နုတ်သီမ်ႏခရာႏ ဟောဝ်သေငါႏ

နုတ်သီမ်ႏ ကရိုꩻယို “နုတ်”ကိုနောဝ်ꩻဗဲ့ꩻထိုꩻ ထေထိုꩻ မာꩻဖေ့ꩻထိုꩻ မာꩻစင်ထိုꩻ အဓိပ္ပါယ်ႏလꩻနုဲးနောဝ်ꩻသွူ။ နောဝ်ꩻတွော့ꩻ မာꩻဖေ့ꩻတမုဲꩻ-? မာꩻစင်တမုဲꩻ-? နီဗွေႏဖရာꩻ သာႏသနာႏတောႏနောဝ်ꩻ နီရေင်သူရျာꩻလွိုလဲဉ်း။ နောဝ်ꩻမꩻ အွိုးတခီင်ႏခီင်ႏတလဲင်ႏလဲင်ႏကို ကအီႏသမုတ်ဒါႏ သိမ်ႏခင်လယိုနောဝ်ꩻ မော့ꩻလဲင်ႏစခါ ထွာဗာႏဖိုလဲန်း သီမ်ႏမကောင်၊ ရဟန်ꩻတစွိုꩻစွိုꩻ သမုတ်ခါꩻဒါႏ သီမ်ႏလီꩻသီမ်ႏယသီမ်ႏည အဝ်ႏဒါႏမကောင် ပါꩻမုဲꩻတဲ့တသေထွꩻတဝ်း။ ပေါႏသီမ်ႏလီꩻသီမ်ႏယသီမ်ႏည မီန်ႏအဝ်ႏနဝ်ꩻ ကအီႏသမုတ်တသာဒါႏသီမ်ႏယိုနဝ်ꩻ လွေꩻခွေါင်းသီမ်ႏလီꩻသီမ်ႏယတဲ့လꩻတဝ်း၊ လွေꩻစပ်တဲ့လꩻတဝ်း၊ လွေꩻသမုတ်ထပ်ယင်း သီမ်ႏလီꩻသီမ်ႏယလောင်းနဝ်ꩻတဲ့လꩻတဝ်း၊ ကသမုတ်တသာဒါႏသီမ်ႏယိုနဝ်ꩻ အမီန်ႏလွေꩻစပ်ထိုꩻသီမ်ႏလီꩻ မီန်ႏလွေꩻခွေါင်းသီမ်ႏလီꩻ မီန်ႏလွေꩻထပ်သီမ်ႏလီꩻလောင်းနောဝ်ꩻ သီမ်ႏလီꩻနဝ်ꩻ ခံႏတဝ်းအကုဲ၊ ကုဲတဝ်းတဲ့။ သီမ်ႏတသာကုဲထိုꩻ သီမ်ႏတသာအောင်ႏတဝ်း၊ စူꩻဗာႏဒျာႏအလီꩻ၊ စူꩻတဝ်းအတသာ၊ ကောပ်ပွိုးနောဝ်ꩻမꩻ နီကအီႏသမုတ်တသာဒါႏယိုနဝ်ꩻ ဖေႏနေးကအောင်ႏ ဖေႏနေးကထွာသီမ်ႏတဲင်တွော့ꩻ သီမ်ႏလီꩻသီမ်ႏယသီမ်ႏညမီန်ႏအဝ်ႏလႏယိုတဲ့ နေးတောမ်ႏသင်္ဃာႏသီး အမိန်း၊ နေးတောမ်ႏနီဗွေႏဖရာꩻ ထာꩻနယ်ꩻတဲင်တွော့ꩻ အီႏနုတ်ထိုꩻအီႏမာꩻစင်ထိုꩻ အီႏမာꩻဖေ့ꩻထိုꩻနောဝ်ꩻ ဟဲ့ꩻ “နုတ်သီမ်ႏ”နဝ်ꩻသွူ။

နဝ်ꩻမꩻသီမ်ႏကကုဲထိုꩻဗာႏ အကျောင်ꩻတရာꩻ သီမ်ႏကဖေ့ꩻထိုꩻဗာႏ အကျောင်ꩻတရာꩻနဝ်ꩻ အဝ်ႏနီမျိုꩻသွူ။ နီဗွေႏဖရာꩻ သာႏသနာႏယိုမီန်ႏဖေ့ꩻထိုꩻတဲ့ သီမ်ႏယိုနဝ်ꩻ ဖေ့ꩻထိုꩻကုဲထိုꩻ။ နောဝ်ꩻတွော့ꩻ ယိုခါနောဝ်ꩻ နီဗွေႏဖရာꩻသာႏသနာႏ သမ်းအောဝ်ႏနေကတဲင်တွော့ꩻ သီမ်ႏလီꩻသီမ်ႏယသီမ်ႏမော့ꩻလဲင်ႏစခါ မီန်ႏအောဝ်ႏစီင်ႏစွော့ꩻတဲ့ အတဖေ့ꩻထိုꩻတဝ်းဒွိုန်း အအောဝ်ႏနေကဒွိုန်း၊ တီင်ႏအောဝ်ႏနေကဒွိုန်းနုဲးနောဝ်ꩻတဲင်တွော့ꩻ နီကအီႏသမုတ်ဒါႏ သီမ်ႏတသာယို ဖေႏနေးကအောင်ႏ သꩻဖေႏနေးကဆွော့ꩻ နုဲးနောဝ်ꩻတဲင်တွော့ꩻ သီမ်ႏလီꩻသီမ်ႏယမီန်ႏအောဝ်ႏတဲ့ ဖေႏကတောမ်ႏအောဝ်ႏဗာႏမွုန်း ဗွေႏသင်္ဃာႏသီး အီႏနုတ်ထိုꩻ အီႏမာꩻစင်ထိုꩻ။ နောဝ်ꩻမꩻ အွိုးမော့ꩻလဲင်ႏစခါ ဗွေႏသင်္ဃာႏသီး ကသမုတ်နောဝ်ꩻ သမုတ်ရီး သမာနသံဝါသသီမာထွူမꩻ သမုတ် အဝိပ္ပဝါသသီမာ သီမ်ႏအောဝ်ႏနီမျိုꩻ။ ကောပ်နောဝ်ꩻမꩻ အရီးနောဝ်ꩻ လဲန်းထိုꩻခလႏ အဆုဲꩻနောဝ်ꩻ လဲန်းခကီ။ သမာနသံဝါသနောဝ်ꩻ လဲန်းရီး၊ အဝိပ္ပဝါသနောဝ်း လဲန်းဆုဲꩻ။ ကောပ်နောဝ်ꩻမꩻ တီင်ႏအီႏထူႏထန်ႏ ဗဲ့ꩻထန်ႏထိုꩻနောဝ်ꩻ ယူႏစမ်ꩻဗော့ꩻ တကောက်ꩻတဖြုံႏကိုနောဝ်ꩻ သော့ꩻခန်း မောက်ꩻစောက်ꩻရာႏနီဖြုံႏတရိုꩻတဝ်း၊ မောက်ꩻဖားရာႏနီဖြုံႏတရိုꩻတဝ်း၊ အဖြုံႏရီးနောဝ်ꩻ လဲန်းခလႏ အဖြုံႏဆုဲꩻနောဝ်ꩻ လဲန်းခကီ၊ မီန်ႏထူႏထန်ႏနောဝ်ꩻ ထူႏထန်ႏဗာႏရီးဒျာႏ အဖြုံႏဆုဲꩻ၊ ထူႏထန်ႏအဖြုံႏဆုဲꩻ မီန်ႏထွူမꩻ ထူႏထန်ႏဗာႏအဖြုံႏရီး။ ယိုတဲ့နုဲးနောဝ်ꩻနေနေ ကအီႏနုတ်သီမ်ႏယိုလဲင်ႏခါနောဝ်ꩻ နုတ်ရီးဗာႏ အဝိပ္ပဝါသသီမ်ႏ၊ နောဝ်ꩻမီန်ႏထွူမꩻ နုတ်ꩻဗာႏ သမာနသံဝါသသီမ်ႏ အဓိပ္ပါယ်ႏအောဝ်ႏနုဲးနောဝ်ꩻသွူ။

ကောပ်ပွိုးနောဝ်ꩻမꩻ မီန်ႏနုတ်သီမ်ႏယိုနောဝ်ꩻ ဗွေႏသင်္ဃာႏသီး အွဉ်ႏသတိတိနုဲးမုဲꩻနဲးတဲင်တွော့ꩻ တပါꩻတောမ်ႏတပါꩻနောဝ်ꩻ ခွေါင်းဝင်ꩻ လꩻတောဝ်း။ ခွေါင်းဝင်ꩻလꩻတောဝ်း-ကရိုꩻနောဝ်ꩻ အဓိပ္ပါယ်ႏနုဲးမုဲꩻ-? ဥပမာႏခန်း ခကွဉ်ႏတပါꩻ ခတွို့ꩻတပါꩻ။ တထွာနွောင်ꩻတဝ်းတဲ့ အွဉ်ႏဒေါ့ꩻခန်း အထွာ ဝိနယ်ꩻသီးအမျိုꩻနောဝ်ꩻ အဖွီတောမ်ႏ အထွူႏနောဝ်ꩻ စူꩻဗာႏဒျာႏ အထွူႏက။ အသေႏချာႏတောမ်ႏ တသေႏချာႏတောဝ်းနောဝ်ꩻ စူꩻဗာႏဒျာႏ အသေႏချာႏ။ ကောပ်နောဝ်ꩻမꩻတဲင် သီမ်ႏအဝ်ႏနီဖြုံႏ အနားနဝ်ꩻဗော့ꩻဗော့ꩻအဝ်ႏဆွိုင်ꩻစွဉ်ႏလို့ဝင်ꩻ အဝါႏခါႏကွို့ꩻတထာလူမ်ꩻ အွဉ်ႏဒေါ့ꩻခန်းအပုင်ႏစံႏဟုဲး။ အပါꩻခကွဉ်ႏနဝ်ꩻ သမ်းအုံသီမ်ႏအဖြုံႏကွောန်ႏမော့ꩻတွို့ꩻ အပါꩻခတွို့ꩻနဝ်ꩻ သမ်းအိုင်သီမ်ႏမော့ꩻကွဉ်ႏ ဝွေꩻဗွေႏသီးနီပါꩻနောဝ်ꩻ သမ်းအဝ်ႏဆွိုင်ꩻလို့ဝင်ꩻ သမ်းခွေါင်းလို့ဝင်ꩻ။ သီမ်ႏနီဖြိုင်ႏ ခှေါင်းလို့ဝင်ꩻ၊ နောဝ်ꩻနောဝ်ꩻ သီမာဘေဒ။ ထွာထိုꩻ သီမ်ႏခကွဉ်ႏတဖြုံႏ သင်္ဃာႏတစု၊ သီမ်ႏခတွို့ꩻတဖြုံႏ သင်္ဃာႏတစု သင်္ဃာႏနီစုနောဝ်ꩻ အလွေꩻခှေါင်းထိုꩻလို့ဝင်ꩻ၊ နောဝ်ꩻနောဝ်ꩻ အပ်တဝ်းတဲ့။ နဝ်ꩻတွော့ꩻ မီန်ႏအုံညာꩻငါႏလို့ဝင်ꩻတဲ့ သမ်းတလꩻတဝ်းနေနေ။ မီန်ႏအုံညာꩻငါႏလို့ဝင်ꩻနဝ်ꩻ ထွာတဝ်း သင်္ဃာႏထာꩻဗူႏ။ ကောပ်ပွိုးနောဝ်ꩻမꩻ အုံဗာႏ စူနီသောင်ꩻထာ ဟတ္ထပါသ်ကို၊ တပါꩻတောမ်ႏတပါꩻနဝ်ꩻ ဖေႏကအဝ်ႏဗော့ꩻဗာႏဝင်ꩻ စူနီသောင်ꩻထာ ဟတ္ထပါသ်ကို။ နောဝ်ꩻမꩻ ဟဲ့ꩻသင်္ဃာႏအဗူႏတဲ့။ မီန်ႏဒေါ့ꩻဒွေါင်ႏဒွေါင်ႏနဝ်ꩻ အိုင်တွိုက်လို့ဝင်ꩻ၊ အုံဗာႏလို့ဝင်ꩻနဝ်ꩻတဲ့ လꩻတဝ်း။ အုံညာꩻလို့ဝင်ꩻတဲ့ လꩻတဝ်း။ ကောပ်နဝ်ꩻမꩻ အုံရေ့ꩻရေ့ꩻ စူနီသောင်ꩻထာ ဟတ္ထပါသ်အရပ်ကိုနဝ်ꩻတဲ့ အွဉ်ႏသတိသွော့။

ဖတ်ကမ္မဝါႏတွင်ꩻ သင်္ကန်ꩻတရိုꩻတဝ်း တောမ်ႏစူတရိုꩻတဝ်း တမျိုꩻမျိုꩻတောမ်ႏကလာꩻထဲင်လႏယို တရိုꩻတဝ်း အွောန်ႏခွေါင်းမွုန်းတဝ်းလို့ဝင်ꩻ အွဉ်ႏသတိသွော့နဝ်ꩻတချက်။ နဝ်ꩻမꩻ အွဉ်ႏသꩻဗာႏနုဲးမုဲꩻ နီကဖတ်ကမ္မဝါႏယိုနဝ်ꩻ ကမ္မဝါႏနုတ်သီမ်ႏ၊ သꩻအွဉ်ႏဗာႏ သီမ်ႏလီꩻသီမ်ႏယမီန်ႏအဝ်ႏလႏယိုနဝ်ꩻ ဖေႏနေးကစင်ထိုꩻဗာႏ။ သꩻရေႏမိုးချက် သီမ်ႏလီꩻ ဖေႏနေးကစင်ထိုꩻဗာႏ။ ဗွေႏသင်္ဃာႏသီး တောင်ꩻတောင်ꩻနေား။ အွဉ်ႏဗာႏသꩻ သီမ်ႏလီꩻသီမ်ႏယသီမ်ႏညမီန်ႏအဝ်ႏလႏယိုနဝ်ꩻ ဖေႏကစင်ထိုꩻဗာႏ။ အွဉ်ႏဗာႏသꩻနုဲးနဝ်ꩻ။ နဝ်ꩻမꩻ ဖတ်ဗာႏကမ္မဝါႏယို။ ဖတ်ကမ္မဝါႏအလောင်ႏလင် လꩻတဝ်း။ ကမ္မဝါႏယိုနဝ်ꩻ ဟဲ့ꩻကမ္မဝါႏနုတ်သီမ်ႏ၊ ကမ္မဝါႏမာꩻစင်ထိုꩻသီမ်ႏ။ နဝ်ꩻမꩻ အချက်အဝ်ႏနီချက် တချက်နဝ်ꩻ သီမ်ႏဖေႏကထိုꩻမားထိုꩻအွဉ်ႏဗာႏသꩻနုဲးနဝ်ꩻ။ နီအချက်နဝ်ꩻ ဖတ်ဗာႏ ကမ္မဝါႏနုတ်သီမ်ႏ နုဲင်းနဝ်ꩻသွူ။ နဝ်ꩻတွော့ꩻ ဗွေႏသင်္ဃာႏသီးဖုံႏ ဗဟုသုတဖေႏကလꩻ ကမ္မဝါႏနုတ်သီမ်ႏယိုနဝ်ꩻ ပါသော့ꩻ ဝိနယ်ꩻပိဋကတ်၊ မဟာဝဂ္ဂပါဠိကိုသွူ။ နဝ်ꩻတွော့ꩻ ထွာသွဉ်လိတ်သားတွော့ꩻ ဝင်ꩻချꩻသော့ꩻလိတ် အွိုးသီမ်ႏကို။ သမ်းသွဉ်သော့ꩻကမ္မဝါႏယို အွိုးသီမ်ႏကို။ နုဲးနဝ်ꩻဟ သီမ်ႏနဝ်ꩻ အကုဲထိုꩻတဝ်းနဲ့၊ ရီခရာႏအဝ်ႏ၊ ကုဲထိုꩻတဝ်း။ ပွိုးတမုဲꩻ အမုဲတာ ဖေႏနေးသီမ်ႏကထိုꩻမား သꩻနုဲးနဝ်ꩻ တအွဉ်ႏတဝ်း။ သꩻနုဲင်းနဝ်ꩻ တအဲန်ထဝ်း။ သꩻထင်ႏဒျာႏလိတ်ဝါႏ၊ သꩻသွဉ်ဒျာႏလိတ်၊ သီမ်ႏဖေႏနေးကထိုꩻမား နုဲးနဝ်ꩻမွေးတဝ်း။ နဝ်ꩻမꩻ သီမ်ႏနဝ်ꩻ တကုဲထိုꩻတဝ်း။ ကမ္မဝါႏယိုနဝ်ꩻ သွဉ်သော့ꩻခန်းသီမ်ႏကိုတဲ့ သီမ်ႏဖေႏနေးကကုဲကရိုꩻဒါႏသꩻ ပထမရေႏမိုးချက် နုဲးနဝ်ꩻ အဲန်ထဝ်းတဲင်တွော့ꩻ သီမ်ႏနဝ်ꩻ ကုဲထိုꩻတဝ်း။ ကောပ်နဝ်ꩻမꩻ ဖတ်ကမ္မဝါႏတွင်ꩻနဝ်ꩻ သုဏာတု… အွဉ်ႏအုံပသာႏဆောင်းတဆင်ႏထွူမꩻ ကွဲး မေ၊ နဝ်ꩻထွူမꩻ ကွဲး ဘန္တေ၊ တေနဝ်ꩻတဲ့ တ-ဒျာႏ၊ ဒ-မွေးတဝ်း၊ အွဉ်ႏသတိတိသွော့၊ နဝ်ꩻမꩻ ထာꩻရိုႏသေႏဖရာꩻတဲ့ ဖေႏကထွာ၊ တရာꩻတဲ့ ဖေႏကထွာ၊ သင်္ဃာႏတဲ့ ဖေႏကထွာ၊ ထိုမ်းမွုန်းခင်ႏဖာႏ၊ ခင်ႏဖာႏနဝ်ꩻ ဗွောင်ႏထွူတွော့ꩻ ခင်ႏနဝ်ꩻ အွဉ်ႏဒင်ႏဒျာႏ ခင်ႏဖာႏလောင်း။ ခင်ႏအွဉ်ႏဒင်ႏ ခင်ႏဖာႏလောင်းနဝ်ꩻ ဟဲ့ꩻထိုမ်းခင်ႏဖာႏ မွေးတဝ်း၊ ဝင်ꩻဟဲ့ꩻ ယမ်းဒျာႏခင်ႏဖာႏ၊ တောမ်ႏကယမ်းဒါႏပဲန်၊ သေင်ႏကွို့ꩻနဝ်ꩻ ပီဝင်ꩻ၊ အထိုမ်းမွေးတဝ်း အယမ်းဒျာႏ၊ ပေါႏအယမ်းဒျာႏနဝ်ꩻ အပ်ဒျာႏ၊ ဟန်ႏရဝ်ꩻနဝ်ꩻ ဖေႏနေးကသေ ကလꩻ ဗဟုသုတနဝ်ꩻ လဝ်းနယ်ဗာႏ နဝ်ꩻသွူ။