ယူနီကုဒ်ကရိုꩻနောဝ်ꩻ

မျန်မာ(မန်း) အတာႏ ထွားသွော့ မျန်မာ ယူနီကိုဒ် ယိုဩ။

ယူနီကိုဒ်လိုဂို

ကမ္ဘာႏအလောင်းကအဝ်ႏဒျာႏ ခမ်းထီနုဲင်ႏငံႏပေါင်ꩻစွုမ်ႏ ၊ ငေါဝ်းငွါဘာႏသာႏပေါင်ꩻစွုမ်ႏဖုံႏယို ကွန်ပျူတာအလောင်းတရိုꩻတဝ်း မိုဘိုင်းဖုံးအလောင်းတရိုꩻတဝ်း ပရိုဂရမ်တရိုꩻတဝ်း မဉ်ႏတွယ်ႏလိတ်ဖြုံႏ ကွန်ပျူတာတွမ်ႏ မိုဘိုင်းဖုံးစနစ်လိတ်ဖြုံႏယို ဖေႏကသေနာႏ ကအွဉ်ႏထွော့သေꩻခါꩻဒါႏ လိတ်ဖြုံႏတဖြုံႏစီႏတွမ်ႏကုဒ်နံပါတ်အမုဲင် စနစ်ꩻနဝ်ꩻ ဟဲ့ ယူနီကုဒ် (အိန်းကလေတ်: Unicode) သွူ။

ကွန်ပျူတာတွမ်ႏမိုဘိုင်းဖုံးအကို လိတ်ဖြုံႏအက္ခရာႏဖုံႏယို အဝ်ႏသွုံꩻရိုꩻကီလဲ့ ကွယ်တွော့ꩻ ကွန်ပျူတာစနစ်ယို သေနာႏဗော့ꩻ ဂဏန်ꩻဖြုံႏလွုမ်ꩻသွူ။ ဥပမာႏ - အင်္ဂလိပ် လိတ်ဖြုံႏအက္ခရာႏ A ယို တွမ်ႏကွန်ပျူတာ ကုဒ်နံပါတ်နဝ်ꩻ U 0041 နဝ်ꩻသွူ။ နဝ်ꩻမꩻဘာႏသာႏငေါဝ်းငွါပေါင်ꩻစွုမ်ႏ၊ လိတ်ဖြုံႏပေါင်ꩻရေင်ရျာꩻအကို မဉ်ႏသိမ်ꩻမတ်ခါꩻတွမ်ႏကွန်ပျူတာနဝ်ꩻ ကွန်ပျူတာဖေႏကသေနာႏ လိတ်ဖြုံႏပေါင်ꩻရေင်ရျာꩻအကို တဗိုန်တဝ်း ကုဒ်နံပါတ်တဗာႏဗာႏစီႏနဝ်ꩻ အဝ်ႏလိုႏအွဉ်ႏထွော့လဲဉ်းနဝ်ꩻသွူ။

နုဲင်းဒျာႏနီမန်းခမ်းအတွက်ꩻတာႏ မန်းလိတ်လွုမ်ꩻတကာႏတဝ်း ကထွာဒျာႏ ခမ်းရင်ꩻသား မဲင်ꩻ ၊ စောက်ꩻ ၊ စောက်ꩻတနျာႏ ၊ ဖြဝ်ꩻ ၊ ပလောင် ၊ ပအိုဝ်ႏ ၊ စတဲင် ဘာႏသာႏငေါဝ်းငွါ အတွက်ꩻ ကုဒ်ပွိုင့် (Codepoint) လꩻခါꩻလဲဉ်းသွူ။ ပါဠိ တွမ်ႏ သက္ကတအတာႏလဲ့ ကုဒ်ပွိုင့်(codepoint)လꩻ ခါꩻလဲဉ်းနေနေသွူ။ “ယူနီကုဒ်”စနစ်အကို မန်းအက္ခရာႏတဖြုံႏစီႏ တွမ်ႏ ခမ်းရင်ꩻသား လိတ်ဖြုံႏအတွက်ꩻ ကုဒ်ပွိုင့်(codepoint)ယို တယ်ႏ U 1000 - U 109F အခါႏလယ်ႏအကို အဝ်ႏအွဉ်ႏထွော့ခါꩻဖေႏနဝ်ꩻသွူ။ နဝ်ꩻထွူမကာႏ U AA60 - U AA7 F ၊ U A9E0 - U A9FE အက္ခရာႏတသာတဲ့ ကုဒ်ပွိုင့်(codepoint)ယို အဝ်ႏတိုꩻထဲင်းဖေႏယင်းနဝ်ꩻသွူ။

ပြည်ထောင်စုဖောင့်ကရိုꩻနဝ်ꩻ

ယူနီကုဒ်ယို ဖောင့်တဗာႏမွေးတဝ်းသွူ။ ထွာဒျာႏ စနစ် စံသတ်မတ်ချက် တကာႏတဝ်း စနစ်အတွိုင်ꩻ သတ်မတ်ချက်အတွိုင်ꩻ ဖောင့်အမျိုꩻမုဲင်ꩻရိုꩻတဝ်း အွဉ်ႏထွော့နွောင်ꩻ ယူနီကုဒ်ဖောင့်နဝ်ꩻသွူ။ ပြည်ထောင်စုဖောင့်နဝ်ꩻ ယူနီကုဒ်စံနုန်ႏယို အပြဲ့အစွုမ်ႏလွောက်ꩻနာႏဒျာႏဖောင့်နဝ်ꩻသွူ။ အီႏသွုံꩻပြောင်ꩻလုဲင်ႏသွူ ယူနီကုဒ် ရိုꩻနေးနဝ်ꩻတဲ့ လိုꩻကသေအာဖောင့်နဝ်ꩻ ထွာဒျာႏ “ ပြန်ထောင်စုဖောင့် ” သွူ။

မန်းခမ်းနိုင်ႏငံႏအကိုကလား “ပြည်ထောင်စုဖောင့်”ကထန်ႏနဝ်ꩻ ကလွောက်ꩻနာႏလွေꩻဒျာႏ “ယူနီကုဒ် ၊ ယူနီကုဒ်စံနုန်ႏ ”၊ မဉ်ႏထွူ လိုꩻကသေအာဒျာႏဖောင့်နဝ်ꩻ ထွာဒျာႏ Myanmar 2 တွမ်ႏ Myanmar 3 နဝ်ꩻသွူ။ Myanmar 3 ဖောင့်ယို တွမ်ႏယူနီကုဒ်စံနုန်ႏအပြဲ့အစွုမ်ႏကုဲက်ညီႏဒျာႏရိုꩻကီလဲ့ အာႏပေꩻချက်ယဟန်ႏအဝ်ႏဆေ့ꩻဆေ့ꩻနဝ်ꩻသွူ..။Myanmar 3 အကိုဒင်ႏဖျင်သော့ꩻယင်း “ပြည်ထောင်စုဖောင့်” မꩻ အာႏပေႏချက်ကားကအဝ်ႏယို အဆင်ႏပြေႏအီ ၊ သွုံꩻနွောင်ꩻအီ ၊ ထွာလွဉ်စွဉ်ႏဖောင့် အမျိုꩻအစာꩻတဗာႏနဝ်ꩻသွူ။ ဝင်ꩻဟဲ့တဝ်း Myanmar 4 တွော့ꩻဟဲ့လုဲင်ႏစွဉ်ႏ “ ပြည်ထောင်စု ဖောင့် ”နဝ်ꩻသွူ။ ပြည်ထောင်စုဖောင့် Myanmar 3 အကိုတပါတဝ်းဒွိုန်း ခမ်းရင်ꩻသားလိတ်ဖုံႏနဝ်ꩻတဲ့ ယိုခါပါလွဉ်လဲဉ်းနဝ်သွူ။

ထွာတမုဲင်ꩻ မွော့ပြောင်ꩻဗာႏတွိုႏ ယူနီကုဒ်ဟောင်း

နီမန်းခမ်းအကို အွန်လဲင်းလောင်းကအဝ်ႏသွုံꩻဒျာႏ ဖောင့်နဝ်ꩻ ထွာဒျာႏ “ဇော်ဂျီ”(Zawgyi)ဖောင့်သွူ။ ဇော်ဂျီဖောင့်ယို သွုံꩻလွဉ်နေင်ႏပေါင်ꩻ (၁၀)လွိုလဲဉ်း ရိုꩻကီလဲ့ ဗꩻတွိုႏယိုခါ လိုꩻအဝ်ႏသွုံꩻအာကဒွိုန်းကဒျာႏ နဝ်ꩻသွူ။ နီမန်းခမ်းအကို ကလွောက်ꩻနာႏလွေꩻဒျာႏ ယူနီကုဒ် စံနုန်ႏ ဖောင့်တပေါႏတဝ်းဒွိုန်းတွင်ꩻ (Internet) အဉ်တာနဲတ်အလောင်း မန်းလိတ်ယို ဖေႏနေးကသွုံꩻလꩻတွော့ꩻ ထွင်ႏဖေႏဇော်ဂျီဖောင့်နဝ်ꩻသွူ။

ဇော်ဂျီယို အိင်တာနက် ဘရောင်ဇာ (Browser) ထောက်ခံႏဒျာႏရိုꩻကီလဲ့ ကရီးဝင်ꩻကသွုံꩻအာဒျာႏ ဂျီတော့လ်(G-Talk)လောင်းယိုသွုံꩻနွောင်ꩻ ၊ နုဲင်းကွန်ပျူတာတာႏလဲ့ တွယ်ႏလိတ်စီႏလိတ် အဆင်ႏပြေႏအီစတဲင်အာႏသန်ချက်အဝ်ႏရိုꩻကီလဲ့ အာႏပေႏချက်တဲ့အဝ်ႏအာတန်သွူ။ “နုဲင်းယိုခါ ဝင်ꩻကသွုံꩻအာဇော်ဂျီဖောင့်ယို ထွာတမုဲင်ꩻမွော့ ထွဉ်းသွုံꩻတောႏဒျာႏယူနီကုဒ်ဖောင့်ဟောင်း? ”အရီယိုတဗာႏမဉ်ႏဖြေႏဗာႏနဝ်ꩻ ဇော်ဂျီဖောင့်ယို တွယ်ႏလိတ်နဝ်ꩻအဝ်ႏထီႏဒျာႏအတွိုင်ꩻသွူ။ ဥပမာႏ - “ ခြွိုင်ႏသန်ꩻ”ယိုတဖြုံႏ မဉ်ႏတွယ်ႏစွဉ်ႏဇော်ဂျီ ဖောင့်နဝ်ꩻ တွယ်ႏရီးဗာႏ လ-ဗဲဉ် ၊ ရ - ဗဲဉ် ၊ မဉ်ႏထွူ ခ - ရီး ၊ မဉ်ႏထွူဒင်ႏဝွိုန်ꩻ ၊ ဝ - ဟွဲး ၊ ထွို့ꩻခင်ႏတလီး ၊ င - သွတ်ꩻ ၊ မုဲင်ပက်ꩻငါ ၊ သ ၊ န - သွတ်ꩻ ၊ မုဲင်ငါ တွယ်ႏဗာႏနေးနဝ်ꩻသွူ။ ဇော်ဂျီဖောင့်ကိုနဝ်ꩻ လ - ဗဲဉ် ၊ ရ - ဗဲဉ်၊ ပွုံႏစံႏအဝ်ႏသွစ်ꩻမျိုꩻအကို လွိုက်ဗာႏ သင်ꩻရာꩻ လ - ဗဲဉ် ၊ ရ - ဗဲဉ် ၊ နဝ်ꩻသွူ။ ဒင်ႏဝွိုန်ꩻ တွမ်ႏ ဝ - ဟွဲးယိုအီႏတွယ်ႏရီးဗာႏ အဗာႏမုဲင်ꩻ ၊ ယင်းတချက် - တွယ်ႏခန်းမွိုင်ꩻ “ တွို့ꩻ” ယိုတဖြုံႏနဝ်ꩻ မုဲင်လတဲ့ ပွုံႏစံႏ ကွယ်ꩻအဝ်ꩻသွံမျိုꩻအကို လွိုက်ဗာႏသင်ꩻရာꩻမုဲင်လနဝ်ꩻ သွူ။