အဇိတထေရ်ႏ

အဇိတထေရ်ႏနဝ်ꩻ သာဝတ္ထိခမ်း ကောသလခွန်တန် အဆရာႏ ကထွာဒါႏ ပရောဟိတ်ပုဏ္ဏာꩻ အပိုနဝ်ꩻသွူ။ အဇိထေရ်ႏ ကလွူးဖွာꩻ အခိန်ႏကာႏလ သမယအယံꩻတွင်ꩻနဝ်ꩻ ဗွေႏစဝ်းမျတ်ဘုရာꩻဂေါတမ တပွင်ꩻတဝ်းဒွိုန်းသွူ။

ဝွေꩻနဝ်ꩻ အခိန်ႏအရွယ်ႏထွိုင်ႏလꩻ ခိုဗင်ႏတဲင် အီႏတောႏလမ်းတောႏပါႏ လွူးနမ်းအမျိုꩻ သꩻတဝင်ႏစာꩻတဝ်းတဲင် ဗုဲင်ခန်းရသေ့ꩻပေႏ ဗာဝရီရသေ့ꩻထျꩻနဝ်ꩻသွူ။ ဗာဝရီရသေ့ꩻနဝ်ꩻ လိုꩻခိုမျတ်လက္ခဏာႏ ဗွေႏပြဲ့ꩻစွုံႏထွူတကာႏတဝ်း သံးဒါႏလျင်ႏပါ ပေႏတင်ႏသွံဖွုံႏ တွမ်ႏ ကျမ်ꩻဂန်ႏ အမျိုꩻမျိုꩻဖုံႏတဲင် အိန္ဒိယတခမ်းလွုမ်းကအဝ်ႏအုံလွဒါႏ ခွန်သီး ခမ်းသားသီးဖုံႏ ကားကအဝ်ႏ ရိုႏသေႏရောင်လွဗာႏ ဝွေꩻနဝ်ꩻသွူ။ ဝွေꩻတပဲ့ꩻ ရသေ့ꩻဖုံႏလဲ့ အဝ်ႏအာတန်နဝ်ꩻသွူ။

နဝ်ꩻအခိန်ႏတွင်ꩻ ဂေါတမ စဝ်းမျတ် နီဗွေႏဘုရာꩻ ပွင်ꩻလွဉ်ခန်း နီလိုခမ်းနဝ်ꩻသွူ။ ဗာဝရီရသေ့ꩻဖြားနဝ်ꩻ လောကခမ်းကို ထီႏသေငါꩻဒါႏ သစ္စာႏလစ်ꩻပါꩻ ဗွေႏမျတ်ဘုရာꩻ ပွင်ꩻလွဉ်လဲဉ်းအကျောင်ꩻ ကထွိုင်ႏဟွိုန်တွော့ꩻ မွေးဟောင်းမွေးတဝ်းဟောင်း မဲဉ်သေစဲင်း အချင်ꩻအရာꩻတဲင် ထွဉ်ႏခန်း အတပဲ့ꩻ အဇိတရသေ့ꩻပေႏ လွေꩻပွေါးထွားချောင်ꩻ  နီဗွေႏမျတ်ဘုရာꩻနဝ်ꩻသွူ။

အဇိတရသေ့ꩻလဲ့ တွမ်ႏ သွꩻရသေ့ꩻစွိုꩻဖုံႏတဲင်  ဗွေႏမျတ်ဘုရာꩻနဝ်ꩻ တွမ်ႏ မဟာႏပုရိသ လက္ခဏာႏတောႏနိမိတ်ဖုံႏ ဗွေပြဲ့ꩻစွုံႏဒါႏ ဘုရာꩻစဲစ်မွေးနေဟောင်း ထွားစဲစ်ဆေꩻခန်းနဝ်ꩻသွူ။ ဘုရာꩻအစဲစ်အမဲဉ်ႏ မွေးဒျာႏအကျောင်ꩻ ကထွိုင်ႏသေတဲင် တရီထန်ႏတဝ်းတွမ်ႏဖြောင်း ရီခန်းဒျာႏသꩻကို နီဗွေႏမျတ်ဘုရာꩻလဲ့ ခွုင်းဝွေꩻဗွေႏကရီဒါႏ ပုစ္ဆာႏကားကအဝ်ႏ ဆွုံꩻဖျတ်ဖြေႏချာဖေႏခန်းသꩻကိုနဝ်ꩻသွူ။

အဇိတရသေ့ꩻလဲ့ တွမ်ႏ သဒ္ဓါႏတရာꩻ ကေႏနပ်အာႏရꩻကေႏညိုႏငါႏ ဗွေႏစောဝ်းမျတ်ဘုရာꩻတဲင် ဗုဲင်ရဟန်ꩻတွော့ꩻ နွို့ခန်း ဗွေႏမျတ်ဘုရာꩻ သာႏသနာႏတောႏကိုနဝ်ꩻသွူ။ ကထွိုင်ႏထွာရဟန်ꩻတဲင် မဉ်ꩻကျောႏလꩻခန်း အဇိတထေရ်ႏ နုဲင်းနဝ်ꩻသွူ။

ကထွိုင်ႏထွာ ရဟန်ꩻဘဝတဲင် လျောက်လဝ်းကွီခန်း လွောက်ꩻဖက်ရာꩻ ကမ္မဋ္ဌာန်ꩻတရာꩻ ဗွေႏမျတ်ဘုရာꩻထျꩻထွူ လွေꩻကံကျင်ꩻခန်း လိုယေန်ရာꩻအရပ် အားထုတ်(ကံကျင်ꩻ) ဝိပဿနာႏတရာꩻ တညတဝ်းအခိန်ႏခါႏ ထွာလꩻခန်း ရဟန္တာႏမျတ်နဝ်ꩻသွူ။