်ငွါဒါႏ' သေလို့လောကသိုမ်ပါꩻ' ဆုံꩻမꩻသင်ꩻသား ကားသတ္တဝါႏယို ကဆုံꩻမꩻဒါႏသားအကို အမျတ်လွိုသွတ်ꩻ' ထွာလိုꩻလူꩻသီးဆရာႏ' သစ္စာႏလစ်ꩻပါꩻတရာꩻမျတ်ယို နမ်းလဲ့သေဒျာႏ ဝင်ꩻဖေႏကသေနာႏလဲ့ ဟော်ꩻကျာꩻနယ်ဒါႏ'။ ဗွေႏမျတ်ဘုရာꩻနဝ်ꩻနဝ်ꩻ လူꩻသူထပ် ဗျဟ္မာႏဘုံႏနီဆီ ရဟန်ꩻပုဏ္ဏာꩻစတဲင် လောကဖုံႏအကို နမ်းသေဖြွဉ်လို့စွဉ်ႏတဲင်တွော့ꩻ ဟော်ꩻခြုဲင်းနယ်ဒါႏ၊ ဗွေႏမျတ်ဘုရာꩻနဝ်ꩻနဝ်ꩻ အဟော်ꩻတရာꩻနဝ်ꩻ အထျꩻလဲ့ယံ အထာႏဝလဲ့ကျ အသွတ်ꩻလဲ့ ယံမွေးစွဉ်ႏ' အကျိုꩻလဲ့အဝ်ႏမွေးစွဉ်ႏ' အနက်အခရာႏတွမ်ႏသဒ္ဒါႏလဲ့ဗွေစွုမ်ႏ' အွဉ်ႏနယ်လွေꩻဖေႏဗာႏ အကျင်ꩻဗွာစင် စွုံႏစွုံႏလင်ႏလင်ႏယင်သွူ၊ မဉ်ႏခွဲးထီႏဗာႏ အရိယာႏပုဂ္ဂိုလ်ႏနုဲင်းယိုနဝ်ꩻ ယံမွေးငါႏသနယ်"(ဟွုန်ထွꩻလွနုဲင်းနဝ်ꩻဖုံႏသွူ။) စမ္ပေယျကဝေင်ꩻသား ပုဏ္ဏာꩻလိုꩻခြွေဖုံႏနဝ်ꩻ အဝ်ႏဝေင်ꩻစမ္ပာႏ ထန်ႏလွေꩻပဉ်ဖုံႏပဉ်စွိုꩻတွော့ꩻ လွေꩻမိုးထေ့ခန်းဒျာႏ ဂဂ္ဂရာႏထီနောင်အထျꩻနဝ်ꩻသွူ။ အတွင်ꩻနဝ်ꩻ သောဏဒဏ္ဍပုဏ္ဏာꩻနဝ်ꩻ အဝ်ႏထင်ႏကျံႏဗေင်ႏယာထာꩻ အပျသာဒ်လောင်းကီ၊ ထီႏလွေꩻခန်း စမ္ပေယျဝေင်ꩻသား ပုဏ္ဏာꩻခြွေဖုံႏ အဝ်ႏဝေင်ꩻစမ္ပာႏထန်ႏလွဉ် ပဉ်ဖုံႏဖုံႏပဉ်စွိုꩻစွိုꩻဖုံႏ အဝ်ႏလွေꩻမိုးထေ့လွ ဂဂ္ဂရာႏထီနောင်ဖင်ႏဖုံႏနဝ်ꩻသွူ၊ ထွိုင်ႏထီႏနုဲင်းနဝ်ꩻထွူတဲင် ဒေါ့ꩻဖေႏခန်း အလိုꩻကမဉ်'ခတ္တ' "အွိုႏခတ္တဟွေး- စမ္ပေယျကခမ်းသား ပုဏ္ဏာꩻခြွေဖုံႏနဝ်ꩻ ပဉ်ဖုံႏပဉ်စွိုꩻနေးစွဉ်ႏ အလွေꩻမိုးထေ့လွ ဂဂ္ဂရာႏထီနောင်ဖင်ႏနဝ်ꩻ တမုဲင်ꩻအဝ်ႏနဲး?"။ "အဝ်ႏသနယ်အော်၊ အဝ်ႏသာႏကီႏဝင်ႏခွန်ခွိုꩻ ကဗုဲင်ထိုꩻရဟန်ꩻ ရဟန်ꩻဂေါတမနဝ်ꩻ တွမ်ႏရဟန်ꩻသံႏဃာႏ အပါꩻငတ်ꩻရျာꩻ ကျွꩻလွေꩻတဖူꩻအင်္ဂတုံးတဲင် အအဝ်ႏသတင်ꩻသုံꩻ ဝေင်ꩻစမ္ပာႏ ဂဂ္ဂရာႏထီနောင်ဖင်ႏသနဲ့အော်၊ ဗွေႏရဟန်ꩻဂေါတမသူꩻနဝ်ꩻ အဂုဏ်ႏသတင်ꩻဟဝ် ကျောႏကျာႏစွစ်ꩻစဲစ်ꩻနုဲင်းယို (ဂုဏ်ႏတောႏကွတ်ꩻပါꩻ)။ နဝ်ꩻမꩻ ပုဏ္ဏာꩻစားယိုဖုံႏ အဝ်ႏလွေꩻမိုးထေ့ ရဟန်ꩻဂေါတမနဝ်ꩻသွူသနယ်အော်"။ "ပေါႏနဝ်ꩻတဲ့ ခတ္တဟွေး- လွေꩻထေ့သွော့ စမ္ပေယျက ပုဏ္ဏာꩻခြွေဖုံႏသူꩻဟုဲင်း၊ လွေꩻထေ့ထွူတဲင် ဒေါ့ꩻပုဏ္ဏာꩻခြွေစားနဝ်ꩻဖုံႏ တွမ်ႏငဝ်းနုဲင်းယိုဟုဲင်း ' သောဏဒဏ္ဍပုဏ္ဏာꩻနဝ်ꩻ အရိုꩻနုဲင်းယို နီဗွေႏသီး အုံပွေါးပသာႏကတဲ့အော်၊ သောဏဒဏ္ဍပုဏ္ဏာꩻတဲ့ အီႏလွေꩻမော့ꩻခွဲး ဗွေႏရဟန်ꩻဂေါတမတဲ့အော်"(ရိုꩻနုဲင်းနဝ်ꩻနေား)၊ "မွေးသွူ-အော်" ခတ္တဝွန်ႏခံႏနုဲင်းနဝ်ꩻထွူတဲင် လွေꩻမိုးထေ့ခန်း စမ္ပေယျကသား ပုဏ္ဏာꩻခြွေဖုံႏထွူတဲင် ဒေါ့ꩻခန်းသောဏဒဏ္ဍပုဏ္ဏာꩻ ကဒေါ့ꩻနယ်အတွိုင်ꩻနဝ်ꩻသွူ။ အတွင်ꩻနဝ်ꩻ အခမ်းခမ်းအထီထီ ပုဏ္ဏာꩻအဖြာꩻငတ်ꩻရျာꩻဖုံႏ တွမ်ႏကိစ္စတစွိုးတမျိုꩻတဲင် အဝ်ႏအုံလွ ဝေင်ꩻစမ္ပာႏကိုနဝ်ꩻသွူ၊ ပုဏ္ဏာꩻစဝ်းနဝ်ꩻဖုံႏ ဟွုန်ထွꩻလွခန်း "သောဏဒဏ္ဍပုဏ္ဏာꩻနဝ်ꩻ အီႏလွေꩻမိုးထေ့ ရဟန်ꩻဂေါတမထျꩻတဲ့"၊ တွိုႏနဝ်ꩻတဲင် ပုဏ္ဏာꩻနဝ်ꩻစားဖုံႏနဝ်ꩻ လွေꩻထေ့လွခန်း သောဏဒဏ္ဍပုဏ္ဏာꩻထျꩻ၊ လွေꩻမိုးထေ့ထွူတဲင် ဒေါ့ꩻလွခန်း သောဏဒဏ္ဍပုဏ္ဏာꩻတွမ်ႏငဝ်းနုဲင်းယို "ဗွေႏသောဏဒဏ္ဍ ကအီႏလွေꩻမိုးထေ့ ရဟန်ꩻဂေါတမကရိုꩻနဝ်ꩻ မွေးဒျာႏနဲ့"၊ အေား- ဗွေႏသီးဖုံႏ အမွေးဒျာႏရင်ꩻအော်၊ "ခွေတဲ့ အီႏလွေꩻမိုးထေ့ ရဟန်ꩻဂေါတမဒျာႏရင်ꩻ"ဒေါ့ꩻလွနုဲင်းနဝ်ꩻဖုံႏသွူ။ ဗွေႏသောဏဒဏ္ဍ တွမ်ႏလွေꩻမိုးထေ့မွုန်း ရဟန်ꩻဂေါတမသူꩻ၊ ဗွေႏသောဏဒဏ္ဍ လွေꩻမိုးထေ့ရဟန်ꩻဂေါတမထျꩻနဝ်ꩻ တထွိုက်တဝ်း၊ ဗွေႏသောဏဒဏ္ဍ မဉ်ႏလွေꩻမိုးထေ့ ရဟန်ꩻဂေါတမထျꩻသူꩻနဝ်ꩻ ဗွေႏသောဏဒဏ္ဍအတွက် အချွေႏအရံႏအီႏယွမ်ꩻ၊ ရဟန်ꩻဂေါတမအတာႏ အချွေႏအရံႏအီႏအာတေား၊ ကရိုꩻဒါႏဗွေႏသောဏဒဏ္ဍ အချွေႏအရံႏအီႏယွမ်ꩻ၊ ရဟန်ꩻဂေါတမ အချွေႏအရံႏအီႏအာတေား-ကရိုꩻဒါႏ အကျောင်ꩻယိုတမျိုꩻတဲင် ဗွေႏသောဏဒဏ္ဍ တလွေꩻထေ့ထွိုက်တဝ်း ရဟန်ꩻဂေါတမထျꩻ၊ အမဲဉ်ႏတဗာႏနဝ်ꩻတဲး ရဟန်ꩻဂေါတမ လွဉ်ထေ့ထွိုက်ဒျာႏ ဗွေႏသောဏဒဏ္ဍထျꩻယိုထဲင်း" ဒေါ့ꩻလွနုဲင်းနဝ်ꩻဖုံႏသွူ။ တလွေꩻထွိုက်တဝ်း အကျောင်ꩻတမျိုꩻယင်းနဝ်ꩻ- ဗွေႏသောဏဒဏ္ဍနဝ်ꩻ မွိုးဖဲ့တဲ့သင်၊ ဖါဖဲ့ꩻတဲ့သင် နီဖဲ့ꩻဖဲ့ꩻ လွူးဖွါꩻလင်ꩻဒျာႏဟဝ်ဟဝ်ဒါႏဒါႏ၊ မွိုးဟို့ꩻကြောင်းစင်ဒျာႏ၊ ဗꩻစွဉ်ႏမွိုးဖြားဖါဖြားနွုတ်ꩻဆက်သူꩻ ပွိုင်းဝွို့တွမ်ႏအခွိုꩻတဲင် ဝင်ꩻတပယ်ႏထိုꩻတဝ်း၊ ဝင်ꩻတကဲ့ꩻရဲ့ꩻတဝ်း၊ ကွပ်အကျောင်ꩻယိုစားတဲင် ဗွေႏသောဏဒဏ္ဍတလွေꩻထေ့ထွိုက်တဝ်း(ပ)ယိုထဲင်း"။ တမျိုꩻယင်းနဝ်ꩻ ဗွေႏသောဏဒဏ္ဍနဝ်ꩻ ခြွေခြား၊ ဥစ္စာႏလွိုင်ႏ၊ အသုံꩻအဆောင်ႏလွိုင်ႏအာ။ ပ ။ တမျိုꩻယင်းနဝ်ꩻ ဗွေႏသောဏဒဏ္ဍနဝ်ꩻ ရွစ်ဖတ်ဒါႏ ဝေဒကျမ်ꩻဂန်ႏ၊ ဒါႏအိုမ်သေꩻခါꩻ မန္တန်ႏစတဲင်ဝေဒကျမ်ꩻဂန်ႏဖုံႏ၊ အဘိဓာန်ႏကျမ်ꩻ ကေဋုဘကဟဲ့ꩻဒါႏ ကာဗျအလင်္ကာႏကျမ်ꩻဖုံႏ၊ ကဖြယ်နယ်ဒါႏ အက္ခရာႏသိက္ခာႏကျမ်ꩻ' နိရုတ္တိကျမ်ꩻဖုံႏ၊ ဣတိဟာသပဉ္စမာနံ-သမဲင်ꩻအစဲဉ်ႏ ရာႏဇဝင်ႏအဆက်ဆက်ကရိုꩻဒါႏ ပုရာဏကျမ်ꩻဖုံႏ၊ ပေႏတင်ႏသိုမ်ဘုံႏ ဒါႏလို့ကြောင်းစွဉ်ႏ၊ လောကာယတကျမ်ꩻ မဟာပုရိသလက္ခဏာႏကျမ်ꩻဖုံႏလဲ့ အဝ်ႏဒါႏလို့ဗွေဗိက်ဒျာႏ။ ပ ။ တမျိုꩻယင်းနဝ်ꩻ- ဗွေႏသောဏဒဏ္ဍနဝ်ꩻ ယောင်ꩻရေꩻမွေးစွဉ်ႏထာꩻ၊ မဉ်ထွားခရာႏ တင်ႏတယ်ႏမွေးငါႏ၊ မာꩻစွူဖြွိုးနွောင်ꩻအီမွေးစွဉ်ႏသꩻ၊ ယောင်ꩻဆင်ꩻနမ်းအင်္ဂါႏ ဗွေစွုမ်ႏမွေးငါႏနဝ်ꩻသွူ။ပ။ တမျိုꩻယင်းနဝ်ꩻ- ဗွေႏသောဏဒဏ္ဍနဝ်ꩻ သီႏလအဝ်ႏ၊ ပွာꩻခါꩻထွူသီႏလအဝ်ႏ၊ ကပွါꩻသေꩻခါꩻထွူသီႏလ ဗွေစွုမ်ႏမွေးငါႏ။ပ။ တမျိုꩻယင်းနဝ်ꩻ- ဗွေႏသောဏဒဏ္ဍနဝ်ꩻ ငဝ်းယံတန်၊ ငဝ်းယံအဝ်ႏ၊ ဗွန်နုဲင်းလိုꩻဝေင်ꩻတန် သရိက်သယ်ꩻခေႏအဲဉ်ထဝ်းတဲင် ငဝ်းသျင်ꩻ၊ ယုဲင်ꩻထီလဲ့ဒါႏတဝ်း၊ ကမဉ်အွဉ်ႏသေဒါႏ အခရာႏလဲ့ ဒေါ့ꩻသေနာႏစဲင်းစဲ့ဖေႏဒါႏ။ပ။ တမျိုꩻယင်းနဝ်ꩻ- ဗွေႏသောဏဒဏ္ဍနဝ်ꩻ ထွာလိုꩻအာသီးဖုံႏ အဆရာႏ'အဆရာႏ၊ အဝ်ႏသွဉ်ဖေႏ ပုဏ္ဏာꩻပေႏသိုမ်ရျာꩻသီး ပေႏတင်ႏသိုမ်ဘုံႏ၊ အဝ်ႏအရပ်ရပ်အရာႏ ကမဉ်ဒါႏလွဒါႏမန္တန်ႏ ပေႏတင်ႏသားဖုံႏ လွဉ်သွဉ်ထေ့ လွဉ်တရေ့လွ သောဏဒဏ္ဍပုဏ္ဏာꩻထျꩻနဝ်ꩻသွူ။ပ။ တမျိုꩻယင်းနဝ်ꩻ- ဗွေႏသောဏဒဏ္ဍနဝ်ꩻ အရွယ်ႏလွဉ်ꩻလဲဉ်း လဲင်ꩻဖြားလဲဉ်း၊ ခွန်နီဆက်သိုမ်ဆက်လဲဉ်းတဲင် အခိန်ႏညဆွာꩻငါႏလဲဉ်း။ပ။ တမျိုꩻယင်းနဝ်ꩻ- ဗွေႏသောဏဒဏ္ဍယို မာဂဓခမ်းဗွေႏ ခွန်ဗိမ္ဗိသာရ အွဉ်ႏရေꩻ၊ ခံႏနွမ်ꩻ၊ ဟွုန်ဟဝ်၊ ပူႏဇောႏ၊ ရိုႏသေႏနဝ်ꩻသွူ။ပ။ တမျိုꩻယင်းနဝ်ꩻ- ဗွေႏသောဏဒဏ္ဍယို ပေါက္ခရသာတိပုဏ္ဏာꩻ အွဉ်ႏရေꩻ၊ ခံႏနွမ်ꩻ၊ ဟွုန်ဟဝ်၊ ပူႏဇောႏ၊ ရိုႏသေႏနဝ်ꩻသွူ။ပ။ တမျိုꩻယင်းနဝ်ꩻ- ဗွေႏသောဏဒဏ္ဍနဝ်ꩻ အိုပ်ꩻစိုꩻပဲင်ႏဗာႏ မာဂဓခမ်းဗွေႏ ကဖေႏပဲင်ႏဒါႏ လွိုင်ႏကွုန်ꩻသာႏယာႏ ဝေင်ꩻစမ္ပာႏယိုသွူ။ ကွပ်ပွိုးအကျောင်ꩻနုဲင်းယိုတဲင် ဗွေႏသောဏဒဏ္ဍပုဏ္ဏာꩻ လွေꩻမိုးထေ့ ရဟန်ꩻဂေါတမနဝ်ꩻ တထွိုက်တဝ်း၊ အမဲဉ်ႏစင်ႏစဲစ်ꩻ ရဟန်ꩻဂေါတမ အဝ်ႏလိုႏလွဉ်မိုးထေ့ဗာႏဒျာႏ ဗွေႏသောဏဒဏ္ဍထျꩻယိုနဝ်ꩻသွူ။[၁][၂]