လာဘမုနိစေႏတီႏ၊ နောင်တောင်ꩻ

နောင်တောင်ꩻ လာဘမုနိစေႏတီႏတောႏနဝ်ꩻ အဝ်ႏဒျာႏ မျန်မာခမ်းထီ ဖြဝ်ꩻခမ်းနယ်ႏအခဝ်နဝ် ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသ ဝေင်ꩻဟိုပုံꩻ အခဝ်ကွဉ်ႏထင်ꩻ ကျောင်ꩻနောင်တောင်ꩻယိုခါ ဆꩻကီကွဉ်ႏထင်ꩻ သုဲင်ꩻကောင်လောင်းတဲင် ဘုရာꩻစေႏတီႏအောဝ်ႏ ၃ ဆူႏသွူ။ စေႏတီႏသွံဆူႏယိုနဝ်ꩻ အောဝ်ႏစဲဉ်ႏနဝ်ထင်ꩻဝင်ꩻသွူ၊ အထာႏဝ အဆူႏတန်နဝ်ꩻ တဲႏအွဉ်ရီးသွတ်ꩻတဲင် ထွာမူလပထမစေႏတီႏ၊ ဖဲ့ꩻနဝ်တဆူꩻနဝ်ꩻ တဲယ်ႏဆုဲင်တဲင် ထွာဒုတိယစေႏတီႏ၊ ဖဲ့ꩻထင်ꩻနဝ်ꩻတယ်ႏဆုဲင်ꩻတဲင်ထွာ တတိယ စေႏတီႏသွူ၊ စေႏတီးယိုသွံဆူႏ ကဟဲဒါႏ လာဘမုနိစေႏတီႏနဲင်းယိုနဝ်ꩻ ဗွေႏဗွန်နောင်တောင်ꩻယိုခါ ဖန်ဖေႏဒျာႏသွူ၊ ခါးလာႏဝွေꩻဗွေႏကတယ်ႏ နောင်တောင်ꩻပရဟိတကျောင်ꩻယိုနဝ်ꩻ စေႏတီးမဉ်ꩻနဝ်ꩻ အောဝ်ႏသုဲင်ꩻကောင်လောင်းတဲင် ဖန်ဒျာႏ စေႏတီႏသုဲင်ကောင် နဲင်းနဝ်ꩻသွူ။

စေႏတီးအထဝယိုတဆူႏနဝ်ꩻ ပါမုဲင်ꩻတယ်ႏလူႏသေꩻခါလဲ့ꩻ ကွပ်တသေထွꩻတဝ်းတဲင် ပထမ စေႏတီႏသမဲင်ꩻနဝ်ꩻ သေထွꩻစဲင်းလို့ꩻတောဝ်းသွူ၊ ကွယ်ႏတွော့ꩻ စေႏတီႏလောင်း ကအောဝ်းဒါႏ ဟိန်ႏခေါင်ꩻလောင်ꩻပေႏလောင်းနဝ်ꩻ အောဝ်ႏတဲမ်ႏခါꩻ ခုနေင်ႏနဝ်ꩻထွာဒျာႏ တယ်ႏစလွေꩻ ၁၂၆၁ ဒဲဉ်သီႏလာဗွေ အောဝ်ႏတဲမ်းခါꩻနုဲင်းနဝ်ꩻတဲင်တွော့ꩻ မဉ်ႏထွားနဲင်းခုနေင်ႏယိုနဝ်ꩻ ညလဲဉ်းသွူ နေင်ႏပေါင်ꩻ တရျာꩻလွိုသွူ။ ကတယ်ႏဗာႏ စေႏတီး ဒုတိယ တဆူႏနဝ်ꩻ ပွိုင်ႏလဲင်ႏစခါ လိုꩻဖြားတယ်ႏသေꩻခါꩻ စေႏတီႏအောဝ်ႏတဆူႏတဲင် စေႏတီႏကထွိုင်ႏကုဲင်ပြင်ꩻတွော့ꩻ နေင်ႏ ၁၃၄၂ ဗာႏ ဝါႏဆိုႏလာကိုနဝ်ꩻ ဗွေႏဆရာတောႏ ကျောင်ꩻနောင်တောင်ꩻတွမ်ႏ ဗွေႏဆရာႏတောႏ ကျောင်ꩻဟိုနာꩻ ဘဒ္ဒန္တနန္ဒဝံသ အွဉ်တယ်ႏကော်ႏဖေႏယင်ႏစေႏတီႏ ဒုတိယ တစ်ဆူႏသွူ၊ စေႏတီႏထျꩻသောင်ယို ဖေႏကထွာ သာႏသနာႏဟံႏတဲင် ၁၃၄၉ ဗွေႏဆရာႏတော်ႏ ဘဒ္ဒန္တနန္ဒဝံသ ကျွထင်ႏဆို့ꩻဝါႏ သတင်ꩻသုံꩻလွေꩻဖရာꩻကောင်လောင်းသွူ။

ဖဲ့ꩻထင်ꩻတဆူႏ ဂျိုဟ်ႏ ၈ ခွင်ႏစေႏတီႏနဝ်ꩻ ဗွေႏဗွန်နောင်တောင်ꩻ အွဉ်တယ်ႏလူႏဒျာႏသွူ၊ စေႏတီႏအလူႏတကာႏနဝ်ꩻထွာဒျာႏ ဝေင်ꩻနမ်းစင် ဦးစိုင်းလူ+ ဒေါ်နန်းဆွမ်း သီႏခံႏထွာဖေႏအလူႏတကာႏ အထျꩻတဲင် ပါတွမ်ႏ ၇ မွူးနီꩻသာꩻ အမျာꩻဖုံႏသွူ။