ဟော်ꩻအာအာသွော့လိတ်

ထာꩻလိမ္မာႏ အောဝ်ႏဒျာႏလိတ်ကိုတဲင် ဟော်ꩻအာအာသွော့နဝ်ꩻမꩻ ထာꩻသေဉာဏ်ႏပညာႏ တိုꩻတက်ဗွေလꩻသွူ။ အမျိုꩻသာꩻ လိတ်လုဲင်ꩻယေန်ႏငဲးမုꩻဖုံႏယို ဖေႏအာႏလွသွော့ဝင်ꩻ တွမ်ႏရွဉ်အာႏ၊ တွမ်ႏနမ်းအာႏ၊ တွမ်ႏအကျံႏဉာဏ်ႏအာႏ အမျိုꩻမျိုꩻဖုံႏသွူနော၊ တွမ်ႏရွဉ်အာႏကရိုꩻနောဝ်ꩻ နာꩻရွဉ်စူကို မဉ်ႏအောဝ်ႏတရေင်လဲ့ တစွဲးတာႏ၊ မဉ်ႏအောဝ်ႏ တစွဲးလဲ့ တခန်တာႏ၊ မဉ်ႏအောဝ်ႏတခန်လဲ့ တဗီႏတာႏပေႏငါ၊ မဉ်ႏဖေႏအာႏ ဖြေꩻထွားနောဝ်ꩻ ယံကျငါႏလဲဉ်းသွူ။ တွမ်ႏနမ်းအာႏကရိုꩻနောဝ်ꩻ မာꩻကို ခွုမ်ကို ဆောင်ႏရွက်ကို ကူႏညီႏကို တုတ်ꩻဖြေ့ꩻလီကို၊ အီလွေꩻသဲင်ꩻကို၊ ဖြေꩻစာကို၊ ဆောႏအော်ꩻကိုကစ ကားတဲင်ထာꩻမာꩻဖုံႏသွူ။ တွမ်ႏအကျံႏဉာဏ်ႏအာႏကရိုꩻနောဝ်ꩻ နင်းဟွူလိတ်လုဲင်ꩻ အမျိုꩻမျိုꩻ ဟော်ꩻခရာႏ ထွားခရာႏ ဖေႏကအောဝ်ႏလွိုင်ႏအာအာနောဝ်ꩻ နမ်းဒျာႏလဲ့ ကားတဲင်ကသေကဒါႏ ကယူႏလꩻဟူသမျ တဲမ်းစန်ႏထေထွတ်တွဲႏနျꩻ၊ ဝင်ꩻလင်ယိုလဲ့ နွန်ႏဆွာႏ တဲက်တွန်ꩻ နိုꩻဆောႏတမာ ထွဉ်ႏပူႏဇောႏ ဖြေꩻဟော်ꩻထွားကစဖုံႏနောဝ်ꩻထွူ။

ပသွစ်ꩻပေႏ ဖြွမ်းဝင်ꩻအကျောင်ꩻ

ပသွစ်ꩻပေႏနောဝ်ꩻ အမွူးတွာရွံဟူ၊ အုံဗူႏဖြွမ်းဝင်ꩻ ပဉ်စွိုꩻစွိုꩻ၊ ညီႏဝင်ꩻသꩻသွိုꩻ သွꩻဖုံႏအာ၊ သွꩻချင်ꩻလဲ့ခါ ရန်ႏသူႏတဝ်း၊ ခေ့ꩻယာတွမ်ႏစောဝ်း သꩻညီႏမျ၊ အချင်ꩻရက်လွ မေတ္တာႏရောက်၊ ရန်ႏသူႏစောင်ꩻသျောက် ယံချံꩻသာႏ၊ သွꩻခွအတာႏ ရဲဆီꩻကို၊ ထာꩻသားလင်ယို မညိဉ်ꩻဆယ်ꩻ၊ အုံဒွါႏတီႏမယ်ꩻ တွမ်ႏသွꩻဖက်၊ ဝင်ꩻမဉ်ႏနိစ္စက် ဖမ်းဝင်ꩻတဲတ်ꩻ၊ ဖြွမ်းဝင်ꩻတလဲတ်ꩻ ရန်ႏသူႏအောင်ႏ၊ လမ်းပါႏတယ်ႏထောင်ႏ နေးသေင်ႏစီႏ၊ မာꩻရီးတောဝ်းဝင်ꩻ အုံဒွါႏရင်ꩻ၊ အဝင်ꩻရန်ႏလဲ့ ငမ်းတောဝ်းတဲ့၊ နီယိုခါလဲ့ ဥပမာႏ၊ နေးထွာဆရာႏ ပသွစ်ꩻမျိုꩻ၊ နမ်းတာႏဝင်ꩻအကျိုꩻ ယံကထွာ၊ အသွစ်ꩻနောဝ်ꩻခါ မဉ်ႏစိမ်ႏဗူႏ၊ တွာရွံꩻစူတူႏ တဖူႏလွုမ်း၊ နီလိုꩻအောဝ်ႏငမ်း လွင်းထိုꩻဗာႏ၊ ယံထွာဆရာႏ ကိဉ်ꩻစာꩻဗဲင်း၊ နေးဉာဏ်ႏထဲမ်ထဲင်း လွောင်ႏဗူႏရေꩻ၊ တလူꩻကလွေꩻ ယံသွတ်ꩻအီ၊ ပေႏတန်နာꩻနီ ပအိုဝ်ႏဖုံႏ၊ အုံညီꩻအောဝ်ႏပြုံႏ ယံညီႏဝင်ꩻ၊ နီယိုလိုꩻချင်ꩻ မေတ္တာႏရောက်၊ နောဝ်ထင်ꩻတသျောက် တွို့ꩻတွမ်ႏကွဉ်ႏ၊ ယံဖေႏထောင်စွဉ်ႏ တဖူꩻမꩻ၊ တဖူꩻဖြယ်ဖ ယံလွေꩻပုဲင်ႏ၊ လိုꩻခိုကွန်ႏစုဲင်ႏ ပအိုဝ်ႏအာ၊ နီယိုလဲင်ႏခါ ဝင်ꩻသွင်ꩻပေါ်ꩻ၊ တရာꩻသဖော်ꩻ မအွဉ်ႏဝင်ꩻ၊ အွဉ်ႏဒွါႏအထန်ႏ သွင်ꩻသော့ꩻတောဝ်း၊ ယံသွင်ꩻညီꩻရောဝ်း လိုႏကျိုꩻစာꩻ၊ နီယိုစွုမ်ႏဖြာꩻ သတိဆောင်ႏ၊ ယံဖေႏကအောင်ႏ တွိုႏရန်းထို၊ ပအိုဝ်ႏမျိုꩻယို အဆင်းယံကထင်ႏ၊ ကျိုꩻစာꩻထွုမ်ႏဉာဏ်ႏ သိပ္ပသွဉ်၊ ယံဖေႏကဒွဉ် ခေါဝ်းဝင်ꩻဖုံႏ၊ အုံညီꩻအုံပြုံႏ တွိုင်ႏပင်ႏဖက်၊ အထိန်ꩻအမတ် ရန်းယံဗွိုန်၊ ယံဖေႏတွာသွိုန် စီꩻဝွေꩻညီႏ၊ ရန်ႏကွုန်ႏ တောင်ႏကီꩻ ခုံႏရန်းထို၊ ထင်ႏတွိုႏနီယို အချင်ꩻချင်ꩻ၊ မရက်လွဝင်ꩻ နုဲင်းပသွစ်ꩻ၊ လီလာလယ်ႏစွစ်ꩻ နိစ္စထဲင်း၊ သꩻလဲင်ꩻကနဲင်း စွေးကိဉ်ꩻစာꩻ၊ နီယိုနောဝ်ꩻရာꩻ ယံထွားနုဲင်း၊ လိတ်ယိုကခြုဲင်း ပသွစ်ꩻပေႏ၊ ဥပမာႏဖေႏ တင်ꩻလုဲင်ဟွေး။